Hiburunima 10
10
1Yɛhudianim’ adiini zaligunim’ nyɛla bin’ suma din ti yɛn kana ŋmahinli, ka pa binshɛŋa din nyɛ alali. Ka bɛ ni daa kul maani sara shɛŋa yuuni kam la daa bi tooi chɛ ka bɛn vu m-miri Naawuni di zuɣu be dɛde. 2Di yi pa lala, bɛ daa naan ku chɛ li malibu? Ka niriba bɛn jɛmdi Naawuni lala yi daa shiri yi bɛ daalahichi ni, bɛ suhuri daa naan ku lan chihiri alahichi zuɣu. 3Amaa sara maligunim’ ŋɔ daa kul teerila niriba maa bɛ daalahichi yɛla yuuni kam; 4dama naɣilahi mini buhi ʒim ku tooi kpihim niriba daalahichi.
5Daliri ŋɔ zuɣu Masia ni daa yɛn ka dunia ŋɔ ni na, o daa yɛli Naawuni:
“A bi bɔri biŋkɔbiri sara maligu mini
sara malibu balibu kam,
amaa ninsal’ niŋgbuŋ ka a zaŋ ti ma. 6A mi nini bi tiɣiri alahichi kpihimbu sara maligunima
bee bɛ ni zaŋdi biŋkɔb’ shɛb’ maani sara
n-nyɔri ba buɣim bimbini zuɣu la.
7 #
Yila 40.6-8
Di saha ka n daa lan yɛli,
‘N Duuma Naawuni,
n ka kpe ŋɔ na ni n ti tumla a yubu
kaman di ni sabi n yɛla shɛm
nyin’ Naawuni Kundi ni la.’ ”
8Tuuli o daa yɛlimi, “A bi bɔra, ka a mi nini bi tiɣiri biŋkɔbiri sara maligu mini sara malibu balibu kam ni biŋkɔb’ shɛb’ bɛ ni zaŋdi maani sara nyɔri buɣim bimbini zuɣu ni alahichi kpihimbu sara maligunim’ la.” Masia daa yɛli dimbɔŋɔ, hal bɛ ni daa kul maani sara maligu balibu kam ŋɔ zaa kaman Naawuni zaligu ni wuhi shɛm la. 9Di nyaaŋa ka o daa lan yɛli, “N Duuma Naawuni, n kana ni n ti tumla a yubu.” Naawuni daa kpihim tuuli sara maligunim’ la ka zalila din pah’ ayi. 10Di zuɣu ka ti mali m-be kasi Yisa Masia ni daa tum Naawuni yubu, ka zaŋ omaŋmaŋ’ niŋgbuŋ mali sara yim ka di yɛla naai zaa la zuɣu.
11 #
Yibu 29.38
Yɛhudianim’ maligumaana kam kul ʒiɛmi tumd’ o sara maligu tuma dabisili kam n-kul maanila sara maligu yini maa napɔn bɔbili. Ka sara maligunim’ ŋɔ mi ku tooi kpihim niriba daalahichi; 12amaa niriba daalahichi kpihimbu zuɣu, Masia daa malila sara maligu yim din kul ni ʒiɛya hal ni saha din ka bahigu, ka chaŋ ti ʒini Naawuni nudirigu polo 13#Yila 110.1 ni o guhiri hal ti paai saha shɛli Naawuni ni yɛn zaŋ o dimnim’ leeg’ o napɔntamdigu. 14Sara maligu yini ŋɔ zuɣu ka Masia chɛ ka Naawuni ni mali shɛb’ ka bɛ be kasi la be dɛde hal ni saha din ka bahigu.
15Naawuni Shia Kasi gba di li shɛhira ti sani. Tuuli o daa yɛlimi:
16 #
Jɛr 31.33
“Ti Duuma yɛliya,
‘Dimbɔŋɔ n-nyɛ alikauli shɛli
n ni ti yɛn lo ba dabisi’ shɛŋa din kanna puuni:
N ni ti zaŋ n zaligunim’ niŋ bɛ suhuri ni,
ka sab’ li niŋ bɛ tɛha ni.’ ” 17#Jɛr 31.34 O daa lan yɛli yaha: “N ti ku lan teei bɛ daalahichi mini bɛ biriginsim tuma yɛla hal abada.” 18Naawuni ni chɛ bɛ daalahichi paŋ ba zuɣu, di bi lan kpa ni sara maligu din ni kpihim alahichi mali yaha.
