LÓʼKAS 18

Nkaʼtɛ́n ɛ kidí kɛ́ ɔʼkɛ́ɛd kɛ́ kíínyə́gígi onjɔm pɛyɔm nyummú

1Yə́sus əyíbusiə́din nkaʼtɛ́n yɛ́ɛnɛ əgubuúloodi lɛ́ pógóódi kɔɔ́sɔ́gɔlɔn Táán pɛnɛŋ piim, pádɛág ɛsɛmbɛlɛdɛʼ. 2Yiísə́ə́ ɔnɔ́ na pɔ́lɛ́: «Onjɔm pɛyɔm nyummú aa nyóon ayɛ́ɛ a pálɛ́ɛg yimmú. Ayɛ́ɛ lɛ́ Táán, aʼtammána, adiɛn tɛn na kɛnɛŋ na mɔɔd. 3Kidí tɛn kɛ́ ɔʼkɛ́ɛd kímmú kɛ́yɛ́ɛ kɔ a pálɛ́ɛg yɛ́ɛy, kíəgiimin a nó onjɔm pɛyɔm nyóon lɛ́ ábaasɛ uʼtíiyiʼ wó ayɛ́ɛ a wólɛ́ na mɔɔd nyummú, ámoyɛ́ʼkɛn nyɔ́lɛ́ kilumiʼ. 4Pɛnɛŋ wɔnɔ́ pɛnɛŋ, onjɔm pɛyɔm nyóon adɛʼkɛ́ɛ anyɔ́ŋɛn lɛ́ ná aábaasɛ kɛbán kiə́ŋ. Náa onjɔm pɛyɔm əə́səə kɔ na nyɔ́lɛ́nyɔ́amɔɛ́d ɔnɔ́: “Ɛɛ́ɛ, ɔmbɔ́ wɔnɔ́ ná ntɛádammanaá Táán, ntiɛn na kɛnɛŋ na mɔɔd, 5ndóo, kidí kɛ́ ɔʼkɛ́ɛd kɛ́ɛnɛ kɛ́lɛ əginyə́gigi kɛ́fɔlɛ́. Ndamoyɛ́ʼkɛn nyɔ́lɛ́ kilumiʼ, ná adɛyɛ́njaáda kə́mmú oʼto.” » 6Sə́dúk əyíʼkíni kɛɛn na tɔgɛ́ɛ́, ɔnɔ́: «Lɛŋáan koob nkə kɛ́ ɔmbɛ́ wo onjɔm pɛyɔm nyóonɛ əə́səə! 7Táán anɛ́ɛ́n óoʼ, poafɛg lɛ́ alɛ ogolɔb adiɛ́ʼkɛn kilumiʼ na pɔɔd pá nyɔ́lɛ́nyɔ́amɔɛ́d əyííyid ə; pɔɔd pá pálɛɛ́ amoyálɛɛlɛn na udúg wɔnɔ́ na wɔɔ́s a? Alɛ ogoyɛ́ɛn ədiə́bísígíí kiim aboɛ́bɛ a? 8Ndóo, ndabodɛ́anɛ lɛ́, əəgəə́bisig koboyɛ́ʼkɛn kilumiʼ. Kɛbán kímuʼ, ná Mɔɔ́n o mɔɔd alɛ́ɛ́ kimbuúlini əə, alɛ́ɛ́ koboan pɔɔd a nsí pá pálɛɛ́ na kəə́liʼtiniʼ ə́?»

