Matiu 23

Yisa to m-piligi zaligubaŋdiba bilikɔnsi tuma

(Maak 12.38-39; Luk 11.43, 46; 20.45-47)

1Di saha ka Yisa daa yɛli salo min’ o nyaandoliba, 2“Naawuni zaligubaŋdiba mini Farisiinima n-zani Anabi Musa zaashee; 3dinzuɣu niŋmiya bɛ ni wuhi ya ni yi niŋ shɛlikam, amaa ka di niŋdiya bɛ ni niŋdi shɛm, dama bɛ wuhiri din tuhi, amaa ka bɛmaŋmaŋ’ lee bi dol’ li. 4Bɛ lɔri ʒi’ tibisa din ʒibu to ʒiini niriba, amaa ka bɛmaŋmaŋ’ ku saɣi zaŋ bɛ nubil’ gba wuɣi li. 5#Mat 6.1; Kal 15.38; Zal 6.8 Bɛ tumdi bɛ tuma zaa la niriba nini zuɣu, ka niŋdi bɛ ni piriti sab’ shɛŋa mini din pari bɛ gbiɛri zuɣu ka di nyɛ zaɣ’ yɛlima, ka chɛri ka bɛ binyɛra naŋgbanzusa #23.5 BINYƐRA NAŊGBANZUSA: Bɛ daa yɛrila binyɛra din mali naŋgbanzusa ka di wuhiri bɛ ni zaŋ bɛmaŋ ti Naawuni shɛm. Lihimi Kal 15.37-41 puuni. nyɛ zaɣ’ wɔɣila, 6ka yuri jilima ʒiishɛhi ʒinibu bɛ churi puhibu ni, ka yuri ʒiishe’ viɛla ni ʒinibu bɛ jɛmbu duri ni; 7ka yuri puhigu dahi ni, ka lan yuri ni niriba booni ba bɛ karimbanima.

8 Amaa di bi simdi ni bɛ boli ya karimbanima, dama karimba yino ka yi mali, ka yinim’ bɛn zaa kpalim nyɛla mabihi ni taba. 9Di boliya so yi ba dunia ŋɔ ni, dama Naawuni yino ŋun bɛ alizanda ni ŋɔ kɔŋko n-nyɛ yi ba. 10Yi mi di chɛliya ka niriba booni ya bɛ duumanima, dama Duuma yino kɔŋko ka yi mali, ŋuna n-nyɛ Masia. 11#Mat 20.26-27; Maak 9.35; 10.43-44; Luk 22.26 Ŋun nyɛ wɔɣirili yi ni, ŋun’ zaŋm’ omaŋa n-leei yi zaa ha bia. 12#Luk 14.11; 18.14 Ka ŋunkam tibigir’ omaŋa ni nya filiŋ, ka ŋunkam mi siɣisiri omaŋa ni nya tibiginsim.

Yisa ni galim bilikɔnsi tuma shɛm

(Maak 12.40; Luk 11.39-42, 44, 52; 20.47)

13Yisa daa yɛliya, “Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi yo alizanda nam dunoli ni niriba di kpe di ni. Yimaŋmaŋ’ bi kpɛri di ni, ka mi bi saɣiri ni bɛn bɔri ni bɛ kpe di ni kpe.

[ 14“Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi fari pakoya yinsi, ka suhiri Naawuni yuuri ni niriba tɛhi ni yi nyɛla ninvuɣ’ suma. Dinzuɣu yi ni ti nya tibidarigibo pam.]

15 “Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi kaari gindi teeku, ka dari gindi duli tiŋgbana mi ni yi kul nya ninvuɣ’ yino ŋun ni saɣi doli yi daadiini soli, ka yi yi ti nya so ka o dol’ li, yi chɛ ka o leela buɣim bia buyi zuɣu gari yimaŋmaŋ’ ni nyɛ buɣim bihi shɛm.

16 “Mbusim be yinim’ sowuhiriba bɛn nyɛ zoomba ŋɔ zuɣu! Dama yi wuhiri ni nir’ yi po Naawuni jɛmbu duu di pa taali, amaa ni nir’ yi po salima din be Naawuni jɛmbu duu maa ni, shee ka o niŋ o ni po n-dalim yɛl’ shɛli maa. 17Yinim’ bɛn nyɛ zoon’ jɛra ŋɔ, bina ayi ŋɔ dini n-lee gari di kpee: Salima maa bee Naawuni jɛmbu duu din chɛ ka salima maa be kasi maa? 18Ka yi lan wuhiri ni nir’ yi po sara maligu bimbini di pa taali, amaa ni nir’ yi po sara shɛli din pa bimbini maa zuɣu, shee ka o niŋ o ni po n-dalim yɛl’ shɛli maa. 19Yinim’ zoomba ŋɔ, bina ayi maa ni dini n-lee gari di kpee: Sara maa bee bimbini din chɛ ka sara maa be kasi maa? 20Dinzuɣu ŋunkam po sara maligu bimbini pola di mini binshɛɣukam din pa di zuɣu. 21Ka ŋunkam po Naawuni jɛmbu duu pola di mini Naawuni ŋun be di ni maa. 22#Aiz 66.1; Mat 5.34 Ka ŋunkam mi po alizanda pola di mini Naawuni nam ʒiishee n-tabili ŋun’ Naawuni ŋun ʒi di ni maa.

