Piligu 46

Yaakubu min’ o malibu kuli Ijipti

1Dinzuɣu ka Yaakubu daa zaŋ o ni mali binshɛɣukam zaa n-yiɣisi chaŋ Bɛrishiiba nti mali sara o ba Yisahaku Naawuni ŋɔ sani. 2Ka Naawuni daa tɔɣisi Yaakubu yɛtɔɣa ʒii puuni yuŋ. O daa bol’ o mi, “Yaakubu, Yaakubu.” Ka o saɣi ka yɛli, “N nyɛ ma.”

3Di saha ka o daa yɛl’ o, “Mani n-nyɛ Naawuni ŋun nyɛ a ba Naawuni. Di zɔri dabiɛm ni a kuli Ijipti, dama n ni chɛ ka a daŋ niriba ti leei zuliya bɛn galisi pam. 4M min’ a ni chaŋ Ijipti, ka n ti lan zaŋ a labisi kpe na yaha; ka Yisifu maŋmaŋ’ nuu ni ti daag’ a nina pɔbi.”

5Di saha ka Yaakubu daa yiɣisi Bɛrishiiba n-lu soli. Ka Yaakubu bihi daa zaŋ bɛ ba Yaakubu mini bɛ paɣiba ni bɛ bihi n-niŋ tɔroko’ shɛŋa Firawuna ni daa zaŋ ti ba ni bɛ zaŋ o niŋ n-ʒi o na la ni. 6#Tuma 7.15 Bɛ daa lan zaŋ bɛ niɣi mini bɛ neen’ shɛŋa bɛ ni daa nya Keenan tiŋgbɔŋ ni la n-kuli Ijipti. Yaakubu daa zaŋla o daŋ zaa bɛn nyɛ 7o bidibisi min’ o bipuɣinsi ni o yaansi bɛn nyɛ bidibisi mini bipuɣinsi zaa kuli Ijipti.

8Yaakubu zuliya bɛn daa dol’ o kuli Ijipti yuya m-bɔŋɔ. Yaakubu min’ o bidibisi. Rubin ŋun daa nyɛ Yaakubu bituuli la, 9ka Rubin bidibisi daa nyɛ: Hanok mini Pallu ni Hɛzirɔn ni Karimi. 10Ka Simiɔn bidibisi daa nyɛ: Jɛmuɛl mini Jamin ni Ohad ni Jachin ni Zɔhar ni Shaul ŋun daa nyɛ Keenan paɣ’ bia la. 11Ka Lɛvi bidibisi daa nyɛ: Gɛrishɔn mini Kɔhat ni Mɛrari. 12Ka Juda bidibisi daa nyɛ: Ɛr mini Onan ni Shɛla ni Pɛrɛz ni Zɛra, amaa ka Ɛr mini Onan daa kpi Keenan tiŋgbɔŋ ni; ka Pɛrɛz bidibisi daa nyɛ: Hɛzirɔn mini Hamul. 13Ka Isaka bidibisi daa nyɛ: Tola mini Puva ni Jashub ni Shimrɔn. 14Ka Zɛbulɔn bidibisi daa nyɛ: Sɛrɛd mini Ɛlɔn ni Jaaliil. 15Liya ni daa dɔɣi bidib’ shɛb’ min’ o bipuɣiŋga Daina ti Yaakubu Mɛsopoteemia la m-bala. O mini Liya zuliya bɛn nyɛ bidibisi mini bipuɣinsi zaa kalinli daa nyɛla ninvuɣ’ pihitanaata.

16Ka Gaad bidibisi daa nyɛ: Zifiɔn mini Hagi ni Shuni ni Ɛzibɔn ni Ɛr ni Arɔd ni Arɛli. 17Ka Asha bidibisi daa nyɛ: Imna mini Ishiva ni Ishivi ni Bɛraya ni bɛ tizɔpaɣ’ Sɛra. Ka Bɛraya bidibisi daa nyɛ: Hɛbɛr mini Malikiɛl, 18bɛna n-nyɛ Zilipa so Leeban ni daa zaŋ ti o bipuɣiŋga Liya la bidib’ shɛb’ o ni daa dɔɣi ti Yaakubu, ka bɛ zaa kalinli daa nyɛ ninvuɣ’ pinaayɔbu.

