Mose I, 34
34
Nɔ ko ya tua Dina
1Ligbi ko ɔ, Lea biyo ɔ nɛ e kɛ Yakob fɔ, nɛ a tsɛɛ lɛ Dina a je kpo konɛ e ya slaa Kanaan yi ɔmɛ ekomɛ. 2Benɛ Hamor binyumu Shekem na Dina a, e nu lɛ pani nya nɛ e kɛ lɛ hwɔ. Hamor nɛ ɔ, Hiv no ji lɛ, nɛ lɛ ji jamɛ a zugba a nɔ yelɔ. 3Shekem na Dina he bua jɔmi; e suɔ lɛ saminya, nɛ e kɛ lɛ sɛɛ ni. 4Pee se ɔ, Shekem de e tsɛ Hamor ke, “Yaa bi yiheyo nɛ ɔ si ha mi nɛ ma ngɔ lɛ.”
5Yakob nu kaa nɔ ko ya pee e biyo Dina basabasa; se akɛnɛ e binyumu ɔmɛ kɛ e lohwe ɔmɛ ho nga nɔ ya he je ɔ, e de we nɔ́ ko kɛ ya si a kpale kɛ ba. 6Shekem tsɛ Hamor ba Yakob ngɔ nɛ e kɛ lɛ ba sɛɛ ní. 7Jamɛ a be ɔ mi nɔuu ɔ, Yakob binyumu ɔmɛ hu je nga nɔ kɛ ba. Benɛ a nu sane nɛ ba a, a mi mi fu wawɛɛ nitsɛ kaa Shekem tsu zo ní kaa kikɛ nɛ ɔ ngɛ Israel; kaa e nu Yakob biyo pani nya, nɛ e kɛ lɛ hwɔ. Nɔ́ nɛ Shekem pee nɛ ɔ, a hiɔ̃. 8Hamor de Yakob ke, “Ye binyumu Shekem suɔ kaa e kɛ o biyo ɔ maa hi si. I kpa mo pɛɛ nɛ o kɛ o biyo ɔ nɛ ha lɛ nɛ e ngɔ. 9Nyɛ ha nɛ wa ha wa he gba; nyɛɛ kɛ nyɛ biyi ɔmɛ ha wɔ, konɛ nyɛ hu nyɛɛ ngɔ wa biyi ɔmɛ. 10Ke nyɛ kplɛɛ ja a, waa kɛ nyɛ maa hi si. Wa zugba a fɔɔ si ha nyɛ; nyɛɛ kɛ wɔ maa hi si faa, nyɛ maa ye jua, nɛ nyɛ ma na nyɛ nitsɛmɛ nyɛ weto ní.”
11Shekem hu de Dina tsɛ kɛ e nyɛmimɛ ɔmɛ ke, “I kpa nyɛ pɛɛ nɛ nyɛɛ ngɔ ye tɔmi ɔ ngɔ pa mi; nɔ́ tsuaa nɔ́ nɛ nyɛ bi mi ɔ, ma ha nyɛ. 12Nyɛɛ tsɔɔ mi nike ní nɛ nyɛ ngɛ hlae, konɛ yo se ní ɔ hu nyɛɛ wo he jua bɔ nɛ nyɛ suɔ. Nyɛɛ ngɔ yiheyo ɔ ngɔ ha mi nɛ ma ngɔ; nɔ́ tsuaa nɔ́ nɛ nyɛ ma bi mi ɔ, ma ha nyɛ.”
13Se akɛnɛ Shekem ble Dina, Yakob binyumu ɔmɛ a nyɛmiyo ɔ he je ɔ, mɛ hu a sisi Shekem kɛ e tsɛ Hamor ɔ. 14A de mɛ ke, “Wa be nyɛe maa pee ja kaa waa kɛ wa nyɛmiyo ma ha mɔmlɔtɔtsɛ; ke wa pee ja kɛkɛ wa pue wa hɛ mi si. 15Ke nyɛ maa pee kaa bɔ nɛ wa ngɛ ɔ, nɛ nyɛ maa po nyɛ nyumu ɔmɛ tsuo ɔ, lɛɛ wa maa kplɛɛ nɔ́ nɛ nyɛ de ɔ nɔ. 16Ke nyɛ pee ja lɛɛ waa kɛ wa biyi ɔmɛ ma ha nyɛ, nɛ wɔ hu wa maa ngɔ nyɛ biyi ɔmɛ. Waa kɛ nyɛ maa hi si, nɛ wa maa pee ma kake. 17Se ke nyɛ kplɛɛ we kaa a po nyɛ ɔ, lɛɛ wa maa ngɔ wa nyɛmiyo ɔ kɛ ho.”
