GÉNESIS 23
23
Sara wañupun
1Saraqa kausarqa iskay chunka qanchisniyoj watasta. 2Pay wañuporqa Quiriat-arbapi, chayqa kashan Hebrón llajtapi, Canaán jallp'api. Abrahamqa may llakisqa mayta waqarqa warmin Sara wañupojtin. 3Chaymantaqa wañusqata saqespa rerqa Hetpa wawasninwan parlaj, kay jinata:
4Noqaqa karu llajtayoj qankuna ukhupi tiyakuni, jinapis venderiwaychej ari uj chhikan jallp'ata, chayman warmiyta p'ampakapunaypaj. 5-6Hetpa wawasnintaj nerqanku: Wiraqochi, uyariwayku ari. Noqayku yachayku qan Diospa ajllasqan kay chaupiykupi kasqaykita. Chayrayku qanqa sumajnin cheqaman warmiykita p'ampakapuy, ni mayqenniyku nisqaykuchu, qanqa mana kayman p'ampakunaykichu, nispa.
7-9Chanta Abrahamqa sayaykuytawan chay llajtayoj hititasman k'umuykorqa, nispa: Cheqamanta qankunaqa munankichej kaypi warmiyta p'ampakapunayta chayqa, nipuwaychej ari Zoharpa wawan Efronta, vendenawanta Macpela cuevata, mayqenchus kashan jallp'asnimpa cantosnimpi chayta. Noqa qopusaj chay cuevaj valesqanta, ajinamanta noqajtapuni kanampaj chay sepultura kay llajtapi.
10-11Hitita Efronqa chay runas ukhullapi kasharqa. Nerqapachataj Abrahamman tukuy ayllusnin uyarishajtin, jinallataj llajta punkuta yaykumojkunaj uyarinankuta, nispa: Mana, wiraqochíy, uyariway: Qhasilla qosqayki chay jallp'ata, maypichus cueva kashan chayta. Tukuy ayllusniy uyariwajkuna yachachunku qhasilla qosusqayta. Chayman warmiykita p'ampakapuy.
12-13Abraham ujtawan chay llajtayojkunaman k'umuykuspa, Efronman tukuy uyarishajtin nillarqataj: Uyarillaway ari. Jap'ikapullay qolqeta chay jallp'aj valesqanta, chayman tukuy sonqo wañusqayta p'ampakapusaj.
14-15Efrontaj kuticherqa: Mana wiraqochíy, uyarillaway jallp'aqa valen tawa pachaj qolqe. Imataj chay qolqe kanqa iskayninchejpajrí? Qanqa chayman rispa warmiykita p'ampakampullay.
16Abrahamqa chay qolqeta Efronman jaywarqapacha hititas rikushajtinku pay jinata nejtinkama, chayta qorqa qolqe ch'uyata makipura, tawa pachaj qolqeta. 17Jinamanta Efrompa jallp'anqa Abrahampa makinman chayarqa. Chaytaj karqa Macpelapi, Mamrej inti llojsimuyninnejpi, maypichus sach'asniyoj jallp'a cuevayoj karqa, chay. 18Ajinata chay jallp'ata Abrahamqa rantikaporqa. Chayta yacharqanku tukuy hititas, jinallataj llajta punkunta yaykoj llojsejkunapis.
19Chaymanta Abrahamqa warminta p'ampakamporqa Macpela jallp'api cuevaman, Mamrej inti llojsimuyninnejpi. Chay cheqaqa may rejsisqa karqa Hebrón sutiwan Canaán jallp'api. 20Ajinamanta Abrahamqa chay jallp'ayoj karqa, cuevayojtaj; mayqentachus hititas venderqanku aya p'ampanapaj.
Currently Selected:
GÉNESIS 23: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
