Yibu 1
1
Bɛ niŋ Izraɛlnim’ putɔɣu Ijipti
1 #
Pil 46.8-27
Yaakubu bidibisi bɛn mini bɛ malibu daa kuli Ijipti yuya m-bɔŋɔ: 2Rubin mini Simiɔn ni Lɛvi ni Juda 3ni Isaka ni Zɛbulɔn ni Bɛnjamin 4ni Dan ni Naftali ni Gaad ni Asha. 5Yaakubu zuliya kalinli daa nyɛla ninvuɣ’ pisopɔin: Yisifu ŋun’ daa pun bela Ijipti. 6Di nyaaŋa ka Yisifu min’ o mabihi maa ni bɛ ʒiɛman’ ni niriba zaa daa ti kpi. 7#Tuma 7.17 Amaa ka Izraɛlnim’ maa daa dɔɣi bihi n-nabi ka yɛligi pam, ka mali yaa m-pali Ijipti tiŋgbɔŋ maa ni zaa.
8 #
Tuma 7.18
Ka na’ palo daa ti di Ijipti, ŋun’ daa bi mi Yisifu. 9Ka ŋun’ daa yɛl’ o niriba, “Nyamiya, Izraɛlnim’ ŋɔ zooya, ka lan mali yaa gari ti. 10#Tuma 7.19 Chɛliya ka ti bo so’ shɛli din ni chɛ ka bɛ ku lan nabi. Di yi pa lala ti mini ti dimnim’ yi ti yɛn tuhi, bɛ ni pahi ti dimnim’ maa zuɣu tuhi ti ka nya soli zo n-yi ti tiŋgbɔŋ ŋɔ ni.” 11Dinzuɣu ka bɛ daa bo tuma zuɣulaannim’ ti ba ni bɛ chɛ ka bɛ tum tuun’ kpɛma hal ka bɛ shia ti yi bɛmaŋ’ ni, ka daa chɛ ka bɛ me Firawuna nɛma zaashee fɔntinsi ti o Pitom mini Ramɛsis. 12Amaa bɛ ni daa kul niŋdi ba fitiina shɛm, lala ka bɛ zuliya maa daa kul nabiri ka yɛligiri pahira. Ka jɛlinsi mini dabiɛm daa kpe Ijiptinim’ maa suhuri ni zaŋ chaŋ bɛ polo. 13Ka Ijiptinim’ daa muɣisiri ba ka bɛ tumdi tuun’ kpɛma. 14Bɛ daa chɛ ka Izraɛlnim’ maa nɔrila tandi, ka ŋmari bilichiisi, ka tumdi bɛ puri ni tuma zaa, ka lan muɣisiri ba ka bɛ tumdi tuun’ kpɛma ni di chɛ ka biɛhigu niŋ ba tom.
15Ka Ijipti naa maa daa ti lan yɛli Hiburunim’ maa paɣidɔɣisɔtɔɣindiba bɛn yuya daa booni Shifira mini Pua, 16“Hiburu paɣ’ yi lan yɛn dɔɣi ka yi chaŋ ni yi ti deei bia, ka nya ka bia maa nyɛla bidibiga, yin’ kumiy’ o, amaa di yi nyɛ bipuɣiŋga, yin’ chɛliy’ o.” 17Amaa ka paɣidɔɣisɔtɔɣindiba maa daa zɔri Naawuni ka bi niŋdi Ijipti naa ni daa yɛli ni bɛ niŋm’ shɛm maa, bɛ daa bi kuri bidibbihi maa. 18Ka Ijipti naa maa daa ti boli paɣidɔɣisɔtɔɣindiba maa na ti bɔhi ba, “Wula ka yi bi kuri bidibbihi maa ka chɛ ba?”
19Ka paɣidɔɣisɔtɔɣindiba maa daa yɛli Firawuna, “Hiburu paɣiba bɛn’ bi be kaman Ijipti paɣiba ni be shɛm, bɛ mali yaa pam. Paɣidɔɣisɔtɔɣinda ti yɛn paai ka bɛ pun dɔɣi.” 20Ka Naawuni daa zaŋ o nuu pa paɣidɔɣisɔtɔɣindiba maa zuɣu, ka niriba maa daa lan nab’ pahi ka niŋ yaa. 21Paɣidɔɣisɔtɔɣindiba maa ni daa zɔri Naawuni maa zuɣu ka Naawuni daa ti ba bɛ dahalali bihi. 22#Tuma 7.19 Di saha ka Firawuna daa wuh’ o niriba maa zaa, “Hiburunim’ maa yi lan dɔɣi bidibiga, yin’ zaŋm’ o ti lɔhi Nail Mɔɣili ni, amaa chɛliya bipuɣinsi bɛna.”
Currently Selected:
Yibu 1: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.
