LÓʼKAS 1

Lóʼkas aáyaŋ əsəə tuə́ áa əə́dilə kálaʼtaʼ yəəŋ

1-2Sɔ́g waam wo ɔʼtɛ́m Tiofíil, pɔɔd piíŋ páyáfɛ́gɛ́ɛ́ kudilə pɛbán piim pɛ́ Táán ayɛ́ɛ́lɛ a kɛgaágadɛ kiə́s. Píílə́ndin əgibiídilən nkə kiim kɛ́ pɔsɔ́g pə́mmú Píísə́ə́, a nkə kɛ́ pɛ́ɛ́dála na əngis yɔ́ɔ́bɔn, kəə́bə́ə́ əgín kɔ a niə́bə́ə. Pɔ́lɛ́ aa Táán əyíbuyííyid lɛ́ pálɔɛgɛ Tɔsɔm Tólaŋ. 3Kólɛ́ aa mɛ tɛn nyɛɛ́lɛŋ kuŋíənə pɛ́lɛ́, agɛɛlɛ lɛ́ ndɛŋ kɔŋɛʼ kɔŋɛʼ nkə kiim kɛ́ kɛ́yásánɛ́ɛ́ Əgəə́bə́ə a noʼkoɛ. Mbáság kusəə lɛ́ nkuúdilən pɛ́lɛ́ áanɛ kímuʼ kímuʼ a nufuuʼ 4ná ólɛŋ koob lɛ́ nkə kɛ́ páyɛ́goyáʼkánánɛ kɛ́lɛ fɔ́lɔ́b.

Uŋun ó maʼtom wálɔɛgɛ́nɛ Saʼkalɛ́as lɛ́ ɔɔgɔɔŋ mɔɔ́n

5A kɛnɛŋ kɛ́ Ɛlóod ayɛ́ɛ nkúm ɛ Siudə́ə, ɔnjaaganɛʼ pɛfɔny nyummú ayɛ́ɛ kɔ niiŋ lɛ́ Saʼkalɛ́as. Páyáyáaban a muʼkíib a muʼkíib. Nyɔ́lɛ́ ayɛ́ɛ a ondáŋ ó payaaganɛʼ pɛfɔny wó Ábɛa. Oʼkán wəəŋ ayɛ́ɛ niiŋ lɛ́ Ɛlɛ́sabɛd, ntóón yɛ́ a palaa Álɔn. 6Pɔ́lɛ́ piim lɛ́, na oʼkán na nyɔ́lɛ́, páyɛ́ɛ pɔɔd pá páyɛ́ɛ alaa sáád a əngis á Táán, páagɛɛ́ngɛg pɛcɛm piə́ŋ na pisiə́g piə́ŋ kɔŋɛʼ, kɔŋɛʼ. 7Kɛbán kímuʼ, pádɛʼkɛ́ɛ na mɔɔ́n lɛ́ Ɛlɛ́sabɛd ayɛ́ɛ kisúsún. Na náan kɛ́ páyɛ́ɛ páʼkoman kulun tɛn pɔ́lɛ́ piim.

