Mə́líʼkus 8

Yə́sus ayáábɛn tɔ́ɔ́sɛn ɛ pɔɔd íniʼ na pɛlɛ́ɛd pɛ́ʼtáan na pɛ́baan súg

(Maʼt 15.32-39; Mə́l 6.30-44)

1A mədúg mə́mmú, pɔɔd pə́yə́yiilən piíŋ kɔ áay kɛnɔ kɛ́ Yə́sus ayɛ́ɛ. Ná yɛɛ́dála lɛ́ pɔ́dɛɔ́gɔ na yoom ɛ́ konɛ, yɛɛ́dɔ́ŋɔn paaʼkan pə́ə́ŋ, ɔnɔ́ na pɔ́lɛ́: 2«Mbilígɔɔ́ʼkɔn yəə́ʼkisiəd kɛ́fɔlɛ́ na pɔɔd póonɛ lɛ́ mədúg mádáád áa móonɛ pálɛɛ́ əgiim pínjə́njən, pə́ndigi kə́mmú na yoom ɛ́ konɛ. 3Mbəʼkusəə áay nɛ́gɔŋ lɛ́ púúləni pagaadɛ iyó, pə́mmú pə́ədə́əŋ a ngə́ ná toɛn toáʼkoman a nkó. Piíŋ pálɛ kɔ pá pə́míim pádɛ́ɛman laálá.» 4Paaʼkan pə́ə́ŋ pə́yímuyúlísíni pɔ́nɔ́: «Pəsi aa póonɛ a kɛnɔ kɛ́ kifələ́ə́n. Ə́lə́ə́ áa tɛɔ́gɔɔŋ anɛ́ɛ́n moom mó tɛlɛɛ́ págaabɛn ungim nyóonɛ ánɛ, ə́yíid əə́?» 5Yə́sus əyíbuŋíən ɔnɔ́ na pɔ́lɛ́ əə: «Pugóódi pɛlɛ́ɛd pɛ́sɛ́g áay əə́?» Náa pɔ́nɔ́: «Tigóódi pɛlɛ́ɛd pɛ́ʼtáan na pɛ́baan áanɛ.» 6Náa ɔnɔ́ ungim ə́ləndin a nsí. Yiísiə́d pɛlɛ́ɛd pɛ́ɛb pɛ́ʼtáan na pɛ́baan, amɛ́ʼkɛn pisoyidiʼ na Táán, aábɛ́ŋa, amɛ́ʼkɛn na paaʼkan pə́ə́ŋ lɛ́ páaban ungim. Pááság kaaba. 7Pígóodi moyaa mó pusú tɛn kɔ áay. Yə́sus aáság kusiəd pusú póob, amɛ́ʼkɛn pisoyidiʼ na Táán, amɛ́ʼkɛn na paaʼkan pə́ə́ŋ lɛ́ páaba tɛn. 8Ungim nyɔ́ ayɛ́ɛ kɔ yɛɛ́nɛ́, əə́yíid. Paaʼkan pɛ́ɛ́gómmánɛ pɛbɛŋ pɛ́ pɛ́ɛ́lɔ́b, piə́yə́ə́g mɔsaŋɛʼ móʼtáan na móbaan. 9Kɔmɔɛ́d lɛ́ pɔɔd pá pɛ́ɛ́nɛ́ moom móom páyɛ́ɛ yoom wɔnɔ́ tɔ́ɔ́sɛn ɛ pɔɔd íniʼ. Ná páyɛ́ɛ páʼkoman konɛ́ɛnɛ, áay aa Yə́sus ayɛ́bodɛánɛ lɛ́ púúləni. 10Ná ungim ayɛ́ɛ aáʼkɛɛn, nyɔ́lɛ́ aáság kudíin abag a kɛʼkɔ́m na paaʼkan pə́ə́ŋ, pááyaag nsɛ́ɛ́ ɛ noom, pámɛ́ɛn a kɛsom kɛ́ nsí kɛ́ Talamanóʼta.

