Piligu 26

Yisahaku be Gɛra

1Kum daa ti lan lu tiŋgbɔŋ maa ni. Di daa nyɛla kum din pahi din daa pun lu Ibrahimma ʒiɛman’ ni la zuɣu. Ka Yisahaku daa chaŋ Filistianim’ Naa Abimilɛk sani Gɛra. 2Ka Yawɛ daa ka Yisahaku sanna ti yɛl’ o, “Di chaŋ Ijipti, kpalim be tiŋgban’ shɛli ni n ni yɛn wuh’ a. 3#Pil 22.16-18 Kul be tiŋgbani ŋɔ ni, ka m be a sani, ka niŋ alibarika niŋ a ni, ka zaŋ tiŋgbana ŋɔ zaa ti a min’ a zuliya, ka chɛ ka n ni daa lo a ba Ibrahimma alikauli shɛl’ la pali. 4N ni chɛ ka a zuliya nabi m-be kaman saŋmarisi la. N ni zaŋ tiŋgbana ŋɔ zaa ti a zuliya maa, ka dunia ŋɔ zuliya kam zaa ni ti nya alibarika la a zuliya maa zuɣu, 5Ibrahimma ni daa deei n noli ka doli n zalikpana mini n zaligu shɛŋa din pahi la zuɣu.”

6Dinzuɣu ka Yisahaku daa kpalim be Gɛra. Ka nimaani nim’ ni daa ti bɔh’ o bɔhigu zaŋ chaŋ o paɣ’ polo, 7#Pil 12.13; 20.2 o daa yɛlimi, “O nyɛla n tizɔpaɣa,” dama o daa zɔrila dabiɛm ni o yɛli ni o paɣa m-bala. O daa tɛhimi ni o yi yɛl’ lala, di pa shɛli ka nimaani nim’ maa ti ku o Ribɛka zuɣu, dama o daa nyɛla paɣ’ viɛlli. 8Yisahaku ni daa be nimaani ka di niŋ daba ayi ha, ka Filistianim’ Naa Abimilɛk daa ti lihi takɔro ni nya ka Yisahaku diɛmd’ o paɣ’ Ribɛka. 9Ka Abimilɛk daa tim ti boli Yisahaku na ti bɔh’ o, “O nyɛla a paɣa; ka bɔ n-niŋ ka a yɛli ni o nyɛla a tizɔpaɣa?”

Ka Yisahaku garigi yɛl’ o, “N tɛhimi ni n yi yɛli ni m paɣa m-bala, bɛ ni ku ma o zuɣu.”

10Ka Abimilɛk daa bɔh’ o, “Tuun’ bɔ ka a lee tum ti maa? Di pa shɛli ka yaŋɔnim’ ni so di zaŋ a paɣ’ maa dɔni. A naan chɛ ka di taali ʒin’ ti zuɣu.” 11Dinzuɣu ka Abimilɛk daa kpah’ o niriba zuɣu ni yɛli, “Ŋunkam niŋ doo ŋɔ bee o paɣ’ ŋɔ shɛli, bɛn’ kum’ o.”

12Ka Yisahaku daa ko bɛ tiŋgbani maa ni biri n-daa ti kpuɣi di daatam ka di gari o ni daa zaŋ shɛm biri maa ʒii bukɔbiga zuɣu. Ka Yawɛ daa niŋ alibarika niŋ o ni. 13Ka o nyamma daa yɛligi ka o leei bundana. 14O daa mali piɛri mini niɣi pam ni tumtumdiba gba pam, ka Filistianim’ daa ti zabir’ o nyuli di zuɣu. 15Filistianim’ maa daa ŋari kɔbil’ shɛŋa o ba Ibrahimma ni daa na be o nyɛvili ni ka o tumtumdiba gbi la.

16Di saha ka Abimilɛk daa yɛli Yisahaku, “Yiɣisim’ ti sani, dama a mali kpiɔŋ gari ti.” 17Dinzuɣu ka Yisahaku daa yiɣisi chaŋ ti ʒini Gɛra vinvamli ni. 18Ka Yisahaku daa lan lab’ gbi kɔbil’ shɛŋa bɛ ni daa pun gbi o ba Ibrahimma ʒiɛman’ ni la, dama Filistianim’ n-daa ŋar’ li Ibrahimma kum nyaaŋa. Ka Yisahaku daa zaŋ o ba ni daa zaŋ yu’ shɛŋa bol’ kɔbilisi maa la n-lan bol’ li.