8Náan aa wɔɔ́s wúmmú, wɔnɔ́ ná Saʼkalɛ́as ayɛ́ɛ agɛɛlɛ pigólí piə́ŋ a udi ó Táán a Tɛ́mpɛl lɛ́ kɛ́yɛ́ɛ wɔɔ́s ó pigólí wó ondáŋ wɔ́ɔ́bɔn, 9lɛ́ əgín wɔnɔ́ ná kɛ́yɛ́ɛlanɛ a mandoŋá mɔ́ɔ́bɔn má payaaganɛʼ pɛfɔny, páyɛ́ɛ pɔɔ́ndɔnɔ ntɔŋ agolɛŋ nyɔ́ ɔɔ́sɔd a uʼkóó. Náan aa a wɔɔ́s wóow, ntɔŋ yiídə́əŋ lɛ́ nyɔ́lɛ́ aa ɔ́sɔ́dɛ́ɛ́ a uʼkóó ó Sə́dúk, lɛ́ ɔ́gɔ́lɔnɛ ɛdɛm#1.9 Kɛ́lɛ náan a kálaʼtaʼ yɛ Ɔsa 30.7-8 10A kɛnɛŋ kɛ́go kɛ́ɛg kɛ́ kogɔ́lɔnɛ ɛdɛm, kiʼtúú kɛ́ pɔɔd kiim kɛ́lɛ a táán, pɔ́ɔgɔɔ́sɔ́gɔlɔn Táán. 11Uŋun ó maʼtom ó Sə́dúk wááság kɛɛn alónɛn Saʼkalɛ́as kɔ a uʼkóó, wáádɛ́lɛm a ombɔg ó nɛnom, a ɛbá ɛ́ kibóŋ kɛ́ pálɛɛ́ ɔgɔ́lɔnɛ ɛdɛm a kɛ́lɛ́#1.11 Kɛ́lɛ náan a kálaʼtaʼ yɛ Ɔsa 30.1-6; 1Puʼk 7.48 12Ná Saʼkalɛ́as yɛɛ́dála uŋun ó maʼtom wóow, maŋɔ́ mə́ə́ŋ mááság kɔsɔ́mɛg a kaadɛ wəə́ŋ, əə́bə́ə́ kuliminə. 13Náa uŋun ó maʼtom wɔ́nɔ́ na nyɔ́lɛ́: «Saʼkalɛ́as, odɛʼtámmána. Táán amóób pɛɔ́sɔ́gɔ́lɔ́n pɛáŋ, oʼkán waaŋ, Ɛlɛ́sabɛd əəgubiə́nin mɔɔ́n ɔnɔ́mɛɛd. Ólog mɔɔ́n nyóon lɛ́ Sɛ́aŋ. 14Wagɛɛn na tɔnyɔ́g kɛ́fɔlɛ́ a kəə́bíən kuə́ŋ. Ɛ́fɔlɛ́ ɛ́ pɔɔd tɛn ɛlɛ́ɛ́ kɔnyɔ́ga. 15Kɛ́lɛ lɛ́, mɔɔ́n nyóon alɛ́ɛ́ kɛɛn kɛa kɛ́ mɔɔd a udi ó Sə́dúk. Adɛndɛ́ɛ́ koŋo maloʼ, aŋŋó yoom na yoom yɛ́ yáagɛɛlɛ lɛ́ mɔɔd áŋwaŋ#1.15 Pódála tɛn náan a kálaʼtaʼ yɛ Ɔmb 6.3 Əgín kɔ́gɔ́ɔg a kaadɛ ká ŋŋí, Uŋun wó Ufúlúʼtú ólɛ́ɛ́ kɛɛn na nyɔ́lɛ́ síɛ́ɛ́d. 16Alɛ́ɛ́ kɛɛlɛ lɛ́ pɔɔ́n pá Ɛ́sɛlayɛl piíŋ pímbuúlini a ngə́ ɛ Sə́dúk Táán yɔɔbɔn#1.16 Pódála tɛn náan a kálaʼtaʼ ɛ Məl 2.6 17Alɛ́ɛ́ kusúid yuudi a əngis á Táán. Alɛ́ɛ́ kɛɛn na toɛn wɔnɔ́ Ɛlɛ́as, əə́gəə́siəd tɛn wɔnɔ́ nyɔ́lɛ́, agɛɛlɛ lɛ́ yíiʼkini kolad pasɛ na pɔɔ́n pɔ́ɔ́bɔn. Alɛ́ɛ́ kɛɛlɛ tɛn lɛ́, pá pádɛ́agoóbɛnɛɛ́ Táán, pɛ́ɛn na mafɛgaʼ málaŋ#1.17 Kɛ́lɛ náan a kálaʼtaʼ ɛ Məl 3.23-24 Alɛ́ɛ́ kɛɛlɛ lɛ́ pɔɔd pɛ́ɛn paábɔ́ŋɛ́náán a oʼto ó Sə́dúk.»

