LÓʼKAS 17

Yə́sus yɛɛ́dɛánɛ na paaʼkan pə́ə́ŋ lɛ́ páálɛŋ

(Maʼt 18.7, 8; Mə́l 9.42)

1Yə́sus yɛɛ́dɛánɛ na paaʼkan pə́ə́ŋ ɔnɔ́: «Ngə́ yɛ́ɛnɛ lɛ́ pɛbán pɛ́ pɛ́agɛɛlɛ lɛ́ mɔɔd ə́də́əŋ a kɔbɛ́ pɛ́dɛyáyɛ́lɛ́ɛ́, ɛdɛɔ́gɔ. Náa, maan na nyɔ́ kɛ́lɛ́ɛ́ kɛɛnɛɛ́ lɛ́ nyɔ́lɛ́ aa alɛɛ́ nɛdáán nɛ́ mbúʼtə́n. 2Kɔŋɛʼ na nyóon lɛ́ pámoodoŋ kɛdám kɛ́ nɛdáán a kɛnág, pámoódagɛdɛ a noom, agolaŋ lɛ́ ə́də́əŋi ɛyaa ɛ́ moóngaa wɔnɔ́ yɛ́ɛnɛ ímuʼ a kɔbɛ́. 3Lɛŋáan kodɛ́lɛman o!

(Maʼt 18.15,21-22)

«Móŋŋí waaŋ amaʼkogoyɛ́ɛlɛ kɔbɛ́, ómoósɔyɔn kɔŋɛʼ kɔŋɛʼ. Əməʼkəə́liʼtini nsɔ́ɔ́ yəəŋ, úumuúlisin. 4A wɔɔ́s úmmuʼ, woómóŋŋí amaʼkogoyɛ́ɛlɛ kɔbɛ́ pɛnɛŋ pɛ́ʼtáan na pɛ́baan, ə́yiim tɛn pɛnɛŋ pɛ́ʼtáan na pɛ́baan a udi wááŋ əgiim əgəə́suʼki mɔ́lɛ́, ímulísin.»

(Maʼt 17.20)

5Náa pɔɔ́n pá maʼtom pɔ́nɔ́ na Sə́dúk: «Ɛ́bɛyɛ́ɛ́lɛ lɛ́ kəə́liʼtiniʼ kuə́s kóyam.» 6Sə́dúk əyíbuyúlísíni ɔnɔ́: «Poyáágɛn oʼto na Táán ɔmbɔ́ əgín náanɛ sɔɔŋ wɔnɔ́ niis nɛ́ ɛnás ná polɛ págodɛ́anɛ na sɛʼkɔmɔ́ɔl yɛ́ɛnɛ lɛ́ yə́lúgin, yɛ́ɛn agaádagɛdɛ a noom, ɛ́yɛboyóbɛn.»

Uʼkudin nyɔ́ ayɛ́ɛ́lɛ oʼtom wó páyɛ́moyɛ́ʼkɛn

7«Ánɛ úmmuʼ a ondáŋ wááŋan aa alɛɛ́ ogɛɛlɛ lɛ́, alɛ na uʼkudin nyɔ́ amɛ́ɛn amoósoman pɔlɛ́m puə́ŋ, ɔmbɔ́ lɛ́ amɛ́ɛn a kinuŋ kɛ́ mudúg muə́ŋ, ná əə́gimbuúli pigólí, áamodɛ́anɛ ɔnɔ́: “Ə́bísígíí kiim ələndin, ónɛ́ɛnɛ ə́?” 8Adɛ́ aamodɛ́anɛ agá ɔnɔ́ na nyɔ́lɛ́: “Ɛ́nnámɛ́n moom mó konɛ móam, óliógíí paʼkolobá wíim agɛnjaabɛn, mɛ nnɛ, ndáaŋo. A ngim yɛ́ɛy ná wɛ údíin úləndin anɛ́ɛ́n agonɛ, waáŋo.” 9Ɔdɛɔ́gɔ oʼkódágódá lɛ́ yɛ́ʼkɛn uʼkudin wəəŋ pisoyidiʼ a oʼto wóonɛ lɛ́ amɛ́ɛ́lɛ nkə kɛ́ amámodɛánɛ, ngɔ́ɔ́? 10Náan tɛn yoom ímuʼ aa kígódíí lɛ́ kíɛn na pəŋi. Kɛnɛŋ kɛ́ pomɛ́ɛ́lɛ oʼtom wó puígóodi lɛ́ póɛlɛ, sələ́ən poɔʼkɔ́: “Tɛlɛ əgín agá muyənjə́g mó pəgudin. Tɛmɛ́ɛ́lɛ oʼtom wó tiígóodi lɛ́ tíɛlɛ.” »

