Hiburunima 11

Yɛda niŋbu

1Yɛda niŋbu nyɛla din ni chɛ ka nir’ ti nya binshɛŋa o ni niŋdi tahima ni o ni ti nya la; di lan nyɛla din ni chɛ ka o shiri mi ni o nina ni ku tooi nya binshɛŋa beni. 2Yɛda niŋbu zuɣu ka Naawuni nini daa tiɣi kurimbuni ha niriba.

3 # Pil 1.1; Yila 36.6, 9; Jɔn 1.3 Yɛda niŋbu zuɣu ka ti baŋ ni Naawuni daa zaŋla o nol’ ni yɛligu nam dunia ŋɔ; dinzuɣu Naawuni daa zaŋla ti nina ni ku tooi nya binshɛŋa n-nam ti nina ni nyari binshɛŋa ŋɔ.

4 # Pil 4.3-10 Yɛda niŋbu zuɣu ka Ɛbɛl daa mali sara din so Keen dini, ka di daa tiɣi Naawuni nini, ka o deeg’ o pini maa ka lih’ o wuntizɔra. Ɛbɛl pun kpi, amaa o yɛda niŋbu puuni o na kul tɔɣisiri yɛtɔɣa.

5 # Pil 5.21-24 Yɛda niŋbu zuɣu ka Naawuni daa kpuɣi Inok ka o bi kpi, ka so daa bi lan nya o, Naawuni ni daa kpuɣ’ o maa zuɣu. Naawuni Kundi di shɛhira yɛli ni Naawuni ni daa na bi kpuɣi Inok saha shɛli, o daa nyɛla Naawuni nini ni tiɣi so. 6Ka di yi pa yɛda niŋbu zuɣu Naawuni nini ku tiɣi nira. Dama ŋunkam chaŋ Naawuni sani, di niŋ kamaata ni o niŋ yɛda ni Naawuni beni ka deeri bɛn bɔr’ o ni bɛ suhuri zaa suhigu.

7 # Pil 6.13-22 Yɛda niŋbu zuɣu ka Anabi Nuhu daa wum Naawuni noli o ni daa kpah’ o zuɣu ni yɛl’ o yɛl’ shɛŋa din ti yɛn niŋ ka o nini na bi nya li la puuni, ka daa kpahi ŋariŋ ni di tilig’ o min’ o yiŋnima. O ni daa niŋ shɛm maa daa kari dunianim’ saria luhi ba, ka Naawuni daa zaŋ o zali wuntia zaani o yɛda niŋbu maa zuɣu.

8 # Pil 12.1-5 Yɛda niŋbu zuɣu ka ti yab’ Ibrahimma daa deei Naawuni noli o ni daa yɛl’ o ni o yiɣisim’ chaŋ tiŋgban’ shɛli ŋun’ Naawuni ni lo alikauli ni o ni zaŋ ti o la ni; ka o daa yiɣisi omaŋmaŋ’ tiŋgbɔŋ ni gbaai chandi, hal ka ʒi o ni chani luɣ’ shɛli maa. 9#Pil 35.27 Yɛda niŋbu zuɣu ka o daa chani gindi alikauli tiŋgbɔŋ maa ni m-be kaman tinzun tiŋgbɔŋ ni ka o be la. Ka o mini Yisahaku ni Yaakubu bɛn daa ti yɛn di alikauli maa fal’ la daa kul bela tantinim’ ni. 10Ti yab’ Ibrahimma daa guhirila tin’ shɛli Naawuni maŋmaŋ’ ni zali di tanzaa ka lan nyɛ ŋun me li, ka di ku vuui.

11 # Pil 18.11-14; 21.2 Yɛda niŋbu zuɣu ka Zara daa nya yaa niŋ pua, hal o ni daa yaɣi dɔɣibu saha shɛl’ la, dama o daa niŋ ŋun lo o alikauli maa naani. 12#Pil 15.5; 22.17; 32.12 Dinzuɣu do’ yino ŋun niŋgbuŋ daa gbarigi zaa la daa leei ŋun dɔɣi zuliya shɛb’ bɛn galisi kaman saŋmarisi bee kaman teeku noli bihigu din ka kalinli ŋɔ.