18Náa Saʼkalɛ́as ɔnɔ́ na uŋun ó maʼtom: «Nkə aa kíəgindoodi lɛ́ nkə kɛ́ɛg kɛ́ olɛɛ́ əgusəə kɛ́lɛ fɔ́lɔ́b ə́? Mɛ áa nyóonɛ mbáʼkomanɛɛ́ kulun, ɔmbɔ́ tɛn oʼkán waam.» 19Náa uŋun ó maʼtom wɔ́nɔ́ na nyɔ́lɛ́: «Mɛ, ndɛ Kábɛlɛ́a#1.19 Kɛ́lɛ náan a kálaʼtaʼ ɛ Tan 8.16; 9.21; Lóʼk 1.26 nyɔ́ ndɛanɛɛ́ a udi ó Táán əgumuúgudin. Nyɔ́lɛ́ aa əmíim yɛ́ʼtom lɛ́ nyíim agoólɔɛgɛnɛ pisig pɛ́ Tɔsɔm pɛ́ɛnɛ. 20Wɔnɔ́ ná udiə́liʼtininií tólɛ́, wɔɔlɔb mummug. Udiə́giiʼkini kosɔyɛd kə́mmú agɛɛn əgiig əgín a wɔɔ́s wó kɛ́lɛ́ɛ́ kaáyɛ́lɛɛ́. Ɛɛ́ɛ, a fɔ́lɔ́b, nkə kɛ́ mbágodɛánɛ, kɛ́lɛ́ɛ́ kaáyɛ́ɛlɛ a kɛnɛŋ kɛ́go kɛ́ Táán yɛɛ́fɛ́g.»

21Pɔɔd páyɛ́ɛ agobóŋan əgín Saʼkalɛ́as káanɛ a táán. Páyɛ́ɛ əgəə́wúnəni pɔ́nɔ́ əə, tuə́ áa alɛɛ́ fíníŋ fíníŋ náan a uʼkóó a kaadɛ ə́! 22Ná əyíím álon anɛ́ɛ́n, adɛʼkágaáʼkɛ kosɔyɛd. Pɔɔd pááság kolɛŋ lɛ́ kiə́wúunəniʼ kɛ́ kɛbán kɛ́mámolónɛn kɔ a uʼkóó a kaadɛ. Ayɛ́ɛ aáʼkaán mummug, ɔɔ́ndɔsɔyɔ agá na ɔmbɔg.

23Ná kɛnɛŋ kɛ́ kugud kɛ́ Saʼkalɛ́as a uʼkóó kɛ́ɛ́mán, əyúúli a noádɛʼ nuə́ŋ. 24A ngim yɛ́ɛy, oʼkán Ɛlɛ́sabɛd aáság kolon na nium. Ɔyɔ́ɔ́sɛm məə́ máʼtáan na nɛ́lɛ́ andón yoog. Ayɛ́ɛ agosɔyɔ kɔ a ɔʼtɛ́m wə́ə́ŋ a kaadɛ, ɔnɔ́: 25«Táá nkə kɛ́ Sə́dúk amɛ́ɛ́lɛ na mɛ a kɛ́ɛnɛ! Əmínjəə́búʼkíníí, əmə́yindiogi oʼto kono wó óyɛ́ɛ na mɛ a əngis á pɔɔd.»

Uŋun ó maʼtom ó Táán wɛ́lɔɛ́gɛ kəə́bíən kó Yə́sus

26Ná nium nɛ́ Ɛlɛ́sabɛd nɛ́yɛ́ɛ nɛándɛ məə́ máʼtáan na úmmuʼ, Táán yɛɛ́dóm Kábɛlɛ́a, uŋun wə́ə́ŋ ó maʼtom wúmmú a Násalɛd, pálɛ́ɛg yimmú yɛ́ a Kalilə́ə. 27Ayɛ́moodóm a nó ombódóm wo ɔʼkɛ́ɛd nyummú niiŋ lɛ́ Malɛ́a. Ombódóm ogo nyóon ayɛ́ɛ adɛ́ndɛŋ panɔ́mɛɛd. Ayɛ́ɛ aándɛ agá kɛɔŋɔn kɛ́ Yósɛb, ɔnyɔmmɔ́n ó mɔɔd nyummú nyɔ́ a yoog ɛ pɔɔd ɛ Tə́fid. 28Náan aa uŋun ó maʼtom wóow wɛ́ɛ́lónɛn Malɛ́a, wááság kumuúsoyidi wɔ́nɔ́: «Mbə́gusóyídi aá Malɛ́a! Táán amágoyɛ́ɛ́lɛ kɔŋɛʼ, Sə́dúk alɛ na wɛ.»

