MARCOS 14

3. Jesusan t'aqhisitapa, jiwatapa, jiwatat jaktatapa

(14.1—16.20)

Jesusar katuntañ amtapxi

(Mt 26.1-5; Lc 22.1-2; Jn 11.45-53)

1Israelitanakan Pascua uru uruyañatakix pä urukixänwa, uka urun jan levaduran t'ant'a manq'apxirïna.#14.1 Pascua: uka jach'a urux kunapachatix israelitanakax Egipto markan t'aqhiskasin qhispitäpkän uka uru amtapxäna (Ex 12.1-27; Dt 16.1-8). Jilïr sacerdotenakampi, kamachi yatichirinakampisti kunjäm tuqitsa Jesusarux katuntañpin munapxäna, ukat jupar jiwayañataki. 2Ukampis jupanakax sapxänwa:

—Aka jach'a urunakan jan juparux katuntkañäniti, jaqinakaw ch'axwtaspa ukat jiwasatakiw sayt'asipxaspa —sasa.

Mä warmix suma q'apkir qullampiw Jesusar warxati

(Mt 26.6-13; Jn 12.1-8)

3Jesusax Betania markan jikxatasïna, lepra usuni sat Simonan utapana. Manq'añatak qunt'atäskipansti, mä warmiw purinïna nardo sat layminakat lurat wali jila alan suma qulla mä qirur apt'asita. Uka qiru p'akjasinsti, Jesusan p'iqiparuw uka q'apkir qullampix warxatäna. 4Yaqhipanakasti uk uñjasax wal thithipxäna, jupanakkamarakiw sasipxäna:

—¿Kunatakirak uka suma q'apkir qullsti inamayatak wartisti? 5Ukax kimsa patak qullqiruw aljasisapäna, uka qullqimpi jan kunaninakar yanapt'añataki —sasa.

Uka warmitakisti wal arusipxäna.

6Ukampis Jesusax jupanakarux sänwa:

—Jan phiñasipxamti. ¿Kunatsa jumanakax jupar tuqisipkta? Ukham lurasax nayaruw aski luraskitu. 7Jan kunaninakax jumanak taypin utjapuniniwa,#14.7 Dt 15.11. jupanakarusti kuna pachas yanapasipkätawa, ukampis nayax janiw mä juk'a pachat jumanakampïkxäti. 8Aka warmix qawqhtix lurirjamäki uk luraski, janchixax imaskani ukürutakiw qullamp warxatasax nayrt'aski.#14.8 Mt 26.8-12; Jn 19.40. 9Qhanak sapxsma, kawkhantix aka qhispiyasiñ arunakax akapachan parlaskani ukkhaxa, aka warmin luratapat parlapxani, ukhamat jupax amtatäni —sasa.

Judasax Jesusaruw aljanti

(Mt 26.14-16; Lc 22.3-6)

10Tunka payan yatiqirinak taypin maynïriw utjäna, Judas Iscariote sutini, jupasti Jesusar katuntayañatakix jilïr sacerdotenakamp parljiriw saratayna. 11Jupanakasti uk ist'asin wal kusisipxäna; Judasar qullqi churañatakiw amtapxäna, ukat Judasax kunayman tuqit Jesusar katuntayañ thaqhäna.

Jesusan Pascua jayp'un manq'äwipa

(Mt 26.17-29; Lc 22.7-23; Jn 13.21-30; 1 Co 11.23-26)

12Jan levaduran t'ant'a manq'añ qallta uruw purinïna, ukürusti, israelitanakax mä urqu oveja luqtapxirïna, ukat yatiqirinakapax Jesusar jiskt'apxäna:

—¿Kawkharus Pascua arum manq'äwi wakichir sarapxäxa? —sasa.

13Ukatsti Jesusax pani yatiqiriparuw khithäna:

—Markar sarapxam. Ukansti mä chacharuw uma wakulla apt'at jikxatapxäta; jupar arkapxam, 14kawkharutix jupax mantkani uka utanir sapxam: “Yatichirix siwa: ¿Kawkïris yatiqirinakaxampi Pascua manq'a manq'apkä uka utaxa?” sasa. 15Ukat jumanakarux uta patan mä jach'a uta wakicht'at uñacht'ayapxätam. Ukan jiwasan manq'añasatakix wakiyapxäta —sasa.

16Yatiqirinakasti mistuwayasin markaruw puripxäna. Ukatsti kunjämtix Jesusax siskatayna ukhampun taqi kunsa jikxatapxäna, ukanarak Pascua manq'a manq'añatakix wakiyapxäna.#14.16 Dt 16.5-8.

