Mə́líʼkus 16

Yə́sus aálón a kəəniʼ ongóm

(Maʼt 28.1-8; Lóʼk 24.1-12; Sɛ́a 20.1-10)

17 Ná kisúgiʼ kɛ́ɛ́sán, pa Malɛ́a nyɔ́ a Magdala pɔ́lɛ́ na Salomə́ə na Malɛ́a tɛn nyummú, ŋŋí ɛ Sɛ́ag pɛ́wɛ́ɛ́n lamɛ́ndaʼ agɛɛn əwu kɛlóŋ kɛ́ Yə́sus. 2Páyɛ́ɛ́n a kəəniʼ na pɛbáŋɛn pɛ́ koany kó a wɔɔ́s ó sɔ́ndɛʼ, áay pɔ́nɔ́ kisúgiʼ kɛ́ Yúdɛn kɛ́ɛ́sán puə́y. 3Páyɛ́ɛ agɛɛn pə́əgiim pɔ́ɔ́cɔcɔb pɔ́nɔ́ əə: «Ánɛ aa əə́bimíngilidini nɛdáán nɛ́ páyáág a unuʼ ó kəəniʼ ə́?» 4Ná páyɛ́ɛ pándɛ ndúmiʼ na kəəniʼ, pááság kodála nɛdáán nɛ́go nɛ́ páyɛ́ɛ əgiim pááságɛma lɛ́ nɛ́ɛ́yámɛn kɛ́fɔlɛ́, nɛándɛ nimíngílídiə́n a ɛbá. 5Pááság kɛɛn, pɔ́ɔ́sɔ́d a kəəniʼ. Ná pɛ́ɛ́sɔ́d kɔ, pɛ́ɛ́dála ɔnyɔmmɔ́n ó mɔɔd alɛ kɔ undəndínə́ə́n a ɛbá yɛ́ ombɔg ó nɛnom. Ayɛ́ɛ na ntaa nfúlúʼtú. Mədig mə́yíbusúú a ambaan. 6Náa ɔnɔ́ na pɔ́lɛ́: «Pɔɔ́n pá ɛ́yaʼ! Podɛʼtámmána aá! Mbálɛŋ lɛ́ Yə́sus mɔɔ́n o Násalɛd nyɔ́ pɛ́ɛ́báŋan a ɔmbásá aa polɛɛ́ əguunə. Amóndɛg, əndigi áanɛ. Táá kɛnɔ kɛ́ pə́yíngígi kɛlóŋ kiə́ŋ áa kɛ́ɛnɛ. 7Nɛ́gɔŋ yɛ́ɛnɛ todáan, póɛn adɛ́anɛ na Píɛ, na paaʼkan piim poɔʼkɔ́: “Aáʼkoboóyaŋɛnɛ a Kalilə́ə, poamoodála kɔ́gɔ́ɔg əgín wɔnɔ́ ná ayɛ́bodɛánɛ!” » 8Pə́yíím pálon a kəəniʼ na ɔʼtɛ́d, pə́əliminə na wɛɛ́y. Pɛ́ɛ́ʼtáŋ unuʼ ó kodam pááloaŋanan pɔsɔ́g nkə kɛ́ɛg kɛ́ pɛ́ɛ́dála lɛ́ wɛɛ́y óyɛ́ɛ na pɔ́lɛ́ a kúfuʼ.

Yə́sus ayɛ́ɛ́n alónɛn Malɛ́a ntóón ɛ Magdala

(Maʼt 28.9-10; Sɛ́a 20.11-18)

[ 9Ɔʼkɛ́ɛd o na oʼto na oʼto nyɔ́ Yə́sus yɛɛ́lónɛn ná yɛɛ́lón a kəəniʼ na koany púúb kó wɔɔ́s ó na oʼto na oʼto ó sɔ́ndɛʼ ayɛ́ɛ Malɛ́a ntóón ɛ Magdala. Malɛ́a ogo nyóon aa ayɛ́ɛ na məŋun má mabɛ́ máʼtáan na mábaan má máyɛ́ɛ əgumuyə́bi náa Yə́sus yɛɛ́ŋɛ́ŋ mɔ́lɛ́. 10Ná Yə́sus ayɛ́molónɛn, ayɛ́ɛ́n adɛ́anɛ na paaʼkan pə́ə́ŋ pá páyɛ́ɛ na nyɔ́lɛ́ pɛnɛŋ piim. Ayɛ́bobóan pálɛ suúúm, páalɛɛ. 11Náa, ná ayɛ́bodɛánɛ lɛ́ Yə́sus alɛ ongóm, nyɔ́lɛ́ amámoodála na əngis yə́ə́ŋ, pə́diʼkə́əgəə́liʼtini.

