Mə́líʼkus 10

Mɔɔd oʼkóodi lɛ́ ágada kodɔn

(Maʼt 19.1-9; Lóʼk 16.18)

1A ngim yɛ́ɛy, Yə́sus aáság kodɛ́ɛmɛn áay a Kaʼpɛlɛnáyum, agɛɛn a kɛsom kɛ́ nsí kɛ́ a Siudə́ə, na a nsɛ́ɛ́ ɛ noom nó Siuludɛ́ɛŋ. Kiʼtúú kɛ́ pɔɔd kɛáság kiiʼkiniʼ kiim əgəə́yii kɛnɔ kɛ́ ayɛ́ɛ, əə́bə́ə́ koboyáʼkananɛ əgín wɔnɔ́ ná ándɛ áagɛɛlanɛ pɛnɛŋ piim. 2Ngab ɛ Pafalɛsɛyɛ́ɛŋ yimmú ɛyáyɛ́ʼtɛ́nɛ́ɛ́ a ɛbá yə́ə́ŋ. Wɔnɔ́ ná páyɛ́ɛ əguunə kumudə́əŋi a kisindiʼ kɛɔ́bɔn, pə́yímuŋíən pɔ́nɔ́ əə: «Pɛcɛm piə́s pɛ́lɛ agɛɛ́ʼkɛn mɔɔd toɛn lɛ́ ágada kodɔn na oʼkán á?» 3Yə́sus əyíbuŋíən tɛn ɔnɔ́ na pɔ́lɛ́ əə: «Moyíis yiísə́ə́ a pɛcɛm ɔnɔ́ nkə a noá na kɛbán kɛ́ɛg kɛ́ kosaa kodɔn ə́?» 4Náa pɔ́nɔ́ na nyɔ́lɛ́: «Moyíis yiídílə a pɛcɛm lɛ́ mɔɔd aándaaŋɛŋ oʼkán, ə́dilə nufuuʼ nóonɛ lɛ́ kodɔn koáman, ámoyɛ́ʼkɛn a ombɔg#10.4 Kɛ́lɛ náan a kálaʼtaʼ ɛ Tɛʼt 24.1 » 5Náa Yə́sus ɔnɔ́ na pɔ́lɛ́: «Ɛɛ́ɛ, Moyíis yiídílə kɛcɛm kɛ́ɛg náan a oʼto wááŋan lɛ́ polɛ na ntɛ́m yɛ́ nnasáŋ. 6Náa, əgín kɔ́gɔ́ɔg a niə́bə́ə ná Táán ayɛ́ɛ aáʼkɛɛlɛ muim, ayɛ́ɛ́lɛ mɔɔd lɛ́ na ɔnɔ́mɛɛd na ɔʼkɛ́ɛd#10.6 Kɛ́lɛ náan a kálaʼtaʼ ɛ Siɛ 1.27; 5.2 7Kólɛ́ aa ɔnɔ́mɛɛd alɛ́ɛ́ kudi ə́mə́dí sɛ na ŋŋí agɛɛn agaálad na oʼkán. 8Pándɛ anyóon úmmuʼ súg, pə́ndigi kə́mmú nto ɛ pɔɔd ɛ́baan. 9Mɔɔd oʼkóodi anɛ́ɛ́n lɛ́ ásaa nkə kɛ́ Táán áálad!» 10Ná páyɛ́ɛ pándɛ a noádɛʼ, paaʼkan pə́ə́ŋ pə́ə́bə́ə́ kumuŋíənə pɔ́nɔ́ na nyɔ́lɛ́ álɛŋ koboyáásɛnɛn kɛbán kɛ́ kosaa kodɔn kɛ́ɛg aáŋ. 11Náa Yə́sus ɔnɔ́ na pɔ́lɛ́: «Mɔɔd amaʼkoŋɛŋ oʼkán lɛ́ kodɔn koáman, əməʼkusiəd wɛndɛ́ŋ, alɛ uʼtə́ŋə́ə́n a kɛdaŋ a noá na oʼkán wəəŋ o noádɛʼ. 12Yoom tɛn náan ímuʼ na ɔʼkɛ́ɛd nyɔ́ aádɛ́da kodɔn agɛɛn ɔdɔn na mɔɔd wɛndɛ́ŋ. Nyɔ́lɛ́ tɛn alɛ uʼtə́ŋə́ə́n a kɛdaŋ a noá na onom.»

