Tuma 8

1-2Sool gba nuu daa be Stiivin kubu maa ni.

Sool ni niŋ cheechi alaka shɛm

Ka wuntizɔriba daa zaŋ Stiivin ti sɔɣi, ka kum o kuli pam. Dindali maa zaŋ chana ka bɛ daa gbaai Yisa nyaandoliba bɛn daa be Jɛrusalɛm la alaka niŋbu; ka bɛ zaa daa wurim chaŋ ti kpe Judia mini Samaria tiŋgbana ni, kulla Yisa tuumba la kɔŋko n-daa naɣ’ kpalim.

3 # Tuma 22.4-5; 26.9-11 Sool n-daa nyɛ ninvuɣ’ so ŋun niŋdi Yisa nyaandoliba maa alaka maa; o daa dolila yiya n-gbahiri dɔbba mini paɣiba bɛn daa nyɛ Yisa nyaandoliba nti kpɛhiri duu.

Bɛ yihi Yisa lahibal’ suŋ waazu Samaria

4Ka bɛn daa wurim maa daa chani gindi luɣilikam n-yihiri Yisa lahibal’ suŋ waazu. 5Ka Filip daa chaŋ Samaria nti yihiri waazu yɛri ba ni Yisa n-nyɛ Masia. 6Samarianim’ maa ni daa wum Filip yɛligu ka nya o ni wuhiri shihir’ shɛŋa maa zuɣu ka bɛ daa deeg’ o yɛligu maa ni suhu yini. 7Alizin’ biɛri daa kuhirimi ka zɔri ka chɛri bɛ ni ʒi ninvuɣ’ shɛb’ zuɣu, ka bɛn bɔɣiri mini bɛ gbaya daa kpi ni gbariti pam daa nya alaafee. 8Ka tiŋ’ maa ni nim’ suhuri daa paligi pam.

9Do’ so daa beni ka o yuli booni Saimɔn, o daa warila bukpahigu ka wuhir’ omaŋa ni o nyɛla wɔɣirili, ka o yɛla daa mali Samarianim’ alahiziba pam. 10Ka tiŋ’ maa ni nanim’ mini tarimba zaa daa kul kpalim lihirila ŋuna ka yɛra, “Yiko shɛli ti ni booni Naawuni yiko tital’ la be doo ŋɔ ni.” 11Ka bɛ daa zaŋ bɛ zaɣa zaa niŋ o ni, dama o daa pun chɛ ka o bukpahitali maa tabibi tuma niŋ ba alahiziba pam ka di wɔɣa. 12Amaa bɛ ni daa ti wum ka Filip yihi Naawuni nam mini Yisa Masia yuli waazu maa ka bɛ dɔbba mini paɣiba daa niŋ yɛda ka deei kom baptaizibu. 13Hal Saimɔn maŋmaŋ’ gba daa niŋ yɛda ka deei kom baptaizibu; di nyaaŋa ka o daa zaŋ omaŋ’ tabili Filip n-nyari shihira mini alahiziba tuun’ shɛŋa din daa niŋdi maa, ka di gar’ o pam.

14Ka Yisa tuumba bɛn daa be Jɛrusalɛm la daa wum ni Samarianim’ deei Naawuni yɛligu, ka daa tim Pita mini Jɔn bɛ sani. 15Ka bɛ daa paai nti suhi Naawuni ti ba ni bɛ deei Naawuni Shia Kasi, 16dama bɛ daa pun deei kom baptaizibu ti Duuma Yisa yuli ni, amaa ka na lee bi deei Naawuni Shia Kasi. 17Di saha ka Pita mini Jɔn daa zaŋ bɛ nuhi pa bɛ zuɣu ka bɛ deei Naawuni Shia Kasi.

18Saimɔn ni daa nya ka tuumba maa zaŋ bɛ nuhi pa bɛ zuɣu ka bɛ deei Naawuni Shia Kasi maa zuɣu ka o daa bɔ liɣiri ni o ti ba 19ka yɛra, “Timiya ma yiko ŋɔ, ka n gba zaŋdi n nuhi pari niriba zuɣu ka bɛ deeri Naawuni Shia Kasi.”