Yə́sus yiísíəd nkaʼtɛ́n na ɔʼkɔ́mmanɛʼ mag, na Falɛsɛyɛ́ɛŋ

9Aáság kusiəd tɛn nkaʼtɛ́n yɛ́ɛnɛ a oʼto ó pɔɔd pá páyɛ́ɛ əgəə́səə lɛ́ pɔ́lɛ́ pálɛ sáád a əngis á Táán, páasɛ́ɛdanɛ pɔsɔ́g. 10Ɔnɔ́: «Pɔɔd pábaan a póob pɛ́ɛ́bág a Tɛ́mpɛl agɛɛn ɔgɔɔ́sɔ́gɔlɔn Táán. Úmmuʼ ayɛ́ɛ Falɛsɛyɛ́ɛŋ, nyummú ɔʼkɔ́mmanɛʼ mag. 11Sɔ́g o Falɛsɛyɛ́ɛŋ yɛɛ́dɛ́lɛm kuə́ŋ kidə́níʼtən, əə́bə́ə́ kɔɔ́sɔ́gɔlɔn kɔ a ɔʼtɛ́m wə́ə́ŋ ɔnɔ́: “Oóó Táán, ndəguúsoyidəni wɔnɔ́ ná mɛ ntɛɔ́gɔ wɔnɔ́ pɔsɔ́g pɔɔd póonɛ pá pálɛɛ́ pabɛ́, na wiib, na pɛdaŋ. Ndɛ əguguúsoyidəni lɛ́ mɛ ntɛɔ́gɔ wɔnɔ́ ɔʼkɔ́mmanɛʼ mag nyóʼkága. 12Mɛ, ndɛ əgumin ə́simə́ mədúg málaŋ mábaan a sɔ́ndɛʼ mmuʼ, ndáagoyɛ́ʼkɛn kɛowád kɛ́ moom muim mó ndɛɛ́ ɔɔgɔɔŋ.” 13Ɔʼkɔ́mmanɛʼ mag nyɔ́lɛ́, yɛɛ́dɛ́lɛm kága laálá, angoɛ́sɛ kudə́əmini udi a mɔɛn. Ayɛ́ɛ agá agaábáam a igog, ɔnɔ́: “Oóó Táán, siəd maan na mɛ, ɔngɛɛlɛʼ kɔbɛ́.” 14Náa ndábodɛ́anɛ lɛ́ nyɔ́lɛ́ nyóon aa əyúúli a noádɛʼ nuə́ŋ ná Táán əə́ʼkumuúlisin mabɛ́ mə́ə́ŋ, adɛ́njaŋ sɔ́g nyóʼkáag lɛ́ ungim nyɔ́ alɛ́ɛ́ kaábágɛdɛɛ́, pálɛ́ɛ́ kumuúsuuli. Náa, nyɔ́ alɛ́ɛ́ kəə́sulií nkó a nsí, pálɛ́ɛ́ komobágɛdɛ.»

Nɛlaamɛʼ nɛ́ Táán nɛ́lɛ agoob na pá pə́əgəə́siəd wɔnɔ́ poómbaa

(Maʼt 19.13-15; Mə́l 10.13-16)

15Pɔɔd páyɛ́ɛ piimin Yə́sus na pɔɔ́n pá podom kɛ́ lɛ́ ná áboyábɛgɛn ombɔg a oʼto. Ná paaʼkan pɛ́ɛ́dála náan, páyɛ́bosásan lɛ́ púúlini ngim na pɔ́lɛ́. 16Náa, Yə́sus yiísə́ə́ lɛ́ píim na pɔ́lɛ́, ɔnɔ́: «Tíən poómbaa píim ná ndɛɛ́, pudiyíbuugíd lɛ́ Nɛlaamɛʼ nɛ́ Táán nɛ́agoob na pá pálɛɛ́ wɔnɔ́ pɔ́lɛ́. 17A fɔ́lɔ́b ndabodɛ́anɛ lɛ́ nyɔ́ əsiədinií Nɛlaamɛʼ nɛ́ Táán wɔnɔ́ ɛyaa ɛ́ moóngaa, nyóon adɛndɛ́ɛ́ kosɔd a nɛ́lɛ́.»

Tó ɔʼtɛ́m na tugúm

(Maʼt 19.16-30; Mə́l 10.17-31)