Yə́sus yiíbílis moyaa mó poómbaa

(Maʼt 19.13-15; Lóʼk 18.15-17)

13Pɔɔd pə́yíímín Yə́sus na poómbaa lɛ́ ná áboyábɛgɛn ombɔg a oʼto. Náa, paaʼkan páyɛ́bosásan lɛ́ púúlini ngim na pɔ́lɛ́. 14Ná Yə́sus yɛɛ́dála náan pə́əbudíʼkəni, yiílíŋ, ɔnɔ́ na pɔ́lɛ́: «Tíən poómbaa póob píim ná ndɛɛ́, pudiyíbuugíd lɛ́ Nɛlaamɛʼ nɛ́ Táán nɛ́agoob na pá pálɛɛ́ wɔnɔ́ pɔ́lɛ́. 15A fɔ́lɔ́b ndabodɛ́anɛ lɛ́ nyɔ́ əsiədinií Nɛlaamɛʼ nɛ́ Táán wɔnɔ́ ná ɛyaa ɛ́ moóngaa, nyóon adɛndɛ́ɛ́ kosɔd a nɛ́lɛ́.» 16Ná ayɛ́ɛ aáʼkoman kosɔyɔ náan, aáság kəə́súidin poómbaa póob, əmə́buyə́gúlígíí, amábɛ́gɛn ɛ́nɛ́ moóngaa ombɔg a oʼto əgumuúbilis.

Kɛ́lɛ kɛgányáán lɛ́ mɔɔd o tugúm ɔ́sɔd a Nɛlaamɛʼ nɛ́ Táán ə́y

(Maʼt 19.16-30; Lóʼk 18.18-30)

17Ná Yə́sus ayɛ́ɛ aándanyɔ́ŋɛn kosan, mɔɔd nyummú aáság kiim alon na ɔʼtɛ́d. Əyímudə́ə́ŋə́nən a udi na əndu, ɔnɔ́ na nyɔ́lɛ́: «Kisig kɛ́ kɛlág! Nkə aa nyɛ́lɛɛ́ agɛɛlɛ lɛ́ nyɛ́ɛn na ɔlaa ó pɛnɛŋ piim əə́?» 18Náa Yə́sus ɔnɔ́ na nyɔ́lɛ́: «A igə aa waágɛʼtɔ́ŋɔn lɛ́ kisig əə́? Úmmuʼ nyɔ́ alɛɛ́ ɔŋŋɛʼ ɔdɛɔ́gɔ, ná kɛ́sánɛn əgín lɛ́ Táán nyɔ́lɛ́nyɔ́əsíŋ. 19Waálɛŋ pɛcɛm, ngɔ́ɔ́? Pɛ́ aa pɛ́ɛnɛ lɛ́: Odɛnjóón mɔɔd, udiʼtə́əŋ a kɛdaŋ, udinjííbə, odɛʼtɛ́lɛ́mɛn mɔɔd mbaasɔ́ ɛ pɛfaa, udisiə́dín mɔɔd yoom a kɛcoo, nyáádɛ sɛ waaŋ na ŋŋí waaŋ.» 20Mɔɔd əyímuyúlísíni ɔnɔ́: «Kɛlág, mɛ əgín kɔ a nɛóndaa nɛ́am aa ndɛɛ́ əgəə́nuŋ a pɛcɛm pɛ́ɛb piim.» 21Ná mɔɔd nyóon yiísə́ə́ náan, Yə́sus aáság komodɛ́ʼtɛg yəə́b. Yɛɛ́nyɔ́ga na nyɔ́lɛ́, náa ɔnɔ́: «Ɛɛ́ɛ, yoom yáʼkogoólɔbɛn ímuʼ súg: Tod, ólɛga nkə kiim kɛ́ ugódíí. Mɔɔnɛ́ móom wáaban mɔsɔ́gasɔ́gá ná wíim anɛ́ɛ́n wínjə́ən, wagɛɛn na tugúm a mɔɛn.» 22Náa, əgín ná mɔɔd nyóon ayóób náan, nkó yəəŋ yiísúú. Yɛɛ́ság kosan udi suúúm lɛ́ ayɛ́ɛ na tugúm tuíŋ.

