MARCOS 7

Jaqin chuymapar q'añuchki ukanaka

(Mt 15.1-20)

1Fariseonakaw Jesusarux jak'achasipxäna, kamachi yatichirinakampi kuna, khitinakatix Jerusalén markat purinipkäna ukanakampi. 2Jupanakasti Jesusan yaqhip yatiqirinakaparux q'añu amparanakapamp manq'ir uñjapxäna, mä arunsti, yatichäwinakarjam ampar jan jariqasis manq'apxatapat jisk'achapxäna. 3(Fariseonakampi taqpach judionakampix awkinakapan saräwinakaparjamaw phuqhapxi, janïr manq'kasax amparanakap sum jariqasisa. 4Qhathut kutt'anisinxa, ampar jan jariqasisax janiw manq'apkiti, ukat juk'ampi yaqha saräwinakaw judionak taypin utji, umañ qirunak jariña, chatunaka, metalat lurat wayuchanak jariña, ukhamarak ikiñ chiqanakapsa, ukanaksti sum phuqhapxi).#7.4 Mt 23.25; Lc 11.39. 5Ukatpï fariseonakampi kamachi yatichirinakampix Jesusar jiskt'apxänxa:

—¿Kunatsa yatiqirinakamax nayra awkinakasan sarnaqäwinakaparjam jan phuqhapki? ¿Kunatarak manq'añatakisti amparanakap jan jariqasipkisti? —sasa.

6Jesusasti jupanakarux sänwa:

—Isaías profetax chiq arsüna jumanakan pä amtañan jaqïpxatamat qhanañchasaxa:

‘Aka jaqinakax lakampikiw yupaychapxitu,

ukampis chuymanakapax nayat jayankaskiwa.

7Inamayakiw nayar yupaychatapaxa,

yatichäwinakapax jaqin amtäwipakiwa’ sasa.#7.6-7 Is 29.13.

8Jumanakax jaqinakan sarnaqäwinakapar phuqhañatakix Diosan kamachi arunakap apanukupxtawa —sasa.

9Jesusasti saskakïnwa:

—Sarnaqäwinakamar phuqhañatakix Diosan kamachip mä tuqiruw apanukupxtaxa. 10Moisesax sänwa: ‘Awkimar taykamar jach'añcham’.#7.10 Ex 20.12; Dt 5.16. ‘Khititix awkipar taykapar ñanqhachanixa, jiwayatäpan’ sasa.#7.10 Ex 21.17; Lv 20.9. 11Ukampis jumanakax sapxtawa: ‘Mä jaqix awkipar taykapar jan yanapañ laykux saskaspawa: Janiw yanapkirismati, taqi kunaxas Diosar katuyatäxiwa’ sasa; 12ukatsa sasipkaktawa, khititix ukham sixa, ukax janiw awkipar taykaparux yanapañapäkxiti, sasa. 13Ukhamat jumanakax nayra awkinakaman sarnaqäwiparjamax Diosan arup ina ch'usar tukuyapxtaxa, wawanakansa wawanakapar jaytasa. Ukhamarak kunayman yaqha ukar uñtasitanaksa lurapxtaxa —sasa.

14Jesusasti wasitat jaqinakar jawsasin säna:

—Taqin ist'apxita, ukatsti amuyt'apxarakim. 15Kuna manq'atix lakat jaqin purakapar mantki ukax janiw jaqirux q'añuchkaspati, jan ukasti kuna q'añu arunakatix jaqin chuymapat mistki, ukaw jaqirux q'añuchi. [16Jumanakatix ist'añ munapxstaxa, ist'apxam]#7.15 Yaqhip qillqatanakanxa v. 16 uka t'aqax janiw utjkiti. —sasa.

17Ukatsti jaqinakar jaytanukxasin Jesusax utaruw mantxäna, ukatsti yatiqirinakapax uka yatichäwxat jupar jiskt'apxäna. 18Jesusasti jupanakarux sänwa:

—¿Jumanakamppachat jan amuyapkta? Kunatix anqat mantki ukax janiw jaqirux Diosan nayraqatapan q'añu tukuykiti. 19Kuntix manq'antki ukax janiw chuymapar mantkiti, jan ukasti purakaparuw manti, ukatsti mistxarakiwa —sasa.