17Arumt'xipansti Jesusax tunka payan yatiqiripampiw purïna. 18Manq'añatak qunt'atäkasinsti, Jesusax jupanakaruw säna:

—Qhanak sapxsma, nayamp chik manq'apktas ukanakat mayniw aljantitani —sasa.#14.18 Sal 41.9 (10).

19Uk ist'asinsti jupanakax llakthaptapxänwa, sapa maynirakiw Jesusarux jiskt'asipxäna:

—¿Nayätti? —sasa.

20Jesusasti jupanakarux sänwa:

—Jumanakat maynïriwa, khititix nayamp chika pachpa chuwar t'ant'a chilltaski ukawa. 21Chiqpachansa, Jaqin Yuqapax kunjämatix jupat qillqatäki ukhamarjamaw phuqhaski; ukampis ¡kunakïkani Jaqin Yuqapar katuntaykanis uka jaqitakixa! Jupatakix walïsapänwa jan yuriñapaxa —sasa.

22Manq'kasinsti, Jesusax t'ant'a irtasin Diosaruw yuspagaräna. Ukatsti t'ant'a pachinuqasax yatiqirinakaparuw churäna, sarakïnwa:

—Manq'apxam, akax nayan janchixawa —sasa.

23Ukxarusti vinon qiru astasin Diosaruw yuspagaräna. Ukatsti yatiqirinakaparuw uk churarakïna. Taqiniw uka qirut vino umt'apxäna. 24Jesusasti saskakïnwa:

—Akax nayan wilaxawa, Diosax uka wilampiw taqi jumanakampix mä arust'äwi luri,#14.24 Ex 24.6-8; Jer 31.31-34; Zac 9.11; Lc 22.20. uka wila tuqirakiw walja jaqinakax qhispiyatäpxani. 25Qhanak sapxsma, jichhat uksarux janiw mayampsa uvan achupat umkxäti, Diosan qhapaq markapan machaq vino umkä uka urkama —sasa.

Jesusax Pedron jan uñt'ir tukuñap yatiyi

(Mt 26.30-35; Lc 22.31-34; Jn 13.36-38)

26Mä q'uchu q'ucht'asinsti,#14.26 Salmo q'uchunaka: Pascua jayp'u manq'äwinsti qalltañatakix akïr q'uchunak q'uchupxirïna Salmos 113—114, tukuyañatakisti Salmos 115—118 ukanakarak q'uchupxirïna. Olivos qulluruw sarapxäna. 27Ukatsti Jesusax jupanakarux sänwa:

—Jichha arumax jumanakax taqiniw nayat mayjt'asisin jaytanukupxitäta. Qillqatanakan siwa: “Awatiriruw jiwayä, ovejanakasti ananukutäniwa” sasa.#14.27 Zac 13.7. 28Ukampis jaktxä ukkhax Galilean jumanakarux wasitat tantachapxäma —sasa.#14.28 Mt 28.7,10,16; Mc 16.7; Jn 21.1.

29Pedrosti ukxarux sänwa:

—Mayninakax taqinis mayjt'asis jumar jaytanukusipkpan, nayax janipuniw jumarux jaytanukkämati —sasa.

30Jesusasti juparux sarakïnwa:

—Pedro, qhanak sisma, jumax jichha arumpacha, wallpax janïr pä kuti art'kani ukapachaw kimsa kuti nayar jan uñt'ir tuküta —sasa.

31Ukham siskatpachas Pedrox arsuskakïnwa:

—Jumamp chik jiwañaxas wakischini ukasa, janipuniw jumar jan uñt'irix tukkämati —sasa.

Taqinirakiw uka kipka sapxäna.

Jesusax Getsemaní chiqan Diosat mayisi

(Mt 26.36-46; Lc 22.39-46)

32Ukxarusti Getsemaní sat chiqaruw puripxäna. Jesusasti yatiqirinakaparux sänwa:

—Akawjar qunt'asipxam, nayasti Diosat mayisiriw sarä —sasa.

33Ukatsti Pedrompiru, Santiagompiru, Juanampiruw irpäna, Jesusasti walpun chuymapan llakthaptäna, axsarthapirakïna. 34Ukat kimsanirux säna:

—Chuymaxan sinti llakt'ataw uñjasta niyas jiwkirista ukhama.#14.34 Jn 12.27. Akawjar qhiparapxam, janiw ikipxätati —sasa.

