Piligu 25

Ibrahimma zuliya shɛb’ bɛn pahi

(1 Yɛlikura 1.32-33)

1Ibrahimma daa lan kpuɣi paɣ’ so. O yuli n-daa booni Kɛtuura. 2Ka o daa dɔɣi Zimiran mini Jokishan ni Mɛdan ni Midian ni Ishibak ni Shua. 3Ka Jokishan daa nyɛ Shiiba mini Dɛdan ba. Ka Dɛdan bihi daa nyɛ Ashurim mini Lɛtushim ni Liummim. 4Ka Midian mi bihi daa nyɛ Ɛfa mini Ɛfɛr ni Hanok ni Abida ni Ɛldaa. Bɛmbɔŋɔ zaa daa nyɛla Kɛtuura bihi min’ o yaansi.

5Ka Ibrahimma daa zaŋ o ni su binshɛlikam zaa ti Yisahaku. 6Amaa o paɣ’ shɛb’ bɛn kpalim la bihi bɛna, pina ka o daa ti ba, o ni daa na be o nyɛvil’ ni saha shɛli. Ka o daa chɛ ka o bihi bɛn kpalim maa chaŋ ti be tiŋgbɔŋ maa ni wulimpuhili polo ka chɛ Yisahaku.

Ibrahimma kum ni o sɔɣibu yɛla

7Ibrahimma yuma daa nyɛla yuun’ kɔbiga ni pisopɔinnaanu. 8O daa kurigimi zaa ka naanyi kpi m-pah’ o yaannim’ zuɣu. 9Ka Yisahaku mini Ishimail bɛn daa nyɛ o bidibisi la daa zaŋ o ti sɔɣi Makipɛla siliga din daa be Zɔhar ŋun daa nyɛ Hiti nir’ la bia Ɛfurɔn palo din be Mamri wulimpuhili polo la ni. 10#Pil 23.3-16 Ibrahimma n-daa da palo maa Hitinim’ sani. Nimaani ka bɛ daa sɔɣi Ibrahimma min’ o paɣ’ Zara. 11Ibrahimma kum nyaaŋa, Naawuni daa niŋ alibarika niŋ o bia Yisahaku ni. Yisahaku daa bela Bɛrilahairoi.

Ishimail zuliya

(1 Yɛlikura 1.28-31)

12Ibrahimma bia Ishimail ŋun nyɛ Haga, Zara dab’ paɣa ŋun daa nyɛ Ijipti paɣ’ ni daa dɔɣ’ so la zuliya m-bɔŋɔ. 13Ishimail bidibisi yuya kaman bɛ ni daa dɔɣ’ ba pa tab’ shɛm m-bɔŋɔ: Nɛbaiɔt ŋun daa nyɛ o bituuli la mini Kɛdar ni Adibiil ni Mibisam 14ni Mishima ni Duma ni Masa 15ni Hadad ni Tɛma ni Jɛturi ni Nafish ni Kɛdɛma. 16Bɛna n-daa nyɛ Ishimail bidibisi, ka bɛ daa zaŋ bɛ yuya m-boli bɛ tiŋkpansi mini bɛ ni daa be luɣ’ shɛŋa. Bɛ daa nyɛla toondaannim’ pinaayi bɛ zuliyanim’ ni. 17Ishimail daa niŋla yuun’ kɔbiga ni pihitanaayopɔin, ka naanyi kpi m-pah’ o yaannim’ zuɣu. 18O zuliya daa bela Havila mini Shur luɣ’ shɛli din daa tuhi Ijipti dɛde zaŋ labi Asiria polo la. Nimaani ka bɛ daa chaŋ ti be ka chɛ Ibrahimma zuliya bɛn zaa kpalim la.