Yə́sus ayóómɛ nto ɛ pɔɔd yówád yɛ́ ɛyɛ́ɛ abany nkún

11Wɔnɔ́ na Yə́sus ayɛ́ɛ a ngə́ agɛɛn a Yolósalɛm, yɛɛ́sán yɛ́ a Səməlíi na a Kalilə́ə. 12A nɛsɔd nɛ́ ayɛ́ɛ agosɔd a ɛyaa ɛ́ nigúu yímmú, nto ɛ pɔɔd yówád yaáság kiim əgəə́bun na nyɔ́lɛ́. Páyɛ́ɛ abany nkún. Pɛ́ɛ́dɛ́lɛm laálá na nyɔ́lɛ́#17.12 Kɛ́lɛ náan a kálaʼtaʼ ɛ Ləf 13.45-46 , 13pə́ə́bə́ə́ kosɔyɔ nɛŋo a mɔɛn, pɔ́nɔ́: «Yə́sus wɛ! Sə́dúk! Siəd maan na pəsi!» 14Ná ayɛ́boodála, aáság kusəə ɔnɔ́: «Todáan, póɛn ogoóloodi na payaaganɛʼ pɛfɔny#17.14 Kɛ́lɛ náan a kálaʼtaʼ ɛ Ləf 14.2-3 » Pááság kusiəd ngə́ pámɛ́ɛn. Pálɛ anɛ́ɛ́n kɔ agɛɛn a, pándɛ siə́siə́. 15Ná sɔ́g nyummú a ondáŋ wɔ́ɔ́bɔn yɛɛ́dála lɛ́ nyɔ́lɛ́ oóʼkoom, aáság kuúlini ngim, əə́giim ányáadɛ Táán, nɛŋo a mɔɛn. 16Ayɛ́ɛ́n ədə́əŋənən Yə́sus a ambaan, udi a nsí, əə́muúsoyidəni. Mɔɔd nyóon nyɔ́ əyímbuúlíni ngim, ayɛ́ɛ mɔɔ́n ó Səməlíi. 17Náa Yə́sus ɔnɔ́: «Adɛ́ pɔɔd póob piim pówád póyóóm ó, ngɔ́ɔ́? Ə́lə́ə́ áa pɔsɔ́g pə́mmú póʼkáag pá nto ɛ́ʼtáan na íniʼ pálɛɛ́? 18Ɔmbɔ́ úmmuʼ adɛáyɔ́ɔ́ŋɛnɛ kimbuúlini əgiim agɛɛ́ʼkɛn pisoyidiʼ na Táán, əgín kɛnɔɔŋɛʼ kɛ́ɛnɛ aa kímímbuúlíni ə́?» 19Náa ɔnɔ́ na mɔɔd nyóon: «Tɛ́ɛ́mɛn, tod. Kəə́liʼtiniʼ koáŋ kómágoyɔ́ɔ́yɛ.»

Kiim kó Nɛlaamɛʼ nɛ́ Táán

20Pafalɛsɛyɛ́ɛŋ pááság kumuŋíən pɔ́nɔ́ na nyɔ́lɛ́ əə: «Naanɛ́g anɛ́ɛ́n áa Nɛlaamɛʼ nɛ́ Táán nɛ́lɛ́ɛ́ kiimií ə́?» Yiísə́ə́ ɔnɔ́ na pɔ́lɛ́: «Nɛlaamɛʼ nɛ́ Táán nídíəgiim náanɛ poádɛ́tɛg. Ndóo. 21Pádɛndɛ́ɛ́ kusəə pɔ́nɔ́: “Táá, nɛ́ aa nɛ́ɛnɛ o!” Ɔmbɔ́ lɛ́: “Táá, nɛ́ aa nɛ́ʼkága o!” Ndóo. Nɛmɔɛ́d aa nɛ́ɛnɛ nɛándɛɛ́ kɔ a kɛgaágadɛ kɛáŋan.»

Wɔɔ́s wó Mɔɔ́n o mɔɔd alɛ́ɛ́ kimbuúlií

22Náa Yə́sus ɔnɔ́ na paaʼkan pə́ə́ŋ: «Mɔɔ́s málɛ́ɛ́ kiim má polɛ́ɛ́ kɔnyɔ́ŋɛnɛɛ́ lɛ́ pódála Mɔɔ́n o mɔɔd əgín ɔmbɔ́ a wɔɔ́s úmmuʼ súg, náa, podɛndɛ́ɛ́ komoodála.

(Maʼt 24.26-27)

23«Pálɛ́ɛ́ kusəə pɔ́nɔ́ na pəŋi: “Táláan taa, alɛ áanɛ!” Ɔmbɔ́ lɛ́: “Taa, alɛ kága!” Podɛnjɛ́ɛ́n kɔ, podɛmbɔ́gɔ́nɔn kɛɛn. 24Kɛ́lɛ lɛ́, wɔnɔ́ ná ándɛ ɛdáányɛ́ yáasaa mbálámɔɛn, kodɛ́ɛmɛn a ɛbá yɛ́ɛnɛ agɛɛn alon a yɛ́ʼkága, náan tɛn aa nimbuúlini nɛ́am nɛ́ mɛ Mɔɔ́n o mɔɔd nɛ́lɛ́ɛ́ kɛɛnɛɛ́ a wɔɔ́s wóow. 25Náa, kíəguunə lɛ́ áyaŋ anɛ ntɔ́b kuíŋ, ɔsɛg wóonɛ ó nɛ́gɔŋ úmuúʼtəm.

