Mose I, 30
30
1Benɛ Rahel na kaa e fɔ we ha Yakob ɔ, e hɛ kɔ̃ e nyɛmiyo ɔ nɔ, nɛ e de Yakob ke, “Ha mi bimɛ, ke pi ja a, ma gbo.”
2Yakob mi mi fu lɛ wawɛɛ nitsɛ, nɛ e bi lɛ ke, “Anɛ Mawu ji mi lo? Lɛ ji nɔ nɛ tsi o fɔmi nya a nɛ.”
3Rahel he nɔ ke, “Hyɛ, ye mawayo Bilha ji nɛ ɔ nɛ; o kɛ lɛ nɛ hwɔ, nɛ e fɔ ha mi, konɛ imi hu ma na bimɛ kɛ gu e nɔ.” 4Rahel kɛ e mawayo Bilha ha Yakob, nɛ Yakob kɛ lɛ na bɔmi. 5Bilha ba na mi nɛ e fɔ binyumu ha Yakob. 6Rahel wo lɛ biɛ ke Dan,#30.6 Dan: Ngɛ Hebri gbi mi ɔ, biɛ nɛ ɔ pɛɛ kaa munyu nɛ e sisi ji “wo nguɔ.” nɛ e de ke, “Mawu wo mi nguɔ. E nu ye kue fami ɔ, nɛ e ha mi binyumu.” 7Bilha ba na mi ekohu, nɛ e fɔ binyumu enyɔne ha Yakob. 8Rahel wo lɛ biɛ ke Naftali,#30.8 Naftali: Ngɛ Hebri gbi mi ɔ, biɛ nɛ ɔ pɛɛ kaa munyu nɛ e sisi “hwu ta.” nɛ e de ke, “I kɛ wa wenyɛ ɔ hwu ta nɛ nya wa, nɛ i ye e nɔ.”
9Benɛ Lea na kaa e fɔmi se po ɔ, e kɛ e mawayo Zilpa ha Yakob kaa e yo, 10nɛ Yakob kɛ lɛ fɔ binyumu. 11Lea wo lɛ biɛ ke Gad,#30.11 Gad: Ngɛ Hebri gbi mi ɔ, biɛ nɛ ɔ sisi ji “he ba ní”. nɛ e de ke, “Ye he ba ní pɛ!” 12Zilpa fɔ binyumu enyɔne ha Yakob. 13Lea wo lɛ biɛ ke Asher,#30.13 Asher: Ngɛ Hebri gbi mi ɔ, biɛ nɛ ɔ sisi ji “bua jɔmi.” nɛ e de ke, “Hyɛ bɔ nɛ ye bua jɔ ha! Yi kpa amɛ ma de ke a gbaa mi saminya.”
14Ligbi ko, benɛ a ngɛ ngma kpae ɔ, Ruben ya na suɔmi tso yiblii#30.14 Suɔmi tso yiblii: A heɔ yeɔ kaa tso yiblii nɛ ɔmɛ haa nɛ nɔ fɔɔ. Enɛ ɔ he je ɔ, a kɛ peeɔ fɔmi tsopa. komɛ ngɛ nga a nɔ, nɛ e ngɔ kɛ ba ha e nyɛ Lea. Rahel de Lea ke, “I kpa mo pɛɛ, ha mi suɔmi tso yiblii nɛ o bi ɔ kɛ ba a eko.”
15Lea he nɔ ke, “Nɛ o kpɔ ye huno ɔ ngɛ ye dɛ ɔ, lɔ ɔ pi ha mo lolo? Ye bi ɔ suɔmi tso yiblii nɛ ɔ hu o ma kpɔ lo?”
Rahel de lɛ ke, “Ha mi o bi ɔ suɔmi tso yiblii ɔ, konɛ Yakob kɛ mo nɛ hwɔ nyɔ nɛ ɔ mi.”