Iso mini Yaakubu dɔɣibu

19Ibrahimma bia Yisahaku zuliya ni nyɛ shɛm m-bɔŋɔ: Ibrahimma n-daa nyɛ Yisahaku ba. 20Yisahaku daa nyɛla yuun’ pihinahi nira saha shɛl’ o ni daa kpuɣi Ribɛka ŋun daa nyɛ Bɛtuɛl Aram nir’ ŋun daa yi Mɛsopoteemia la na bipuɣiŋga la. Ribɛka daa nyɛla Leeban ŋun nyɛ Aram nir’ la tizɔpaɣa. 21Ka Yisahaku daa suhi Yawɛ ti o paɣ’ maa, dama o daa nyɛla paɣiŋoo; ka Yawɛ daa deeg’ o suhigu maa, ka chɛ ka o paɣ’ Ribɛka niŋ pua. 22Ka bihi daa ti var’ o pul’ ni ka o yɛli, “Di yi yɛn nyɛ ŋ-ŋɔ n ni be?” Ka o daa chaŋ ni o ti bɔhi Yawɛ nya. 23#Rom 9.12 Ka Yawɛ daa yɛl’ o,

“Zuliya ayi m-be a pul’ maa ni.

Niriba ayi ka a ti yɛn dɔɣi,

ka bɛ ni ti woligi.

Yino ni ti mali kpiɔŋ gari yino;

ka kpɛm’ ni ti ŋmaligi

jɛm biasani.”

24Ka Ribɛka dɔɣibu dali daa ti paai, ka jahi m-be o pul’ ni. 25Ka ŋun daŋ tooni daa yina m-mɔha, ka o niŋgbuŋ zaa mali kɔbiri m-be kaman biŋkɔbigu kɔbiri siturili la; ka bɛ daa bol’ o yuli Iso.#25.25 ISO: Hiburuli ni yuli ŋɔ gbinni nyɛla, “Ŋun mali kɔbiri” bee “Kɔbirilana”. 26Ka o tizo daa gbib’ o napɔŋkpaa n-dol’ o yina; ka bɛ daa bol’ o mi yuli Yaakubu.#25.26 YAAKUBU: Hiburuli ni yuli ŋɔ gbinni nyɛla, “O gbaai napɔŋkpaa”. Di nyɛla bɛ ni daa yɛri yɛtɔɣ’ shɛli ka di gbinni nyɛla “O yɔhim ma”. Yisahaku daa nyɛla yuun’ pihiyɔbu nira saha shɛli Ribɛka ni daa dɔɣi jahi maa.

Iso zaŋ o kpamdi taɣi bindirigu

27Bihi maa ni daa ti zooi, Iso daa niŋla tɔha biiŋa ŋun daa kul be mɔɣu ni; ka Yaakubu mi be baalim m-be yiŋa. 28Yisahaku daa yurila Iso, dama o daa yuri mɔɣu ni nimdi pam, ka Ribɛka mi daa yuri Yaakubu.

29Dahin shɛli ka Yaakubu daa ti duɣi ʒiɛri, ka Iso yi mɔɣu ni na ka kum wum o pam, 30ka o daa yɛli Yaakubu, “Niŋm’ a ʒiɛri din mɔhi ŋɔ ti ma ka m piɛbi, dama kum wum ma pam.” Dinzuɣu ka bɛ daa bol’ o Ɛdom.#25.30 ƐDOM: Hiburuli ni di gbinni nyɛla, “Zaɣ’ ʒee”.

31Ka Yaakubu daa yɛl’ o, “Zaŋm’ a kpamdi ti ma pɔi.”

32Ka Iso yɛl’ o, “M mini kum kul chɛ tab’ la kpe ni kpe, ka buchi bɔ ka kpamdi lan yɛn ku ma?”

33 # Hib 12.16 Ka Yaakubu yɛl’ o, “Faashee ka a po.” Ka Iso daa shiri po, ka zaŋ o kpamdi maa ti Yaakubu. 34Ka Yaakubu daa zaŋ bɔrɔbɔro mini tuya ʒiɛri maa ti Iso ka o di ka nyu, ka yiɣisi chaŋ o chandi shee. Lala ka Iso daa niŋ ʒiɛm o kpamdi maa.

Currently Selected:

Piligu 25: DBwDB

Highlight

Copy