Piligu 44

Pipi’ shɛli din yiɣi ka firi

1Di saha ka Yisifu daa yɛl’ o yiŋ’ tumtumdiba kpɛma, “Niŋm’ bindira su niriba maa kpalansi ni ka di saɣi bɛ ʒibu tariga, ka zaŋ bɛ zaa yinoyino liɣiri niŋ bɛ kpalansi noya ni; 2ka zaŋ n daanzinfa pipia la niŋ ŋun nyɛ bɛ zaa biasan’ la kpalaŋ’ nol’ ni m-pah’ o kawana liɣiri zuɣu.” Ka o daa niŋ kaman Yisifu ni yɛl’ o shɛm maa. 3Ka biɛɣu daa neei ka bɛ bahi ba ka bɛ zaŋ bɛ bunsi lu soli. 4Bɛ ni daa kul yi tiŋ’ maa ni n-chaŋ biɛla ha saha shɛli, ka Yisifu daa yɛl’ o tumtumdiba kpɛma, “Yiɣisim’ kari niriba maa naba, a yi ti paai ba, nyin’ bɔhim’ ba, ‘Bɔ n-niŋ ka yi zaŋ zaɣ’ biɛɣu yo zaɣ’ viɛlli samli? Bɔ n-niŋ ka yi zu n daanzinfa pipia? 5Dina ka n dan’ mali nyuri kom, ka lan mal’ li nyar’ ashilɔni yɛla. Yi ni niŋ shɛm maa, yi tum taali.’ ”

6O ni daa mali ti paai ba, yɛtɔɣa maa ka o daa shiri zaŋ yɛli ba. 7Ka bɛ daa bɔh’ o, “Bɔ n-niŋ ka ti dan’ ti yɛl’ o ni yɛli yɛtɔɣ’ shɛŋa ŋɔ? Naawuni di wuhi gba, ka tinim’ bɛn nyɛ a daba ŋɔ ti tum tuuni ŋɔ tatabo! 8Nyama, ti ni daa nya laɣ’ shɛli ti kpalansi noya ni la, ti daa ʒi li yi Keenan tiŋgbɔŋ ni labina ti ti a, ka bɔzuɣu ka ti ni ti zu anzinfa bee salima a dan’ yiŋa? 9A yi nya li tinim’ bɛn nyɛ a daba ŋɔ ni so sani, yin’ kum’ o, ka tinim’ bɛn kpalim zaa mi leei ti dan’ daba.” 10Ka o yɛli, “Chɛliya ka di shiri niŋ kaman yi ni yɛli shɛm maa. Ti yi nya li so sani, dilan’ ni leei n dabili, ka yinim’ bɛn kpalim ku mali taali.” 11Di saha ka bɛ zaa daa paai bɛ kpalansi yomyom sɔŋ tiŋa, ka lɔrigilɔrigi di noya. 12Ka o daa vihi li. O daa daŋla bɛ kpɛm’ dini vihibu m-mali lala hal ti paai bɛ biasani dini; ka daa nya pipia maa Bɛnjamin kpalaŋa ni. 13Di saha ka bɛ daa darigi cheeicheei bɛ binyɛra, ka kpuɣi bɛ ʒiya pa bɛ bunsi zuɣu ŋ-ŋmaligi lab’ tiŋ’ maa ni.

14Juda min’ o mabihi maa ni daa paai Yisifu yiŋa, o daa na be yiŋa, ka bɛ daa damd’ o tooni. 15Ka Yisifu daa bɔhi ba, “Tuun’ bɔ ka yi lee tum maa? Yi bi mi ni nir’ kaman n ni be shɛm ŋɔ tooi nyari ashilɔni yɛla?”

16Ka Juda daa bɔh’ o, “N dana, wula ka ti lee lan yɛn yɛl’ a? Ti ka ti ni yɛn yɛli shɛm. Bee wula ka ti yɛn tooi niŋ tɔɣisi yi? Naawuni nya tinim’ bɛn nyɛ a daba ŋɔ taali ni nyɛ shɛli; ti mini bɛ ni nya pipia ŋɔ so sani maa zaa leela nyini n dan’ daba.”

