Mose I, 35

Mawu gbaa Yakob ngɛ Betel

1 # Mose I, 28.11-17 Mawu de Yakob ke, “Yaa Betel esɔ, nɛ o ya hi lejɛ ɔ. Yaa ma bɔ sami la tɛ ngɛ lejɛ ɔ ha imi, Mawu ɔ nɛ i je ye he kpo ngɔ tsɔɔ mo, benɛ o tu o nyɛmi Esau nya fo ɔ.”

2Kɛkɛ nɛ Yakob de e yi ɔmɛ, kɛ e bimɛ ɔmɛ, kɛ nɔ tsuaa nɔ nɛ kɛ lɛ ngɛ ɔ ke, “Nyɛ jé ma se mawu ɔmɛ nɛ ngɛ nyɛ dɛ ɔ ngɔ pue he; nyɛɛ tsukɔ nyɛ he, nɛ nyɛɛ wo tadehi nɛ a he tsɔ. 3Wa ngɛ hiɛ ɔ jee kɛ yaa Betel. Ma ma bɔ sami la tɛ ngɛ lejɛ ɔ ha Mawu ɔ nɛ piɛ ye he ngɛ ye amanehlu be ɔ mi, nɛ e kɛ mi ngɛ kɛ ba si mwɔnɛ nɛ ɔ.” 4A ngɔ a ma se mawu ɔmɛ tsuo nɛ ngɛ a dɛ ɔ, kɛ a tue nya ní ɔmɛ ba ha Yakob; nɛ Yakob pu ngɛ tso ngua a sisi ngɛ Shekem kasa nya.

5Benɛ Yakob kɛ e yi ɔmɛ, e bimɛ ɔmɛ, kɛ e we bi ɔmɛ hia kɛ yaa a, sawale nu ni ɔmɛ ngɛ ma amɛ nɛ bɔle mɛ ɔ a mi; lɔ ɔ he ɔ, a nyɛɛ we a se. 6Yakob kɛ e we bi ɔmɛ tsuo ba su Luz, ngɛ Kanaan zugba a nɔ. Ma nɛ ɔ biɛ kpa ji Betel. 7Yakob ma bɔ sami la tɛ ngɛ lejɛ ɔ, nɛ e kɛ Betel Mawu ɔ biɛ wo lɛ; ejakaa lejɛ ɔ ji he nɛ Mawu je e he kpo ngɔ tsɔɔ lɛ ngɛ, benɛ e tu e nyɛmi Esau nya fo ɔ. 8Bimɛanyɛ ɔ nɛ hyɛ Rebeka ngɛ e jokuɛ mi, nɛ a tsɛɛ lɛ Debora a ba gbo, nɛ a pu lɛ ngɛ tso ngua a sisi, ngɛ Betel leneyi je. Enɛ ɔ he je ɔ, a wo lejɛ ɔ biɛ ke, “Tso ngua he nɛ a woɔ ya ngɛ.”

9Benɛ Yakob je Mesopotamia kɛ ba a, Mawu je e he kpo ngɔ tsɔɔ lɛ ekohu, nɛ e gbaa lɛ. 10#Mose I, 32.28 Mawu de lɛ ke, “O biɛ ji Yakob; se kɛ je mwɔnɛ ɔ kɛ yaa a, a be mo tsɛe ja hu; a ma tsɛ mo Israel.” Kɛkɛ nɛ Mawu wo lɛ biɛ ke Israel. 11#Mose I, 17.4-8 Jehanɛ Mawu de lɛ ke, “Imi ji Mawu Ope ɔ nɛ; mo fɔ bimɛ babauu. Niinɛ, je mahi kɛ matsɛmɛ maa je o mi. 12Zugba a nɛ i ngɔ kɛ ha Abraham kɛ Isak ɔ, i kɛ ma ha mo kɛ o nina.” 13Kɛkɛ nɛ Mawu je e he ngɛ he nɛ e kɛ lɛ tu munyu ngɛ ɔ. 14#Mose I, 28.18-19 Yakob kɛ kaimi tɛ ko ma si ngɛ he nɛ Mawu kɛ lɛ ba tu munyu ngɛ ɔ. E plɛ wai kɛ oliv nu ngɔ pue nɔ, nɛ e kɛ pee tɛ ɔ klɔuklɔu kɛ ha Mawu. 15E wo lejɛ ɔ biɛ ke Betel; e sisi ji Mawu we.

