Mə́líʼkus 15

Páyɛ́ɛ́n na Yə́sus a nó Pɛláad

(Maʼt 27.1-2; Lóʼk 23.1-5; Sɛ́a 18.28-38)

1Na pɛbáŋɛn pɛ́ a koany kaáyɛnɛ, puʼkúm pó payaaganɛʼ pɛfɔny, na ponnom pó nigúu, na palɛŋ pɛcɛm, na ungim nyɔ́ ayɛ́ɛ a ɛgɔny yɔ́ɔ́bɔn yɛ́ ɛgóón yɛ́ɛy, páyágɔ́nyɛ́dɛ́ɛ́ agoyɔɔ kɛbán kiə́ŋ. Pə́yímuusúŋ tuwoo a ombɔg, pámɛ́ɛn na nyɔ́lɛ́ a nó Pɛláad. 2Pɛláad əə́bə́ə́ komolóoya, ɔnɔ́: «Olɛ nkúm ɛ Yúdɛn a, ngɔ́ɔ́?» Yə́sus əyímuyúlísíni ɔnɔ́: «Náan ó! Kɛ́lɛ náan wɔnɔ́ ná olɛɛ́ əgusəə.» 3Puʼkúm pó payaaganɛʼ pɛfɔny póyɛ́ɛ əgín agosóman Yə́sus ɛ́fɔlɛ́ ɛ́ pɛbán a nkó. 4Náa Pɛláad əyíʼkíni kuŋíən na Yə́sus ɔnɔ́ əə: «Tuə́, odɛágaánɔna a? Odɛɔ́gɔ agoob pɛsɔ́mɛn pɛ́ɛnɛ piim pɛ́ pálɛɛ́ əgusuginə a nkó yaaŋ á!» 5Náa, Yə́sus adɛʼkɛ́ɛ agogáaŋanan. Ɔmbɔ́ pɛbɛɛ a kɛbán əgín kímuʼ adɛʼkáabaalɛ. Pɛláad ayáfɛ́máá kɛ́fɔlɛ́ na kaásab kóog kó ayásábɛ́ɛ́ náan.

Páábaasɛ lɛ́ póon Yə́sus

(Maʼt 27.15-26; Lóʼk 23.13-25; Sɛ́a 18.39—19.16)

6Maag miim a wɔɔ́n ó Páska, kɛ́yɛ́ɛlanɛ lɛ́ Pɛláad əəlis mɔɔd o yoog yɛ njaan úmmuʼ nyɔ́ nigúu níəŋíən lɛ́ ə́lis. 7Náan aa a kɛnɛŋ kɛ́go kɛ́ɛg, mɔɔd nyummú ayɛ́ɛ a yoog yɛ njaan niiŋ lɛ́ Palábas. Páyɛ́ɛ a yɛ́lɛ́ na pɔsɔ́g pə́mmú pá pídə́ə́míni oʼto wɔɔ́s wúmmú na nɛlaamɛʼ, pámáyoon mɔɔd. 8Náa kiʼtúú kɛ́ pɔɔd kɛ́agɛɛn a nó Pɛláad əgumuŋíən lɛ́ yɛ́ɛlɛ ondoŋá. 9Pɛláad əyíbuŋíən ɔnɔ́ na pɔ́lɛ́ əə: «Oo, poanyɔ́ŋɛn anɛ́ɛ́n lɛ́ mpuúlisin ánɛ ə́? Nkúm ɛ Yúdɛn əə́?» 10Kɛ́lɛ lɛ́, Pɛláad yɛɛ́lɛŋɛn lɛ́ a yaág yɛ́ əngis aa puʼkúm pó payaaganɛʼ pɛfɔny puígúmin Yə́sus əgiim amosɔ́mɛn na nyɔ́lɛ́. 11Náa, puʼkúm pó payaaganɛʼ pɛfɔny poɛ́báya kiʼtúú kɛ́ pɔɔd kɛ́ɛg lɛ́ pádɛ́anɛ na Pɛláad, ə́buúlisin Palábas. Pááság komodɛ́anɛ náan. 12Náa Pɛláad əə́giiʼkini kusiəd tɔgɛ́ɛ́, ɔnɔ́ na pɔ́lɛ́: «Nyɛ́ɛlɛ anɛ́ɛ́n tuə́ na sɔ́g nyóonɛ nyɔ́ polɛɛ́ agodɔ́ŋɔn lɛ́ nkúm ɛ Yúdɛn əə́?» 13Pə́yímuyúlísíni nɛŋo a mɔɛn pɔ́nɔ́: «Ɛ́ʼkɛn toɛn pámoóbaŋan a ɔmbásá o!» 14Náa Pɛláad ɔnɔ́ na pɔ́lɛ́: «Kɔbɛ́ igə anɛ́ɛ́n áa amɛ́ɛ́lɛ ə́?» Náa, pɛ́ɛ́sásɛd agá kə́mmú na toɛn pɔ́nɔ́: «Ɛ́ʼkɛn toɛn pámoóbaŋan a ɔmbásá o!» 15Wɔnɔ́ ná Pɛláad adɛʼkɛ́lɛɛ́ anyɔ́ŋɛn lɛ́ kiʼtúú kɛ́ pɔɔd kɛ́ɛg kɛób ilúún na nyɔ́lɛ́, aáság kubuúlisin Palábas, amáboyɛ́ʼkɛn Yə́sus lɛ́ pámobáam ná pámoóbaŋan a ɔmbásá.