17Ka Yisifu yɛli, “Naawuni di saɣi ka n niŋ lala! Kulla n ni nya pipia maa so sani maa kɔŋko n-ni leei n dabili; amaa yinim’ bɛn kpalim ŋɔ, kulimiya yi ba sani ni alaafee.”

Juda balim Yisifu Bɛnjamin zuɣu

18Di saha ka Juda daa chaŋ Yisifu sani ti yɛl’ o, “N dana, n suhir’ a, chɛ ka mani a dabili ŋɔ tɔɣisi yɛtɔɣ’ shɛli niŋ a tibili ni, a mi di chɛ ka a suhu yiɣisi bahi mani a dabili ŋɔ zuɣu, dama a ŋmanila Firawuna maŋmaŋa. 19N dana, a daa bɔhila tinim’ a daba ŋɔ, ‘Yi mali ba bee tizo?’ 20N dana, ka ti daa yɛl’ a, ti mali ba ka o nyɛla ninkurili, ka mali tizo ŋun nyɛ ti ba maa ni daa dɔɣ’ so o ninkurilim ŋɔ ni. O biɛli daa kpimi ka chɛ ka o kɔŋko n-kul kpalim o mabihi ni; ka o ba maa yur’ o pam. 21Ka a daa yɛli tinim’ a daba ŋɔ, ‘Ʒimiy’ o ka n sanna ka n ti nya o.’ 22N dana, ka ti daa yɛl’ a, ‘Bia maa ku tooi wolig’ o ba, o yi wolig’ o, o ba maa ni kpi.’ 23Di saha ka a daa yɛli tinim’ a daba ŋɔ, ‘Faashee ka yi ti ʒi yi tizo maa mali na, di yi pa lala, yin’ di ti chɛ ka n nini nyan ya.’

24“Ti ni daa paai yiŋa, ti daa zaŋ nyini n dan’ ni daa yɛli shɛm maa yɛli ti ba ŋun nyɛ a dabili maa. 25Ka ti ba maa daa ti lan yɛli ti, ‘Labimiya ti da bindira biɛla ti ti na.’ 26Ka ti daa yɛl’ o, ‘Ti ku tooi labi. Ti tizo ŋɔ yi ku dol’ ti chaŋ, dindina ti ku chaŋ; dama ti tizo maa yi ka ti sani, doo maa nini ku nya ti.’ 27Di saha ka m ba ŋun nyɛ a dabili maa daa yɛl’ ti, ‘Yi mi ni m paɣ’ daa dɔɣ’ ba la bidibis’ ayi ti ma,’ 28ka bɛ ni yino daa kani ka chɛ ma, ka n daa yɛli, ‘Biɛhiŋ kani, ŋ-ŋɔ bini n-dari chɛrisichɛris’ o; ka m bi lan nya o hal ni zuŋɔ. 29Ka yi yi zaŋ ŋumbɔŋɔ gba chaŋ, ka binshɛli ti niŋ o, yi ni chɛ ka n kpi ni n zab’ piɛla ŋɔ ni suhugarigu.’

30“Dinzuɣu pumpɔŋɔ, n yi lab’ m ba ŋun nyɛ a dabili maa sani, ka bia maa bi dol’ ti labi, dindina o nyɛvili ni tab’ bia maa nyɛvil’ la zuɣu, 31o yi ti nya ka bia maa bi dol’ ti labina, o ni kpi; ka tinim’ bɛn nyɛ a daba ŋɔ ni chɛ ka ti ba ŋun nyɛ a dabili maa kpi ni zab’ piɛla ni suhugarigu. 32Dama mani a dabili ŋɔ daa zaŋla n nyɛvili pa talima bia maa zuɣu m ba sani ka yɛli, ‘N yi ti bi ʒi bia maa kuna, di taali din’ ʒinimi n zuɣu hal ni n nyɛvili tariga.’ 33Dinzuɣu pumpɔŋɔ, n suhir’ a, chɛ ka mani a dabili ŋɔ kpalim leegi n dan’ dabili ka chɛ bia maa, ka a chɛ ka o dol’ o biɛyanim’ maa kuli. 34Dama bia maa yi bi doli ma kuli, wula ka n lee yɛn niŋ n-tooi labi m ba sani? N zɔri ni n nini nya zaɣ’ biɛ’ shɛli din yɛn paai m ba maa.”

Currently Selected:

Piligu 44: DBwDB

Highlight

Copy