Yohanes II 1
1
Agbalẽ la xɔlawo.
1Hamemegã xoxo la ŋlɔ ɖo ɖe aƒenɔ tiatia kple viawo, amesiwo melɔ̃na le nyateƒe me; eye menye nye ɖeɖekoe lɔ̃a wò o, ke boŋ amesiwo katã dze si nyateƒe la hãe, 2le nyateƒe, si nɔa mía me, eye wòanɔ anyi kpli mí ɖaa la ŋuti: 3Amenuveve kple nublanuikpɔkpɔ kpakple ŋutifafa, si tso Mawu Fofo la kple Yesu Kristo, si nye Fofo la ƒe Vi la gbɔ la, anɔ anyi kpli mi le nyateƒe kple lɔlɔ̃ me!
Nuxɔxlɔ̃ bena, woanɔ nyateƒe me.
4Dzi dzɔm ŋutɔ bena, mekpɔ viwòwo dometɔa ɖewo le nyateƒe la me zɔm, abe alesi miexɔ se tso Fofo la gbɔ ene. 5Eye azɔ la mele kuku ɖem na wò, aƒenɔ — menye se yeye wònye meŋlɔ ɖo ɖe wò o, ke boŋ esi le mía si tso gɔmedzedzea me lae — bena míalɔ̃ mia nɔewo. 6Eye esiae nye lɔlɔ̃ la bene, míazɔ ɖe eƒe seawo nu. Esia nye se la bena, miazɔ eme, abe alesi miese tso gɔmedzedzea me ene. 7Elabena ameblela geɖe, siwo meʋua me bena, Yesu Kristo va le ŋutilã me o la, do go yi ɖe xexeame. Esiae nye ameblela kple Kristo ƒe futɔ la. 8Mikpɔ mia ɖokui dzi nyuie, bene miagabu dɔ, siwo miewɔ la o, ke boŋ fetu blibo nasu mia si. 9Amesiame, si da vo ɖe Kristo ƒe nufiafia ŋu, eye menɔa eme o la, Mawu mele esi o; eye amesi noa Kristo ƒe nufiafia me la, Fofo la kple Vi la le esi. 10Ne amea ɖe va mia gbɔ, eye mehe nufiafia sia ɖe asi vɛ o la, migaxɔe ete aƒea me o, eye migado ɖoa ƒe hã ne o: 11elabena amesi do ɖoaƒe nɛ la, ede ha kplii le eƒe dɔwɔwɔ vɔ̃wo me.
12Nya geɖe gali be, maŋlɔ aɖo ɖe mi; gake nyemelɔ̃ be, matsɔ agbalẽ kple agbalẽŋlɔtsi aŋlɔ wo o, ke boŋ mele mo kpɔm be, mava mia gbɔ, eye ne mieɖo go ŋku me kple ŋku me la, míaƒo nu, bene miaƒe dzidzɔ nazu blibo. 13Nɔviwònyɔnu tiatia la ƒe viwo ɖuɖɔ wò ƒã.
Currently Selected:
Yohanes II 1: EWERV
Highlight
Share
Copy
Want to have your highlights saved across all your devices? Sign up or sign in
Bible in Éwé Revised Version © Bible Society of Ghana, 1913, 2006.