Chɛliya ka ti vu m-miri Naawuni
19Dinzuɣu ti mabihi, ti niŋ naani ni ti ni tooi kpe Luɣ’ Kasi Zaa Kasi Shee la Yisa ʒim zuɣu. 20O mali so’ palli din nyɛ nyɛvili soli din doli kpɛri chinchin’ tibisili la ni ti ti. Chinchin’ tibisili maa nyɛla o niŋgbuŋ ŋmahinli. 21Ka ti ni mali maligumaani’ titali ŋun su Naawuni jɛmbu duu fukumsi la zuɣu, 22#Lɛv 8.30; Ɛzɛk 36.25 chɛliya ka ti niŋ nimmoo ti suhuri ni niŋ yɛda, ka chɛ ka ti suhuri paɣi neei ka ti yi taali ni ti suhuri ni tɛha puuni, ka su ti niŋgbuna mi ko’ viɛlli, ka vu m-miri Naawuni. 23Chɛliya ka ti gbibi ti ni mali tahima shɛli yɛda la kirikiri ka di viini ginda, dama ŋun lo ti alikauli maa nyɛla ŋun kul ʒe yim. 24Chɛliya ka ti baɣa kul be ti ni yɛn niŋ shɛm kpaŋsi tab’ suhuri ni, ka di chɛ ka ti wuhiri ti yurilim ni nyɛ shɛm ka tumdi tuun’ suma. 25Ka di chɛliya ka ti naɣiri Naawuni jɛmbu laɣiŋgu ni kaman ninvuɣ’ shɛb’ ni chɛ ka di chandi zaɣisibu niŋ ba miligu shɛm la, amaa chɛliya ka ti kpaŋsiri tab’ suhuri, di bahi bamdi yi ni nya ka ti Duuma Dabisili dal’ la vuri miriti la zuɣu.
26Ti yi kul tumd’ alahichi milinsi puuni, ti ni baŋ yɛlimaŋli ni nyɛ shɛl’ la nyaaŋa, sara maligu shɛli lan kani din ni kpihim ti daalahichi. 27#Aiz 26.11 Amaa din beni nyɛla, saria karibu mini buɣim din mali dabiɛm ka nyɛ din ti yɛn bahi bɛn tuhiri Naawuni yol’ la n-naɣ’ kpalim. 28#Zal 17.6; 19.15 Ninvuɣ’ so daa yi tum din chihi Anabi Musa zaligu, bɛ kur’ o mi niriba ata bee ayi shɛhira zuɣu ka nambɔzɔbo kani. 29#Yibu 24.8 Ka yi tɛhiya ni tibidarigibo bɔ n-lee simdi ninvuɣ’ so ŋun no n-taai Naawuni Bia, ka lihi ʒiɛm alikauli ʒi’ shɛli din daa mal’ o ka o be kasi, ka niŋdi din dihiri Naawuni daalibarika Shia la vi la? 30#Zal 32.35, 36 Dama ti mi ŋun yɛli, “Mani n-su biɛri bɔhibu, m mi shiri ni bɔhi biɛri labisi la.” O lan yɛli, “Yi Duuma ni kar’ o niriba saria.” 31Di mi mali dabiɛm ni nir’ kpe Naawuni ŋun nyɛ nyɛvililan’ ŋɔ nuu ni!
32Teemiya saha shɛli din gari la ha, yi ni daa bɔhim baŋ Naawuni yɛla la nyaaŋa, yi daa niŋ ania di wahala bina pam ni, amaa yi mɔbu puuni di daa bi nyaŋ ya. 33Shɛlini bɛ daa turi ya ka muɣisiri ya palɔni, ka shɛlini mi yi daa nyɛla bɛn pahi bɛ ni niŋdi yi tab’ shɛb’ lala zuɣu. 34Bɛ ni kpɛhi shɛb’ duu yɛla daa niŋ ya nambɔɣu, ka bɛ ni daa fa yi nɛma zaa la, yi daa niŋ suɣilo dee’ li ni suhupiɛlli, yi ni mi ni yi mali binshɛŋa din so ka nyɛ din ni be hal ni saha din ka bahigu la zuɣu. 35Dinzuɣu di zaŋya yi naani niŋbu bahi, dama di mali laara pam. 36Di niŋ kamaata ni yi niŋ ania din ni chɛ ka yi tum Naawuni yubu, ka nya o ni daa lɔn ya alikauli shɛl’ la palibu. 37#Hab 2.3-4 Di bemi kaman di ni sab’ shɛm la ni Naawuni yɛliya:
“Di ku lan yuui ka ŋun yɛn kana maa ku kpalim,
ka shiri kana.
38Ŋun yi taali ni Naawuni sani kul ni bela
yɛda niŋbu zuɣu,
amaa o yi tiri gbini, n suhu ku piɛl’ o zuɣu.”
39Tinim’ mi pala bɛn tiri gbini bahi yoli; amaa ti nyɛla bɛn lee niŋ yɛda ka tiligi.
Currently Selected:
Hiburunima 10: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.