19Amaa ka Yisahaku biŋkɔbiguliba daa gbi kɔbiliga vinvamli maa ni n-nya kom. 20Ka Gɛra biŋkɔbiguliba daa kana ti niŋ Yisahaku biŋkɔbiguliba maa naŋgbankpeeni yɛli, “Ti kom m-bala.” Dinzuɣu ka Yisahaku daa boli kɔbiliga maa yuli Ɛsɛk, bɛ ni daa niŋ o naŋgbankpeeni maa zuɣu.

21Di nyaaŋa ka Yisahaku biŋkɔbiguliba maa daa lan gbi kɔbil’ shɛli, ka bɛ daa lan niŋ ba naŋgbankpeeni di zuɣu; dinzuɣu ka Yisahaku daa boli kɔbiliga maa yuli dimdi kɔbiliga. 22Ka o daa yiɣisi tirisi tooni nti lan gbi kɔbil’ shɛli, ka so daa bi lan niŋ o naŋgbankpeeni di zuɣu yaha; dinzuɣu ka o daa boli di mi yuli Rɛhɔbɔt ka yɛra, “Yawɛ yipa ti ti luɣ’ shɛli din mali palo pumpɔŋɔ, ka ti ni tɔŋ tiŋgbani ŋɔ ni.”

23Ka Yisahaku daa ti yiɣisi nimaani chaŋ Bɛrishiiba. 24Ka Yawɛ daa ka o sanna dindali maa yuŋ ti yɛl’ o, “Mani n-nyɛ a ba Ibrahimma Naawuni, di zɔri dabiɛm, n ni be a sani, ka niŋ alibarika niŋ a ni, ka chɛ ka a zuliya nab’ pam n dabili Ibrahimma zuɣu.” 25Ka Yisahaku daa me sara maligu bimbini zali nimaani jɛm Yawɛ, ka zaŋ o tanti suɣili kpa nimaani. Ka o tumtumdiba daa lan gbi kɔbil’ shɛli nimaani yaha.

Yisahaku mini Abimilɛk lo tab’ alikauli

26 # Pil 21.22 Di saha ka Abimilɛk min’ o saawaralana Ahuzat ni o sapashin’ kpɛm’ Fikol daa yi Gɛra chaŋ Yisahaku sani. 27Ka Yisahaku daa bɔhi ba, “Bɔzuɣu ka yi ka n sanna, yi daa bi je ma mi ka kari ma yi ya?”

28Ka bɛ garigi yɛl’ o, “Ti mi ka biɛhiŋ kani ni Yawɛ be a sani, dinzuɣu chɛ ka ti min’ a laɣim lo tab’ alikauli 29ni a ku niŋ ti zaɣ’ biɛɣu kaman ti gba ni daa bi shih’ a bee n-niŋ a shɛli, amaa ka naɣ’ niŋ a la zaɣ’ viɛlli hal ti chɛ ka a yi n-chaŋ ni alaafee la. Pumpɔŋɔ Yawɛ niŋ alibarika niŋ a ni.” 30Ka Yisahaku daa niŋ ba saani ka bɛ di ka nyu. 31Ka biɛɣ’ daa neei ka bɛ daŋ yiɣisibu lo tab’ alikauli, ka Yisahaku daa chɛbisi ba ka bɛ kuli ni suhudoo.

32Ka Yisahaku tumtumdiba daa ka o sanna dindali maa ti yɛl’ o bɛ ni gbi kɔbil’ shɛli yɛla, ka yɛli, “Ti nya kom.” 33Ka o daa boli kɔbiliga maa yuli Shiiba.#26.33 SHIIBA: Hiburuli ni di gbinni nyɛla “Pɔri kɔbiliga”. Dinzuɣu ka bɛ booni tiŋ’ maa yuli Bɛrishiiba hal ni zuŋɔ.

Iso kpuɣi tinzun paɣiba

34Iso ni daa ti paai yuun’ pihinahi saha shɛli ka o daa kpuɣi Judit ŋun daa nyɛ Hiti nir’ ŋun yuli daa booni Bɛri la bipuɣiŋga mini Basɛmat ŋun gba nyɛ Hiti nir’ ŋun yuli daa booni Ɛlɔn la bipuɣiŋga. 35Ka bɛ daa ti Yisahaku mini Ribɛka suhusaɣiŋgu pam.

Currently Selected:

Piligu 26: DBwDB

Highlight

Copy