Mə́líʼkus 11

Yə́sus yɛɛ́sɔ́d a Yolósalɛm páamosɛ́gɛn wɔnɔ́ nkúm

(Maʼt 21.1-11; Lóʼk 19.28-40; Sɛ́a 12.12-16)

1Ná Yə́sus na paaʼkan pə́ə́ŋ páyɛ́ɛ pándɛ ndúmiʼ na Yolósalɛm, páyɛ́ɛ pándɛ a oʼkon ó malɛ́m má pa olifiyə́ə, #11.1 Kiɛd kímmú aa pɔ́ɔdɔ́ŋɔn náan a tɔgɛ́ɛ́ tó piləsí lɛ́ «olifiyə́ə.» Kɛ́lɛ əguum modámádám mó pɔ́ɔdɔ́ŋɔn tɛn lɛ́ «olíifə.» ndúmiʼ na Pɛdfasə́ə na Pɛʼtaníi. Yə́sus yɛɛ́dɛ́lɛm aáság kudə́əmini paaʼkan pə́ə́ŋ pábaan, amáboodóm yuudi, 2ɔnɔ́ na pɔ́lɛ́: «Todáan a ɛyaa ɛ́ nigúu yɛ́ɛy yuudi. Ná puə́giig kɔ, a nɛsɔd nɛ́ɛn poaboan mɔɔ́n ó jáʼkáas uʼtilígə́ə́n. Mɔɔd adɛ́njaŋ kobag a yɛ́lɛ́. Púdíŋin, púinjiimin na yɛ́lɛ́. 3Mɔɔd əməʼkubuŋíən lɛ́ əə: “A igə aa polɛɛ́ əgudíŋin mɔɔ́n o jáʼkáas nyóon əə́?” Púmuyúúlisini poɔʼkɔ́: “Sə́dúk alɛ njaan na yɛ́lɛ́, əəguúlisi tɛn əgín nɛ́gɔŋ.” » 4Paaʼkan pááság kɛɛn. Pɛ́ɛ́bóan mɔɔ́n ó jáʼkáas uʼtilígə́ə́n a táán, a kigin kɛ́ noádɛʼ, a ɛbá yɛ́ udíyoog. Pááság kudíŋin. 5Ná pɔɔd pá páyɛ́ɛ kɔ páyɛ́boodála pə́ədíŋin jáʼkáas, pə́yíbuŋíən pɔ́nɔ́ na pɔ́lɛ́: «Nkə aa poágɛɛlɛ kɛ́ɛg náan əə́? A igə aa polɛɛ́ əgudíŋin mɔɔ́n ó jáʼkáas nyóon əə́?» 6Pááság kubuyúlisini əgín wɔnɔ́ ná Yə́sus ayɛ́bodɛánɛ. Pááság kubuudi lɛ́ pɛ́ɛn na yɛ́lɛ́. 7Pááság kudíŋin pámɛ́ɛn na yɛ́lɛ́ ná Yə́sus alɛɛ́. Póyóliógóníí pilə́ə́ pɛɔ́bɔn pɛ́ niŋiʼ, pámáágan a jáʼkáas a mɔɛn, Yə́sus aábágɛd, əə́ləndin#11.7 Pódála tɛn náan a kálaʼtaʼ ɛ Saʼk 9.9 8Pə́ə́bə́ə́ kɛɛn, nyɔ́lɛ́ a jáʼkáas a mɔɛn. Ɛ́fɔlɛ́ ɛ́ pɔɔd ɛ́yɛ́ɛ ogoóliogoni pilə́ə́ pɛɔ́bɔn pɛ́ niŋiʼ, páadɛ́ga a ngə́, pɔsɔ́g pə́mmú páagɛɛn asóma pɛlaa a kidun, pə́əgiim agaágan a ngə́ agomonyáadɛ#11.8 Kɛ́lɛ náan a kálaʼtaʼ ɛ 2Puʼk 9.13 9Pɔɔd páyɛ́ɛ kiʼtúú kilúd lɛ́ póonɛ yuudi, pə́mmú ngim, páagɛɛn, pə́əgiim páágan pɛʼkɛ́ʼkɛ́, pɔ́nɔ́: «Nugəm na wɛ ó! Táán ágoyɛ́ɛlɛ kɔŋɛʼ, wɛ nyɔ́ olɛɛ́ əgiim a niiŋ nɛ́ Sə́dúk! 10Táán ásɛ́a Nɛlaamɛʼ nɛ́ nɛ́lɛɛ́ əgiim, Nɛlaamɛʼ nɛ́ sɛʼkóón wəəs Tə́fid! Nugəm nóɛn na Táán nyɔ́ alɛɛ́ a mɔɛmɔɛ́n#11.10 Pódála tɛn náan a kálaʼtaʼ ɛ Pɛʼk 118.25-26 !» 11Yə́sus aáság kɛɛn əgiig a Yolósalɛm. Yɛɛ́sɔ́d a Tɛ́mpɛl, aádɛ́ʼtɛg pɛnɔ piim, əmíim álon, amɛ́ɛn a Pɛʼtaníi na paaʼkan pə́ə́ŋ pá pówád na pábaan, mbin ɛyɛ́ɛ yəə́ndədə́əŋ.