29Ná Malɛ́a ayóób pisoyidiʼ pɛ́ɛb, oʼto wə́ə́ŋ wááság kolɛ́aŋ. Ayɛ́ɛ əgəə́ŋíən ɔnɔ́ əə, wóow ombod ó pisoyidiʼ əə, wóloodi lɛ́ nkə ə́? 30Náa uŋun ó maʼtom wɔ́nɔ́ na nyɔ́lɛ́: «Odɛʼtámmána Malɛ́a! Táán amágoyɛ́ɛ́lɛ kɔŋɛʼ, 31wəəsiəd nium ná úbíən mɔɔ́n ɔnɔ́mɛɛd, ómoólog lɛ́ Yə́sus. 32Alɛ́ɛ́ kɛɛn kɛgóʼkóón kɛ́ mɔɔd. Pálɛ́ɛ́ komoodɔ́ŋɔn lɛ́ Mɔɔ́n o Táán yɛ́ a mɔɛn. Sə́dúk Táán alɛ́ɛ́ komoyɛ́ɛlɛ lɛ́ ábág nkúm a oʼkɔɔ ó sɛʼkóón Tə́fid. 33Nyɔ́lɛ́ aa alɛ́ɛ́ kolamɛɛ́ nigúu nɛ́ Ɛ́sɛlayɛl a pɛnɛŋ piim. Nɛlaamɛʼ niə́ŋ nɛ́dɛndɛ́ɛ́ kɛɛn na nɛman#1.33 Pódála tɛn náan a kálaʼtaʼ ɛ 2Sa 7.12, 13, 16; Ɛsa 9.6; Tan 7.14 »

34Náa Malɛ́a ɔnɔ́ na uŋun ó maʼtom wóow: «Ooo, kɛ́ɛg əə, kíəgiim kɛásán tuə́ ə́? Mɛ aa nyóonɛ ntɛ́ndɛŋɛɛ́ panɔ́mɛɛd!» 35Náa uŋun ó maʼtom wɔ́nɔ́ na nyɔ́lɛ́:

«Uŋun wó Ufúlúʼtú úguyíiminin,

ná toɛn tó Táán nyɔ́ alɛɛ́ a mɔɛmɔɛ́n tógoyálam.

Kólɛ́ aa kɛ́lɛɛ́ lɛ́, mɔɔ́n nyóon nyɔ́ wəə́bíən, alɛ́ɛ́ kɛɛn Sálábádábádá. Pálɛ́ɛ́ komoodɔ́ŋɔn pɔ́nɔ́, Mɔɔ́n o Táán. 36Taa, sɔ́gmóŋŋí waaŋ Ɛlɛ́sabɛd aándɛ na nium, ɔmbɔ́ wɔnɔ́ ná əə́ʼkulunií. Nyɔ́lɛ́ nyɔ́ páyɛ́ɛ agodóga lɛ́ alɛ kisúsún. Nium niə́ŋ nɛándɛ məə́ máʼtáan na úmmuʼ. 37Kióloodi a nyóon lɛ́, yoom ímuʼ na ímuʼ yɛ́ ɛ́mááyɛn Táán, ɛ́dɛɔ́gɔ#1.37 Pódála tɛn náan a kálaʼtaʼ ɛ Siɛ 18.14 »

38Náa Malɛ́a ɔnɔ́ na uŋun ó maʼtom: «Ooʼó! Ndɛ uʼkudin o Sə́dúk. Kɛáyɛ́ɛlɛ wɔnɔ́ ná wəə́səə». Uŋun ó maʼtom wááság kosan.

