Matiu 22
22
Amiliya lɔbu chuɣu puhibu ŋahili
(Luk 14.15-24)
1Yisa daa lan ŋahi niriba ŋaha yɛli, 2“Alizanda nam ŋmanila na’ so ŋun daa yɛn puh’ o bia daamiliya lɔbu chuɣu, 3ka daa tim o yiŋbihi ni bɛ ti yɛli o ni daa pun boli ninvuɣ’ shɛba ni bɛ ka amiliya lɔbu chuɣu maa ni na; amaa ka bɛ daa zaɣisi kandina. 4Ka o daa lan tim o yiŋbi’ shɛb’ yaha, ka yɛli ba, ‘Chamiya ti yɛli n ni pun boli ninvuɣ’ shɛb’ la ni m pun mali bindirigu dibu shili; ka pun ku naɣilahi mini naɣipol’ kpaba, ka mali binshɛɣukam shili, dinzuɣu ni bɛ kam’ amiliya lɔbu chuɣu maa ni na.’ 5Amaa ka o ni daa boli ninvuɣ’ shɛb’ maa zaŋ li niŋ asahi, ka bɛ ni yino zaŋ kpa o puu polo, ka yino chaŋ o tuma shee, 6ka bɛn kpalim mi gbahi naa maa yiŋbihi maa n-dihi ba vi, ka ku ba. 7Ka naa maa suhu daa yiɣisi pam, ka o tim o tɔbbihi ni bɛ chaŋ ti ku ninvuɣ’ kuriba maa, ka nyo bɛ tiŋ’ maa buɣim. 8Di saha ka naa maa daa yɛl’ o yiŋbihi, ‘Amiliya lɔbu maa shili biya, amaa n ni pun boli ninvuɣ’ shɛb’ la bi simdi li. 9Dinzuɣu yimiya doli solɔri m-boli yi ni kul nya shɛb’ zaa ka bɛ ka amiliya lɔbu chuɣu ŋɔ ni na.’ 10Ka o yiŋbihi maa daa yi n-doli solɔri maa laɣim bɛ ni nya ninvuɣ’ shɛb’ zaa na; ninvuɣ’ biɛri mini ninvuɣ’ suma hal ka amiliya lɔbu duu maa ti tiɣi salo.
11 “Ka naa maa daa ti kpɛna n-gbaai salo maa yulibu nti nya do’ so ka o bi ye amiliya lɔbu chuɣu maa binyɛrigu. 12Ka o bɔh’ o, ‘Zɔri, wula ka a lee niŋ hal ti kpe kpe na ni ka bi ye amiliya lɔbu chuɣu ŋɔ binyɛrigu?’ Ka o kɔŋ garigibu. 13#Mat 8.12; 25.30; Luk 13.28 Di saha ka naa maa daa yɛl’ o yiŋbihi, ‘Lomiy’ o nuhi min’ o naba n-zaŋ o ti bahi kpaŋ’ ha zibisim shee. Nimaani ka niriba ni ti fabili ka dim bɛ nyina.’ ”
14Yisa daa lan yɛli, “Niriba pam ka bɛ boli nti gahimla biɛla.”
Farigu yɔbu
(Maak 12.13-17; Luk 20.20-26)
15Di saha ka Farisiinim’ daa chaŋ ti to jina ni bɛ gbaai bɛ ni yɛn niŋ shɛm puɣisi gbaai Yisa o yɛtɔɣa ni. 16Ka bɛ daa tim bɛ nyaandoliba mini Hɛrɔd nyaanzaaniba o sani; ka bɛ chaŋ ti yɛl’ o, “Karimba, ti mi ni a nyɛla yɛlimaŋyɛra, ka wuhiri Naawuni soli ni yɛlimaŋli, ka bi zɔri sal’ kam nini, dama a bi zɔri niriba nini bɛ ni ʒe zaashe’ shɛŋa ni zuɣu. 17Yɛlim’ ti a ni tɛhiri shɛm: Di luhiya ni ti yo farigu Naa Siiza sani bee di bi luhi?”
18Amaa ka Yisa daa baŋ bɛ ninvuɣ’ biɛtali maa ka bɔhi ba, “Yinim’ bilikɔɣinim’ ŋɔ, bɔ n-niŋ ka yi zahindi ma? 19Zaŋmiya laɣ’ shɛli yi ni mali yɔri farigu zuɣu maa na ka n nya.”
Ka bɛ daa zaŋ laɣifu na ti ti o. 20Ka Yisa bɔhi ba, “Ŋun’ daanfooni mini sabbu n-lee be di ni ŋɔ?”
21Ka bɛ yɛl’ o, “Naa Siiza dini.”
Ka o yɛli ba, “Dinzuɣu Naa Siiza ni su shɛli, yin’ zaŋmiya li ti o, ka Naawuni mi ni su shɛli, yin’ zaŋmiya li ti ŋun’ Naawuni.”
22Bɛ ni daa wum lala maa ka di gari ba pam, ka bɛ daa chɛ o ka chaŋ.