23Yə́sus ayágásɛ́ɛ́ ná paaʼkan pə́ə́ŋ pálɛɛ́, náa ɔnɔ́ na pɔ́lɛ́: «Kɛágány na pɔɔd pá tugúm lɛ́ pɔ́sɔd a Nɛlaamɛʼ nɛ́ Táán ə́y!» 24Tɔgɛ́ɛ́ tó Yə́sus tóod tuíyə́bi paaʼkan pə́ə́ŋ kɛ́fɔlɛ́. Náa ɔnɔ́ kə́mmú na pɔ́lɛ́: «Pɔɔ́n, kɛágány lɛ́#10.24 A pagálaʼtaʼ pə́mmú pá kalaʼ pá píídílə na ombɔg, pámáábɛg kɔ lɛ́: Kɛágány lɛ́ mɔɔd nyɔ́ yaágɛ́nɛ́ɛ́ ɔʼtɛ́m a tugúm. mɔɔd ɔ́sɔd a Nɛlaamɛʼ nɛ́ Táán ə́y! 25Ɛɛ́ɛ, kɛ́lɛ kɛgányáán lɛ́ kiʼtóg kɛ́ nnyam yɛ́ pɔ́ɔdɔ́ŋɔn lɛ́ sɛamóo ɛ́sɔd a kiwoo kɛ́ níloʼ nɛ́ kolada pilə́ə́. Náa a mɔɔd o tugúm, kímíʼkíni kogany kə́mmú agaáyɛn náan agɛɛlɛ lɛ́ ɔ́sɔd a Nɛlaamɛʼ nɛ́ Táán.» 26Ná Yə́sus əyíʼkíni kusəə náan, nsiŋ ɛ paaʼkan yiílióŋ kúfuʼ a oʼto. Páyɛ́ɛ əgəə́ŋíənə kɔ pɔ́lɛ́ na pɔ́lɛ́ pɔ́nɔ́ əə: «Áay oóoʼ, ánɛ aa aágaáʼkɛ anɛ́ɛ́n kɔɔy əə́?» 27Yə́sus ayɛ́bodɛ́ʼtɛg a udi log log log, náa ɔnɔ́ na pɔ́lɛ́: «Ɛɛ́ɛ, kɛ́lɛ náan fɔ́lɔ́b lɛ́ a mɔɔd na mɔɔd, ngə́ ɛgɔɔ́yɔ́ɔyɛ ɛdɛɔ́gɔ. Náa a Táán, ímuʼ na ímuʼ yɛ́ ɛ́lɛɛ́ ɛ́gomoyag ɛ́dɛɔ́gɔ lɛ́ nyɔ́lɛ́ ogóódi toɛn tó kɛɛlɛ yiim.» 28Náa Píɛ ɔnɔ́ na nyɔ́lɛ́: «Ooo Sə́dúk, pəsi anɛ́ɛ́n pá tiídí tímə́dí yiim yɛ́ tiígóodi, əguguyə́ən oóoʼ?» 29Yə́sus əyímuyúlísíni ɔnɔ́ na nyɔ́lɛ́: «A fɔ́lɔ́b ndabodɛ́anɛ lɛ́ ungim nyɔ́ yiídí ə́mə́dí toádɛʼ, pomóŋŋí, ŋŋí, sɛ, pɔɔ́n na malɛ́m a niiŋ nɛ́am na a nɛ́ Tɔsɔm tó Táán, 30yiim yɛ́ɛy yɛ́ yiídí lɛ́ pomóŋŋí, ŋŋí, sɛ, pɔɔ́n, malɛ́m, alɛ́ɛ́ kɛɛn na yɛ́lɛ́ náan əʼtin áʼtáan áʼtáan a mədúʼtugəniʼ əgín móonɛ má tigódíí, ɔmbɔ́ tɛn ntɔ́b. Alɛ́ɛ́ kɛɛn tɛn na ɔlaa ó pɛnɛŋ piim a mədúg má yuudi. 31Piíŋ pá pálɛɛ́ nɛ́gɔŋ yuudi pálɛ́ɛ́ kuúlini ngim. Piíŋ tɛn pá pálɛɛ́ nɛ́gɔŋ ngim, pálɛ́ɛ́ kosan yuudi.»

