Jeemsi 1

1 # Mat 13.55; Maak 6.3; Tuma 15.13; Gal 1.19 Man’ Jeemsi ŋun nyɛ Naawuni mini ti Duuma Yisa Masia dabili la n-sabiri gbaŋ ŋɔ tiri yinim’ bɛn nyɛ ti zuliya pinaayi bɛn wurim chaŋ ti be dunia ŋɔ luɣ’ shɛlikam la m-puhiri ya.

Yɛda niŋbu mini yɛm yɛla

2M mabihi, yi yi ti nya zahimbu balibu kam, yin’ maliya suhupiɛlli di puuni, 3dama yi mi ni buɣisibu shɛli din buɣisiri yi yɛda niŋbu chɛmi ka yi niŋdi ania. 4Chɛliya ka yi daania niŋbu maa niŋ pali, ka di chɛ ka yi bi niriba ka ba n-zani shɛlikam zaa puuni, ka ku kɔŋ shɛli. 5Ka yɛm yi pooi yi ni so, ŋun’ suhimi Naawuni ka o ti o li; dama Naawuni nyɛla ŋun tiri sokam ka di galisira, ka bi nyari so taali di puuni. 6Amaa di simdi ni o lee suhimi ni yɛda ka bi biɛhinda, dama ŋun biɛhindi ŋmanila teeku kɔgban’ shɛli pɔhim ni ʒiɛri ka di laŋsira. 7Nir’ lala di tɛhiri ni o ni deei shɛli ti Duuma sani. 8Dilana nyɛla tɛhaayilana ka ku tooi ʒe yim.

Fara mini azichi yɛla

9Di simdi ni ti mabi’ so ŋun nyɛ faralana ka Naawuni duh’ o mali suhupiɛlli; 10#Aiz 40.6-7 ka ti mabia ŋun mi nyɛ azichilana ka Naawuni siɣis’ o, di simdi ni o gba mali suhupiɛlli, dama azichilana ni ti vuui kaman mɔpuma ni kpahiri luri shɛm la. 11Wuntaŋ’ yi puhina m-bii ni tulim n-kpe mɔri, di puma kpahirimi lu ka di viɛlim gba kpaai. Lala ka azichilana gba ni ti kpaai o tuma tumbu puuni.

Buɣisibu mini zahimbu nyabu

12Ninvuɣ’ so ŋun niŋ ania zahimbu puuni mal’ alibarika, dama zahimbu maa yi buɣis’ o ka o nyaŋ li, o ni ti nya laara din nyɛ nyɛvil’ shɛli Naawuni ni zaŋ lo bɛn yur’ o alikauli la. 13Ka so yi ti nya zahimbu, ŋun’ miri ka o yɛli ni Naawuni n-zahim o, dama zahimbu din ni chɛ ka nir’ tum zaɣ’ biɛɣu ku tooi zahim Naawuni, ka ŋun’ Naawuni mi ku zahim so lala. 14Amaa nir’ nyari zahimbu din ni chɛ ka o tum zaɣ’ biɛɣu la omaŋmaŋ’ kɔr’ biɛri yi ti voog’ o kpɛhi di ni n-gbaag’ o kaman tɔŋ la. 15Ka di nyaaŋa kɔr’ biɛri yi tiɣi pua, di dɔɣirila alahichi; ka alahichi mi yi ti bi zaa, di tiɣirila pua n-dɔɣi kum.

16M mabiyurisi, di chɛliya ka binshɛli yɔhim ya. 17Pin’ suma mini pina din be tibi zaa yirila Naawuni ŋun nam alizanda mini neesim, ka nyɛ ŋun ka taɣibu, ka mi ka shilinshia din limsiri neesim maa la sanna. 18Omaŋmaŋ’ yubu zuɣu ka o zaŋ ti leeg’ o bihi yɛlimaŋli yɛligu la puuni ni di chɛ ka ti leeg’ o bikpamba o binnamda zaa puuni.

Wumbu mini tumbu

19M mabiyurisi, teemiya dimbɔŋɔ. Di simdi ni sokam wumdi yomyom, ka gbaam’ omaŋa o yɛtɔɣa tɔɣisibu ni, ka mi di jɛri suli yomyom, 20dama ninsal’ sujee mini Naawuni wuntia tuma bi dol’ taba. 21Dinzuɣu yihimiya dinkam nyɛ daɣiri mini biɛribiɛtali zaa yi bebu ni, ka doliya tarimtali soli n-deei Naawuni ni zaŋ yɛligu shɛli biri yi suhuri ni, ka di nyɛ din ni tooi tiligi ya la.

22Amaa leemiyala bɛn tumdi yɛligu maa ni wuhi shɛm, ka pa ni bɛn yɔhim bɛmaŋ’ wumdila di ni yɛli shɛm kɔŋko. 23Dama so yi’ nyɛla ŋun wumdila yɛligu maa kɔŋko, ka pa ŋun tumdi di ni wuhi shɛm, o ŋmanila ninvuɣ’ so ŋun lihi diɣi ni n-nya o ninni m-baŋ omaŋmaŋ’ nama biɛhigu ni nyɛ shɛm, 24ka ŋmaligi chaŋ ha ka lan tam o ni lihi nya omaŋ’ shɛm maa kɔtomsi. 25Amaa nir’ yi lihi Naawuni zaligu din be tibi ka nyɛ din tiri daadamnim’ yolisim la ni viɛnyɛliŋga, ka kul dol’ li dɛde ka nyɛ ŋun tumdi di ni wuhi shɛm, ka pa ni ŋun wumdi li mi kɔŋko, o ni nya alibarika Naawuni sani o ni tumdi shɛm maa puuni.

26So yi tɛhi ni o dolila adiini soli ka bi gbib’ o zilinli, o yɔhindila omaŋa o suhu ni, ka o daadiini soli dolibu nyɛla yoli. 27Adiini alali din nyɛ din ka galimi ti Ba Naawuni sani nyɛla kpibisi mini pakoya lihibu bɛ wahala ni mini maŋgbaabu zaŋ chaŋ dunia ŋɔ yɛliniŋda din gabisiri niriba la polo.

Currently Selected:

Jeemsi 1: DBwDB

Highlight

Copy