Ukham sasin Jesusax taqi manq'an q'umätap yatiyäna. 20Ukatsti saskakïnwa:

—Kunatix jaqin chuymapat mistki ukaw jaqirux q'añuchi. 21Jaqin chuymapatsti jan wali amuyunakaw mistu: wachuqa jucha luraña, jaqi jiwayaña, 22lunthatasiña, jaqin yänakap munaña, ñanqha luraña, sallqjasiña, q'añu luraña, uñisiña, k'ari arunak apnaqaña, jach'a jach'a tukuña, jan amuyunjam sarnaqaña. 23Taqi ukanakaw chuymat mistu, ukarakiw jaqirux q'añuchi —sasa.

Jan judiökasin Jesusar iyawsir warmi

(Mt 15.21-28)

24Jesusasti uka chiqat mistuwayxasinxa, Tiro markaruw sarxäna. Mä utar purisinsti, Jesusax janiw khitin yatiñapsa munkänti, ukampis janiw jaqinakat imantasiñjamäkänti. 25Mä warmisti Jesusan ukankatap ist'asinxa, jupan ukaruw jutäna, phuchhapan ñanqha ajayun mantatätap layku, purinisinsti Jesusan nayraqataparuw killt'asïna. 26Uka warmix janiw judía warmïkänti, jan ukax Fenicia markankirïnwa. Jupasti phuchhapat ñanqha ajayu alissuñapatakiw Jesusar achikt'asïna. 27Jesusasti juparux sänwa:

—Wawanakay nayraqat manq'asipxpan, janiw wakiskiti wawanakat t'ant'a apaqasin anunakar#7.27 Anunaka: Judionakax khitinakatix jan judiöpki ukanakaruw anunaka sapxirïna. churañaxa —sasa.

28Warmisti Jesusarux sarakïnwa:

—¡Tatay, ukax chiqapunïskiwa! Ukampis kuna manq'a t'unanaktix wawanakax jalaqtayki ukanak anunakax manq'apxi —sasa.

29Jesusasti ukxarux sänwa:

—¡Warmi, uka arsutamax chiqäskapuniwa! Jichhax kusisitak utamar sarxam, ñanqha ajayusti phuchhamat mistuwayxiwa —sasa.

30Warmisti utapar purisinxa, phuchhaparux ikiñankaskir jikxatäna; ñanqha ajayusti jupat mistuwayxataynawa.

Jesusax uqar amutu jaqiruw k'umaraptayi

31Jesusax Tiro markat mistxasinxa, Sidón chiq sarakipawayäna Galilea quta jak'ar puriñkama, Decápolis uraqi chiqa sarasa. 32Jesusan ukarusti mä uqar amutu jaqiruw irpanipxäna, ukatsti amparapampi uka jaqir luqxatt'añapatakiw achikt'apxäna. 33Jesusasti uka jaqirux jaqinak taypit yaqhawjar irpaqasaw ampar luk'anampi jinchupat luqantäna, laxraparusti thusunqayampiw jawt'äna.#7.33 Mc 8.23; Jn 9.6. Khaya urunakanxa, thusunqayampiw qullt'apxirïna. 34Ukatsti alaxpach tuqi uñtasaw jach'at samsüna, sarakïnwa: “¡Efatá!”#7.34 Efatá: uka arux arameo aruwa. sasa. (Ukax: “¡Jist'artam!” sañ muni.)

35Ukspachaw uqarax ist'xäna, ukatsti sum parlxarakïna. 36Jesusasti jaqinakarux jan khitirus arsupxañapatakiw iwxt'äna; ukampis iwxt'katpachas yaqhanakarux yatiyasipkakïnwa. 37Jupanakasti wali muspharataw sapxarakïna: “Taqi kunsa sumpun luri. ¡Uqaranakas ist'xiwa, amutunakas arsxarakiwa!” sasa.#7.37 Is 35.5-6.

Currently Selected:

MARCOS 7: AYOPD

Highlight

Copy