20Amaa ka Pita daa garigi yɛl’ o, “A min’ a liɣiri maa zaa bahim’ yoli! Dama a tɛhiya ni a ni tooi zaŋ liɣiri da Naawuni pini. 21A bi kpini shɛli yɛla ŋɔ ni, a mi nuu ka di ni, dama a suhu bi ʒe yim ni Naawuni.” 22Ka daa lan yɛl’ o, “Dinzuɣu niŋm’ tuuba a biɛribiɛtali ŋɔ zuɣu ka suhi Naawuni; di pa shɛli o ni chɛ a tɛhi’ biɛri din nyɛ alahichi maa paŋ a. 23Dama n nya ka a mali putɔɣu, ka be alahichi bandi ni.”

24Ka Saimɔn kuhi yɛli, “Suhim’ ti Duuma ti ma, ka yɛla ŋɔ zaa miligi n zuɣu.” 25Pita mini Jɔn ni daa niŋ shɛhira ka tɔɣisi ti Duuma yɛligu naai maa ka bɛ daa doli Samaria tiŋkpansi pam chani yihiri Yisa lahibal’ suŋ waazu n-labiri kuni Jɛrusalɛm.

Filip mini Itiɔpia kpeen’ so

26Ka ti Duuma malaika daa ti yɛli Filip, “Yiɣisima n-dol’ a nudirigu polo mɔɣu ni pal’ shɛli din yiri Jɛrusalɛm kuni Gaza la.” 27Ka o daa yiɣisi chaŋ. Ka Itiɔpia namɔɣili so ŋun daa su Kandɛse ŋun daa nyɛ Itiɔpia napaɣ’ la azichi fukumsi daa chaŋ Jɛrusalɛm ti jɛm Naawuni, 28ka ʒi o chɛchɛbuŋ’ lɔɣu ni n-labiri kuni ka karindi Anabi Aizaia litaafi. 29Ka Naawuni Shia Kasi daa yɛli Filip, “Guumi paai chɛchɛbuŋ ŋɔ lana.” 30Ka Filip daa guui paag’ o sani nti wum ka o karindila Anabi Aizaia litaafi. Ka Filip bɔh’ o, “A baŋ a ni karindi litaafi shɛli maa gbinni?”

31Ka o garigi yɛl’ o, “Wula ka n lee ni tooi baŋ di gbinni, ka pa ni so n-dolisi ma?” Ka daa yɛli Filip ni o kpɛm’ o chɛchɛbuŋ’ lɔɣu maa ni na ti ʒin’ o sani. 32O ni daa karindi litaafi shɛli maa daa sabi yɛlila ŋ-ŋɔ:

“Bɛ daa zaŋ o mi tahi kaman bɛ ni tahiri

piɛɣu o kɔrigibu shee shɛm la

bee kaman bɛ ni chɛri piɛbil’ so kɔbiri,

ka o bi yaar’ o nol’ la.

33 # Aiz 53.7-8 Bɛ daa mɔŋ o yɛlimaŋli o muɣisigu maa ni.

Ka ŋuni n-lee ni tooi yɛli o zuliya yɛla?

Dama bɛ daa di o nyɛvili dunia ŋɔ ni.”

34Ka namɔɣili maa daa bɔhi Filip, “Ŋun’ yɛla ka Anabi maa lee yɛri maa, omaŋmaŋ’ yɛla bee so yɛla?” 35Di saha ka Filip daa zaŋ litaafi maa ni luɣ’ shɛli o ni karim maa n-gbaag’ o Yisa lahibal’ suŋ waazu yihibu. 36Bɛ ni daa chani maa ka bɛ mali ti paai ko’ shɛli, ka namɔɣili maa yɛl’ o, “Nyam’ kom ŋɔ! Bɔ n-lee ni chɛ ka n ku deei kom baptaizibu?” [ 37Ka Filip yɛl’ o, “A yi niŋ yɛda ni a suhu zaa, a ni tooi deei.” Ka namɔɣili maa yɛli, “N niŋ yɛda ni Yisa Masia nyɛla Naawuni Bia.”]

38Ka o daa chɛ ka chɛchɛbuŋ’ maa zani; ka o mini Filip zaa yi n-chaŋ ti siɣi kom maa ni, ka Filip baptaiz’ o. 39Bɛ ni daa yi kom maa ni na maa ka ti Duuma Shia Kasi daa kpuɣi Filip chaŋ, ka namɔɣili maa bi lan nya o, ka mi daa ŋmaligi chaŋ o chandi ni suhupiɛlli. 40Ka bɛ daa ti nya Filip la Azɔtus, ka o doli nimaani tinsi n-yihiri Yisa lahibal’ suŋ waazu hal ti paai Siizaria.

Currently Selected:

Tuma 8: RLDB

Highlight

Copy