Mose I, 29
29
Yakob ya su Laban we ɔ mi
1Yakob tsa e blɔ hiami ɔ nɔ kɛ ya si e ya su zugba a nɛ ngɛ beleku je ɔ nɔ. 2Tlukaa a, e ya pã vu ko nɔ ngɛ nga a nɔ, nɛ to kuu etɛ hwɔɔ si kɛ bɔle vu ɔ. Jamɛ a vu ɔ mi nɛ a yɛɛ nyu ngɛ kɛ haa tohi nɛ a nuɔ, nɛ tɛ agbo ko ngɛ vu ɔ nya. 3Ke to ɔmɛ tsuo ba bua a he nya ngɛ lejɛ ɔ, to hyɛli ɔmɛ ma kpɛne tɛ ɔ kɛ je vu ɔ nya nɛ a ma ha to ɔmɛ nyu. Kɛkɛ ɔ, a ma kpɛne tɛ ɔ kɛ ya to e blɔ he ekohu.
4Yakob bi to hyɛli ɔmɛ ke, “Ye nyɛmimɛ, jije nyɛ je?”
A he nɔ ke, “Wa je Haran.”
5E bi mɛ ekohu ke, “Anɛ nyɛ le Nahor binyumu Laban lo?”
A he nɔ ke, “Ee, wa le lɛ.”
6E pa bi mɛ ke, “E ngɛ saminya lo?”
A he nɔ ke, “Ee, e ngɛ saminya. Hyɛ, e biyo Rahel nɛ kpaka e to ɔmɛ kɛ ma a nɛ!”
7Yakob de mɛ ke, “Je jɔɛ lolo; e sui be nɛ a maa wo lohwe ɔmɛ tsu mi. Nyɛ ha to ɔmɛ nyu nɛ a nu, nɛ nyɛɛ kpale mɛ kɛ ho nɛ a ya ye ní.”
8To hyɛli ɔmɛ he nɔ ke, “Dɛbi, wa be nyɛe maa pee ja, ja to ɔmɛ tsuo ba bua a he nya ngɛ hiɛ ɔ, nɛ a kpɛne tɛ ɔ kɛ je vu ɔ nya, loko wa ma ha mɛ nyu.”
9Benɛ Yakob kɛ mɛ ngɛ munyu tue kɛ mwɔɔ ɔ, Rahel ba su lejɛ ɔ kɛ e tsɛ to ɔmɛ; ejakaa lɛ ji nɔ nɛ hyɛɛ to ɔmɛ. 10Benɛ Yakob na Rahel kɛ e tsɛko Laban to ɔmɛ ɔ, e ya kpɛne tɛ ɔ kɛ je vu ɔ nya nɛ e ha to ɔmɛ nyu. 11Lɔ ɔ se ɔ, e fua Rahel atuu, nɛ e kɛ bua jɔmi fo ya pue e nɔ. 12E de Rahel ke, “Ye nyɛmi ji mo; o tsɛ nyɛmiyo Rebeka a, e bi ji mi.”
Rahel tu fo kɛ ho nɛ e ya bɔ e tsɛ amaniɛ. 13Benɛ Laban nu e wɔfase Yakob he ɔ, e tu fo ya kpee lɛ, nɛ e pee lɛ atuu; e fiɔ e nya he, nɛ e kɛ lɛ ba we mi. Benɛ Yakob bɔ Laban nɔ́ tsuaa nɔ́ nɛ ba a, 14Laban de ke, “Niinɛ, imi nitsɛ ye nyɛmi tutuutu ji mo!” Yakob hi Laban ngɔ hlami kake.
Yakob sɔmɔ Laban
15Pee se ɔ, Laban de Yakob ke, “E ngɛ mi kaa o weku no ji mi lɛɛ, se e sɛ kaa o tsuɔ ní kɛ haa mi yaka. Tsɔɔ mi hiɔwo nɛ o ngɛ hlae.” 16Laban ngɛ biyihi enyɔ; a tsɛɛ nɔkɔtɔma a ke Lea, nɛ e senɔ ɔ biɛ ji Rahel. 17Lea hɛngmɛ ngɛ fɛu saminyayoo, se Rahel lɛɛ e nɔmlɔ tso ɔ kɛ e nɔ́ tsuaa nɔ́ hi kɛ pi si; e he ngɛ fɛu saminya.
18Akɛnɛ Yakob suɔ Rahel he je ɔ, e de Laban ke, “Ma tsu ní ha mo jeha kpaago konɛ o kɛ Rahel, o bi wayo ɔ ha mi nɛ ma ngɔ.”
