Mateo 13
13
Mä phawirjjata yatichäwi
(Mr 4.1-9; Lc 8.4-8)
1Ucürusti Jesusajj utat mistusinjja, kota thiyaruw kont'asïna. 2Cunjämatejj walja jakenaca tantachasipjjänjja, ucatwa Jesusajj barcor mantasinjja kont'asi, jakenacasti kota thiyancasipcaraquïnwa. 3Jupasti walja yatichäwinacwa yatichäna, uñtasitanac toke.
Saraquïnwa: “Mä yapuchir jakew phawir mistu. 4Phawcasinjja, mä yakhep jathajj thaqui jac'anacaruw puri, ucatsti jamach'inacajj jutasinjja pallthapiwayjjewa. 5Mä yakhepasti kalararawjaruw puriraqui, cawqhantï juc'aquïcän lak'ajja ucawjaru. Uca jathanacasti juc'a lak'anïtap laycojj janc'aquiw mistunïna. 6Inti lupt'anïpansti pharsuwayjjewa, jan suma saphinïtap laycu. 7Yakhepanacasti ch'aphi taypinacaruw puriraqui, ch'aphinacampi chica jilcasajja ch'aphinacaw atipjasin chhaktayapjje. 8Ucampis ucat ucjjar jathajja wali suma lak'awjaruw puri, ucatsti wali sum achuraqui, mayasti patacaruw achu, chicatanacasti sojjta tuncaru, quimsa tuncaruraqui. 9Jumanacatejj ist'añ munapjjstajja, ¡ist'apjjam!”
¿Uñtasïwinacampejj cuns yatichañ munänjja?
(Mr 4.10-12; Lc 8.9-10)
10Jesusan discipulonacapasti jupar jac'achasisinwa jisct'apjjäna:
—¿Cunatsa uqham uñtasitanac toke jakenacarojj parltajja? —sasa. 11Jesusasti jupanacarojj sänwa:
—Jumanacarojj Diosajj yatiyapjjtamwa cunanacatejj alajjpachan imantatäqui ucanacjja, ucampis jupanacarojj janiw yatiyatäpcänti. 12Qhitinacatejj utjirinïqui ucarojj juc'ampiw churasini, uqhamatwa jupanjj walja utjani. Ucampis qhitinacantejj jan cunapas utjqui ucanacatjja apakatäniwa mä juc'a utjiripasa. 13Ucatwa nayajj jumanacarojj uñtasitanac toke yatichapjjsma, jupanacasti uñjcasinsa janis uñjapcaspa uqhamaw tucupjje, ist'casinsa janis ist'apcaspa uqhamaraquiw tucupjje. 14Uqhamwa cuntejj Isaías profetajj arsuwaycatayna ucajj phokhasi:
Jumanacajj ist'casinsa janiw amuyapcätati,
uñjcasinsa janiw uñjapcaraquïtati.
15Aca jakenacan chuymanacapasti chhaktayatawa,
jinchunacapasa llupantatawa,
nayranacapasti jist'antataraquiwa;
uqhamat jan uñjapjjañapataqui,
jinchunacapas jan ist'apjjañapataqui,
janiraqui chuymanacapansa amuyt'apjjañapataqui,
jan nayan ucarus cuttaniñapataqui,
nayasti jupanacarojj janiw c'umaraptaycäti.
16“Jumanacasti cusisitäpjjañamawa, chekpachansa uñjasipctawa ist'asipcaractawa. 17Khanacwa sapjjsma, walja profetanacaw, walja asqui jakenacaraquiw aqham uñjañ munapjjäna cuntejj jumanacajj uñjapctas ucanacjja, ucampis jupanacajj janiw uñjapcänti, ist'añ munasinsa janiraquiw ist'apcänsa.