Yə́sus yiílúmísə́ni kiɛd kímmú kɛ́ pɔ́ɔdɔ́ŋɔn lɛ́ figiyə́ə

(Maʼt 21.18-19)

12Wɔnɔ́ ná páyɛ́ɛ pə́ʼkiim pádɛ́ɛmɛn a Pɛʼtaníi əguúlini a Yolósalɛm a koany kaáyɛnɛ kóog, njaan ɛyɛ́ɛ abany Yə́sus. 13Yɛɛ́dála kiɛd kímmú kɛ́ pɔ́ɔdɔ́ŋɔn lɛ́ figiyə́ə. Kɛ́yɛ́ɛ laálá, toáŋánán ləbiʼ, ləbiʼ, ləbiʼ. Ayáyɛ́ʼtɛ́nɛ́ɛ́ kɔ ndúmiʼ agodála nga alɛ ogoboan modámádám mó konɛ kɔ. Ná ayɛ́ɛ́n əgiig kɔ a nidíŋ, yɛɛ́bóan əgín toáŋánán na toáŋánán lɛ́ kɛ́dɛʼkɛ́ɛ kɛnɛŋ kɛ́ pəfíigə kuum. 14Náa ɔnɔ́ na yɛ́lɛ́: «Odɛndɛ́ɛ́ kuum kə́mmú mɔɔd áanɛ modámádám moáŋ!» Paaʼkan pə́ə́ŋ páyóób nkə kɛ́ɛg kɛ́ yiísə́ə́.

Yə́sus yɛɛ́ŋɛ́ŋ pɔɔd pá páyɛ́ɛ agɛɛlɛ undunə́ a Tɛ́mpɛl

(Maʼt 21.12-17; Lóʼk 19.45-48; Sɛ́a 2.13-20)