Pɛnɛŋ pɛ́dáád a pɛ́ɛnɛ Yə́sus ɔnɔ́ nyɔ́lɛ́ əəgu, ə́yiʼkini kiim yóndɛg

(Maʼt 20.17-19; Lóʼk 18.31-34)

32Yə́sus ayɛ́ɛ a ngə́ páagɛɛn a Yolósalɛm na paaʼkan pə́ə́ŋ. Nyɔ́lɛ́ aa yiísúidin udi. Wɛɛ́y úyíbugóodi pɔ́lɛ́ piim lɛ́ na paaʼkan na ungim nyɔ́ ayɛ́ɛ əgubuyə́ən. Yɛɛ́dɔ́ŋɔn kə́mmú paaʼkan pə́ə́ŋ pá pówád na pábaan, pə́mə́suídíí agosɔyɔ a ɛbá, əə́bə́ə́ kobodɛ́ananɛ ntɔ́b yɛ́ yaámoóboan kɛnɛŋ sɔɔŋ. 33Yiísə́ə́ ɔnɔ́ na pɔ́lɛ́: «Taa, Pəsi aa póonɛ tɛándabágɛ́ɛ́ a Yolósalɛm, kɛnɔ kɛ́ páagɛndɛg mɛ Mɔɔ́n o mɔɔd a ɔmbɔg á puʼkúm pó payaaganɛʼ pɛfɔny, na palɛŋ pɛcɛm. Pálɛ́ɛ́ kobaasɛ kɛbán kɛ́am lɛ́ pɛ́njoon, pə́yiʼkumin agɛnyɛɛ́ʼkɛn a ɔmbɔg á pandɛŋ Táán. 34Pandɛŋ Táán pálɛ́ɛ́ kɛnyɛɛŋanɛ, páagɛŋŋɔnɔ, pə́əgiʼtúəŋənən pɛda a udi, páyɛʼpáam na nsuə́, páság kɛnjoon. Náa, mɔɔ́s mádáád a ngim yɛ́ɛy, ndəgiiʼkini kiim ndon a kəəniʼ ongóm.»

Nkə kɛ́ pa Sɛ́ag pɔ́lɛ́ na móŋŋí Sɛ́aŋ pííŋíən

(Maʼt 20.20-28; Lóʼk 22.25-27)