Pafalɛsɛyɛ́ɛŋ pííŋíən na Yə́sus lɛ́ yɛ́ɛlɛ ongán pɔ́lɛ́ pádála

(Maʼt 12.38-39; Maʼt 16.1-4; Lóʼk 11.16-29; Lóʼk 12.54-56)

11Pafalɛsɛyɛ́ɛŋ pə́yíímən kɔ áay kɛnɔ kɛ́ Yə́sus ayɛ́ɛ, pɔ́ɔsɔyɔ na nyɔ́lɛ́. Páyɛ́ɛ əguunə kumudə́əŋi a kisindiʼ. Píísə́ə́ pɔ́nɔ́ na nyɔ́lɛ́: «Ɛɛlɛ kɛálɛ́ʼkán kɛ́ kíəbiíloodi lɛ́ Táán áa əyíím ágoodom.» 12Yə́sus əyíísímid na toɛn, náa ɔnɔ́ na pɔ́lɛ́: «A igə aa ɔsɛg wóonɛ ó nɛ́gɔŋ ólɛɛ́ əgiŋíən lɛ́ nyɛ́ɛlɛ kɛálɛ́ʼkán páádála əgín na əngis yɔ́ɔ́bɔn ə́? A fɔ́lɔ́b ndabodɛ́anɛ na pəŋi ɔsɛg wóonɛ ó nɛ́gɔŋ lɛ́ pudiə́giim agɛɛn na kɛálɛ́ʼkán ɔmbɔ́ kímuʼ.» 13Ná yiísə́ə́ náan, aáság kodɛ́ɛmɛn, aábág a kɛʼkɔ́m na paaʼkan pə́ə́ŋ, əmúúlíni koyaag nsɛ́ɛ́ ɛ noom.

Yə́sus ɔnɔ́, ndə́b yɛ Ɛlóod na ɛ Pafalɛsɛyɛ́ɛŋ ɛlɛ ləfíu yɛ́ páagaágan a umbúb agɛɛlɛ lɛ́ únud

(Maʼt 16.5-12; Lóʼk 12.1)

14Agɛɛn koɔ́bɔn, paaʼkan pə́yə́bə́líí kusiəd pɛlɛ́ɛd agɛɛn na pɛ́lɛ́. Pígóodi əgín kɛlɛ́ɛd kímuʼ súg na pɔ́lɛ́ a kɛʼkɔ́m. 15Yə́sus yiísiə́d tɔgɛ́ɛ́ agoboyááganan mbaŋ, ɔnɔ́: «Pólóʼkɔd na kinudiʼ umbúb kɛ́ Pafalɛsɛyɛ́ɛŋ na kɛ́ pɔɔd pá ɛgɔny yɛ́ Ɛlóod pógódíí!» 16Ná paaʼkan páyóób náan, pə́ə́bə́ə́ kəə́lúluu kɔ pɔ́lɛ́ na pɔ́lɛ́ pɔ́nɔ́: «Alɛ əgusəə náan lɛ́ wɔnɔ́ ná tidiiminií tísiəd pɛlɛ́ɛd pɛ́ tɛánɛ!» 17Yə́sus yɛɛ́lɛ́ŋ nkə kɛ́ɛg kɛ́ páyɛ́ɛ afɛga. Náa ɔnɔ́ na pɔ́lɛ́: «Polɛ əgəə́lúluu poɔʼkɔ́ mbə́səə náan a oʼto wóonɛ lɛ́ pudiimin púsiəd pɛlɛ́ɛd pɛ́ poánɛ a? Puligi podɛób əgín ə́! Puligi pondɛŋ á! Nsiŋ yaaŋan iligi idiə́buə́níí anyóon a! 18Polɛ əngis angás, náa podɛɔ́gɔ agodɛ́ʼtɛganan a! Ntóɛŋ yaaŋan ɛlɛ mbuənə́ə́n, náa podɛɔ́gɔ agoóbanan a#8.18 Pódála tɛn náan a kálaʼtaʼ ɛ Siə 5.21; Ɛsɛ́ 12.2 ! Əgín kɔ áanɛ nɛ́gɔŋ, pundigi agaáyɔ́ɔ́ŋɛ 19pɛlɛ́ɛd pɛ́ʼtáan pɛ́ nyɛɛ́bɛ́ŋa, mbáábɛn tɔ́ɔ́sɛn ɛ pɔɔd ɛ́ʼtáan a? Adɛ́ ungim yɛɛ́nɛ́, piə́lub ə́? Pɛbɛŋ pɛ́ pɛ́ɛ́lɔ́bɔn, poɛ́báda, pííyə́ə́g a mɔsaŋɛʼ mósɛ́g mó poyɛ́ɛ́n na mólɛ́?» Náa paaʼkan pə́ə́ŋ pɔ́nɔ́ na nyɔ́lɛ́: «Mɔsaŋɛʼ mówád na móbaan.» 20Yə́sus ayɛ́ɛ́n na tɔgɛ́ɛ́ yuudi ɔnɔ́: «Áyɔ́ŋɛ́an tɛn wɔnɔ́ ná nyɛɛ́bɛ́ŋa pɛlɛ́ɛd pɛ́ʼtáan na pɛ́baan agaabɛn tɔ́ɔ́sɛn ɛ pɔɔd íniʼ páánɛ́. Mɔsaŋɛʼ mósɛ́g áa muíyə́ə́g na pɛbɛŋ pɛ́ pɛ́ɛ́lɔ́b, pomáyɛɛn na pɛ́lɛ́?» Pə́yímuyúlísíni pɔ́nɔ́ na nyɔ́lɛ́: «Móʼtáan na móbaan.» 21Náa Yə́sus ɔnɔ́ na pɔ́lɛ́: «Puligi podɛób á? Puligi podɛób lɛ́ adɛ́njaŋ kɛbán kɛ́ pɛlɛ́ɛd aa ndɛɛ́ əgusəə?»