35Ukatsti Jesusax jupanakat mä juk'a nayraqataruw saräna, ukansti parap uraqir puriyañkamaw killt'asïna, ukatsti Diosaruw mayisïna, wakisispa ukkhax uka t'aqhisiñ apaqt'añapataki. 36Mayisïwipanxa akham sasaw arsüna: “Awkixay, jumax taqi kun lurañatakiw ch'amanïtaxa, aka k'allk'u um umt'añaxsa apaqt'asitaya; ukampis jan nayan munañaxäpati, jan ukasti juman munañamarjam luraspan” sasa.#14.35-36 Heb 5.7-8.

37Ukxarusti yatiqirinakapan ukaruw kuttäna, jupanakarusti ikiraskir jikxatäna. Pedrorusti sänwa:

—Simón, ¿ikisktati? ¿Janit mä juk'akamas uñnaqirjamäkta? 38Jan ikipxamti; yant'ar jan mantañatakix Diosat mayisipxam. Chiqpachansa jumanakax taqi kunsa sum lurañ munapxtaxa, ukampis jan ch'amaniw jikxatasipxtaxa —sasa.

39Jesusasti mayamp sarasinxa, uka pachpa arunakampirakiw Diosat mayisïna. 40Kuttanxasinsti, wasitat jupanakarux ikiraskir jikxatäna, jupanakan nayranakapan ikimpi atipjatätap layku. Ukat jupanakax janiw kuns arsurjamäpkänti. 41Kimsïr kuti kuttanisinsti sarakïnwa:

—¿Ikisipkaktati? ¡Sartapxam! Jaqin Yuqapar katuntir qhuru jaqinakax niyaw akankxapxi, nayar katuntiriw jutapxi. 42Sartapxam, jin sarxapxañäni; aljantkitani ukax niyaw purinxi —sasa.

Jesusaruw katuntapxi

(Mt 26.47-56; Lc 22.47-53; Jn 18.2-11)

43Jesusax parlaskän ukhamaruw Judasax purinïna, jupasti Jesusan tunka payani yatiqiripat maynïrïnwa, jupamp chikasti walja jaqinakaw espadanak apt'ata, lawanak ayt'ata jutapxäna. Jilïr sacerdotenakampi, kamachi yatichirinakampi, jilïr jaqinakampiw jupanakarux khithanipxatayna. 44Jesusar aljantir Judasasti, jupanakarux sataynawa: “Khitirutix nayax jamp'att'kä ukawa, juparuw katuntapxäta, ukatsti jan antutasaw irpapxäta” sasa.

45Judasasti Jesusar jak'achasisin jamp'att'äna:

—¡Yatichiri! —sasa.

46Ukatsti jaqinakax Jesusaruw katuntapxäna, ukham katuntat irpapxarakïna.

47Jesusampïpkän ukanakat maynïriw espadap apsusisin jilïr sacerdoten uywatapar jisktasin jinchup thuqhuqayäna. 48Jesusasti jaqinakarux sänwa:

—¿Lunthatarjamati espadanakampi, lawanakampi nayar katuntir jutapxta? 49Sapürurakis Tatitun utapan jumanakar yatichasipksmaxä,#14.49 Lc 19.47; 21.37; Jn 18.20. ukkhay katuntapxitasamänxa. Ukampis akax Qillqatanakan phuqhasiñapatakiw lurasi —sasa.

50Ukxarusti yatiqirinakapax taqiniw Jesusar sapak jaytawayasin jaltxapxäna. 51Ukampis mä waynaw Jesusarux arkaskäna, mä isimp awayt'ataki. Juparusti katuntapxarakïnwa, 52ukatsti jupax uka isip apt'awayasin q'alalakiw jaltxäna.

Jesusax Jach'a Tantachasïwi nayraqatan jikxatasi

(Mt 26.57-68; Lc 22.54-55,63-71; Jn 18.12-14,19-24)

53Jaqinakasti Jesusarux jilïr sacerdoten utaparuw irpapxäna, ukansti taqi jilïr sacerdotenakampi, jilïr awkinakampi, kamachi yatichirinakampiw tantachasipxäna. 54Pedrosti jayatak arkäna, jilïr sacerdoten uta anqäxapar mantañkama, ukansti soldadonakamp chikaw nina jak'an qunt'at junt'uchasiskäna.