35Pa Sɛ́ag pɔ́lɛ́ na Sɛ́aŋ, pɔɔ́n pá Səbədə́ə, páyáyɛ́ʼtɛ́nɛ́ɛ́ a ɛbá ɛ́ Yə́sus, pɔ́nɔ́ na nyɔ́lɛ́: «Kɛlág, tɛanyɔ́ŋɛn lɛ́ tíguŋíən yoom. Sɛ́gɔɔ óbɛyɛ́ɛlɛ nkə kɛ́ tiə́guŋíən.» 36Náa Yə́sus ɔnɔ́ na pɔ́lɛ́: «Poanyɔ́ŋɛn lɛ́ nyɛ́ɛlɛ nkə na pəŋi ə́?» 37Pə́yímuyúlísíni pɔ́nɔ́ na nyɔ́lɛ́: «Tɛanyɔ́ŋɛn lɛ́ ná waágɛɛn a oʼkɔɔ wááŋ ó Nɛlaamɛʼ, a nugəm, óbɛyáág lɛ́ nyóonɛ a ombɔg wááŋ ó nɛnom, nyummú a oó kɛmɛs.» 38Yə́sus əyíbuyúlísíni ɔnɔ́ na pɔ́lɛ́: «Podɛɔ́gɔ agolɛŋ nkə kɛ́ɛg kɛ́ polɛɛ́ əgiŋíən. Polɛ págaáʼkɛ konɛ ntɔ́b yɛ́ mɛ ndáanɛ a? Ɔmbɔ́ lɛ́ yɛ́ ndɔ́ɔgɔɔŋ a ɔsɔgɛn wáam əə́?» 39Náa pɔ́nɔ́ na nyɔ́lɛ́: «Ɛɛ́ɛ, nkə kɛ́ɛg kiim, tɛlɛ págonóʼtan.» Náa ɔnɔ́ na pɔ́lɛ́: «Ɛɛ́ɛ, a ntɔ́b, kɛ́lɛ náan fɔ́lɔ́b lɛ́ pəŋi tɛn polɛ́ɛ́ konɛ yɛ́lɛ́, póyɔɔŋ tɛn njəʼkə́nə́ní wɔnɔ́ mɛ a ɔsɔgɛn. 40Náa, a kɛ́ kuləndin a ombɔg wáam ó nɛnom, ɔmbɔ́ lɛ́ a oó kɛmɛs, adɛ́njaŋ mɛ áa ndágɛɛ́ʼkɛn mɔ́lɛ́. Máagoob na pá Mbáa yiísóbíni lɛ́ mɔ́ɔ́bɔn.» 41Ná pɔsɔ́g paaʼkan pə́mmú póob pá pówád páyóób nkə kɛ́ niŋŋí nɛ́ɛn lɛ́ na Sɛ́ag na Sɛ́aŋ pííŋíən, píílíŋ na pɔ́lɛ́. 42Yə́sus ayɛ́boodɔ́ŋɔn pɔ́lɛ́ piim, náa ɔnɔ́ na pɔ́lɛ́: «Adɛ́ pəŋibáamɔɛ́d poálɛŋ lɛ́ a nsí yɛ́ɛnɛ, pɔɔd pá tɛlɛɛ́ agodɛ́ʼtɛg lɛ́ pálɛ palaamɛʼ, pɔɔd pá pagóón, pálɛ alaamɛ a toɛn, póoloodi lɛ́ pɔ́lɛ́ aa pálɛɛ́ na Nɛlaamɛʼ a? 43Náa, a pəŋi, kíʼkóodi lɛ́ kíɛn náan, ndóo. Kíɛn agá lɛ́ nyɔ́ alɛɛ́ anyɔ́ŋɛn kɛɛn kɛgóʼkóón, yáyáánɛ inə́mbí ɛ́ pɔsɔ́g. 44Nyɔ́ aányɔ́ŋɛn kɛɛn oʼtɛ́lɛm yuudi a ondáŋ wááŋan, yɛ́ɛn wɔnɔ́ kɛɔ́lɛ́ kɛ́ ungim. 45Kɛ́lɛ lɛ́, mɛɛ́nyɔ́amɔɛ́d Mɔɔ́n o mɔɔd, ntiʼkə́əgiim a nsí yɛ́ɛnɛ lɛ́ ná pɔɔd aa pɛ́ɛnɛɛ́ munə́mbí móam, ndóo. Njíím lɛ́ ná mɛ áa nyɛ́ɛnɛɛ́ inə́mbí yɔ́ɔ́bɔn, ndɛ nyɛɛ́ʼkɛn ɔlaa wáam agɛɛlɛ lɛ́ nyááŋɛn ɛ́fɔlɛ́ ɛ́ pɔɔd.»