Yə́sus ayɛ́ɛ́n alónɛn paaʼkan pə́ə́ŋ tɛn pábaan a ngə́

(Lóʼk 24.13-35)

12A ngim tɛn yɛ́ɛy, Yə́sus ayɛ́ɛ́n alónɛn paaʼkan pə́ə́ŋ pábaan a ngə́. Páyɛ́ɛ agɛɛn ongɛn a əʼkúu yɛ́ a ngim. Ayɛ́ɛ́n aboolónɛn pɔ́lɛ́ ná aáʼkaáyáan, udi wə́ə́ŋ wándɛ ndɛ́ŋ. 13Ná páyɛ́moodála, pə́yúúlíni ngim agɛɛn adɛ́anɛ na pɔsɔ́g lɛ́ pɔ́lɛ́ páádála Sə́dúk wɔɔbɔn. Náa, ɔmbɔ́ tɛn pɔ́lɛ́, paaʼkan pə́diʼkə́əgəə́liʼtini tɛn.

Yə́sus yɛɛ́lónɛn anɛ́ɛ́n paaʼkan pə́ə́ŋ piim pówád na úmmuʼ

(Maʼt 28.16-20; Lóʼk 24.36-49; Sɛ́a 20.19-23; Pig 1.6-8)

14Kə́mmú tɛn a ngim yɛ́ɛy, Yə́sus ayɛ́ɛ́n alónɛn paaʼkan pə́ə́ŋ pówád na pábaan. Ayɛ́bobóan pálɛ agonɛ́ɛnɛ. Ayɛ́boóbɛ́n, ɔnɔ́ na pɔ́lɛ́ pálɛ na ntɛ́m nnasáŋ, pɔ́dɛɔ́gɔ na kəə́liʼtiniʼ lɛ́ páyáág isuŋ na pá páyɛ́moodála, pámáyɛbodɛ́anɛ lɛ́ nyɔ́lɛ́ alɛ ongóm. 15Ná ayɛ́ɛ aáʼkobosásan, aáság kusəə ɔnɔ́ na pɔ́lɛ́: «Todáan anɛ́ɛ́n a nsí ngim, pólaamɛnɛ ungim Tɔsɔm Tólaŋ. 16Nyɔ́ alɛ́ɛ́ kaágɛ́ɛ́ oʼto, ə́əsiəd ɔsɔgɛn, nyóon aa alɛ́ɛ́ kɔɔy. Náa, nyɔ́ adɛndɛ́ɛ́ kaágɛ́ɛ́ oʼto, nyóon alɛ́ɛ́ kɛɛn na nsɔ́ɔ́. 17Pá pálɛ́ɛ́ kaágɛ́ɛ́ oʼto, pɛálɛ́ʼkán pɛ́ pálɛ́ɛ́ kɛɛlɛɛ́ əguloodi lɛ́ páʼkaag oʼto na Táán a pɛ́ɛnɛ pɛ́lɛɛ́ lɛ́: Pálɛ́ɛ́ koŋɛ́ŋan məŋun má mabɛ́ a niiŋ nɛ́am. Pálɛ́ɛ́ tɛn kosɔyɔ əʼkíí yɛ́ angwa. 18Pálɛ́ɛ́ kɛɛn tɛn lɛ́ ɔmbɔ́ pə́ə́gumin uʼkud na ombɔg, ódɛboodá. Ɔmbɔ́ páŋo ɛlɔg, ɛ́dɛboyɛ́ɛ́lɛ yoom. Mɔɔd alɛ abany páyɛmoyábɛgɛn ɔmbɔg, óyoom.» 19Ná Sə́dúk Yə́sus ayɛ́ɛ aáʼkoman kosɔyɔ náan na pɔ́lɛ́, əə́bə́ə́ kobag a mɔɛn. Ayɛ́ɛ́n ələndin a ombɔg ó nɛnom ó Táán. 20A pɔ́lɛ́, pɛ́ɛ́ság kɛɛn agɛɛn alɔɛgɛ Tɔsɔm Tólaŋ kɛnɔ kiim. Sə́dúk ayɛ́ɛ agoboyábɛgɛn ombɔg a nkə kɛ́ páyɛ́ɛ agɛɛlɛ, oóloodi a mangán má páyɛ́ɛ agɛɛlanɛ lɛ́ nkə kɛ́ pálɛɛ́ alɔɛgɛ kɛ́lɛ fɔ́lɔ́b.#16.20 Angɛŋ yɛ́ɛnɛ, kusiəd a angɛŋ 9 əgiig a 20, ɔ́dɛɔ́gɔ a pagálaʼtaʼ piíŋ pá kalaʼ pá píídílə na ombɔg.]

Currently Selected:

Mə́líʼkus 16: yatDBL

Highlight

Copy