Píníígi Yə́sus ɛdam ɛ́ pɔsɛ́n

(Maʼt 27.27-31; Sɛ́a 19.1-3)

16Pasɔ́njaa páyɛ́ɛ́n na Yə́sus a yoog yəəŋ ɛ nɛlaamɛʼ yɛ ngɔ́mɛnaʼ yɛ́ nkóʼkóón, . Páyɛ́ɛ agodɔ́ŋɔn kɛnɔ kɛ́go kɛ́ɛg lɛ́ pɛlɛʼtówa. Páyányámánánɛ́ɛ́ kɔ pɔ́lɛ́ piim. 17Píníígi Yə́sus ntaa yɛ́ mbógógó.#15.17 Kilə́ə́ kɛ́ kibógógó kɛ́yɛ́ɛ kilə́ə́ kɛ́ niiŋ, póóʼkóʼkóʼkó. Əgín puʼkúm na pɔɔd pá pagóón áa páyɛ́ɛ pəníigən kɛ́lɛ́ Píísiə́d nuwoo nó pɔsɛ́n páánog, pámámosɔ́nɛg a oʼto. 18Pə́ə́bə́ə́ anɛ́ɛ́n komoónyɛɛŋanɛ, pə́əmuúsoyidəni pɔ́nɔ́: «Nkúm ɛ Yúdɛn, calɛʼ calɛʼ calɛʼ!» 19Páyɛ́ɛ agomogóaŋan na niob a oʼto, pə́əmudúəŋənən pɛda, pə́əgiim ədúmə əndu a udi wə́ə́ŋ, nti yəə́gəə́siŋ a nsí wɔnɔ́ ná ándɛ páagɛɛlanɛ a udi wó nkúm. 20Ná páyɛ́ɛ páʼkoman ɛnyɛɛŋɛʼ yɛ́ɛy náan a nkó yəəŋ, pááság kumudíŋin ntaa yɛ́ mbógógó yɛ́ pə́yímuníígi, pə́mə́muyúlísíni pilə́ə́ piə́ŋ. A ngim yɛ́ɛy aa pɛ́ɛ́lón na nyɔ́lɛ́, pámɛ́ɛn amoóbaŋan a ɔmbásá.

Pándagɛɛn abaŋan Yə́sus a ɔmbásá.

(Maʼt 27.33-44; Lóʼk 23.36-43; Sɛ́a 19.16-24)