Malɛ́a ayɛ́ɛ́n a nó Ɛlɛ́sabɛd

39Əgín a mədúg móom, Malɛ́a aáság kəə́bisig kɛɛn a pálɛ́ɛg ɛ Siudə́ə yimmú, a nkon a mɔɛn. 40Yɛɛ́dám ɔ́sɔd a nó Saʼkalɛ́as, aáság kusoyidi Ɛlɛ́sabɛd. 41Ná Ɛlɛ́sabɛd ayóób pisoyidiʼ pɛ́ Malɛ́a, mɔɔ́n wəəŋ aáság kəə́nyigid a kaadɛ. Uŋun wó Ufúlúʼtú wááság kuyə́əg na Ɛlɛ́sabɛd síɛ́ɛ́d, 42əə́bə́ə́ kosɔyɔ nɛŋo a mɔɛmɔɛ́n, ɔnɔ́: «Malɛ́a! Táán amágoyɛ́ɛ́lɛ kɔŋɛʼ agosan pagɛ́ɛd piim. Amɛ́ɛ́lɛ́nɛ tɛn Mɔɔ́n waaŋ nyɔ́ wəə́bíən kɔŋɛʼ! 43Tuə́ áa Táán aáság kɛnnyáadɛ náan, a ŋŋí ɛ Sə́dúk waam kiim a mɛ noádɛʼ! 44Əgín ná mbóób pisoyidiʼ pɛáŋ, mɛ mɔɔ́n aáság kɛɛn əgəə́nyigid a kaadɛ káam na tɔnyɔ́g. 45Ɛ́yaʼ wɛ sɔ́g! Wɛ nyɔ́ oyáág oʼto lɛ́ nkə kɛ́ Sə́dúk ayɛ́godɛánɛ kɛ́lɛ́ɛ́ kaáyɛ́ɛlɛ!» 46Náa Malɛ́a ɔnɔ́#1.46 Kusiəd a angɛŋ 46 súʼtə́ə́ a 55, pódála tɛn a kálaʼtaʼ ɛ 1Sa 2.1-10 :

«Ɛdáányɛ́ yáam ɛ́lɛ agonyáadɛ Sə́dúk,

47uŋun wáam ólɛ na tɔnyɔ́g a kidíídí kɛ́ Táán, Ongɔɔyɛʼ waam,

48lɛ́ əmínjəə́búʼkíníí mɛ iyənjə́g yɛ́ uʼkudin wəəŋ#1.48 Pódála tɛn náan a kálaʼtaʼ ɛ 1Sa 1.11

Ɛɛ́ɛ, Əgəə́bə́ə nɛ́gɔŋ na a pɛnɛŋ piim, pɔɔd piim pálɛ́ɛ́ kusəə na mɛ pɔ́nɔ́: “Ɛ́yaʼ wɛ sɔ́g!” 49Pálɛ́ɛ́ kusəə náan lɛ́ Táán o toɛn tuim amɛ́njɛɛlánɛ pɛa pɛ́ pɛdám pɛ́ pɛbán.

Niiŋ niə́ŋ nɛ́lɛ nifúŋiə́n.

50A pá pálɛɛ́ agomoódammana, kɔdɛ́ɛ ɔʼtɛ́m kuə́ŋ kóagɛɛnanan nsɛg a nsɛg.

51A toɛn tó a ombɔg wə́ə́ŋ, amɛ́ɛ́lɛ pɛa pɛ́ pɛdám pɛ́ pɛbán.

Aágólɛ́gɛ́dɛ pá pálɛɛ́ agaábágɛdɛ.

52Əə́suulə́ni puʼkúm a mɔʼkɔɔ mɔ́ɔ́bɔn,

amáabágɛdɛ pá pə́əgəə́suuli nkó a nsí#1.52 Kɛ́lɛ náan a kálaʼtaʼ ɛ Síob 5.11; 12.19

53Əə́sugínin pá pálɛɛ́ njaan tugúm,

amáyɛɛlɛ lɛ́ pá pálɛɛ́ na tugúm púúli ɔmbɔg na ɔmbɔg.

54Əmíim ogóomin Ɛ́sɛlayɛl, ndɛg yəəŋ.

Ədiə́bəlini kɔdɛ́ɛ ɔʼtɛ́m kuə́ŋ,

55wɔnɔ́ na yɛɛ́gágɛn pɛmbáa pə́ə́s.