55Jilïr sacerdotenakampi, Jach'a Tantachasïwinkirinakampix Jesusar juchañchañatakix jaqinakampiw k'arimpi irkatayañ munapxäna, ukampis janiw kunatsa juparux juchañchañ jikxatapkänti. 56Waljaniw Jesusarux k'arimpi irkatapxäna, ukampis jupanakax janiw pachpak arsupkänti, jan ukasti may may parlapxäna.#14.56 Judionakan kamachiparjamaxa, wakisïnwa paya, jan ukax, walja irkatirinakan arunakapax kikipakïñapa (Nm 35.30; Dt 19.15). 57Yaqhipanakasti sayt'asisin ina ch'usat k'arintapxäna:

58—Nanakax aka jaqirux akham siri ist'apxta: “Nayaw jaqin lurat aka Tatitun utap tinkuyä, ukatsti kimsürut jaqin jan lurat yaqha uta sayt'ayarakï” —sasa.#14.58 Mc 15.29; Jn 2.19-22. Jesusax ukham arsutapampix Jerusalén markan utjkäna uka jach'a Tatitun utapan t'unjatäñap qhanañchaskäna (Mc 13.1-2).

59Janiw ukhamatsa arsutanakapax mayakïkänti.

60Ukatsti jilïr sacerdotex tantachasïw taypin sayt'asisin Jesusarux jiskt'äna:

—¿Janit kamskätasa? ¿Kunatarak aka jaqinakasti ukham irkatapxtamsti? —sasa.

61Ukampis Jesusax amukiw ist'äna, janirakiw kuns arskänti.#14.60-61 Is 53.7; Mt 27.12-14; Mc 15.5; Lc 23.9. Jilïr sacerdotex wasitat jiskt'askakïnwa:

—¿Jumätati Cristoxa, Qullan Diosan Yuqapäki ukaxa? —sasa.

62Jesusasti sänwa:

—Jïsa, nayätwa. Jumanakax Jaqin Yuqaparux jach'a ch'aman Diosan kupïxapan qunt'at uñjapxäta, ukatsti alaxpach qinayanak patan jutaskir uñjapxarakïta —sasa.#14.62 Sal 110.1; Dn 7.13.

63Uk ist'asinsti jilïr sacerdotex isip ch'iyanuqasïna ukatsti sänwa:

—¿Kunat juk'amp arsurinaksa muntanxa? 64Jumanakax Diosar ñanqhachatap sum ist'apxtaxa. ¿Kamsapxtasa? —sasa.

Jupanakasti taqiniw arsupxäna:

—Jiwañapaw wakisi —sasa.#14.64 Lv 24.15-16; Jn 19.7.

65Yaqhip jaqinakax Jesusar thuskatañ qalltapxäna, nayranakap imt'asaw nuwjapxäna:

—Sapxita, ¿khitis nuwtam? —sasa.

Soldadonakasti Jesusarux t'axllinuqapxarakïnwa.#14.65 Is 50.6; 53.5.

Pedrox Jesusar jan uñt'iriw tuku

(Mt 26.69-75; Lc 22.56-62; Jn 18.15-18,25-29)

66Ukanak lurasiñkamasti, Pedrox uta anqäxankaskänwa. Ukaruw jilïr sacerdoten uywat mä tawaqux purinïna; 67Pedror nina jak'an junt'uchasiskir uñjasinsti, jupar wal wal uñkatasin säna:

—¡Jumax Nazaretankir Jesusampi chikäskarakïyätasä! —sasa.

68Ukampis Pedrox jan uñt'iriw tuküna:

—Janiw juparux uñt'kti, kunpin parlaskchista —sasa.

Ukatsti Pedrox anqaruw mistuwayi. Ukapachaw wallpax art'äna. 69Uywat tawaqusti wasitat Pedror uñkatasin mayninakar yatiyarakïna:

—Aka jaqix jupanakat maynïriwa —sasa.

70Pedrosti mä kutimpiw jan uñt'ir tuküna. Ukat mä juk'ampjarusti ukankirinakax wasitat Pedrorux sapxäna:

—Jumax jupanakat maynïrïskapuntawa; Galileankirïtawa, parlatamas uksankirinakan parlatapjamawa —sasa.

71Pedrosti ukxarux ñanqha arunakampiw säna:

—Janipuniw uka jaqirux uñt'kti. ¡Khitit parlasipksta! —sasa.

72Ukspacharakiw wallpax mayamp art'xäna, uk ist'asinsti, kuntix Jesusax siskäna uka arunakat Pedrox amtasïna: “Wallpax janïr pä kuti art'kani ukkhax kimsa kutiw jumax nayar jan uñt'ir tuküta” sasa. Uka arunakat amtasisinsti Pedrox walpun jachäna.

Currently Selected:

MARCOS 14: AYOPD

Highlight

Copy