16Gbɔkuɛ nya si benɛ Yakob je ngmɔ mi kɛ ma a, Lea je kpo ya kpee lɛ, nɛ e de lɛ ke, “Ma hwɔ o ngɔ mwɔnɛ ɔ, ejakaa i kɛ suɔmi tso yiblii ɔ nɛ ye bi ɔ kɛ ba a wo he hiɔ.” Lɔ ɔ he ɔ, Yakob kɛ lɛ na bɔmi jamɛ a nyɔ ɔ mi.
17Mawu bu Lea kue fami ɔ tue, nɛ e ba na mi, nɛ e kɛ Yakob fɔ binyumu enuɔne. 18Lea wo lɛ biɛ ke Isakar,#30.18 Isakar: Ngɛ Hebri gbi mi ɔ, biɛ nɛ ɔ pɛɛ kaa “hiɔwo”. nɛ e de ke, “I kɛ ye mawayo ɔ ha ye huno, nɛ Mawu wo mi hiɔ.” 19Lea kɛ Yakob na bɔmi ekohu, nɛ Lea ba na mi, nɛ e fɔ binyumu ekpane. 20E wo lɛ biɛ ke Zebulun,#30.20 Zebulun: Ngɛ Hebri gbi mi ɔ, biɛ nɛ ɔ pɛɛ kaa “nike ní.” nɛ e de ke, “Mawu ke mi nɔ́ kpakpa ko. Jehanɛ lɛɛ ye huno kɛ mi maa hi si saminya, ejakaa i kɛ lɛ fɔ binyumuhi ekpa.” 21Pee se ɔ, e fɔ biyo nɛ e wo lɛ biɛ ke Dina.
22Mawu kai Rahel hulɔ; Mawu bu e kue fami ɔ tue, nɛ e bli e muklii mi nya. 23-24Rahel ba na mi, nɛ e fɔ binyumu. E wo lɛ biɛ ke Yosef,#30.23 Yosef: Ngɛ Hebri gbi mi ɔ, biɛ nɛ ɔ pɛɛ kaa “e ha mi eko kɛ piɛ he.” nɛ e de ke, “Mawu je ye hɛ mi zo. Mawu nɛ e pa ha mi binyumu kpa.”
Yakob kɛ Laban wo nɔ́ he jua
25Benɛ a fɔ Yosef se ɔ, Yakob de Laban ke, “Wo mi blɔ konɛ ma kpale kɛ ho ye je he, kɛ ye zugba nɔ ya. 26Ye yi ɔmɛ kɛ ye bimɛ ɔmɛ nɛ i tsu ní ha mo nɛ i kɛ na mɛ ɔ, ngɔɔ mɛ ngɔ ha mi nɛ ma ho. Mo nitsɛ o le kaa i sɔmɔ mo saminya.”
27Laban he nɔ ke, “I kpa mo pɛɛ nɛ o bu nɔ́ nɛ ma de nɛ ɔ tue. I ya bi ní, nɛ a de mi ke o he nɛ Yawɛ gbaa mi ngɛ. 28Tsɔɔ mi bɔ nɛ o ma he, konɛ ma wo mo hiɔ.”
29Yakob he nɔ ke, “Mo nitsɛ o le bɔ nɛ i sɔmɔ mo, kɛ bɔ nɛ i hyɛ o lohwe ɔmɛ. 30Benɛ i ba a, lohwe bɔɔ pɛ o ngɛ. Se amlɔ nɛ ɔ lohwe ɔmɛ bɔ, nɛ a he hiɛ babauu; Yawɛ gu ye nɔ nɛ e kɛ gbaa mo babauu. Amlɔ nɛ ɔ, e su be nɛ ma to blɔ nya kɛ ha imi nitsɛ ye we ɔ.”
31Laban bi lɛ ke, “Nyɛmɛ ma ha mo?”