Jesusajj phawirjjatwa amuyt'ayi
(Mr 4.13-20; Lc 8.11-15)
18“Ist'apjjamay cuntejj uca uñtasïwejj sañ munqui uca. 19Take qhitinacatejj Diosan suma yatiyäwipa ist'apqui ucat janiraqui amuyt'apqui ucanacajj, thaqui thiyarus purcatayna uca jathanacamp sasiwa, chuymapar purcäna uca suma yatiyäwinacsti supayaw apsuwayjje. 20Kalawjar purqui uca jathajja, qhitinacatejj janc'aqui wali cusisiñampi catokapqui ucanacawa, 21ucampis jan suma saphinïtap laycojja, janiw jaya acht'quiti. Cunapachatejj t'akhesiñanacajj uqhamarac jan walt'añanacas juti ucqhajja, janc'aquiw uca suma arunacatjja mayjt'asjje. 22Ch'aphi taypinacar jalantat jatha misturisti acamp sasiwa: Suma arunac ist'casinsa, sintwa llaquisipjje acapach yänacatsa, kollketsa. Take ucanacasti juparojj atipjiwa, suma arunacasti janiraquiw jupan chuymapanjja jiltcaspati. 23Ucampis suma lak'aru purir jathajja acamp sasiwa: Diosan arunacapa ist'asinjja amuyt'apjjewa, ucatsti mä sumwa achupjjaraqui, mayat patacaru sojjta tuncaru uqhamaraqui quimsa tuncarusa.”
Trigo taypin jan wali koraw uñsti
24Jesusasti yakha uñtasïwitwa jupanacarojj parlt'araquïna, aqham sasa: “Diosan reinopajj cunjämatejj mä jakejj yapupar suma jathampi phawanti ucamp sasiwa. 25Ucampis cunapachatejj takeni iquisipcäna ucapachawa mä uñisirejj jutasina jan wali kora jathampi phawantawayi. 26Cunapachatejj trigonacajj alsuni ucatsti pokoraraqui ucqhajja, korajj khanpachwa uñsti. 27Ucapachaw uywatanacajja yapuniru sapjje: “Phawanctas ucajj suma jathänwa. ¿Cawquitaraqui uca jan wali korasti juti?” sasa. 28Yapunisti jupanacarojj siwa: “Mä uñisiriw ucjja luri” sasa. Jupanacasti jisct'asipcaquiwa: “¿Muntati nanacan korsuri sarapjjañajj-jja?” sasa. 29Yapunisti siwa: “Janiwa, uca koranac apscasinjja trigompwa apsupjjasma. 30Aliscpan sam, cunapachatejj yawthapiñ horasajj purincan ucqhaw qhitäjja uca koranac nayrakat apsuñapataqui, ucatsti marka marka waquicht'asin ninaru phichhantañataqui. Trigorusti sumrac imayaraquï’ ” sasa.
Mostaza jathat yatichäwi
(Mr 4.30-32; Lc 13.18-19)
31Jesusasti yakha uñtasïwitwa jupanacaru parlt'araquïna: “Diosan reinopajj cunjämatejj mä jakejj yapupar mostaza jathampi satantqui ucamp sasiwa. 32Chekpachansa mostazajja take jathanacat sipansa sinti jisc'awa, ucampis cunapachatejj alsuni ucatsti jiltasinjja, pankar yapun take kokanacat sipansa, jach'a kokaw tucu. Jach'a kokätap laycusti jamach'inacas tapanacwa ucan lurasiraqui” sasa.
Levadurat amuyt'äwi
(Lc 13.20-21)
33Yakha uñtasïwitwa jupanacaru parlaraquïna: “Diosan reinopajj mä levadurjamawa, cunjämatejj mä warmejj quimsa medida jac'uru levadurampi chapuntqui ucsti poktayaraqui ucamp sasiwa.”
Uca uñtasïwinac tokwa Jesusajj yatichäna
(Mr 4.33-34)
34Jesusasti take acanacwa jakenacarojj uñtasïwi tokenacampi amuyt'ayäna; jan uñtasïwi tokempisti janiw cuns parlcänti. 35Take acanacasti phokhasiscänwa cunjämtejj profetajj kellkatayna ucarjama:
“Uñtasïwinac toke parlä; cunanacatejj imantatäqui orak kalltäwitpacha ucanac saraquï.”
Trigo taypin jilir jan wali korat yatichäwi
36Take jakenacar qhitanucjjasinsti, utaruw mantjjäna. Ucanwa discipulonacapajj jupar
jac'achasisinjja jisct'apjjaraqui:
—Yaticht'apjjetaya cuntejj uca jan wali korampi trigompejj sañ munqui uca— sasa.
