Yibu 2

Anab’ Musa dɔɣibu yɛla

1Lɛvi do’ so daa ti kpuɣi Lɛvi zuliya ni paɣa. 2#Tuma 7.20; Hib 11.23 Ka paɣ’ maa daa ti niŋ pua n-dɔɣi bidibiga, ka paɣ’ maa daa nya ka o bia maa viɛli pam, ka o daa zaŋ o sɔɣiri hal ni chira ata. 3O ni daa ti nya ka o ku lan tooi sɔɣ’ o yaha, ka o daa kpuɣi bɛ ni zaŋ kulikaɣa wuɣi piɛ’ shɛli n-zaŋ kootaali tanta li din ni chɛ ka kom ku tooi kpe di ni. Ka o daa zaŋ o bia maa niŋ di ni n-zaŋ li chaŋ ti zali kaɣili ni mɔɣili duli. 4Ka bia maa tizɔpaɣa daa ʒe kpaŋa ni o nya din yɛn niŋ’ o.

5Ka Firawuna bipuɣiŋga daa ti ka mɔɣili maa ni na ni o ti su kom. Ka o min’ o paɣisara daa baɣisiri mɔɣili maa chana, ka o daa ti nya piɛɣu maa ni su kaɣili ni, ka o tim o paɣisara maa ni yino ni o chaŋ ti zaŋ li na. 6O ni daa zaŋ li na ka o piligi li n-nya bia maa, ka bia maa dii gbaai kuhigu. Ka di daa niŋ o yoli, ka o yɛli, “Hiburunim’ bihi la ni yino m-bala.”

7Di saha ka bia maa tizɔpaɣ’ maa daa bɔhi Firawuna bipuɣiŋga maa, “N cham’ ti boli Hiburu paɣ’ so ŋun mali bihim na ka o ti mɔɣis’ a bia maa bihim ti a?”

8Ka Firawuna bipuɣiŋga maa daa yɛl’ o, “Chama.” Di saha ka bipuɣiŋga maa daa zo n-kuli ti boli bia maa ma na. 9Ka Firawuna bipuɣiŋga maa daa yɛl’ o, “Zaŋmi bia ŋɔ kuli ti wubis’ o ti ma ka n yo a.” Di saha ka paɣ’ maa daa zaŋ bia maa kuli ti wubis’ o. 10#Tuma 7.21 Ka bia maa daa ti kpaŋ ka o zaŋ o tahi ti ti nabipuɣiŋga maa, ka o zaŋ o leeg’ o bia, ka bol’ o yuli Musa,#2.10 MUSA: Hiburuli ni Musa gbinni nyɛla “Bɛ ni yihi so kom ni na.” dama o daa yɛlimi, “Kom ni ka n yih’ o na.”

Musa zo n-kuli Midian

11 # Hib 11.24 #Tuma 7.23-28 Musa ni daa ti bi doo, ka o daa ti yi n-chaŋ o niriba sani nti nya bɛ ni tumdi tuun’ kpeen’ shɛŋa, ka daa ti nya Ijipti do’ so ni buri o niriba Hiburunim’ maa ni yino. 12Ka o daa yul’ o luɣa ni ka bi nya so, ka daa ŋme n-ku Ijipti doo maa n-zaŋ o pi bihigu ni. 13N-daa yi biɛɣu ka o lan yi n-chani ti nya Hiburunim’ maa niriba ayi ni zabira, ka o daa yɛli bɛ ni ŋun ka yɛlimaŋli “Bɔ n-niŋ ka a ŋmɛr’ a mabia maa?”

14Ka dilan’ maa daa bɔh’ o, “Ŋuni n-lee zaŋ a leei ti zuɣulana ni ti sariakarita? A lomi ni a ku ma kaman a ni sa ku Ijipti doo la shɛm la?” Di saha ka dabiɛm daa gbaai Musa, ka o tɛhi ni o ni sa niŋ shɛli maa yi palo. 15#Tuma 7.29; Hib 11.27 Ka Firawuna daa wum di yɛla, ka bɔri ni o ku Musa. Amaa ka Musa daa zo Firawuna sani n-kuli Midian tiŋgbɔŋ ni. Dahin shɛli ka o daa ti ʒi kɔbiliga gbini 16ka bipuɣins’ ayopɔin bɛn daa nyɛ Midian maligumaana so bihi daa ti kana ti toori kom niŋdi bɔɣili ni ni bɛ nyuhi bɛ ba biŋkɔbiri. 17Ka piɛguliba shɛb’ daa kana ti kari ba, amaa ka Musa daa yiɣisi zab’ bɛ zuɣu ka niŋ kom ti bɛ piɛri maa ka bɛ nyu. 18Bɛ ni daa ti kuli yiŋa, ka bɛ ba Riuɛl#2.18 RUƐL: Luɣ’ shɛli polo bɛ bolila Riuɛl “Jɛtro.” Yuya ayi maa zaa yɛrila ninvuɣ’ yino yɛla. bɔhi ba, “Ka wula ka yi ti daŋ kundina lala?”

19Ka bɛ daa yɛl’ o, “Ijipti do’ so n-fa ti piɛguliba maa nuu ni bahi hal ka ŋɔŋ kom ti ti ka ti nyuhi ti biŋkɔbiri maa.”

20Ka o daa bɔh’ o bipuɣinsi maa, “Ka o be ya? Wula ka yi chɛ o zali samban’ ni? Bolimiy’ o na ka o ti di bindirigu.”

21Ka Musa daa saɣi m-be bɛ sani, ka o daa zaŋ o bipuɣiŋga Zipɔra ti Musa. 22Ka o daa zaŋ o dɔɣi bidibiga ka yɛli, “Sana n-nyɛ ma tiŋgbɔŋ ŋɔ ni.” Dinzuɣu ka o daa boli bia maa yuli Gɛrishom.#2.22 GƐRISHOM: Hiburuli ni yuli ŋɔ gbinni nyɛla “Sana.”

23Ka di daa mali ti niŋ yuun’ shɛŋa, ka Ijipti naa maa daa kpi. Ka Izraɛlnim’ maa daa na kul be bɛ dabitim maa ni fabinda, ka kuhiri bɔri sɔŋsim. Ka bɛ dabitim ni kuhigu maa daa paai Naawuni. 24#Pil 15.13-14 Ka Naawuni daa wum bɛ fabila maa, ka teeg’ o ni daa lo Ibrahimma mini Yisahaku ni Yaakubu alikauli shɛl’ la yɛla. 25Ka Naawuni daa lihi lzraɛlnim’ maa, ka baŋ ni bɛ be muɣisigu ni.

Currently Selected:

Yibu 2: DBwDB

Highlight

Copy