15Pááság kɛɛn, pámɛ́ɛn əgiig a Yolósalɛm. Yə́sus ayɛ́ɛ́n ɔsɔd a Tɛ́mpɛl, aáŋɛ́ŋ ungim nyɔ́ yɛɛ́bóan kɔ a undunə́ lɛ́ na palɛgaʼ kɛ́ na pɔɔŋɛnɛʼ kɛ́, əə́díʼkə́ni paʼtɛ́bɛlɛʼ pá pɔsɔ́g pá páyɛ́ɛ agóʼpanɛ mɔɔnɛ́, na toʼkóm tó pɔsɔ́g pá páyɛ́ɛ alɛga piɛm#11.15 A oʼtómódáán ó Tɛ́mpɛl wúmmú wó píídíin pɛnɔɔŋɛʼ lɛ́ pɛ́sɔd kɔ, pagóʼpanɛʼ mɔɔnɛ́ páyɛ́ɛlanɛ kɔ agɛɛ́banɛ pɔɔ́n pá Yúdɛn pá páyɛ́ɛ əgiim a mɔnɔŋ mɛ́ndɛ́ŋ lɛ́ págóʼpɛ mɔɔnɛ́ mɔ́ɔ́bɔn agowɛɛn kɛfɔny, oó lɛ́ agoʼpɛ́ɛ́ mag yɛ́ a Tɛ́mpɛl. 16Náa ɔnɔ́ nyɔ́lɛ́ adɛʼtála kə́mmú mɔɔd aásom a Tɛ́mpɛl na kɛnó a oʼto. 17Əə́bə́ə́ anɛ́ɛ́n kaaʼkananɛ pɔɔd, ɔnɔ́: «Kɛ́lɛ kidiídílə́ a Kálaʼtaʼ ɛ Táán lɛ́, Táán ɔnɔ́: “Pálɛ́ɛ́ kodɔ́ŋɔn noádɛʼ nóam lɛ́ noádɛʼ nó mɔnɔŋ miim málɛ́ɛ́ kɛnyɔɔ́sɔ́gɔlɔnɛɛ́ a nólɛ́.” Náa pəŋi, poáʼkaánɛ agá nólɛ́ nɛɔsɛm nɛ́ piíbən əə́#11.17 Pódála tɛn náan a kálaʼtaʼ yɛ Ɛsa 56.7; na a ɛ Siə 7.11 !» 18Puʼkúm pó payaaganɛʼ pɛfɔny na palɛŋ pɛcɛm páyóób nkə kɛ́ɛg kɛ́ Yə́sus ayɛ́ɛ́lɛ. Pə́ə́bə́ə́ anɛ́ɛ́n kuunə pungə́ wɔnɔ́ ná páagɛɛlɛ agomoyóon. Kɛbán kímuʼ, páyɛ́ɛ agomoódammana lɛ́ ungim ayɛ́ɛ agɔnyɔ́ga na nɛaʼkananɛ niə́ŋ. 19Ná niób níyíím əgiig, Yə́sus yɛɛ́dɛ́ɛ́mɛn áay a Yolósalɛm na paaʼkan pə́ə́ŋ, páálón agɛɛn kɛnɔ kɛ́ndɛ́ŋ.

Nkə kɛ́ Yə́sus yiísə́ə́ a kɛbán kɛ́ kiɛd kɛ́ɛg kɛ́ yiílúmísə́ni

(Maʼt 12.20-22)

20A koany kaáyɛnɛ kúmmú, wɔnɔ́ ná páyɛ́ɛ agosan a ngə́, pɛ́ɛ́dála figiyə́ə yɛ́ɛy yɛ́ Yə́sus yiílúmísə́ni. Ɛyɛ́ɛ yaáʼkoman kogálɛgɛd, yaáʼkoman kogos súʼtə́ə́ na a ngaŋ kɛ́. 21Píɛ aáság kaáyɔ́ɔ́ŋɛ nkə kɛ́ kɛ́yásánɛ́ɛ́, náa ɔnɔ́ na Yə́sus: «Kɛlág, waádála figiyə́ə yɛ́ɛy yɛ́ wiílúmísə́ni puə́y ə́! Yaáʼkoság kogálɛgɛd.» 22Yə́sus yiísə́ə́ ɔnɔ́ na pɔ́lɛ́: «A fɔ́lɔ́b ndabodɛ́anɛ lɛ́ póag oʼto na Táán. 23Mɔɔd nyɔ́ amáág oʼto na Táán amaʼkodɛ́anɛ na oʼkon wóow lɛ́ wə́ə́lúgin, wɛ́ɛn agaádagɛdɛ a noom nó ɛbá fiɛ́d, adɛág isuŋ lɛ́ nkə kɛ́ɛg kɛ́ əə́səə kɛ́agaáyɛ́ɛlɛ, Táán aagɛɛlɛ lɛ́ kɛáyɛ́ɛlɛ. 24Kólɛ́ aa ndábodɛ́anɛ na pəŋi nyɔʼkɔ́: Nkə kiim kɛ́ puə́ŋíən na Táán a pɛɔ́sɔ́gɔ́lɔ́n, yaŋáan əgəə́liʼtini lɛ́ poándɛ na kɛ́lɛ́, aaboyɛ́ʼkɛn tɛn. 25Kɛnɛŋ kɛ́ pəŋi poáʼkodɛ́lɛmɛɛ́ a pɛɔ́sɔ́gɔ́lɔ́n náa polɛɛ́ na məliŋ na sɔ́g nyummú, ímulísínəən kɔbɛ́ kó ayɛ́boyɛ́ɛ́lɛ. Áay, Sɛ waaŋan nyɔ́ alɛɛ́ a mɔɛn əəbuúlisin tɛn pəŋi mabɛ́ má poámoyɛ́ɛlanɛ.» [ 26#11.26 A pagálaʼtaʼ pə́mmú pá kalaʼ pá píídílə na ombɔg, niɛŋ nɛ́ɛnɛ nɛ́lɛ kɔ lɛ́: «Náa, pəŋi pomaʼkɛɛn lɛ́ pudiə́lisin pɔsɔ́g kɔbɛ́ kó páaboyɛ́ɛlanɛ, Sɛ waaŋan nyɔ́ alɛɛ́ a mɔɛn adɛndɛ́ɛ́ kubuúlisin tɛn pəŋi koáŋan kó poámoyɛ́ɛlanɛ.»]

