Tuma 9

Sool tuuba niŋbu yɛla

(Tuma 22.6-16; 26.12-18)

1Sool suhu daa na kul yiɣisiri bahirila ti Duuma nyaandoliba zuɣu, ka kul kpɛhiri ba dabiɛm ni o ni ku ba; ka daa chaŋ maligumaaniba zuɣulan’ sani 2nti yɛl’ o ni o tim’ o gbana ka o zaŋ chaŋ Damaskus Yɛhudianim’ jɛmbu duri ni, ka di zuɣu chɛ ka o yi ti nya sokam ŋun doli soli ŋɔ, bɛ yi nyɛla dɔb’ bee paɣiba, ka o gbahi ba n-lo ba mihi tahi Jɛrusalɛm na.

3O ni daa mali ti miriti Damaskus, o nini nyabu yim ka neesim shɛli yi zuɣusaa na ti neei gil’ o; 4ka o lu tiŋa, ka wum ka kukol’ shɛli boon’ o na yɛra, “Sool, Sool, bɔ n-niŋ ka a niŋdi ma alaka?”

5Ka Sool bɔhi, “Ŋuni n-lee bala, n Duuma?”

Ka kukoli maa yɛli, “Man’ Yisa ŋun nyɛ a ni niŋdi so alaka maa m-bala. 6Yiɣisim’ kpe tiŋ’ ŋɔ puuni ka bɛ ti wuh’ a a ni yɛn niŋ shɛm.”

7Ka bɛn daa dol’ o liɣi ʒiɛya n-wumdi kukoli maa, amaa ka lee bi nya so. 8Ka Sool daa yiɣisi zani n-neeg’ o nina ka bi lan ne; ka bɛ daa gbaag’ o nuu ni n-vo o hal ni Damaskus. 9Ka o daa zom dabisi’ muna ata, ka bi di shɛli bee n-nyu shɛli.

10Yisa nyaandol’ so daa be Damaskus maa ka o yuli booni Ananias. Ka o daa ti nya ʒii, ka ti Duuma bol’ o di ni, “Ananias!”

Ka o saɣi n-yɛli, “N-nyɛ ma, n Duuma.”

11Ka ti Duuma yɛl’ o, “Yiɣisim’ doli pal’ shɛli din yuli booni Dɛde la nti bɔhi ka bɛ wuh’ a Judas yiŋa, ka a bɔhi Sool ŋun nyɛ Taasus nir’ la yɛla. Nyama, o be nimaani suhiri Naawuni, 12ka nya ka do’ so ŋun yuli booni Ananias kpe o sanna nti zaŋ o nuu pa o zuɣu ni o nina neei.” 13Ka Ananias yɛli, “N Duuma, m pun wum doo maa yɛla niriba pam sani zaŋ chaŋ o ni niŋdi a nyaandoliba bɛn be Jɛrusalɛm alaka shɛm polo, 14hal ka deei gbana maligumaaniba kpamba sani n-ka kpe na ni o ti gbahi bɛnkam dol’ a.”

15Ka ti Duuma yɛl’ o, “Chɛli di zaa ha ka chaŋ, dama o nyɛla n ni pii so ni o zaŋ n yuli wuhi bɛn pa Yɛhudianim’ mini nazuɣuri ni Izraɛlnima. 16N ni wuh’ o o ni yɛn di wahala shɛm n yuli zuɣu.”

17Ka Ananias daa chaŋ ti kpe yili maa ni n-zaŋ o nuhi pa Sool zuɣu ka yɛli, “M mabia Sool, ti Duuma Yisa ŋun daa yi a zuɣu sol’ ni a ni daa kanna la n-tim ma a sanna ni a nina ti neei, ka Naawuni chɛ ka o Shia Kasi pal’ a.” 18Di saha ka binshɛɣu din be kaman zahim paɣiri la daa dii yi o nina ni luna, ka o nina maa dii neei. Ka o daa yiɣisi deei kom baptaizibu, 19ka naanyi di bindirigu n-lan nya kpiɔŋ.

Sool yihi waazu Damaskus

Ka Sool daa kpalim Yisa nyaandoliba bɛn daa be Damaskus sani n-niŋ daba ayi; 20ka daa doli Yɛhudianim’ jɛmbu duri n-yihiri waazu yɛri ni Yisa shiri nyɛla Naawuni Bia.

21Ka di daa niŋ bɛnkam wum o yɛligu maa alahiziba ka bɛ bɔhiri taba, “Pa doo ŋɔ n-yi niŋdi Yisa nyaandoliba bɛn be Jɛrusalɛm alaka la? Ka ŋuna n-daa ka kpe na ni o ti gbahi bɛn gba niŋ Yisa yɛda tahi maligumaaniba kpamba san’ la?”

22Amaa ka Sool ŋun’ yiko daa kul pahirimi, ka o kahigiri wuhiri ni Yisa nyɛla Masia; ka o yɛligu maa daa chɛ ka Yɛhudianim’ bɛn be Damaskus maa birim.