Kum ni neebu
(Maak 12.18-27; Luk 20.27-40)
23 #
Tuma 23.8
Dindali maa ka Sadusiinim’ bɛn daa nyɛ bɛn yɛri ni kum ni neebu kani la daa ka Yisa sanna 24#Zal 25.5 ti bɔh’ o, “Karimba, Anabi Musa daa yɛliya ni doo yi kpuɣi paɣa ka na bi zaŋ o dɔɣi bihi ka kpi ka chɛ o, o tizo ŋun’ kpuɣim’ o pakoli maa n-dɔɣ’ bihi ti o biɛli maa. 25To, mapuuni bih’ ayopɔin n-daa be ti ni, ka bikpɛm’ sani ti kpuɣi paɣa, ka bi zaŋ o dɔɣi bihi ka kpi, ka ŋun pa o zuɣu kpuɣ’ o pakoli maa. 26Lala ka di daa niŋ ŋun pah’ ayi mini ŋun pah’ ata m-mali hal ti paai ŋun pah’ ayopɔin maa. 27Bɛ zaa kalinsi nyaaŋa ka paɣ’ maa gba daa kpi. 28Dinzuɣu kum ni neebu dali, bɛ niriba ayopɔin maa ni, ŋun’ paɣa n-lee ni ti nyɛ o? Dama bɛ zaa daa kpuɣ’ o mi.”
29Ka Yisa daa garigi yɛli ba, “Yi chirimya, dama yi ʒi din be Naawuni Kundi ni, ka bi lan mi Naawuni yiko gba. 30Niriba yi ti neei kum ni, bɛ bi lan yɛn kpuɣiri paɣiba bee n-zaŋdi bɛ bipuɣinsi tiri dɔbba; bɛ ti kul yɛn bemi kaman malaikanim’ bɛn be alizanda ni la. 31Ka di yi nyɛla kpiimba kum ni neebu yɛla, yi na bi karim Naawuni ni daa yɛli ya shɛm la? 32#Yibu 3.6 O ni daa yɛli shɛm m-bɔŋɔ: Mani n-nyɛ Ibrahimma mini Yisahaku ni Yaakubu Naawuni. Naawuni pala kpiimba Naawuni, amaa o nyɛla nyɛviyanim’ Naawuni.”
33Salo maa ni daa wum o ni yɛli shɛm maa, ka o wuhibu maa gari ba pam.
Naawuni zaligu din nyɛ kpɛma
(Maak 12.28-34; Luk 10.25-28)
34Farisiinim’ ni daa wum ni Yisa tɔɣisi luhi Sadusiinim’ maa, ka bɛ daa laɣim tab’ ka o sanna. 35#Luk 10.25-28 Ka bɛ ni yino ŋun daa nyɛ Naawuni zaligubaŋda ti bɔhi Yisa bɔhigu ni o zahim o. 36O daa bɔh’ o mi, “Karimba, Naawuni fukumsi zaligunim’ ni, dini n-lee nyɛ kpɛma?”
37 #
Zal 6.5
Ka Yisa yɛl’ o, “Yum’ a Duuma Naawuni ni a suhu zaa min’ a shia zaa ni a tɛha zaa. 38Dimbɔŋɔ n-nyɛ zaligu din daŋ tooni ni din nyɛ kpɛma. 39#Lɛv 19.18 Ka din pa di zuɣu ŋ-ŋman’ li mi nyɛla, ‘Yum’ a ʒiʒiinikpee kaman amaŋmaŋ’ la.’ 40Naawuni fukumsi zaligunim’ din zaa kpalim min’ anabinim’ yɛligu zaa tamla zaligunima ayi ŋɔ zuɣu.”
Masia ŋun nyɛ Naa Dauda yaaŋa
(Maak 12.35-37; Luk 20.41-44)
41Farisiinim’ ni daa laɣim Yisa sani maa ka o bɔhi ba, 42“Wula ka yi lee tɛhiri Masia yɛla? Ŋun’ yaaŋa n-lee nyɛ o?”
Ka bɛ yɛl’ o, “O nyɛla Naa Dauda yaaŋa.”
43Ka o bɔhi ba, “Ka di chaŋ wula ka Naawuni Shia Kasi yiko ni ka Naa Dauda daa bol’ o o Duuma? O daa yɛliya:
44 #
Yila 110.1
Ti Duuma yɛli n Duuma,
‘Ʒinimi n nudirigu polo
hal ka n ti nyaŋ a dimnim’ ti a,
ka a du n-tam bɛ zuɣu.’
45 Ka Naa Dauda yi daa bol’ o o Duuma, di chaŋ wula ka o ni lan nyɛ ŋun’ Naa Dauda yaaŋa?”
46Ka so daa bi tooi garig’ o bɔhigu maa; ka dindali maa zaŋ chana, so daa bi lan buɣisi ni o bɔh’ o bɔhigu yaha.
Currently Selected:
Matiu 22: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