13 # Pil 23.4; 1 Yɛl 29.15; Yila 39.12 Bɛmbɔŋɔnim’ zaa daa kpila yɛda niŋbu puuni ka na bi nya Naawuni ni daa lo ba binshɛŋa alikauli maa, amaa ka daa lee lihi nya li katiŋ’ ha, ka dee’ li ni suhupiɛlli, ka saɣi ni bɛ nyɛla saamba ni tinzunnima dunia ŋɔ ni. 14Ka ninvuɣ’ shɛb’ bɛn saɣi yɛli ŋ-ŋɔ wuhiya ni bɛ bɔrila tiŋgbɔn shɛli din ni nyɛ bɛmaŋmaŋ’ dini. 15Bɛ yi di daa tɛhirila bɛ ni daa pun yi tin’ shɛl’ na la yɛla, bɛ daa naan nya soli n-lan lab’ nimaani. 16Amaa bɛ daa kul bɔrila tin’ shɛli din so. Tin’ shɛli din be alizanda ni ka bɛ daa bɔra. Dinzuɣu vi bi mali Naawuni ni bɛ bol’ o bɛ Naawuni, dama o pun me tiŋ’ zali ba.

17 # Pil 22.1-14 Yɛda niŋbu zuɣu Naawuni ni daa ti buɣisi ti yab’ Ibrahimma saha shɛl’ la, o daa zaŋ Yisahaku mali sara ŋun’ Naawuni sani. Ti yab’ Ibrahimma ni daa nyɛ Naawuni ni lo so alikaulinim’ la zaa yoli, o daa saɣiya n-zaŋ o bi’ gaŋ’ Yisahaku mali sara Naawuni sani 18#Pil 21.12 hal ka daa mi ni Naawuni pun yɛli ŋun’ ti yab’ Ibrahimma, Yisahaku ni ka a zuliya ni zani. 19Ti yab’ Ibrahimma daa niŋ yɛda ni Naawuni ni tooi neei Yisahaku kum ni; ka di bemi kaman lala n-daa shiri niŋ, dama ti yab’ Ibrahimma ŋun’ sani, Yisahaku daa bemi kaman ŋun shiri neei kum ni na.

20 # Pil 27.27-29, 39-40 Yɛda niŋbu zuɣu ka Yisahaku daa suhi alibarika din ti yɛn kana saha shɛli n-niŋ Yaakubu mini Iso ni.

21 # Pil 47.31; 48.1-20 Yɛda niŋbu zuɣu ka Yaakubu daa ti saɣi kum ka niŋ alibarika niŋ Yisifu bidibisi zaa yinoyino ni, o ni daa zaŋ omaŋ’ dalim o jaaŋgbee n-jɛmdi Naawuni saha shɛl’ la.

22 # Pil 50.24-25; Yibu 13.19 Yɛda niŋbu zuɣu ka Yisifu daa ti yɛn kpi ka teei n-tɔɣisi Izraɛlnim’ ni ti yɛn yi Ijipti tiŋgbɔŋ ni shɛm yɛla zali; ka daa wuhi ba bɛ ni ti yɛn niŋ shɛm zaŋ chaŋ o sɔɣibu polo.

23 # Yibu 2.2; 1.22 Yɛda niŋbu zuɣu ka Anabi Musa ba min’ o ma daa dɔɣ’ o n-zaŋ o sɔɣi chir’ muna ata ka bi zo dabiɛm ni bɛ zaɣisi naa zaligu, dama bɛ daa nyaya ka bia maa nyɛla bi’ viɛlli.

24 # Yibu 2.10-12 Yɛda niŋbu zuɣu Anabi Musa ni daa ti bi doo, o daa zaɣisiya ni o pala Firawuna bipuɣiŋga bia. 25O daa paɣiya ni o pahi Naawuni niriba zuɣu n-di wahala gar’ o di alahichi nyaɣisim din ku yuui. 26O daa niŋ yɛda ni o yi nya turi Masia zuɣu, di so Ijipti azichi, dama o daa lihirila o ni ti yɛn nya laara shɛli dahin shɛl’ ha la.

27Yɛda niŋbu zuɣu ka Anabi Musa daa yi Ijipti tiŋgbɔŋ ni ka bi zo Firawuna suhuyiɣisili. O daa bi saɣi ni o lab’ o nyaaŋa; o daa bemi kaman o nini nyala Naawuni ŋun nyɛ nir’ ni ku tooi nya so ŋɔ. 28#Yibu 12.21-30 Yɛda niŋbu zuɣu ka o daa zali Yaɣigari Chuɣu, ka wuh’ o niriba ni bɛ niŋm’ ʒim vie bɛ yinsi dunoya, ka di chɛ ka Kum malaika so ŋun daa yɛn kana ti ku bikpamba la ti ku ku bɛn’ Izraɛlnim’ maa bikpamba.