(Maʼt 24.37-39)

26«Nkə kɛ́ kɛ́yásánɛ́ɛ́ a kɛnɛŋ kɛ́ Nówə kɛ́lɛ́ɛ́ kaásan tɛn náan yoom ímuʼ a mədúg má mɛ Mɔɔ́n o mɔɔd ndɛ́ɛ́ kimbuúlinií. 27A kɛnɛŋ kɛ́go kɛ́ɛg, pɔɔd páyɛ́ɛ əgín moom mó konɛ kɔɔ́nyɔg, poloʼ koŋo, poban kusiədə na pɛdɔ́ʼtɔn kɛɛnan súʼtə́ə́ əgiig a wɔɔ́s wó Nówə yɛɛ́sɔ́d a siʼtíməʼ, a ngim yɛ́ɛy noó nó nogóón nuídə́əŋ, ungim əə́wú#17.27 Kɛ́lɛ náan a kálaʼtaʼ yɛ Siɛ 6.9—7.24 28Kɛ́lɛ́ɛ́ kaásan tɛn wɔnɔ́ a kɛnɛŋ kɛ́ Lóod: A kɛnɛŋ kɛ́go kɛ́ɛg, pɔɔd páyɛ́ɛ lɛ́ páanɛ moom, páaŋo poloʼ, páawɛɛna moom, páalɛga múmmú, pə́əgud a malɛ́m, páawáaga toádɛʼ. 29Kɛbán kímuʼ, wɔɔ́s wó Lóod yɛɛ́dɛ́ɛ́mɛn a Sodóom agosan, Táán yiídə́ə́ŋi noó na yug na nó ndus kɛ́, noáman kuwíiyi ungim kɔ a Sodóom#17.29 Kusiəd a angɛŋ 28 əgiig a 29, kɛ́lɛ náan a kálaʼtaʼ ɛ Siɛ 18.20—19.25 30Náan yoom ímuʼ tɛn aa kɛ́lɛ́ɛ́ kaásánɛ́ɛ́ a wɔɔ́s wó mɛ Mɔɔ́n o mɔɔd ndɛ́ɛ́ kiim nnomɛɛ́.

31«Wɔɔ́s wóow, nyɔ́ alɛ́ɛ́ kɛɛnɛɛ́ a palándaʼ pə́ə́ŋ, náa alɛɛ́ na moom a yoog a kaadɛ, ədinjúúnə kiiʼkini kosɔd a yoog agɛɛn əsiəd moom muə́ŋ. Yoom ímuʼ na nyɔ́ alɛ́ɛ́ kɛɛnɛɛ́ a pɔlɛ́m. Ədinjúlíni a noádɛʼ. 32Áyɔ́ŋɛ́an nkə kɛ́ kɛ́yásánɛ́ɛ́ na oʼkán ó Lóod#17.32 Kɛ́lɛ náan a kálaʼtaʼ ɛ Siɛ 19.26 ! 33Nyɔ́ alɛ́ɛ́ kuunə lɛ́ yə́gəʼkəəŋəni ɔlaa wə́ə́ŋ, alɛ́ɛ́ koʼtaŋ wólɛ́. Kɔmɔɛ́d lɛ́ nyɔ́ alɛ́ɛ́ koʼtaŋɛɛ́ ɔlaa, nyɔ́lɛ́ aa alɛ́ɛ́ kɛɛnɛɛ́ na wólɛ́. 34Ndabodɛ́anɛ lɛ́ a udúg ogo wóow, kɛ́lɛ́ɛ́ kɛɛn lɛ́ pɔɔd pábaan pálɛ pɛɛ́mmɛ́ŋɛ́náán a mɔdɛ́gɛ́n, pə́əsiəd úmmuʼ, pə́ədi nyummú. 35Pagɛ́ɛd pábaan pálɛ́ɛ́ kɔɔb moom ondáŋ a nɛdáán, pə́əsiəd úmmuʼ, pə́ədi nyummú. [ 36Nto ɛ́baan ɛlɛ a pɔlɛ́m, pə́əsiəd úmmuʼ, nyummú ɔ́ɔlɔb.»]

37Paaʼkan pááság kusiəd tɔgɛ́ɛ́, pɔ́nɔ́ na nyɔ́lɛ́: «Sə́dúk, ə́lə́ə́ áa kɛ́lɛ́ɛ́ kaásánɛ́ɛ́ náan əə́?» Əyíbuyúlísíni ɔnɔ́: «Kɛnɔ kɛ́ anjɛŋ yɛ́ɛ́lɔ́b, kɔ tɛn aa kogad kúyúúli#17.37 Pódála tɛn náan a kálaʼtaʼ ɛ Sío 39.30 »

Currently Selected:

LÓʼKAS 17: yatDBL

Highlight

Copy