19Laban he nɔ ke, “Saminya! I suɔ kaa i kɛ lɛ ma ha mo pe kaa i kɛ lɛ ma ha nɔ kpa ko. Lɔ ɔ he ɔ, moo hi ye ngɔ.” 20Yakob tsu ní jeha kpaago konɛ e kɛ na he blɔ nɛ e ngɔ Rahel. Se suɔmi nɛ e ngɛ kɛ ha Rahel he je ɔ, jeha kpaago ɔ be nɛ e pee lɛ kaa ligbi bɔɔ kɛkɛ.
21Kɛkɛ nɛ Yakob de Laban ke, “Be ɔ nɛ wa to kaa ma tsu ní ha mo kɛ ya si ɔ, be ɔ su; ha mi o biyo ɔ nɛ ma ngɔ lɛ.” 22Laban ngmɛ okplɔɔ agbo, nɛ e kpee nihi tsuo nɛ ngɛ lejɛ ɔ kɛ ba ní yemi ɔ. 23Se jamɛ a nyɔ ɔ mi ɔ, Laban kɛ e bi Lea mohu ba ha Yakob, nɛ e kɛ lɛ hwɔ. 24Laban ngɔ e nyɔguɛ yo ɔ nɛ a tsɛɛ lɛ Zilpa a ngɔ ha e bi Lea, nɛ e ba pee e mawayo. 25Yakob li kaa mamoo Lea mohu e kɛ hwɔ si ɔ, kɛ ya si mɔtu. Lɔ ɔ he ɔ, e bi Laban ke, “Mɛni o pee mi nɛ ɔ? Anɛ i tsu we ní ha we mo konɛ ma ngɔ Rahel lo? Mɛni he je mɔ nɛ o sisi mi?”
26Laban he nɔ ke, “Wa hiɛmɛ nɛ ɔ kusumi ngmɛ́ blɔ ja; a ha we jokuɛyo gba be mi nɛ nɔkɔtɔma gba we lolo. 27Mlɛ kɛ yaa si ayɛflo he nyami otsi ɔ maa be. Lɔ ɔ se ɔ, ke o maa wo si kaa o ma tsu ní ha mi jeha kpaago kpa kɛ piɛ he ɔ, i kɛ Rahel hu ma ha mo.”
28Yakob kplɛɛ, nɛ benɛ ayɛflo he nyami otsi ɔ be ɔ, Laban kɛ e bi Rahel hu ha lɛ. 29Laban kɛ e nyɔguɛ yo ɔ nɛ a tsɛɛ lɛ Bilha a ha Rahel, nɛ e ba pee e mawayo. 30Yakob kɛ Rahel hu na bɔmi, nɛ e suɔ lɛ kulaa pe Lea. Yakob tsu ní ha Laban jeha kpaago kɛ piɛ he.
Yakob bimɛ
31Benɛ Yawɛ na kaa Yakob sume Lea kaa bɔ nɛ e suɔ Rahel ɔ, e ha Lea fɔ bimɛ; se Rahel pee yosa. 32Lea ba na mi nɛ e fɔ binyumu. E wo lɛ biɛ ke Ruben,#29.32 Ruben: Ngɛ Hebri gbi mi ɔ, biɛ nɛ ɔ pɛɛ kaa munyu nɛ e sisi ji, “e nu ye we amanehlu ɔ.” nɛ e de ke, “Yawɛ na ye we amanehlu ɔ; jehanɛ lɛɛ ye huno ɔ maa suɔ mi.” 33Lea ba na mi ekohu, nɛ e fɔ binyumu. E wo lɛ biɛ ke Simeon,#29.33 Simeon: Ngɛ Hebri gbi mi ɔ, biɛ nɛ ɔ pɛɛ kaa munyu nɛ e sisi ji “nɔ́ numi.” nɛ e de ke, “Yawɛ nu kaa a sume mi, lɔ ɔ he ɔ, e ha mi binyumu nɛ ɔ hulɔ.” 34Lea ba na mi ekohu, nɛ e fɔ binyumu. E wo lɛ biɛ ke Levi,#29.34 Levi: Ngɛ Hebri gbi mi ɔ, biɛ nɛ ɔ pɛɛ kaa munyu nɛ e sisi ji “mɛtɛ he.” nɛ e de ke, “Jehanɛ lɛɛ ye huno ɔ kɛ e he maa mɛtɛ ye he kpɛii, ejakaa i fɔ binyumuhi etɛ ha lɛ.” 35Lɔ ɔ se ɔ, e ba na mi ekohu, nɛ e fɔ binyumu. E wo lɛ biɛ ke Yuda,#29.35 Yuda: Ngɛ Hebri gbi mi ɔ, biɛ nɛ ɔ pɛɛ kaa munyu nɛ e sisi ji “yi jemi.” nɛ e de ke, “Jehanɛ lɛɛ ma je Yawɛ yi.” Kɛkɛ nɛ e po fɔmi.
Currently Selected:
Mose I, 29: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
