Jeemsi 4

1Ya ka zabili mini naŋgbankpeeni ŋmɛbu zaa lee yina nti be yi sunsuuni? Pa yi niŋgbuŋ kɔre nyaɣisim bɔbu din be yi niŋgbuna yaɣa ni n-zabiri la ni ka di yina? 2Yi bɔri binyara ka ku tooi nya li, ka di zuɣu chɛ ka yi bɔri ni yi ku yi daadamtaba; yi suhuri ye binyar’ shɛŋa yi kɔre ni kpɛri ni zuɣu ti yaɣi, ka yi mi ku tooi nya li, ka di zuɣu chɛ ka yi ŋmɛri tab’ naŋgbankpeeni ka zabira. Yi ka yi ni bɔri shɛli, dama yi bi suhi li Naawuni sani. 3Ka yi mi yi suhi li, yi bi nyari li, dama yi tɛha bi tuhi lala niŋbu ni; yi suhirila binshɛŋa yi ni yɛn zaŋ tum yimaŋmaŋ’ niŋgbuŋ kɔre nyaɣisim tuma. 4Yi bemi kaman yidaampaɣ’ shɛb’ bɛn niŋdi zina! Yi bi mi ni ŋun zaŋ omaŋ’ leei dunia ŋɔ zo nyɛla Naawuni dima? Dinzuɣu ŋunkam bɔri ni o zaŋ omaŋ’ leei dunia ŋɔ zo, dilana zaŋ omaŋ’ leela Naawuni dima. 5Yi tɛhiya ni Naawuni Kundi ni yɛli shɛm la nyɛla din ka gbinni? Di ni yɛli shɛm maa m-bɔŋɔ: “Naawuni ni zaŋ shi’ so niŋ ti ni la zuɣu n-chɛ ka o suhu kul ye ti zuɣu.” 6#Ŋaha 3.34 Ka Naawuni ni niŋdi anfaan’ shɛli niŋdi ti ni galisiya pam; dinzuɣu ka Naawuni Kundi yɛli, “Naawuni zaɣisiri karimbaannima, amaa ka lee niŋdi anfaani niŋdi bɛn siɣisiri bɛmaŋ’ ni.”

7Dinzuɣu zaŋmiya yimaŋ’ ti Naawuni. Zaɣisimiya Sintani, ka o zo ka chɛn ya. 8Vumiya miri Naawuni, ka o mi vu m-miri ya. Yinim’ alahichinim’ ŋɔ, paɣimiya yi nuhi; yinim’ tɛhaayiyinim’ ŋɔ, malimiya yi suhuri ka di be kasi. 9Chɛliya ka nandahima mali ya, ka fabilimiya, ka kuhimiya. Chɛliya ka yi lari leei kumsi, ka chɛ ka yi suhupiɛlli leei suhugarigu. 10Siɣisimiya yimaŋ’ ti Duuma sani, ka o duhi ya.

Ŋun karit’ o tab’ saria zuɣu ni kpahibu

11M mabihi, di yɛriya yɛtɔɣ’ biɛri n-dalindiri taba. Ŋunkam yɛri yɛtɔɣ’ biɛri dalindir’ o mabia bee n-karit’ o saria, o yɛri yɛtɔɣ’ biɛri maa dalindirila Naawuni zaligu, ka kariti zaligu maa saria. Ka a yi kariti zaligu maa saria, dindina a pala ŋun doli zaligu maa ni wuhi shɛm, amaa a nyɛla ŋun kariti li saria. 12Zaliguzaana ni sariakarita yino kɔŋko ŋun ni tooi tiligi niriba ka ni tooi bahi ba yoli m-beni. Ka ŋuni n-lee nyɛ a mi ka a karit’ a daadamkpee saria?

Bɛn nyuri bara zuɣu ni kpahibu

13Wummiya, yinim’ bɛn yɛra, “Zuŋɔ bee biɛɣuni ti ni chaŋ tiŋ’ yaakaza nti be nimaani yuun’ muni n-wolindi nyari nyɔri la.” 14#Ŋaha 27.1 Yi nyɛla bɛn bi mi din sa yɛn niŋ yi nyɛviya biɛɣuni; dama yi ŋmanila paɣili din yi kpe, ka di bi yuui ka di lan yi la. 15Di ni simdi ni yi yɛli shɛm nyɛla: “Ti Duuma yi saɣi, ti ni be ka niŋ dimbɔŋɔ bee dini ŋɔ.” 16Amaa yi lee nyɛla bɛn duhiri yimaŋa ka nyuri bara. Ka barinyubo ŋɔ tatabo zaa nyɛla zaɣ’ biɛɣu.

17Dinzuɣu ŋunkam mi zaɣ’ suŋ tumbu ka bi tum li, di nyɛla alahichi o sani.

Currently Selected:

Jeemsi 4: DBwDB

Highlight

Copy