21Pə́yə́búníí na mɔɔd nyummú niiŋ lɛ́ Simɔ́ɔŋ, mɔɔd nyɔ́ a pálɛ́ɛg ɛ Silɛ́ɛn, sɛ ɛ pa Alɛsándɛlɛ pɔ́lɛ́ na Ulufúus, əə́gəə́yímbuúlini a pɔlɛ́m. Pasɔ́njaa pááság komoogóda ambaan lɛ́ ógóomin Yə́sus konyáŋɛn ɔmbásá. 22Páyɛ́ɛ́n na Yə́sus a kɛnɔ kímmú pɔ́ɔdɔ́ŋɔn a tɔgɛ́ɛ́ tó Əbələ́ə lɛ́ «Kologóʼta.» Áay lɛ́ «kɛnɔ kɛ́ kɛ́yɛ́ɛ wɔnɔ́ kɛlɛ́ʼtɛ́g kɛ́ oʼto.» 23Páyaʼkayɛ́moyɛ́ʼkɛn maloʼ məbuúbúlə́ na yoom yímmú, pɔ́ɔdɔ́ŋɔn lɛ́ míil. Náa, yɛɛ́sáŋɛ́nɛ koŋo. 24Páyɛ́mobáŋan a ɔmbásá, a ngim yɛ́ɛy, agɛɛlɛ lɛ́ páabanan pilə́ə́ piə́ŋ, pɛ́ɛ́lá ntɔŋ agolɛŋ ánɛ aa ə́siədií kɛ́yaán#15.24 Kɛ́lɛ náan a kálaʼtaʼ ɛ Pɛʼk 22.19 25Áanɛ na kɛás, a njə́ŋí ɛ́ʼtáan na íniʼ aa pɛ́ɛ́báŋan Yə́sus a ɔmbásá. 26Kɔ a ɔmbásá, píídílid a igúg igə aa páyɛ́moyóón a yɛ́lɛ́. Náan aa píídílid pɔ́nɔ́: «Táá, nkúm ɛ Yúdɛn.» 27Wɔɔ́s ogo wóow, pɛ́ɛ́báŋan tɛn pɔɔd pə́mmú kɔ áay pábaan a ɛbá ɛ́ Yə́sus. Páyɛ́boyáágan lɛ́ ɛ́nɛ́ sɔ́g a ɔmbásá wə́ə́ŋ lɛ́ nyóonɛ a ombɔg ó Yə́sus ó nɛnom, nyummú a oó kɛmɛs. Pɔ́lɛ́ páyɛ́ɛ piíbən pá pagóón, páagoóna pɔɔd. [ 28#15.28 A pagálaʼtaʼ pə́mmú pá kalaʼ pá píídílə na ombɔg, niɛŋ nɛ́ɛnɛ nɛ́lɛ kɔ lɛ́: «Taa, náan aa nkə kɛ́ kíyə́dílə́ə́ a Kálaʼtaʼ a niiŋ nɛ́ Yə́sus kɛ́yáás. Kíyə́dílə́ə́ lɛ́: “Páyɛ́moyáág a ondáŋ ó pɛbɛ́ pɛ́ pɔɔd pɛ́ pɛ́dɛʼkɛ́ɛ əguyə́nií pɛcɛm”.»] 29Pɔɔd pá páyɛ́ɛ agosánan kɔ áay páyɛ́ɛ agodam pámoodóga tɛn, pə́əgəə́liʼtəni na nto pɔ́nɔ́: «Ɛɛ́ɛ, wɛ nyɔ́ oyɛ́ɛ əgusəə wɔʼkɔ́ wəəbugə Tɛ́mpɛl wíiʼkini kowáag yɛndɛ́ŋ a mɔɔ́s mádáád súg#15.29 Kɛ́lɛ náan a kálaʼtaʼ ɛ Pɛʼk 22.8; Sɛ́a 2.19. Ɔmbɔ́ tɛn áanɛ a Mə́líʼkus 14.58 , 30ɔ́yɔ́yɛ́ɛ́ wɛɛ́nyɔ́amɔɛ́d anɛ́ɛ́n, wə́díŋin a ɔmbásá wóow, úsuu!» 31Yoom tɛn náan ímuʼ na puʼkúm pó payaaganɛʼ pɛfɔny na palɛŋ pɛcɛm. Pɔ́lɛ́ tɛn páyɛ́ɛ agomoónyɛɛŋanɛ, pɔ́ɔsɔyɔ kɔ pɔ́lɛ́ na pɔ́lɛ́ pɔ́nɔ́: «Iíi, ayɛ́ɛ ɔgɔɔyɔnɛ pɔsɔ́g. Nɛ́gɔŋ anɛ́ɛ́n óoʼ, ɔdɛɔ́gɔ ogɔɔ́yɔ́ɔyɛ nyɔ́lɛ́nyɔ́amɔɛ́d! 32Ayɛ́ɛ əgəə́səsəə ɔnɔ́ nyɔ́lɛ́ alɛ Məsíi, alɛ nkúm ɛ nigúu nɛ́ Ɛ́sɛlayɛl. Yə́díŋin anɛ́ɛ́n a ɔmbásá wóow nɛ́gɔŋ yi, ə́suu. Tɛmaʼkodála lɛ́ əə́suu, tɛagaag oʼto na nyɔ́lɛ́!» Ɔmbɔ́ tɛn pɛbɛ́ pɛ́ pɔɔd pɛ́ pɛ́ɛ́báŋan kɔ áay a ɛbá ɛ́ Yə́sus, páyɛ́moyágásɛ́nɛ́ɛ́ tɛn agomoodóga.

