Luka 14

Yesu da gbe le ame tetea ɖe ŋu le Sabat dzi, xlɔ̃ nu le ɖokuibɔbɔ kple dɔmenyowɔwɔ ŋuti.

1Eye wòva ve me, esi wòyi ɖe farisitɔwo ƒe amegãwo dometɔ ɖeka ƒe me le Sabat dzi, be yeaɖu abolo la, wole ŋudzɔ ne. 2Eye kpɔ ɖa, ame tetea ɖe le eƒe ŋku me. 3Eye Yesu xa dzi gblo na sefialawo kple farisitɔwo bena: Woɖe mo be, woada gbe le Sabat dzi loo, alo womeɖe mɔ o mahã? Ke woawo la wozi kpi. 4Eye esi wòde asi eŋu la, eda gbe le eŋu, eye wòdo mɔe. 5Eye wògblɔ na woawo bena: Ameka le mia dome, ne via alo eƒe nyi ge ɖe vudo me la, maɖee le eme enumake le Sabat ŋkeke dzi o mahã? 6Eye womete ŋu gaɖo nusiawo ŋu o.

7Eye esi wòdze si, alesi ame kpekpeawo tia nɔƒe gbãtɔwo la, edo lo na wo gblo bena: 8Ne amea ɖe kpe wò va srɔ̃ɖeƒe la, meganɔ nɔƒe gbãtɔ o; ɖewohĩ wokpe ame ŋkuta wu wò vɛ: 9eye amesi kpe mia kple ame ma la, ava gblɔ na wò bena: Tsɔ nɔwòƒe na amesia, eye ekema ade asi nɔƒe mlɔetɔ tsɔtsɔ me kple ŋukpe. 10Ke boŋ, ne wokpe wò la, yi ɖanɔ nɔƒe mlɔetɔ bena, ne amesi kpe wò va la, agblɔ na wò bena: Xɔ̃, te yi kplɔ̃ ta; ekema anye bubu na wò le amesiwo katã le kplɔ̃a ŋuti la, ƒe ŋku me. 11Elabena amesiame, si ado eɖokui ɖe dzi la, woabɔbɔe ɖe anyi, eye amesi abɔbɔ eɖokui ɖe anyi la, woadoe ɖe dzi. 12Eye wògblɔ na amesi kpee hã bena: Ne èɖo ŋdɔ- alo fiẽkplɔ̃ la, megayɔ xɔ̃wòwo alo nɔviwòwo, alo wò ƒometɔwo, alo hawòvi kesinɔtɔwo o, bena woawo hã nagakpe wò, eye woaɖo eteƒe na wò o. 13Ke boŋ, ne èɖo kplɔ la, yɔ ame dahewo, nuwɔametɔwo, bunɔwo, ŋkuagbãtɔwo, 14eye nazu yayrame, esi naneke mele wo si be, woaɖo eteƒe na wò o ŋuti; ke woaɖo eteƒe na wò le ame dzɔdzɔewo ƒe tsitretsitsi la me.

Lododo le flẽnuɖuɖu gã la ŋu.

15Eye esi kplɔ̃ ŋuti nɔlawo dometɔ ɖeka se nusiawo la, egblɔ bena: Woayra amesi aɖu abolo le mawufiaɖuƒe la me! 16Eye wògblɔ nɛ bena: Amea ɖe ɖo fiẽkplɔ̃ gãa ɖe, eye wokpe ame geɖewo; 17eye esi fiẽnuɖuɣi la ɖo la, edɔ eƒe dɔla la be, woagblɔ na amesiwo wokpe la bena: Miva, elabena nuawo sɔ gbe vo. 18Eye ameawo katã de asi taflatsedodo me kple tame ɖeka. Gbãtɔ gblɔ ne bena: Meƒle anyigba, eye wòle vevie nam be, mayi aɖakpɔe ɖa; meɖe kuku na wò, bui taflatse nam. 19Bubu gblɔ bena: Meƒle nyi eveveve teƒe atɔ̃, eye meyina be, mado woakpɔ; meɖe kuku na wò, bui taflatse nam. 20Eye bubu gblɔ bena: Meɖe srɔ̃; eyata nyemate ŋu ava o. 21Eye esi dɔla la trɔ va la, exlẽ nusiawo fia eƒe aƒetɔ. Tete aƒetɔ la ɖo dɔmedzoe, eye wògblɔ na eƒe ɖɔla la bena: Do go kaba yi ɖe ɖu la ƒe ablɔwo me kple kpɔdomiwo, eye nakplɔ ame dahewo kple nuwɔametɔwo kple ŋkuagbãtɔwo kple bunɔwo va afii. 22Eye ɖɔla la gblɔ bena: Aƒetɔ, wowɔ se, si nède la dzi, eye gake nɔƒe gali. 23Eye aƒetɔ la gblɔ na dɔla la bena: Do go yi mɔ gãwo dzi kple kpɔwo godo, eye nazi wo dzi be, woava me, bena nye aƒe la nayɔ fũ. 24Elabena mele egblɔm na mi bena: Ŋutsu mawo, siwo wokpe la, dometɔa ɖeke maɖɔ nye fiẽnuɖuɖu la akpɔ o.

Nugbegbe le ame ɖokui gbɔ.

25Eye ameha geɖewo yi kplii, eye wòtrɔ gblɔ na wo bena: 26Ne amea ɖe va gbɔnye, eye melé fu fofoa kple dadaa kple srɔ̃a kple viawo kple nɔviaŋutsuwo kple nɔvianyɔnuwo, ẽ, ye ŋutɔ ƒe agbe gɔ̃ hã o la, mate ŋu anye nye nusrɔ̃la o. 27Amesi ke metsɔ eƒe atitsoga, eye wòva dze yonyeme o la, mate ŋu anye nye nusrɔ̃la o. 28Elabena ameka le mia dome, ne ele didim be, yeatu mɔ̃ la, mabɔbɔ nɔ anyi gbã, eye wòabu eŋu kɔnta, ne nu le esi, be wòawu enu la o mahã? 29Menye bena, ne eɖo egɔme anyi tso, eye mete ŋu wu enu o la, ne amesiwo katã kpɔe la, nade asi fewuɖuɖu me le eŋuti o, 30agblɔ bena: Amesia de asi matutu me, eye mete ŋu wu enu o. 31Alo fia ka li, si, ne eyina aʋa kpe ge kple fia bubu la, mabɔbɔ nɔ anyi, eye woade adaŋu, ne ate ŋu atsɔ akpe ewo akpe amesi tsɔ akpe blaave gbɔna edzi dze ge la, o mahã? 32Ke ne mele nenema o la, adɔ dɔlawo aɖo ɖe amesi le mɔ dzi ʋĩ gbɔna la gbɔ, be wòabia tomefafa. 33Azɔ nenema ke mia dome amesiame, si megbe nusiwo katã le esi la o la, mate ŋu anye nye nusrɔ̃la o. 34Dze la, nu nyui ye; ke ne dze hã bu eƒe vivi la, nuka woatsɔ ado vivi nɛ mahã? 35Menyo na anyigba alo na aɖukpo dzi hã o; ɖeko woatsɔe aƒu gbe. Amesi to senu li ne la, nesee.

Currently Selected:

Luka 14: EWERV

Highlight

Copy