Oóloodi kɔdɛ́ɛ ɔʼtɛ́m kuə́ŋ na Ábɛlaam, ná pɔɔ́n pə́ə́ŋ kɛ́ a pəliə́g.»

56Malɛ́a ayɛ́ɛ́lɛ kɔ a nó Ɛlɛ́sabɛd, yoom ɛ́ məə́ mádáád, aáság kuúlini a noádɛʼ nuə́ŋ.

Niə́bíən nɛ́ Sɛ́aŋ Ɔsɔgɛn pɔɔd

57Kɛnɛŋ kɛ́ Ɛlɛ́sabɛd kubíən kɛáság kiim əgiig, əə́bíən mɔɔ́n ɔnɔ́mɛɛd. 58Ungim, na palɛŋanan pə́ə́ŋ, na yoog yəəŋ ɛ pɔɔd, ayóób lɛ́ Sə́dúk ayɛ́modɛ́ɛ́lɛn ɔʼtɛ́m a fuʼ. Pɛ́ɛ́nyɔ́ga kɛ́fɔlɛ́, ondáŋ na nyɔ́lɛ́. 59A wɔɔ́s ó máʼtáan na mádáád má a ngim ɛ kəə́bíən kó mɔɔ́n nyóon, pááság kiimən lɛ́ ná pámoyáanyɛ#1.59 Kɛ́lɛ náan a kálaʼtaʼ ɛ Ləf 12.3 Páyɛ́ɛ anyɔ́ŋɛn lɛ́ pámoólog lɛ́ Saʼkalɛ́as, niiŋ nɛ́ sɛ wəəŋ. 60Náa ŋŋí ɔnɔ́: «Ndóo, niiŋ niə́ŋ nɛ́lɛ́ɛ́ kɛɛn lɛ́ Sɛ́aŋ.» 61Náa pɔ́nɔ́ na nyɔ́lɛ́ əə: «Ánɛ áŋ! Niiŋ nɛ́ Sɛ́aŋ nɛ́lɛ a yoog yaaŋ ɛ pɔɔd ɔ?» 62Pə́ə́bə́ə́ kosɔyɔ na sɛ a mɔɔ́n na ɔmbɔg lɛ́ ə́səə niiŋ nɛ́ aányɔ́ŋɛn kolog mɔɔ́n. 63Saʼkalɛ́as aáság kusəə lɛ́ pámoyɛ́ʼkɛn kibóŋ nyɔ́lɛ́ ə́dilid niiŋ kɔ. Aáság kudilid lɛ́: «Niiŋ niə́ŋ áa nɛ́ɛn Sɛ́aŋ.» Ungim aáság kəə́wúunəni. 64Əgín kɔ áay kum a nsí, Saʼkalɛ́as əə́bə́ə́ kiiʼkini kosɔyɔ. Ayɛ́ɛ agonyáadɛ Táán. 65Wɛɛ́y Wíígúmin pɔɔd piim pá a ɛbá yə́ə́ŋ. Əgín kɛbán kɛ́ɛg aa kɛ́yɛ́ɛ ɔgɔɔ́sɔyɔ a pálɛ́ɛg ngim yɛ́ ɛlɛɛ́ a nkon, a Siudə́ə. 66Ungim nyɔ́ ayɛ́ɛ agoob kɛ́lɛ́, ayɛ́ɛ agosóngɛ kɔ a ɔʼtɛ́m wə́ə́ŋ, əə́gəə́ŋíən ɔnɔ́ əə: «Nyóonɛ mɔɔ́n óoʼ, alɛ́ɛ́ kaan ombod ó mɔɔd igə ə́?» A fɔ́lɔ́b fɔ́lɔ́b, toɛn tó Sə́dúk tólɛ na nyɔ́lɛ́.

Saʼkalɛ́as alɛ agonyáadɛ Táán

67Uŋun wó Ufúlúʼtú wíyə́ə́g Saʼkalɛ́as, sɛ a mɔɔ́n, a ɔʼtɛ́m síɛ́ɛ́d, əə́bə́ə́ kolɔɛgɛ pɛbán pɛ́ Táán ɔnɔ́:

68«Nnyáádɛ́ yɛ́ɛn na Sə́dúk, Táán yɛ Ɛ́sɛlayɛl

lɛ́, amɛ́ɛ́bɛ ndɛg yəəŋ, amáboyááŋɛn.