Ná kɛnɛŋ kɛ́ Yə́sus kíyííg, aáság kiisimid, aádó oʼto

(Maʼt 27.45-56; Lóʼk 23.44-49; Sɛ́a 19.28-30)

33Ná tóɛf iyííg, mbin yiídə́əŋ a nsí ngim pilíb, súʼtə́ə́ a mangɛn mádáád. 34A mangɛn mádáád, Yə́sus yiídóʼtin kiʼkíŋ na toɛn ɔnɔ́: «Ɛ́lɔ́ɔy, Ɛ́lɔ́ɔy, lámá sabágtáni?» Áay lɛ́: «Táán waam, Táán waam, tuə́ áa umíʼtúmín ngim náan#15.34 Kɛ́lɛ náan a kálaʼtaʼ ɛ Pɛʼk 22.2. Pə́ə́səə əgín wɔnɔ́ ná kíyə́sə́líí a tɔgɛ́ɛ́ tó alamɛyɛ́ɛŋ.?» 35Ná ngab ɛ pɔɔd yɛ́ ɛyɛ́ɛ kɔ áay ɛyóób náan, pə́ə́bə́ə́ kosɔyɔ pɔ́nɔ́: «Pomóób ə́, ɔɔ́ndɔdɔ́ŋɔn Ɛlɛ́as!» 36Sɔ́g nyummú kɔ áay a ondáŋ wɔ́ɔ́bɔn aáság kɛɛn na ɔʼtɛ́d, əə́nyum ɛʼpɔ́ɔnsɛ a pɛŋwáŋwáŋá pɛ́ maloʼ, əmíim áfanyɛg a oʼto ó niob, amɛ́ʼkɛn na Yə́sus lɛ́ ɔ́sɔ́sɔ#15.36 Pódála tɛn náan a kálaʼtaʼ ɛ Pɛʼk 69.22 Yiísə́ə́ ɔnɔ́ na pɔsɔ́g: «Póŋáan, tɛ́dála nga Ɛlɛ́as əəgiim əmuúsuuli a ɔmbásá!» 37Yə́sus aáság kiiʼkini kudóʼtin kiʼkíŋ na toɛn, əmíísímid, aádó oʼto. 38Sanjaʼ yɛ́ pɛ́ɛ́sandɛgɛnɛ a Tɛ́mpɛl#15.38 Kɛ́lɛ náan a kálaʼtaʼ yɛ Ɔsa 26.31-33 yaáság kosaalɛg pɛsaa pɛ́baan paáám, kəə́bə́ə́ a oʼto agɛɛn əgiig a nsun. 39Ná sɔ́njaa yɛ́ yɛɛ́dɛ́lɛmɛn a udi wó ɔmbásá yɛɛ́dála wɔnɔ́ ná Yə́sus ayáág nɛŋo, əə́gú, yiísə́ə́ yɔ́nɔ́: «A fɔ́lɔ́b, mɔɔd nyóonɛ ayɛ́ɛ Mɔɔ́n o Táán!» 40Ngab ɛ pagɛ́ɛd ɛyɛ́ɛ kɔ. Pɛ́ɛ́dɛ́lɛ́man laálá, pə́ədíin pánadɛna agá pɛnág agodɛ́ʼtɛg kiim kɛ́ kɛ́yɛ́ɛ agaásan. Kɔ a ondáŋ ó pagɛ́ɛd wóow, Malɛ́a nyɔ́ a Magdala ayɛ́ɛ kɔ, na Malɛ́a tɛn nyummú, ŋŋí ɛ pa Sɛ́ag, ɔnyɔmmɔ́n o mɔɔd, pɔ́lɛ́ ná Yosə́ə. Ɔʼkɛ́ɛd tɛn nyummú niiŋ lɛ́ Salomə́ə ayɛ́ɛ kɔ. 41Páyɛ́ɛ pagɛ́ɛd pá páyɛ́ɛ əgiim pə́yə́njən Yə́sus əgín kɔ́gɔ́ɔg a Kalilə́ə, páamoyɛ́ɛlanɛ maʼtóʼtóm. Ɛ́fɔlɛ́ ɛ́ pagɛ́ɛd tɛn yɛ́ íyíím ɛ́bágananɛ na nyɔ́lɛ́ a Yolósalɛm ɛ́yɛ́ɛ kɔ.