Yə́sus ayóómɛ mɔɔd nyummú nyɔ́ ayɛ́ɛ abany woog a pálɛ́ɛg ɛ Pɛdsáyída

22Yə́sus ayɛ́ɛ́n əgiig na paaʼkan pə́ə́ŋ a nigúu nímmú pɔ́ɔdɔ́ŋɔn lɛ́ Pɛdsáyída. Kɔ́gɔ́ɔg, pɔɔd pə́yíím pə́súidə mɔɔd o woog nyummú agɛɛn na nyɔ́lɛ́ kɛnɔ kɛ́ Yə́sus alɛɛ́. Pááság komoyɔ́sɔ́gɔlɔn lɛ́ ámodɔ́bɛd ná yóom. 23Yə́sus aáság kugumin mɔɔd nyóon a ombɔg, aálón pálɛ́ɛg na nyɔ́lɛ́. Ná páyɛ́ɛ páʼkolon pálɛ́ɛg, Yə́sus aáság koliɛda pɛda a əngis á mɔɔd nyóon, amámoyábɛ́gɛn ombɔg a oʼto, náa ɔnɔ́ na nyɔ́lɛ́: «Mɔɔ́n wo mbáa, olɛ agodála yoom o?» 24Ongwongwóg nyóon aáság kaásɛn əngis, náa ɔnɔ́: «Ɛɛ́ɛ, ndɛ agodála pɔɔd, pálɛ wɔnɔ́ piɛd, náa pálɛ agodáŋana.» 25Yə́sus aáság kiiʼkiniʼ kodɔ́bɛd əngis á mɔɔd nyóon na ɔmbɔg yə́ə́ŋ. Ná mɔɔd ayáásɛn kə́mmú əngis, yándɛ moááŋ, oóʼkoom, aándadɛ́ʼtɛganan kɔŋɛʼ. 26Náa Yə́sus ɔnɔ́ na nyɔ́lɛ́: «Úúli anɛ́ɛ́n a noádɛʼ noáŋ, udinjúlíni kosɔd a pálɛ́ɛg.»

Píɛ ɔnɔ́ Yə́sus alɛ Məsíi

(Maʼt 16.13-20; Lóʼk 9.18-21)

27Yə́sus ayɛ́ɛ́n na paaʼkan pə́ə́ŋ a əʼkúu yə́mmú, ndúmiʼ na Səsalə́ə ɛ Filíib. Pálɛ anɛ́ɛ́n kɔ a ngə́, aáság kuŋíən na paaʼkan pə́ə́ŋ ɔnɔ́ əə: «Kɛnɛŋ kɛ́ pɔɔd pálɛ agosɔyɔ əə, pálɛ əgusəə lɛ́ ndɛ ánɛ ə́?» 28Pə́yímuyúlísíni pɔ́nɔ́ na nyɔ́lɛ́: «Pə́mmú pálɛ əgusəə pɔ́nɔ́ olɛ Sɛ́aŋ Ɔsɔgɛn pɔɔd. Pɔsɔ́g pə́mmú pɔ́nɔ́ olɛ Ɛlɛ́as. Pə́mmú tɛn pálɛ əgusəə pɔ́nɔ́ olɛ ɔndɔɛgɛʼ pɛbán o Táán nyummú wɔnɔ́ pɔsɔ́g pá kalaʼ.» 29Náa Yə́sus ɔnɔ́ na pɔ́lɛ́: «Oo, a nɛáŋan nɛ́ pəŋibáamɔɛ́d anɛ́ɛ́n ə́ə, poɔʼkɔ́ ndɛ ánɛ ə́?» Píɛ əyímuyúlísíni ɔnɔ́: «Olɛ Məsíi.» 30Yə́sus aáság koboyááganan mbaŋ na toɛn, ɔnɔ́: «Pádɛʼtɛánɛ náan na mɔɔd wɛndɛ́ŋ.»