18Nkúm ɛ Yúdɛn yimmú yiíŋíən na Yə́sus yɔ́nɔ́: «Kisig kɛ́ kɛlág, mɛ óoʼ, nkə aa nyɛ́lɛɛ́ agɛɛlɛ lɛ́ nyɛ́ɛn na ɔlaa ó pɛnɛŋ piim əə́?» 19Náa Yə́sus ɔnɔ́ na nyɔ́lɛ́: «A igə aa waágɛʼtɔ́ŋɔn lɛ́ kisig əə́? Úmmuʼ nyɔ́ alɛɛ́ ɔŋŋɛʼ ɔdɛɔ́gɔ, ná kɛ́sánɛn əgín lɛ́ Táán nyɔ́lɛ́nyɔ́əsíŋ. 20Waálɛŋ pɛcɛm, ngɔ́ɔ́? Pɛ́ aa pɛ́ɛnɛ lɛ́: “Udiʼtə́əŋ a kɛdaŋ, odɛnjóón mɔɔd, udinjííbə, odɛʼtɛ́lɛ́mɛn mɔɔd mbaasɔ́ ɛ pɛfaa, nyáádɛ sɛ waaŋ na ŋŋí waaŋ#18.20 Kɛ́lɛ náan a kálaʼtaʼ yɛ Ɔsa 20.12-16; Tɛʼt 5.16-20 ” » 21Náa mɔɔd ɔnɔ́ na nyɔ́lɛ́: «Ndɛ əgəə́nuŋ a pɛcɛm pɛ́ɛb piim əgín kɔ a niə́bə́ə, a nɛnyɔmmɔ́n nɛ́am.» 22Ná Yə́sus ayóób náan, yiísə́ə́ ɔnɔ́ na nyɔ́lɛ́: «Yoom yáʼkogoólɔbɛn kə́mmú ímuʼ súg. Tod, ólɛga nkə kiim kɛ́ ugódíí. Mɔɔnɛ́ móom wáaban mɔsɔ́gasɔ́gá ná wíim anɛ́ɛ́n wínjə́ən, wagɛɛn na tugúm a mɔɛn.» 23Náa, əgín ná mɔɔd nyóon ayóób náan, ayɛ́ɛ aándɛ udi suúúm lɛ́ ayɛ́ɛ na tugúm tuíŋ.

24Ná Yə́sus yɛɛ́dála [mɔɔd suúúm], yiísə́ə́ ɔnɔ́: «Kɛágány na pɔɔd pá tugúm lɛ́ pɔ́sɔd a Nɛlaamɛʼ nɛ́ Táán ə́y! 25Ɛɛ́ɛ, kɛ́lɛ kɛgányáán agɛɛlɛ lɛ́ kiʼtóg kɛ́ nnyam yɛ́ pɔ́ɔdɔ́ŋɔn lɛ́ sɛamóo ɛ́sɔd a kiwoo kɛ́ níloʼ nɛ́ kolada pilə́ə́. Náa a mɔɔd o tugúm, kímíʼkíni kogany kə́mmú agaáyɛn náan agɛɛlɛ lɛ́ ɔ́sɔd a Nɛlaamɛʼ nɛ́ Táán.» 26Pɔɔd pá páyɛ́ɛ agoob tɔgɛ́ɛ́ tuə́ŋ tóod pə́yímuŋíən pɔ́nɔ́ əə: «Áay oóoʼ, ánɛ aa aágaáʼkɛ anɛ́ɛ́n kɔɔy əə́?» 27Náa Yə́sus ɔnɔ́: «Nkə kɛ́ pɔɔd pɔ́dɛɔ́gɔ na ngə́ ɛgɛɛlɛ, Táán alɛ ogɛɛlɛ.»

28Náa Píɛ ɔnɔ́: «Pəsi pá tiídí tímə́dí yiim yɛ́ tiígóodi, əguguyə́ən oóoʼ.» 29Yə́sus əyíbuyúlísíni ɔnɔ́ na pɔ́lɛ́: «A fɔ́lɔ́b, ndabodɛ́anɛ lɛ́ ungim nyɔ́ alɛ́ɛ́ kudi ə́mə́dí toádɛʼ, ɔmbɔ́ lɛ́ oʼkán, pɔɔ́n, pomóŋŋí, sɛ, ŋŋí a oʼto ó Nɛlaamɛʼ nɛ́ Táán, 30alɛ́ɛ́ kɔɔ́ŋɔnɔn agaáyɛn náan a ɔlaa wóonɛ ó nɛ́gɔŋ, áyɛɛn tɛn na ɔlaa ó pɛnɛŋ piim a mədúg má yuudi.»