Yə́sus ɔyɔ́ɔ́yɛ ongwongwóg niiŋ lɛ́ Paaʼtimə́ə

(Maʼt 20.29-34; Lóʼk 18.35-43)

46Yə́sus ayɛ́ɛ́n əgiig na paaʼkan pə́ə́ŋ a pálɛ́ɛg yimmú niiŋ lɛ́ Yəlíʼko. Ná páyɛ́ɛ pándaalon agɛɛn, kiʼtúú kɛ́ pɔɔd kɛ́yɛ́ɛ əgiim kíbuyə́ən a ngim súuu. Pɛ́ɛ́bóan ongwongwóg nyummú undəndínə́ə́n kɔ a ɛbá yɛ́ ngə́, aálɛ́ba moom na pasan a ngə́. Ayɛ́ɛ niiŋ lɛ́ Paaʼtimə́ə, mɔɔ́n o Timə́ə. 47Ná mɔɔd nyóon ayóób lɛ́ Yə́sus mɔɔ́n o Násalɛd aa nyóon əə́ndəgiim asánɛ́ɛ́, əə́bə́ə́ kumuʼkíŋə nɛŋo a mɔɛn ɔnɔ́: «Sɛ́gɔɔ óo, Yə́sus Mɔɔ́n o Tə́fid, siəd maan na mɛ!» 48Pɔɔd piíŋ pə́ə́bə́ə́ komosásan pɔ́nɔ́ na nyɔ́lɛ́: «Lɔ́g unuʼ!» Náa nyɔ́lɛ́ ayɛ́ɛ əgiiʼkini kosása agá kə́mmú na toɛn, ɔnɔ́: «Sɛ́gɔɔ Yə́sus Mɔɔ́n o Tə́fid, siəd maan na mɛ o!» 49Yə́sus aáság kodɛ́lɛm. Náa ɔnɔ́: «Póɛʼtɔ́ŋɔnɔn mɔɔd nyóon.» Pááság komodɔ́ŋɔn, pɔ́nɔ́ na nyɔ́lɛ́: «Mɔɔ́n wo mbáa, tɛ́ɛ́mɛn, wíim, alɛ agogodɔ́ŋɔn!» 50Əgín tɛn ná mɔɔd nyóon ayóób náan, aáság kodɛ́ɛmɛn ŋwaád, amáyáyɛ́dɛ́ɛ́ kóod yəəŋ, əə́sisin a ambaan yə́ə́ŋ, amɛ́ɛn ná Yə́sus alɛɛ́. 51Yə́sus əyímuŋíən ɔnɔ́ əə: «Olɛ əgiʼkíŋə lɛ́ nyɛ́ɛlɛ tuə́ na wɛ ə́?» Náa mɔɔd ɔnɔ́ na nyɔ́lɛ́: «Kɛlág, ndaanyɔ́ŋɛn lɛ́ wɛ́nyɛɛlɛ nyíiʼkini kodɛ́ʼtɛganan.» 52Náa Yə́sus ɔnɔ́ na nyɔ́lɛ́: «Mɔɔ́n wo mbáa, tod áaá! Omɔ́ɔy lɛ́ omáág oʼto na Táán.» Əgín kɔ áay kum a nsí, əə́bə́ə́ kodɛ́ʼtɛganan. Ayɛ́ɛ əgiim ə́yə́njən Yə́sus kɛnɔ kiim.

Currently Selected:

Mə́líʼkus 10: yatDBL

Highlight

Copy