Yə́sus ɔnɔ́ nyɔ́lɛ́ alɛ́ɛ́ kugu, ə́yiʼkini kiim yóndɛg

(Maʼt 16.21-23; Lóʼk 9.22)

31A ngim yɛ́ɛy, Yə́sus əə́bə́ə́ kaaʼkananɛ paaʼkan pə́ə́ŋ, ɔnɔ́: «Mɛ Mɔɔ́n o mɔɔd nkóódi lɛ́ nnɛ ntɔ́b kɛ́fɔlɛ́. Pasaá pá nigúu na puʼkúm pó payaaganɛʼ pɛfɔny na palɛŋ pɛcɛm pálɛ́ɛ́ kiʼtəm, páyɛnjoon. Náa, mɔɔ́s mádáád a ngim yɛ́ɛy, ndɛ́ɛ́ kiiʼkini kiim nyóndɛg.» 32Náan aa yɛɛ́sɔ́yɔ na paaʼkan pə́ə́ŋ moááŋ. Píɛ aáság kumuə́súidin a ɛbá agosɔyɔ na nyɔ́lɛ́. Ayɛ́moóbɛ́n a nkə kɛ́ɛg kɛ́ yɛɛ́sɔ́yɔ, ɔnɔ́ na nyɔ́lɛ́: «Tuə́ áa olɛɛ́ ogosɔyɔ náan, Sə́dúk! Tɔgɛ́ɛ́ toáŋ tóod tólɛ tobɛ́!» 33Ná Píɛ yiísə́ə́ náan, Yə́sus əyímuyə́dúgídíí, əə́bisin paaʼkan pə́ə́ŋ əngis, əə́bə́ə́ kosásan Píɛ, ɔnɔ́: «Sáʼtan wɔnɔ́ wɛ! Liog a mɛ udi, ə́suídíí laálá. Mafɛgaʼ mááŋ móom má olɛɛ́ na mɔ́lɛ́ mɔ́dɛɔ́gɔ mafɛgaʼ má Táán, málɛ má pɔɔd.»

Agɛɛlɛ lɛ́ mɔɔd ə́yə́ən Yə́sus, tuə́ áa yɛ́ɛlɛɛ́

(Maʼt 16.24-28; Lóʼk 9.23-27)

34Ná ayɛ́ɛ aáʼkosásan Píɛ náan, yɛɛ́dɔ́ŋɔn ungim nyɔ́ ayɛ́ɛ kɔ áay, na paaʼkan pə́ə́ŋ kɛ́, ɔnɔ́ na pɔ́lɛ́: «Mɔɔd əməʼkusəə lɛ́ əəginjə́ən, óliogi ɔʼtɛ́m na nyɔ́lɛ́nyɔ́amɔɛ́d, yə́lúú ɔmbásá wə́ə́ŋ, ná yíim anɛ́ɛ́n yínjə́ən. 35Kɛ́lɛ lɛ́, wɛ nyɔ́ wɔʼkɔ́ wamaʼkanɛ ɔlaa wááŋ, wɛ nyóon olɛ́ɛ́ koʼtaŋ wólɛ́. Kɔmɔɛ́d lɛ́ nyɔ́ alɛ́ɛ́ koʼtaŋɛɛ́ ɔlaa wə́ə́ŋ a kidíídí kɛ́am, na a kɛ́ Tɔsɔm Tólaŋ, wɛ nyóon aa olɛ́ɛ́ kɔɔyɛɛ́. 36Mɔɔd amaʼkɛɛn na tugúm tuim tó a nsí, náa ɔlaa wə́ə́ŋ olɛɛ́ undióŋóón, amɛ́ɛ́lɛ nkə aa nyóon? 37Ímuʼ na ímuʼ yɛ́ mɔɔd alɛɛ́ ogɛɛ́ʼkɛn agɛɛlɛ lɛ́ áwɛɛna ɔlaa wə́ə́ŋ, ɛ́dɛɔ́gɔ. 38Mɔɔd amaʼkɛɛn lɛ́ aagoob oʼto kono na mɛ a udi ó pɔɔd póonɛ pá nɛ́gɔŋ pá pádɛ́agoóbɛnɛɛ́ Táán, páagɛɛlanɛ kɔbɛ́, aágaáŋa na tɔgɛ́ɛ́ tóam, mɛ Mɔɔ́n o mɔɔd ndɛ́ɛ́ tɛn koob oʼto kono na nyɔ́lɛ́ ná ndɛ́ɛ́ kimbuúlini a nugəm nó Táán Sɛ waam, ondáŋ na pəfúfúŋ pá məŋun má maʼtom.»

Currently Selected:

Mə́líʼkus 8: yatDBL

Highlight

Copy