GÉNESIS 22
22
Dios prueban Abrahampa feninta
1Unayninmantaj Dios Abrahampa feninta yachayta munarqa. Sutinmanta wajyarqa Abraham, nispa. Paytaj kuticherqa, kaypi kashani, nispa.
2Diosqa nerqa: K'ata churiyki munasqayki Isaacta pusarikuspa riy Moríah jallp'aman. Chayman chayaspataj payta q'olachipuwanki ima orqomanchus noqa riy nisqayki chaypi.
3Abrahamqa q'ayantin tutamanta jatarispa, burronta karunaykuytawan, iskay kamachisninta wawan Isaactawan wajyarqa q'olachinapaj llant'ata k'utuytawan rerqa maymanchus Dios nerqa chayman. 4Kinsa p'unchayta rispa, Abrahamqa karumanta rikorqa, maymanchus risharqa chay cheqata. 5Kamachisninmantaj nerqa: Qankunaqa kayllapi burrowan qhepakuychej, noqataj wawaywan jaqayman rispa Diosta yupaychaytawan kutimpusqaykupacha, nispa.
6Abrahamqa Diospaj q'olachinankupaj apasharqanku chay llant'ata Isaacman q'epiriyucherqa, paytaj cuchillota ninatawan oqhariykukorqa; jinaspataj iskaynillanku kachaykukorqanku. 7Rishaspataj Isaacqa nerqa tatan Abrahamman: Tatáy, paytaj nerqa: Imata ninki wawáy?, nispa. Isaactaj nerqa: Llant'awan ninawan tiyapuwanchej, maytaj chantá ovejarí Señorpaj q'olachinapajri?, nispa.
8Abrahamtaj nerqa: Dios maymantapis rikhurichimullanqa paypaj ovejata q'olachinanchejpaj, wawáy. Jinamanta khuska rillarqankupuni. 9Maymanchus Dios nerqa Abraham rinanta, chayman chayaspataj Abrahamqa uj altarta ruwarqa Diospaj, chaymantaj llant'a apasqanta churarqa. Llant'a patamantaj Isaac wawanta wataykuspa winkuykucherqa altar patapi. 10-11Ñapis cuchillota oqharispa wawanta ñak'anan kashajtintaj, Señorpa angelnin janaj pachamanta nimorqa: Abraham! Abraham! Paytaj kuticherqa, kaypi kashani, nispa. 12Angeltaj nerqa: Ama makiykita oqhariychu, nitaj wawaykita imanaychu, yachaniña qan Diosniykita manchachikusqaykita. Manataj uj k'ata wawaykitapis mich'akunkichu qonawaykipaj.
13Jinamanta Abrahamqa qhawarerqa, rikorqataj uj carnero wajrasninmanta sach'as ukhupi jarap'asqata. Rispataj carnerosta aysarimuytawan altar patapi wañuchispa wawampa cuentanmanta Señorpaj q'olacherqa. 14Chay cheqata Abrahamqa suticharqa: Señorqa qon imachus mana kanchu chayta, nispa. Chayrayku kunan ninku: Uj orqopi Señorqa qon imachus mana kanchu chayta, nispa.
15-16Ujtawan Señorpa angelnin wajyamorqa janaj pachamanta Abrahamta, nispa: Señor nin: Noqa kikiy jurani, qan kayta ruwasqaykirayku, uj k'ata wawaykita mana mich'akuspa pusamusqaykimanta noqarayku. 17Kunanqa bendicisqayki, mirayniykitapis ashkhata mirachisaj mana yupay atinata cielopi qoyllurkunata jina, mar qocha cantopi t'iyuta jina. Chantapis tukuy enemigosninkuta atipanqanku. 18Tukuy naciones mundopi kajkuna paykunanejta bendicisqas kanqanku, qan imatachá nisusqayta kasuwasqaykirayku.
19Abrahamqa chaymanta kutiporqa maypichus kamachisnin kasharqanku chayman. Chaymantataj tukuyninku riporqanku Beersebaman, maypichus Abraham tiyakorqa chayman.
Nacorpa wawasnin
20Unaymanta yacharqa Abrahamqa, wauqen Nacorpa warmin Milcapis wawasniyoj kasqanta. 21Kuraj kajqa karqa Uz, ujnintaj Buz, ujnintaj Kemuel; pay karqa Arampa tatan. 22Chaymanta sullk'as kallarqankupuni: Quesed, Hazo, Pildas, Jidlaf, Betuel ima. 23Kay Betuel karqa Rebecaj tatan. Chay pusaj karqanku Milcaj wawasnin Abrahampa wauqen Nacorpaj.
24Chanta Nacorpata wawasnin kallarqankutaj Reuma warmipi, piwanchus tantalla tiyaj kanku. Chay wawasnintaj karqanku: Teba, Gaham, Tahas, Maaca ima.
Currently Selected:
GÉNESIS 22: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