19Ka Yaakubu paɣ’ Reechɛl bidibisi daa nyɛ: Yisifu mini Bɛnjamin. 20#Pil 41.50-52 Ka Yisifu daa dɔɣi Manaasa mini Ifriim Ijipti tiŋgbɔŋ ni. Pɔtifɛra ŋun daa nyɛ Hɛliopolis tindan’ bipuɣiŋga Asɛnat la ni daa dɔɣi shɛb’ ti o m-bala. 21Ka Bɛnjamin bidibisi daa nyɛ: Bɛla mini Bɛcha ni Ashibɛl ni Gɛra ni Naaman ni Ɛhi ni Rɔshi ni Mupim ni Hupim ni Arid. 22Bɛmbɔŋɔ nyɛla Yaakubu mini Reechɛl zuliya. Bɛ zaa kalinli daa nyɛla ninvuɣ’ pinaanahi.

23Ka Dan bidibiga daa nyɛ Hushim. 24Ka Naftali bidibisi daa nyɛ: Jaziil mini Guni ni Jɛza ni Shilɛm. 25Biliha ŋun daa nyɛ Leeban ni daa zaŋ so ti o bipuɣiŋga Reechɛl la ni daa dɔɣi bidib’ shɛb’ ti Yaakubu m-bala; ka bɛ zaa kalinli daa nyɛla niriba ayopɔin.

26Izraɛl bihi min’ o yaansi bɛn daa dol’ o kuli Ijipti tiŋgbɔŋ ni kalinli daa nyɛla ninvuɣ’ pihiyɔbunaayɔbu. O bidibisi paɣiba daa ka bɛ kalinli maa ni. 27#Tuma 7.14 Yisifu ni daa dɔɣi bi’ shɛb’ Ijipti daa nyɛla bidibis’ ayi. Yaakubu yiŋnim’ zaa bɛn daa kuli Ijipti kalinli daa nyɛla ninvuɣ’ pisopɔin.

Yaakubu min’ o malibu be Ijipti

28Ka Yaakubu daa tim Juda ni o daŋmi tooni ti yɛli Yisifu ka o wuhi ba soli din kuni Goshɛn; ka bɛ daa mali hal ti paai Goshɛn tiŋgbɔŋ ni. 29Di saha ka Yisifu daa mali shili n-kpe o chɛchɛbuŋ’ ni chaŋ Goshɛn ni o ti nya o ba Izraɛl. Bɛ ni daa ti nya taba, ka Yisifu chaŋ o sani nti zaŋ o nuhi m-bɔb’ gbaag’ o ba n-zaŋ o zuɣu pa o nyiŋgoli zuɣu n-kum yuui. 30Ka Izraɛl daa yɛli Yisifu, “N yi kpi pumpɔŋɔ, m paɣiya, n ni nya a ni n nini ka baŋ ni a na be a nyɛvil’ ni maa zuɣu.”

31Di saha ka Yisifu daa yɛl’ o biɛyanim’ maa min’ o ba malibu maa zaa, “N ni chaŋ ti yɛli Firawuna, ‘M ba min’ o malibu ni m biɛyanim’ bɛn be Keenan tiŋgbɔŋ ni la kuli n sanna. 32Bɛ nyɛla bɛn guli piɛri mini niɣi, ka ʒi bɛ piɛri mini bɛ niɣi maa ni bɛ ni mali shɛlikam zaa na.’ 33Firawuna yi boli ya ti bɔhi ya, ‘Tuun’ bɔ ka yi lee tumda?’ 34yin’ yɛlimiy’ o, ‘Tinim’ a daba ŋɔ yaannim’ nyɛla biŋkɔbiguliba, ka ti gba nyɛ bɛn guli biŋkɔbiri ti bilim ni hal ni wayo,’ din ni chɛ ka o chɛ ka yi ʒini Goshɛn tiŋgban’ ni, dama Ijiptinim’ je piɛguliba yɛlli.”

Currently Selected:

Piligu 46: DBwDB

Highlight

Copy