23 # 2 Kɔr 11.32-33 Ka di daa niŋ daba ayi ka Yɛhudianim’ maa daa to jina yɛli ni bɛ kum’ Sool, 24amaa ka o daa baŋ bɛ ni lo shɛm maa. Bɛ daa kul ʒiɛla tiŋ’ maa dunol’ kam ni wuntaŋ’ ni mini yuŋ zaa gu ni bɛ ku o. 25Ka bɛn daa doli Sool daa zaŋ o niŋ piɛɣu ni yuŋ du gooni n-zaŋ o siɣisi ti zali tiŋa.

Sool ni chaŋ Jɛrusalɛm shɛm

26Ka Sool daa ti paai Jɛrusalɛm m-bɔri ni o zaŋ omaŋ’ bali Yisa nyaandoliba ni, ka bɛ daa zɔr’ o, dama bɛ daa bi niŋ yɛda ni o shiri nyɛla Yisa nyaandola. 27Amaa ka Baanabas daa zaŋ o tahi Yisa tuumba la sani nti kahigi Sool ni daa nya ti Duuma sol’ ni ka o yɛl’ o shɛm wuhi ba, ka lan yɛli ba Sool ni daa zaŋ Yisa yuli yihi waazu ni suhukpeeni shɛm Damaskus. 28Ka Sool mini Yisa nyaandoliba maa daa laɣim be Jɛrusalɛm, ka o daa chani gindi mali Yisa yuli yihiri waazu ni suhukpeeni. 29Ka o mini Yɛhudianim’ bɛn wumdi Giriikili daa ti ŋmɛri tab’ naŋgbankpeeni, ka bɛ to jina m-bɔri soli ni bɛ ku o. 30Ka o nyaandolitab’ daa baŋ lala ka zaŋ o tahi Siizaria nti chɛ ka o kul’ o ya Taasus.

31Di saha ka Yisa nyaandoliba bɛn daa be Judia mini Galili ni Samaria zaa daa naanyi nya nyee vuhi ka bɛ yiko maan pahi, ka bɛ daa zɔri ti Duuma ka dol’ o viɛnyɛliŋga, ka bɛ kalinli kul pahira, Naawuni Shia Kasi sɔŋsim puuni.

Pita ni chaŋ Lida shɛm

32Pita daa kul gɔrimi gindi luɣilikam kaari Yisa nyaandoliba, ka daa ti chaŋ Yisa nyaandol’ shɛb’ bɛn daa be Lida la gba sani. 33Nimaani ka o daa ti nya do’ so ŋun yuli booni Ɛnias, ka o gbaya kpi ka o do tiŋa yuma anii zaa. 34Ka Pita daa yɛl’ o, “Ɛnias, Yisa Masia tib’ a; dinzuɣu yiɣisima m-mal’ a bindoo maa yɛrigi!” Ka o daa dii vaai yiɣisi. 35Ka Lidanim’ mini Sharɔnnim’ zaa daa nya doo maa, ka niŋ ti Duuma yɛda.

Pita neei Dɔɔkas kum ni

36Paɣ’ so daa be Jɔpa n-nyɛ Yisa nyaandola ka o yuli booni Tabita. (Giriikili ni bɛ boon’ o la, “Dɔɔkas”. Di gbinni nyɛla “Molifu”.) O daa tumdi tuun’ suma pam, ka lan tumdi nambɔzɔbo tuma gba lala. 37Ka dɔro daa ti gbaag’ o ka o kpi, ka bɛ suug’ o kom n-zaŋ o kpɛhi jirambisa zuɣusaa duu ti sɔŋ. 38Jɔpa mini Lida ni daa bi wɔɣ’ ni tab’ zuɣu ka Yisa nyaandoliba maa daa wum ni Pita be Lida ka tim niriba ayi o sani ni bɛ ti yɛl’ o ni bɛ bɔri ni o ka bɛ sanna yomyom.

39Ka Pita daa dii yiɣisi doli ba. O ni daa mali ti paai, ka bɛ zaŋ o du jirambisa zuɣusaa duu maa ni, ka tiŋ’ maa ni pakoya zaa daa ʒe n-gili Pita kumda, ka wuhir’ o binyɛr’ shɛŋa Dɔɔkas ni daa na be o nyɛvili ni ka she n-ti ba. 40Ka Pita daa chɛ ka bɛ zaa yi; ka o gban’ tiŋ’ suhi Naawuni, ka naanyi ŋmaligi kpim’ maa polo yɛl’ o, “Tabita, yiɣisima!” Ka o neeg’ o nina nya Pita, ka dii yiɣisi ʒini. 41Ka Pita gbaag’ o nuu ni n-yiɣis’ o zali; ka boli Yisa nyaandoliba maa mini pakoya maa na nti zaŋ Dɔɔkas ŋun lan niŋ nyɛvililan’ maa ti ba. 42Ka di yɛla daa moli gili Jɔpa zaa, ka niriba pam daa niŋ ti Duuma yɛda. 43Ka Pita daa kpalim Jɔpa, Saimɔn ŋun daa nyɛ gbanzab’ la yiŋa n-niŋ daba ayi nimaani.

Currently Selected:

Tuma 9: RLDB

Highlight

Copy