Rahel gbenɔ

16Yakob kɛ e yi ɔmɛ, kɛ e bimɛ ɔmɛ hia kɛ je Betel, nɛ a pue blɔ. Benɛ e piɛ bɔɔ nɛ a maa su Efrat ɔ, Rahel fɔmi be su, nɛ e nu kɔɔmi nɛ nya wa. 17Benɛ e fɔmi ɔ he ba wa a, fɔlɔyo ɔ nɛ ngɛ lɛ hyɛe ɔ de lɛ ke, “Rahel, koo ye gbeye; o fɔ binyumu ekohu!” 18Se Rahel miɔ nɛ e ma gbo. Loko e ma e nya a, e wo bi ɔ nɛ e fɔ ɔ ke Benoni;#35.18 Benoni: Ngɛ Hebri gbi mi ɔ, biɛ nɛ ɔ sisi ji “ye aywilɛho mi bi.” se e tsɛ lɛɛ biɛ nɛ e wo lɛ ji Benyamin.#35.18 Benyamin: Ngɛ Hebri gbi mi ɔ, biɛ nɛ ɔ sisi ji “siade bi.”

19Benɛ Rahel gbo ɔ, a pu lɛ ngɛ blɔ nɛ yaa Efrat ɔ he. Amlɔ nɛ ɔ lɛɛ a tsɛɛ Efrat ma a ke Betlehem. 20Yakob kɛ kaimi tɛ ma Rahel yɔkɔ ɔ nɔ, nɛ tɛ ɔ ngɛ lejɛ ɔ kɛ ba si mwɔnɛ ɔ. 21Yakob, nɛ e biɛ tsake pee Israel ɔ, tsa e nyɛɛmi ɔ nɔ, nɛ e ya ma e bo tsu ɔ ngɛ Eder mɔ ɔ se.

Yakob binyumu ɔmɛ

(Kronika I, 2.1-2)

22 # Mose I, 49.4 Benɛ Yakob ngɛ jamɛ a zugba a nɔ ɔ, Ruben kɛ Bilha, e tsɛ pla amɛ a ti nɔ kake ɔ ya na bɔmi; nɛ Yakob nu he.

Yakob ngɛ binyumuhi nyɔngma kɛ enyɔ. 23Lea binyumuhi ji nɛ ɔmɛ nɛ: Ruben (Yakob bitɛte), Simeon, Levi, Yuda, Isakar, kɛ Zebulun. 24Rahel binyumuhi ji Yosef kɛ Benyamin. 25Rahel mawayo Bilha binyumuhi ji Dan kɛ Naftali. 26Lea mawayo Zilpa binyumuhi ji Gad kɛ Asher. A fɔ bimɛ nɛ ɔmɛ ha Yakob ngɛ Mesopotamia.

Isak gbenɔ

27 # Mose I, 13.18 Yakob ba e tsɛ Isak ngɔ ngɛ Mamre, he nɛ Abraham kɛ Isak ba to nubwɔ ngɛ ɔ. Mamre biɛ kpa ji Kiriat Arba, aloo Hebron. 28Isak ye jeha lafa kɛ nyingmi kpaanyɔ, 29nɛ e gbo benɛ e bwɔ kotokoto; nɛ e bimɛ Esau kɛ Yakob pu lɛ.

Currently Selected:

Mose I, 35: Dangme

Highlight

Copy