Yakob he nɔ ke, “I hla we hiɔwo ko. Ke o maa pee nɔ́ nɛ ma bi mo nɛ ɔ ha mi ɔ, lɛɛ ma tsa nɔ ma hyɛ o to ɔmɛ ha mo. 32Ngmɛɛ mi blɔ nɛ ma ya kpa o to ɔmɛ tsuo a mi mwɔnɛ ɔ, nɛ ma ngɔ jijɔ yumu tsuaa jijɔ yumu, kɛ apletsi bi tsuaa apletsi bi nɛ e he ngɛ huatahuata, loo a tsɔɔtsɔɔ e he. Hiɔwo pɛ nɛ i ngɛ hlae ji nɛ ɔ nɛ. 33Pee se, ke o ma ye hiɔwo ɔ bumi ɔ, o maa na kaa i ye mo anɔkuale, loo i sisi mo. Ke o ba na akpakpo ko nɛ e he be huatahuata nɛ a tsɔɔtsɔɔ we e he hulɔ, aloo jijɔ ko nɛ yu we ɔ, lɛɛ o le kaa imi nɛ i ju lɛ.”
34Laban he nɔ ke, “Saminya! Wa maa pee kaa bɔ nɛ o de ɔ.” 35Se jamɛ a nyɔ ɔ mi ɔ, Laban je akpakpohi nɛ a ngmaangmaa a he ɔ, kɛ ní nɛmɛ nɛ a tsɔɔtsɔɔ a he ɔ, kɛ apletsi yihi tsuo nɛ a he ngɛ huatahuata, loo a tsɔɔtsɔɔ a he, loo a wo a he so futaa a kɛ je to tsu ɔ mi. Jijɔ yumu ɔmɛ hu e je mɛ tsuo kulaa kɛ je lejɛ ɔ. Laban kɛ lohwe ɔmɛ wo e binyumu ɔmɛ a dɛ mi, 36nɛ e kɛ mɛ kɛ lohwe ɔmɛ je Yakob he, nɛ e nyɛɛ ligbi etɛ. Yakob hyɛ Laban lohwe kpa amɛ nɛ piɛ ɔ.
37Yakob ya po tso kɔnihi kɛ je tso slɔɔto etɛ a he. E ngmla tso toto ɔ ngɛ he komɛ, nɛ futaa je si ngɛ tso kɔni ɔmɛ a mi. 38E ngɔ tso kɔnihi nɛ e ngmla a he ɔ ba pue to nyu numi ní ɔmɛ a mi ngɛ to ɔmɛ a hɛ mi. E ngɔ mɛ ba pue lejɛ ɔ, ejakaa ke to ɔmɛ ba nyu numi ɔ, a kuɔɔ a he ngɛ lejɛ ɔ. 39Benɛ akpakpo ɔmɛ kuɔ eyi ɔmɛ ngɛ tso kɔni ɔmɛ a hɛ mi ɔ, a fɔ bimɛ nɛ a he ngmaangmaa. Ekomɛ a he ngɛ huatahuata, nɛ ekomɛ hu a he tsɔɔtsɔɔ mi.
40Yakob je jijɔ ɔmɛ kɛ je apletsi ɔmɛ a he, nɛ e ha nɛ a plɛ a hɛ mi ngɔ kpee Laban to huatahuata amɛ, kɛ yumuyumu ɔmɛ. Bɔ nɛ Yakob pee nɛ e kɛ na lɛ nitsɛ e to tsu ji nɛ ɔ nɛ; e kɛ e to ɔmɛ futuu we Laban ní ɔmɛ.
41Be tsuaa be nɛ tohi nɛ ngɛ he wami saminya a ma bɔni a he kuɔmi ɔ, Yakob maa ngɔ tso kɔni ɔmɛ kɛ ba wo lohwehi a nyu numi nɔ́ ɔ mi ngɛ to ɔmɛ a hɛ mi. 42Ke lohwe ɔmɛ be he wami kpakpa ko ɔ, lɛɛ Yakob kɛ tso kɔni ɔmɛ be a hɛ mi fɔe. Enɛ ɔ he je ɔ, lohwe wudɔwudɔ ɔmɛ ba pee Laban níhi, nɛ ní nɛmɛ nɛ ngɛ he wami saminya a ba pee Yakob níhi. 43Blɔ nɔ nɛ Yakob gu nɛ e kɛ na ní kpɔtɔɔ ji nɛ ɔ nɛ. E na tohi, nyɔguɛhi, afukpɔngɔhi, kɛ tejihi babauu.
Currently Selected:
Mose I, 30: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