18Hamor kɛ e bi Shekem kplɛɛ kaa nɔ́ nɛ Yakob binyumu ɔmɛ bi ɔ, a maa pee. 19E yi be ko nɛ Shekem ya pee nɔ́ nɛ a de lɛ ke e sa kaa e pee ɔ; ejakaa e suɔ Yakob biyo ɔ saminya. Jehanɛ se hu, a buu lɛ wawɛɛ nitsɛ ngɛ e tsɛ weku li ɔmɛ a kpɛti.
20Hamor kɛ e bi Shekem ya kpe he ɔ, ngɛ maa agbo ɔ nya, nɛ a kɛ ma mi bi ɔmɛ ya tu munyu, nɛ a de mɛ ke, 21“Kikɛmɛ a nimli nɛ ɔmɛ kɛ wɔ ngɛ saminya; lɔ ɔ he ɔ, nyɛ ha nɛ a hi zugba a nɔ nɛ a ye jua, ejakaa zugba a kle ha mɛ bɔ nɛ sa. Nyɛ ha nɛ waa ngɔ a biyi ɔmɛ, nɛ mɛ hu a ngɔ wa biyi ɔmɛ. 22Ni ɔmɛ kplɛɛ kaa a kɛ wɔ maa hi si nɛ a kɛ wɔ maa pee ma kake, ke ji kaa wa maa po wa kpɛti nyumu ɔmɛ tsuo, kaa bɔ nɛ a po mɛ ɔ. 23Ke wa pee ja a, a lohwe ɔmɛ, kɛ a nɔ́ tsuaa nɔ́ ma ba pee wa nɔ. Enɛ ɔ he je ɔ, nyɛ ha nɛ waa kplɛɛ ha mɛ kɛkɛ, konɛ a kɛ wɔ nɛ hi si.” 24Ma mi bi ɔmɛ tsuo nɛ ya bua a he nya ngɛ ma a agbo ɔ nya a, kplɛɛ nɔ́ nɛ Hamor kɛ e bi Shekem de ɔ nɔ, nɛ a po nyumu ɔmɛ tsuo.
25Ligbi etɛne ɔ nɔ, benɛ pa a ngɛ ni ɔmɛ yee wawɛɛ ɔ, Yakob binyumuhi enyɔ, Simeon kɛ Levi ngɔ a klaate ɔmɛ nɛ a ya tua ma a tlukaa, nɛ a gbe nyumu ɔmɛ tsuo. Simeon kɛ Levi nɛ ɔ, Dina nyɛbimɛ ji mɛ. 26A gbe Hamor kɛ e bi Shekem hulɔ, nɛ a ya ngɔ Dina ngɛ Shekem we ɔ mi kɛ je. 27Jehanɛ Yakob binyumu ɔmɛ tsuo ya sɛ ma a mi, nɛ a ha ní ngɛ a nyɛmiyo ɔ nɛ a pue e hɛ mi si ɔ he. 28A nuu to, kɛ na, kɛ teji, nɛ a muɔ nɔ́ tsuaa nɔ́ nɛ ngɛ ma a mi, kɛ nɔ́ tsuaa nɔ́ nɛ ngɛ nga nɔ kɛ je. 29A ngɔ nɔ́ tsuaa nɔ́ nɛ he jua wa. A nuu yihi kɛ jokuɛwi tsuo, nɛ a ha ní ngɛ wehi a mi.
30Yakob de Simeon kɛ Levi ke, “Nyɛɛ kɛ mi wo amanehlu mi pɛ; jehanɛ lɛɛ Kanaan, kɛ Periz bi ɔmɛ, kɛ nɔ tsuaa nɔ nɛ ngɛ zugba a nɔ ɔ maa nyɛ mi. I be we bi babauu; ke nimli nɛ ɔmɛ tsuo bla ngɔ wo ye he, nɛ a ba tua mi ɔ, a ma kpata wɔ tsuo wa hɛ mi.”
31Se a he nɔ ke, “Anɛ e sa kaa waa ngmɛ blɔ nɛ a pee wa nyɛmiyo ɔ kaa a peeɔ yo yaholɔ lo?”
Currently Selected:
Mose I, 34: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