69Amábɛdómɛn Ongɔɔyɛʼ o toɛn,

alɛ əgiim álon a yoog ɛ pɔɔd yɛ uʼkudin wəəŋ Tə́fid.

70Kɛ́lɛ́ kɛ́go aa əyíím ádom pəfúfúŋ pá palɔɛgɛʼ pɛbán pə́ə́ŋ kɔ́gɔ́ɔg kalaʼ lɛ́ pálɔɛgɛ.

71Píísə́ə́ lɛ́ alɛ́ɛ́ kɛbɛyááŋɛn a ɔmbɔg á pɔɔd pá pə́əbiyúunə kɔbɛ́,

na a aá pabɛnɛn pə́ə́s.

72Yiílóódi kɔdɛ́ɛ ɔʼtɛ́m kuə́ŋ na pasɛ pə́ə́s.

Ədiə́bəlini nkə kɛ́ páyáágánan a nɛsɔ́g nɛ́ yɛɛ́lád na pɔɔd, nɛsɔ́g nɛ́ nifúŋiə́n.

73Nkə kɛ́ ayáágánan na sɛ wəəs Ábɛlaam,

yiísə́ə́ kɛ́lɛ́ a oʼto wə́ə́s ɔnɔ́#1.73 Kɛ́lɛ náan a kálaʼtaʼ ɛ Siɛ 22.16-17 : 74Alɛ́ɛ́ kɛbɛyááŋɛn a ɔmbɔg á pɔɔd pá pə́əbiyúunə kɔbɛ́,

lɛ́ ná tímuúgudin, fiɛ́d na wɛɛ́y,

75ná tíɛn Sálábádábádá, tɛ́yɛɛn sáád a udi wə́ə́ŋ

mɔɔ́s miim má a ɔlaa wə́ə́s.

76A wɛ, mɔɔ́n waam! Pálɛ́ɛ́ kusəə lɛ́ olɛ ɔndɔɛgɛʼ pɛbán o Táán yɛ́ a mɔɛn,

lɛ́ olɛ́ɛ́ kusúid yuudi a əngis á Sə́dúk, əgusóbini pungə́ puə́ŋ#1.76 Pódála tɛn náan a kálaʼtaʼ ɛ Məl 3.1

77Olɛ́ɛ́ kaásɛn nsiŋ yɛ ndɛg yəəŋ lɛ́ ná pálɛŋ lɛ́ nyɔ́lɛ́, alɛ́ɛ́ koboyɔ́ɔyɛ

ná əə́ʼkubuúlisin mabɛ́ mɔ́ɔ́bɔn.

78Kɛ́ɛg kiim kɛ́lɛ a oʼto ó kɔdɛ́ɛ ɔʼtɛ́m kó Táán wəəs alɛɛ́ na kólɛ́.

A kólɛ́ aa, alɛ́ɛ́ kɛbɛdómɛnɛɛ́ Məsíi nyɔ́ alɛɛ́ wɔnɔ́ wɔɔ́s ó koany a nɛdɛ́ɛmɛn niə́ŋ.

79Alɛ́ɛ́ komoáŋɛ pá pálɛɛ́ a mbin, na pá kugu kólɛɛ́ na pɔ́lɛ́ a ɛbá,

agɛɛlɛ lɛ́ ə́biíloodi wɔnɔ́ ná tɛ́dáŋanaá a ngə́ yɛ uŋóón#1.79 Pódála tɛn náan a kálaʼtaʼ yɛ Ɛsa 9.1 »

80A moóngaa, nyɔ́lɛ́ ayɛ́ɛ əgín aman koyam, nsiŋ yəəŋ yaágon. Yiílə́ndin a nigúu nɛ́ nifələ́ə́n, agɛɛn əgiig a wɔɔ́s wó oyólódíí na pɔɔd pá Ɛ́sɛlayɛl.

Currently Selected:

LÓʼKAS 1: yatDBL

Highlight

Copy