Las ɛ Yə́sus kusəə lɛ́ páamoyóon, ə́yiʼkini kiim yóndɛg

(Maʼt 20.17-19; Mə́l 10.32-34)

31Yə́sus əyə́suídíí na paaʼkan pə́ə́ŋ pá pówád na pábaan agosɔyɔ na pɔ́lɛ́, ɔnɔ́: «Taa, pəsi aa póonɛ tɛándabágɛ́ɛ́ a Yolósalɛm, kɛnɔ kɛ́ nkə kiim kɛ́ palɔɛgɛʼ pɛbán pá Táán píídílə a kidíídí kɛ́am kɛ́ mɛ Mɔɔ́n o mɔɔd kígódíí lɛ́ kɛáyɛ́ɛlɛ. 32Kɔ́gɔ́ɔg aa páagɛndɛg a ɔmbɔg á pandɛŋ Táán lɛ́ pɛ́nyɛɛŋanɛ, pɛ́ʼtóga, pə́əgiʼtúəŋənən pɛda. 33Páamobáam na nsuə́, páyɛmoyóon. A ngim ɛ mɔɔ́s mádáád, yíiʼkini kiim álon a kəəniʼ.» 34Náa, paaʼkan pɔ́lɛ́ pádɛʼkáagoob tɔgɛ́ɛ́ tóod ɔmbɔ́ sɔɔŋ. Táán ayɛ́boyɔ́sɛ́gɛn yisí yɛ́ ɛyɛ́ɛ kɔ. Pádɛʼkáagoob nkə kɛ́ Yə́sus ayɛ́ɛ anyɔ́ŋɛn kobodɛ́anɛ.

Yə́sus ayóómɛ ongwongwóg a Yəlíʼko

(Maʼt 20.29-34; Mə́l 10.46-52)

35Yə́sus ayɛ́ɛ aándɛ ndúmiʼ na kiig a pálɛ́ɛg ɛ Yəlíʼko. Náan aa ongwongwóg nyummú ayɛ́ɛ undəndínə́ə́n kɔ a ɛbá yɛ́ ngə́, aálɛ́ba moom na pasan a ngə́. 36Ayóób kiʼtúú kɛ́ pɔɔd kɛ́asan. Náa ɔnɔ́ na pɔ́lɛ́: «Nkə aa kɛ́lɛɛ́ náan əə́?» 37Pááság komodɛ́anɛ lɛ́ Yə́sus mɔɔ́n ó Násalɛd aa alɛɛ́ agosan. 38Əə́bə́ə́ kaágan nɛŋo, ɔnɔ́: «Yə́sus, Mɔɔ́n o Tə́fid, siəd maan na mɛ o!» 39Pɔɔd pá písúidin yuudi, pə́ə́bə́ə́ komosásan, pɔ́nɔ́ na nyɔ́lɛ́ ɔ́lɔ́g unuʼ. Náa, nyɔ́lɛ́ ayɛ́ɛ agá əgiiʼkini kosása na toɛn, ɔnɔ́: «Mɔɔ́n o Tə́fid, siəd maan na mɛ o!» 40Yə́sus aáság kodɛ́lɛm, náa ɔnɔ́ pə́muyíimin na nyɔ́lɛ́. Ná mɔɔd ayɛ́ɛ aándɛ a ɛbá yə́ə́ŋ, Yə́sus əyímuŋíən ɔnɔ́ əə: 41«Wanyɔ́ŋɛn lɛ́ nyɛ́ɛlɛ tuə́ na wɛ ə́?» Náa mɔɔd ɔnɔ́ na nyɔ́lɛ́: «Sə́dúk, ndaanyɔ́ŋɛn lɛ́ wɛ́nyɛɛlɛ nyíiʼkini kodɛ́ʼtɛganan.» 42Náa Yə́sus ɔnɔ́ na nyɔ́lɛ́: «Tɛ́ʼtɛ́gánan. Omɔ́ɔy lɛ́ omáág oʼto na Táán.» 43Əgín kɔ áay kum a nsí, əə́bə́ə́ kodɛ́ʼtɛganan. Ayɛ́ɛ əgiim ə́yə́njən Yə́sus kɛnɔ kiim, aágɛɛ́ʼkɛn nugəm na Táán. Kiʼtúú kɛ́ pɔɔd kɛ́ɛg kiim kíyə́bə́ə́líí konyáadɛ Táán ná pɛ́ɛ́dála náan.

Currently Selected:

LÓʼKAS 18: yatDBL

Highlight

Copy