37Ucapachaw Jesusajj jupanacarojj sï:
—Qhititejj suma jatha satqui ucajja Jaken Yokapawa, 38yapusti aca orakewa. Suma jathäquis ucajja Diosan ajllit wawaparaquiwa, jan wali jathäqui ucasti supayan wawanacapäquis ucaraquiwa. 39Jan wali jathampi phawantirïqui ucasti, pachpa supayawa. Yawthapiña horasasti acapach tucuscan uca uruwa, uca yapu apthapiristi angelanacawa. 40Cunjämtejj jan wali koranacajj apthapisejja ninaru phichhantañataquejja, uqhamaraquiw lurasini acapachan tucusiñap urunjja. 41Jaken Yokapasti angelanacaparojj qhitaniraquiniwa, Diosan reinopata take juchanacar tincuyiri jakenacar apthapiri, uqhamarac qhitinacatejj jan asqui lurapqui ucanacarusa. 42Jupanacarojj nina akquis uca hornoruw jakontapjjani, ucanwa wararipjjani, laca ch'aqhsa t'urusipjjaraquini. 43Ucampis Diosan munañap phokherinacasti, intjamawa khanapjjaraquini Awquipan marcapanjja. Jumanacatejj ist'añ munapjjstajja, ¡ist'apjjam!
Mä imantat korjjat yatichäwi
44“Diosan reinopajj cunjämatejj mä korejj oraken imantatäquis ucamp sasiwa. Mä jakew uca imantat kori jicjjati, ucatsti uca pachparuw wasitat imantjjaraqui, ucatsti cusisitaw take cunatejj jupan utjquis ucanac aljantasin uca orakjja alasjje.
Jila alani perlanacjjat yatichäwi
45“Diosan reinopajj cunjämatejj mä alaquipa jakejj suma perlanaca thakqui ucamp sasiwa. 46Cunapachatejj mä wali jila alan perla jicjjati ucqhajja, take cunatejj jupan utjquis uca aljantasinwa uca perla alasjje.
Chawlla catuñ känjjat yatichäwi
47“Diosan reinopajj cunjämatejj mä känajj kotar jakontatajj take casta chawllanaca catsojja ucamp sasiwa. 48Cunapachatejj chawllajj phokhantjje ucqhajja, kota thiyaruw uca känjja katatsjjapjje, ucatsti ucanwa chawllanacarojj jaljapjje. Suma chawllanacsti canastaruw imjjapjje, jan walinacsti willirpayjjapjjewa. 49Uqhamaraquiw lurasini acapachan tucusiñap urunjja, angelanacaw asquimpi, jan asquimpjja jaljiri jutani. 50Jan walinacarusti nina akquir hornoruw jakontapjjani, ucanwa wararipjjani laca ch'aqhsa t'urusipjjaraquini.”
Machak yänacampi merk'e yänacampi
51Jesusasti ucapachajj jupanacarojj jisct'änwa:
—¿Jumanacajj take acanacjja amuyapjjtati? —sasa.
Jupanacasti sapjjänwa:
—Jïsa, Tata —sasa.
52Jesusasti ucjjarojj saraquïnwa:
—Cunapachatejj mä ley yatichirejj Diosan reinopata sum yatjje ucajja utan jakjamawa. Jupasti suma imat yänacapatjja yatiwa machak yänacsa, merk'e yänacsa apsuniñjja —sasa.
Jesusajj Nazaret marcanquiwa
(Mr 6.1-6; Lc 4.16-30)
53Cunapachatejj Jesusajj uca uñtasitanac toke yatichañ tucjjän ucatjja sarawayjjänwa. 54Ucatsti marcaparuraquiw purjjäna, ucanjja sinagoganwa yatichañ kalltäna. Ist'apcän uca jakenacasti wal muspharasipjjäna, sapjjaraquïnwa:
—¿Cawquinsa aca jakejj uqham yatiñ cancañjja yatekani? ¿Cunjämataraqui aqham milagronacsa luraraqui? 55Jupajj carpinteron yokapächejjaya, Mariaraquiw taycapasa, uqhamarac Jacob, José, Simón, Judas ucanacan jilaparaquiwa. 56cullacanacapasti jiwasanacampiraquiw jacasipqui, ¿cawquitpunrac take acanacsti yatekanpachasti? —sasa.
57Jupanacasti janiw ist'añ munapcänti, ucampis Jesusajj jupanacarojj sänwa:
—Takeniw mä profetarojj sum catokapjje, ucampis marca masinacapampi, utapanquirinacampiquiw jan sumjja catokapquiti —sasa.
58Ucatwa jan walja milagronacjja ucanjja lurcänti, jupanacan jan juparu iyawsapjjatap laycu.
Currently Selected:
Mateo 13: AYBOL1986
Highlight
Share
Copy
Want to have your highlights saved across all your devices? Sign up or sign in
Biblia Aymar © Sociedad Bíblica Boliviana, 1986.
