Piligu 45

Yisifu wuh’ o biɛyanim’ o ni nyɛ so

1 # Tuma 7.13 Di saha ka Yisifu daa kɔŋ omaŋ’ gbaabu ninvuɣ’ shɛb’ bɛn daa ʒe o sani maa zaa tooni, ka kuhi yɛli, “Sokam yiɣisim’ n sani yi.” Dinzuɣu so daa ka Yisifu sani saha shɛl’ o ni daa yɛl’ o biɛyanim’ maa o ni nyɛ so. 2Ka o daa kuhi pam ka Ijiptinim’ ti wum o kuhigu maa, hal ka Firawuna yiŋnim’ gba ti wum o kuhigu maa. 3Ka Yisifu daa yɛl’ o biɛyanim’ maa, “Man’ Yisifu m-bala. M ba na be o nyɛvil’ ni?” Amaa ka di daa gar’ o biɛyanim’ maa pam, ka bɛ kɔŋ o garigibu. 4Di saha ka Yisifu daa yɛl’ o biɛyanim’ maa, “Saɣisimiya miri ma na.” Ka bɛ daa saɣisi mir’ o. Ka o yɛli ba, “Mani yi tizo Yisifu so yi ni daa zaŋ kɔhi Ijipti ŋɔ la m-bala. 5Ka pumpɔŋɔ di chɛliya ka yi suhuri saɣim bee n-je suli niŋ taba, yi ni daa zaŋ ma kɔhi kpe ŋɔ maa zuɣu, dama Naawuni n-daa chɛ ka n daŋ yi tooni na ni n ti fa niriba nyɛviya bahi. 6Yuma ayi ka kum ŋɔ na niŋ tiŋgbɔŋ ŋɔ ni maa, ka di na kpalim yuma anu, ka so ku ko bee n-kpuɣi puu atam. 7Naawuni n-daa chɛ ka n daŋ yi tooni na ni n ti fa yi bɛn na kpalim, ka tiligi yi niriba pam nyɛviya tin ya. 8Dinzuɣu pa yinima n-daa tahi ma kpe na, amaa Naawuni n-daa tahi ma na nti zaŋ ma leei Firawuna ba ni ŋun su o yiŋnim’ zaa fukumsi, ka lan zaŋ ma leei Ijipti tiŋgbɔŋ ŋɔ zaa zuɣulana.

9 # Tuma 7.14 “Niŋmiya yomyom kuli m ba sani ti yɛl’ o, “A bia Yisifu ni yɛli shɛm m-bɔŋɔ: Naawuni zaŋ ma leei Ijipti tiŋgbɔŋ zaa zuɣulana, dinzuɣu niŋmi yomyom yiɣisi kuli n sanna 10nti ʒini Goshɛn tiŋgban’ ni miri ma. Zaŋm’ a bihi min’ a yaansi ni a biŋkɔbbaligu ni a niɣi ni a ni mali binshɛɣukam zaa na; 11ka n ti tir’ a bindira nimaani, dama kum maa yuma na kpalim yuma anu, di yi pa lala kum maa ni ti miig’ a min’ a yiŋnim’ ni a ni mali binshɛɣukam zaa.

12“Ka pumpɔŋɔ yimaŋmaŋ’ mini n tizo Bɛnjamin zaa nini nyaya ni mmaŋmaŋa n-yaagi n noli yɛli ya yɛtɔɣa ŋɔ. 13Yɛlimiya m ba n ni nya jilima shɛli zaa Ijipti ŋɔ mini yimaŋmaŋ’ nini ni nya shɛlikam zaa. Niŋmiya yomyom chaŋ ti zaŋ m ba kuli kpe na.”

14Di saha ka Yisifu daa bɔb’ gbaag’ o tizo Bɛnjamin n-zaŋ o zuɣu pa o nyiŋgoli zuɣu kum pam; ka Bɛnjamin gba daa zaŋ o zuɣu pa o nyiŋgoli zuɣu kum pam. 15Ka Yisifu daa mɔɣis’ o biɛyanim’ maa zaa kparima ka kum pam, di nyaaŋa ka o biɛyanim’ maa daa naanyi tɔɣis’ o yɛtɔɣa.

16Lahibali ni daa ti nti to Firawuna yiŋa ni Yisifu biɛyanima n-kana, di daa niŋ Firawuna min’ o kpambaliba nyaɣisim pam. 17Ka Firawuna daa yɛli Yisifu, “Yɛlim’ a biɛyanim’ maa ni bɛ ʒilim’ bɛ bunsi ʒiya n-lab’ Keenan tiŋgbɔŋ ni 18nti zaŋ yi ba mini yi malibu kuli n sanna ka n ti tin ya tiŋgban’ viɛlli Ijipti tiŋgbɔŋ ŋɔ ni, ka yi ti diri tiŋgbɔŋ ŋɔ ni bindira yi yubu. 19‘Yɛlim’ ba yaha ni bɛ zaŋm’ tɔrokɔnim’ Ijipti tiŋgbɔŋ ŋɔ ni m-mali kuli ti zaŋ bɛ paɣiba mini bɛ bibihi ni yi ba n-kuli kpe na. 20Bɛ di chɛ ka bɛ suhuri zɔhiri zaŋ chaŋ bɛ ni mali shɛlikam ʒibu na polo, dama Ijipti tiŋgbɔŋ ŋɔ luɣ’ viɛlli shee ka bɛ yɛn ʒini.’ ”

21Ka Yaakubu bihi maa daa niŋ lala, ka Yisifu daa zaŋ tɔrokɔnim’ maa ti ba kaman Firawuna ni daa zali shɛm, ka bo bɛ sol’ ni bindira ti ba. 22Ka Yisifu daa ti bɛ zaa yinoyino chuɣu puhibu binyɛra, amaa ka daa bo anzinfa laɣibaligu pihita mini chuɣu puhibu binyɛra ata ti Bɛnjamin. 23Ka o daa bo Ijipti bin suma n-ʒili bunsi pia ni bɛ zaŋ ti ti o ba, ka lan chɛ ka bɛ su kawana mini bɔrɔbɔro ni di ti nyɛ o ba sol’ ni bindira n-ʒili bunnyama pia pahi. 24Di saha ka o daa chɛbis’ o biɛyanim’ maa. Bɛ ni daa yiɣisi ni bɛ chaŋ, ka Yisifu yɛli ba, “Miriya ka yi ŋme tab’ naŋgbankpeeni sol’ ni.”

25Di saha ka bɛ daa yi Ijipti tiŋgbɔŋ maa ni n-kuli Keenan tiŋgbɔŋ ni bɛ ba Yaakubu sani 26nti yɛl’ o, “Yisifu na be o nyɛvil’ ni, ka nyɛla Ijipti tiŋgbɔŋ zaa zuɣulana.” Ka Yaakubu yɛma daa ŋma, dama o daa bi niŋ ba yɛda.

27Amaa bɛ ni daa zaŋ yɛtɔɣ’ shɛŋa zaa Yisifu ni tɔɣisi ba n-yɛl’ o, ka o nya tɔroko’ shɛŋa Yisifu ni daa zaŋ ti na ni bɛ ti kpuɣ’ o na la, ka o suhu daa kpaŋ; 28ka Izraɛl daa yɛli, “Di saɣiya! M bia Yisifu na shiri be o nyɛvil’ ni. N ni chaŋ ti nya o pɔi ka naanyi kpi.”

Currently Selected:

Piligu 45: DBwDB

Highlight

Copy