Yósɛb yiísiə́d kɛlóŋ kɛ́ Yə́sus agɛɛn əni

(Maʼt 27.57-61; Lóʼk 23.50-56; Sɛ́a 19.38-42)

42Niób nɛáság kiim əgiig. Na niób nɛ́go nɛ́ɛn pɔ́nɔ́ kisúgiʼ na koany aa Yúdɛn ɛ́yɛ́ɛ yaáboŋɛn kɛ́lɛ́. 43Mɔɔd nyummú niiŋ lɛ́ Yósɛb, kibíəniʼ kɛ́ pálɛ́ɛg yɛ Əliməʼtə́ə aáság kiim alon. Ayɛ́ɛ mɔɔd tɛn nyɔ́ ayɛ́ɛ lɛ́ amaʼkosɔyɛd a ɛgɔny yɔ́ɔ́bɔn yɛ́ ɛgóón yɛ́ɛy, páyɛmoyóob. Nyɔ́lɛ́ tɛn ayɛ́ɛ aándaamɛna pɛda lɛ́ Táán alɛ́ɛ́ kolaamɛ. Yɛɛ́nóm ɔʼtɛ́m amɛ́ɛn əŋíən na Pɛláad lɛ́ ámoyɛ́ʼkɛn kɛlóŋ kɛ́ Yə́sus nyɔ́lɛ́ yɛ́ɛn əni. 44Ná Pɛláad ayóób lɛ́ Yə́sus əə́ʼkugu, əyə́wúnə́níí, aáság kusəə lɛ́ pɛ́ɛn amodɔ́ŋɔnɔn sɔ́njaa yɛ́ nkóʼkóón yɛ́ píídə́nígi a kinuŋ. Əyímuŋíən ɔnɔ́ na nyɔ́lɛ́: «Yə́sus əə́gú kalaʼ a?» 45Ná sɔ́njaa ɛyɛ́modɛánɛ lɛ́ aádó oʼto kalaʼ, Pɛláad aáság kɛɛ́ʼkɛn Yósɛb toɛn lɛ́ yɛ́ɛn əsiəd kɛlóŋ. 46Yósɛb yɛɛ́wɛ́ɛ́n ombɔ́m ó lɛ́ɛŋ, wə́əfúŋə púyúŋ púyúŋ. Yɛɛ́gábɛ́na óndoʼ yɛ́ pɛ́ɛ́báŋan Yə́sus na yɛ́lɛ́, əə́suuli kɛlóŋ a ɔmbásá, aágóda na ombɔ́m, amɛ́ɛn əni. Əyímuúní a kəəniʼ ká káyɛ́ɛ kɔ áay. Káyɛ́ɛ kədímə́ə́n wɔnɔ́ kɛbaŋ a kɛgon. Ná ayɛ́ɛ əə́ʼkumuúni, aáság kusiəd kɛa kɛ́ kɛdám kɛ́ nɛdáán, əə́míngílídə́ni agolɔ́g unuʼ ó kəəniʼ na nɛ́lɛ́. 47Pa Malɛ́a nyɔ́ a Magdala pɔ́lɛ́ na Malɛ́a nyummú páyɛ́ɛ əgín kɔ áay, páadɛ́ʼtɛg wɔnɔ́ ná pálɛɛ́ əguni Yə́sus.

Currently Selected:

Mə́líʼkus 15: yatDBL

Highlight

Copy