Ánɛ aa yɛɛ́ʼkɛ́nɛ́nɛ́ɛ́ Yə́sus toɛn tóod tó alɛɛ́ na tólɛ́

(Maʼt 21.23-27; Lóʼk 20.1-8)

27Yə́sus əyíʼkíni kuúlini a Yolósalɛm na paaʼkan pə́ə́ŋ. Pááság kɛɛn ɔsɔd a Tɛ́mpɛl. Yə́sus alɛ anɛ́ɛ́n agodáŋana kɔ ɔ, puʼkúm pó payaaganɛʼ pɛfɔny na palɛŋ pɛcɛm na ponnom pó nigúu pááság kaáyɛʼtɛnɛ a ɛbá yə́ə́ŋ, 28náa pɔ́nɔ́ na nyɔ́lɛ́: «A toɛn tó ánɛ aa olɛɛ́ agɛɛlɛ nkə kɛ́ɛg kiim kɛ́ olɛɛ́ agɛɛlɛ ə́? Ánɛ aa agoyɛ́ʼkɛ́nɛ́nɛ́ɛ́ toɛn lɛ́ wɛ́ɛlɛ ə́?» 29Yə́sus əyíbuyúlísíni ɔnɔ́: «Mɛ tɛn ndəbuŋíən kɛ́sɔn kímuʼ súg. Puməʼkinyuúlisini nkə kɛ́ mɛ ndə́buŋíən, mɛ ndabodɛ́anɛ tɛn a toɛn tó ánɛ ndɛɛ́ agɛɛlɛ nkə kɛ́ɛnɛ kɛ́ ndɛɛ́ agɛɛlɛ. 30Ánɛ aa əyíím ádom Sɛ́aŋ lɛ́ yíim agɛɛlɛ ɔsɔgɛn? Táán óm, pɔɔd əə́? Ɛ́ʼtɛánɛ́an!» 31Pə́ə́bə́ə́ kɔɔ́cɔcɔb kɔ pɔ́lɛ́ na pɔ́lɛ́ pɔ́nɔ́: «Timəʼkumuyúlisini lɛ́ “Táán áa ayɛ́moodóm,” əəbiŋíən ɔnɔ́ əə: “A igə anɛ́ɛ́n aa tidiʼkə́yəmuyə́liʼtinií ə́?” 32Náa, timəʼkusəə tɛn tɛɔʼkɔ́: “Pɔɔd aa páyɛ́moodóm, kiə́s kɛ́agɛɛn kɛbɛ́”!» Páyɛ́ɛ agodammana kiʼtúú kɛ́ pɔɔd kɛ́ kɛ́yɛ́ɛ kɔ áay lɛ́ ungim yɛɛ́lɛŋɛn lɛ́ Sɛ́aŋ ayɛ́ɛ fɔ́lɔ́b ɔndɔɛgɛʼ pɛbán o Táán. 33Pə́yímuyúlísíni pɔ́nɔ́ na nyɔ́lɛ́: «Pəsi tɛdɛálɛŋ ánɛ aa ayɛ́moodóm!» Náa nyɔ́lɛ́ tɛn ɔnɔ́ na pɔ́lɛ́: «Oʼó! Mɛ tɛn ntɛábodɛ́anɛ a toɛn tó ánɛ aa ndɛɛ́ agɛɛlɛ pɛbán pɛ́ɛb.»

Currently Selected:

Mə́líʼkus 11: yatDBL

Highlight

Copy