29 # Yibu 14.21-31 Yɛda niŋbu zuɣu ka Izraɛlnim’ daa tooi baai du Teeku Ʒiɛɣu kaman tiŋgban’ kuŋ n-nyɛ li la; amaa ka Ijiptinim’ daa kana ti tɔɣisi ba niŋ lala ka kom di ba.

30 # Jɔsh 6.12-21 Yɛda niŋbu zuɣu ka Izraɛlnim’ daa chaŋ gili Jɛriko goma hal ti paai daba ayopɔin dali, ka goma maa lu. 31#Jɔsh 2.1-21; 6.22-25 Yɛda niŋbu zuɣu ka Reehab ŋun daa nyɛ pagɔrili la daa bi pahi tipawumlinim’ zuɣu bahi yoli, o ni daa deei ninvuɣ’ puɣisiriba la ni suhupiɛlli la zuɣu.

32 # Zuɣ 6.11—8.32; 4.6—5.31; 11.1—12.7; 1 Sam 16.1—1 Nan 2.11; 1 Sam 1.1—25.1 Ka wula ka n lan yɛn yɛli pahi? N lan ka dahima ni n yɛli Gidiɔn mini Barak ni Samsin ni Jɛfita ni Naa Dauda ni Samuɛl ni anabinim’ bɛn pahi la yɛla. 33#Dan 6.1-27 Yɛda niŋbu puuni ka bɛ daa tuhi tin’ muna tɔbu di nasara. Bɛ daa zali din tuhi tumbu soli, ka daa deei Naawuni ni lo ba binshɛŋa alikaulinim’ la. Bɛ daa chɛ ka gbuɣima noya mum, 34#Dan 3.1-30 ka daa kpihi buɣim din mali dabiɛm, ka daa tiligi takɔb’ kum ni. Bɛ daa nya kpiɔŋ bɛ gbariginsim saha. Bɛ daa nyɛla tɔbutuhir’ biinsi bɛn tuhi nyaŋ tinzun tinsi tɔbbihi. 35#1 Nan 17.17-24; 2 Nan 4.25-37 Yɛda niŋbu zuɣu ka Naawuni daa neei paɣ’ shɛb’ niriba bɛn daa kpi kum ni ti ba. Ka ninvuɣ’ shɛb’ daa zaɣisi yolisim shɛli din nyɛ daadamnim’ dini, ka nya azaaba hal ti kpi di puuni ni bɛ ti neei kum ni m-mali nyɛvili din so. 36#1 Nan 22.26-27; 2 Yɛl 18.25-26; Jɛr 20.2; 37.15; 38.6 Bɛ daa mali bɛ ni shɛb’ ansarisi ka fiɛb’ ba, ka daa ga shɛb’ zoligɔnima n-zaŋ ba kpɛhi duu. 37#2 Yɛl 24.21 Bɛ daa lab’ bɛ shɛb’ kuɣa ku ba, ka daa zaŋ sua m-pirigi bɛ shɛb’ buyiyi; ka daa zahim bɛ shɛba, ka zaŋ takɔbi ku shɛba. Bɛ ni shɛb’ daa yɛrila piɛri mini buhi gbana chani ginda. Bɛ daa nyɛla nandaamba ni bɛn nyari muɣisigu mini nahiŋgu. 38Bɛ daa kul darimi gindi kaman bɛn kɔŋ kpɛhili shee, ka be mɔɣu ni mini zoya zuɣu chana, ka be kuɣa lɔna ni mini voyari ni. Bɛ nyɛla ninvuɣ’ suma n-yaɣi dunia ŋɔ ni bebu zuɣu.

39Bɛmbɔŋɔnim’ zaa daa tiɣi Naawuni nin’ la bɛ yɛda niŋbu zuɣu, amaa ka daa na bi nya Naawuni ni daa lo ba binshɛŋa alikauli la; 40ka di nyɛla ŋun’ Naawuni ni lo nia shɛli din so n-ti ti la zuɣu. Di daliri nyɛla, bɛ ku tooi mali be dɛde, ka pa ni Naawuni zaŋ ti mi pahi bɛ zuɣu.

Currently Selected:

Hiburunima 11: DBwDB

Highlight

Copy