23 # Lɛv 27.30 “Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi yihiri naanzua mini buŋgu ni nili zaka, amaa ka lee chɛ Naawuni fukumsi zaligu puuni yɛlikpɛma din nyɛ saria din tuhi karibu mini nambɔzɔbo ni yɛda niŋbu la; dimbɔŋɔnim’ zaa simdi niŋbu, ka di bi niŋ kamaata ni yi chɛ din pahi maa gba niŋbu. 24Yinim’ sowuhiriba bɛn nyɛ zoomba ŋɔ, yi nyɛla bɛn lɔŋdi nanviɣu, amaa ka lee vaani laakum.

25 “Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi paɣirila pipihi mini lahi nyaansi, amaa ka di puuni lee pali ninvuɣ’ fabo mini diribarilim. 26Nyin’ Farisii ŋun nyɛ zom’ ŋɔ, daŋm’ paɣila pipia mini laa puuni, ka naanyi chɛ ka di nyaaŋa gba neei.

27 # Tuma 23.3 “Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi ŋmanila gbala du’ shɛŋa bɛ ni niŋ kalo paligi di nyaansi ka di lihibu viɛla, amaa ka kpiimba kɔba mini daɣiri balibu kam pali di puuni la. 28Lala n-nyɛn ya. Yi ŋmanila wuntizɔriba niriba sani, amaa ka bilikɔnsi mini tuumbiɛri lee pali yi suhuri ni.

Yisa wuhi tibidarigibo ni nyɛ shɛm

(Luk 11.47-51)

29 “Mbusim’ be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi mɛri duri gindi anabinim’ gbala, ka maani wuntizɔriba yɛla teebu binyara zaana, 30ka yɛri ni yinim’ yi di daa be yi yaannim’ saha la, yi daa naan ku pahi bɛ zuɣu ku anabinim’ maa. 31Dimbɔŋɔ puuni yi di yimaŋ’ shɛhira ni yi nyɛla bɛn daa ku anabinim’ maa yaansi. 32Dinzuɣu bahi naaya yi yaannim’ tuma maa! 33#Mat 3.7; 12.34; Luk 3.7 Yinim’ tinvura ŋɔ! Yinim’ garinsi ŋɔ! Wula ka yi yɛn niŋ nti zo n-yi buɣim ni? 34Dinzuɣu n ni tim anabinim’ mini yɛnnima ni Naawuni zaligubaŋdiba yi sanna, ka yi ti ku bɛ shɛba, ka kpahi bɛ shɛb’ tabili dapula zuɣu, ka fiɛb’ bɛ shɛb’ mi yi jɛmbu duri ni, ka niŋ ba alaka tiŋ’ ni zaŋ ti kpa tiŋ’ ni. 35#Pil 4.8; 2 Yɛl 24.20-21 Ka di zuɣu chɛ ka Naawuni ti zaŋ bɛ ni daa ku wuntizɔr’ shɛba dunia ŋɔ ni, Ɛbɛl ŋun daa bi tum taal’ shɛl’ la kubu saha zaŋ ti paai Anabi Zakaria Bɛrakia bi’ so yi ni daa ku Naawuni jɛmbu duu mini sara malibu bimbini sunsuuni la taali ʒili ya. 36Yɛlimaŋli ka n yɛri ya, dimbɔŋɔnim’ zaa taali ni ti ʒi ʒiɛmani ŋɔ niriba zuɣu.

Yisa ni yuri Jɛrusalɛm shɛm

(Luk 13.34-35)

37Ka Yisa daa kuhi yɛli, “Mbaye Jɛrusalɛmnima! Mbaye Jɛrusalɛmnima! Yinim’ bɛn kuri anabinima, ka labiri Naawuni ni timdi tuumb’ shɛb’ yi sanna kuɣa ŋɔ, yimyim paai shɛm ka n kul bɔri ni n laɣim ya kaman noo ni laɣind’ o bihi niŋdi o kpiŋkpama ni shɛm la, ka yi bi saɣira. 38#Jɛr 22.5 Nyamiya, yi jɛmbu duu yipa leela dabɔɣu. 39#Yila 118.26 Ka n yɛri ya mi ni yi ku lan nya ma hal ni saha shɛli yi ni ti yɛn yɛli, ‘Ŋun mali ti Duuma yuli kanna ŋɔ mal’ alibarika.’ ”

Currently Selected:

Matiu 23: RLDB

Highlight

Copy