Māa̍ti̍u̍ 14

Ā dīī Chɔ᷄ŋ Wānā Yi̍ŋāa̍

(Ma̍kī 6:14-29; Lu̍kū 9:7-9)

1A̍ bōōndi̍i̍ ke̍ŋ, mi̍ Māsāa̍ Hɛ̍lɔ̄ɔ̄ tu̍ɛ̍ī a̍ wa̍lta̍ Chi̍i̍sū wa̍ tōsāa̍ la̍ŋ. 2Mbo̍ dīmūl lāŋgba̍ā ndūāā ka᷅lla̍ āā, “Chɔ᷄ŋ Wānā Yi̍ŋāa̍ kpe̍e̍kpe̍i̍ mi̍i̍ŋgu̍ ho̍ō yōōmū ni̍. Le̍la̍ŋ bɛ̍ɛ̍ o̍ nɔ̍ kpāāyāa̍ le̍ kɔ̄ndɔ̄fi̍ltā wāā nu̍a̍ā tōsāa̍ ni̍.”

3-4Sa̍bū Hɛ̍lɔ̄ɔ̄ di̍mi̍ māā Chɔ᷄ŋ mīīŋgu̍ yōōmū wo̍ cho̍ ni̍ māā ndu̍ Hɛ̍lɔ̄ɔ̄ o̍ sūɛ̍i̍ Hɛ̄lo̍o̍dīāā ve̍ chōo̍, ndu̍ yɔ̍nūŋ māā la̍nɔ̍ɔ̍ Fi̍li̍pī pɔ̍mbɔ̄ ndɔ̄ ni̍, mbo̍ tōsā ma̍ bīī Chɔ᷄ŋ Wānā Yi̍ŋāa̍ ma̍ dūāū ndu̍ o̍ yɔ̄lɔ᷄ŋ. Mɛ̄ɛ̍ i̍ lo̍o̍ku̍ yɔ̄nɔ᷄ŋ yɛ̍ cho̍ ho̍ō ni̍. Ndu̍ Hɛ̍lɔ̄ɔ̄ mɛ̄ɛ̍ o̍ chɛ̍ŋ pɛ̍, mbo̍ chūā la̍nɔ̍ɔ̍ Fi̍li̍pī pɔ̍mbɔ̄ ndɔ̄, ndu̍ yɔ̍nūŋ māā Hɛ̄lo̍o̍dīāā ni̍. Le̍ he̍ī, mi̍ Chɔ᷄ŋ di̍mūl ndu̍ āā, “Ō cho̍ i̍ kɛ̍ndɛ̄ mā chu̍a̍ Hɛ̄lo̍o̍dīāā o̍ nɔ̄ ni̍ŋ te̍.” 5Le̍ he̍ī mi̍ Hɛ̍lɔ̄ɔ̄ ye̍e̍mā le̍ Chɔ᷄ŋ dīyɔ̄ɔ̍. Kɛ̍, ō wa̍ sīōōŋnde̍ le̍ Chu̍ūwa̍. Kāni̍ fo̍ndōle̍, Chu̍ūwa̍ nda̍ a̍a̍ chu̍a̍ Chɔ᷄ŋ māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍.

6Mɛ̄ɛ̍ pāa̍le̍ nda̍ lōōnūŋ a̍ vīōlɔ᷄ŋ Hɛ̍lɔ̄ɔ̄ wo̍ le̍ŋ lē fūūlu̍u̍, mi̍ chu̍a̍ Hɛ̄lo̍o̍dīāā wo̍ fūlā mbo̍ yā Hɛ̍lɔ̄ɔ̄ o̍ hɔ̄l a̍ mīālāa̍ wa̍ ā chūūŋgi̍āŋ o̍ bɔ̄ŋa᷅ŋ kōŋ ni᷄ŋ nda̍. Ndu̍yɛ̍, mi̍ Hɛ̍lɔ̄ɔ̄ hi̍nī kɔ̄l a̍ mɛ̄ɛ̍ o̍ ye᷅ yɛ̍. 7Le̍ he̍ī, mbo̍ chūēl ndu̍ būŋgɛ̄i̍ ī kālā ka̍lā. Mbo̍ dīmūl ndu̍ āā, “Nyu̍na̍ ya̍ le̍ nyɛ̄ o̍ nyɛ̄ ŋ̄ yēēma̍, I̍ nɔ̍lā mī ke̍ nu̍m.”

8Chūāāmbɔ̄ɔ̍ bɛ̍ɛ̍ mɛ̄ɛ̍ kāla̍ ndɔ̄ di̍mu̍l ndu̍ yɛ̍, le̍nde̍ o̍ to̍sa̍ ni̍. Mbo̍ dīmūl Māsāa̍ Hɛ̍lɔ̄ɔ̄ āā, “Ke̍ ya̍ bōlle̍ Chɔ᷄ŋ Wānā Yi̍ŋāa̍ le̍ŋ su̍ŋ su̍ŋ o̍ wo̍lɛ̄i̍yo̍ ni᷄ŋ.”

9Mɛ̄ɛ̍ chūāāmbɔ̄ɔ̍ dīmi̍ le̍nde̍, mi̍ mɔ̍nɛ̍i̍ bīī Hɛ̍lɔ̄ɔ̄. Kɛ̍ ndu̍yɛ̍, ndu̍ o̍o̍ chi̍i̍ ni᷅ŋ chūāāmbɔ̄ɔ̍ būŋgɛ̄i̍ chūēl mīālāā ndūa̍a̍ kpo̍u̍ o̍ hɔ̄l. O̍ ko̍ŋ, mi̍ Hɛ̍lɔ̄ɔ̄ di̍mūl So̍vɛ̄i̍ya̍ māā ā kɔ̍ ke᷅ chūāāmbɔ̄ɔ̍ nyɛ̄ o̍ nyu̍na̍ le̍ ndu̍ wo̍. 10Mbo̍ tōsā ma̍ kūā o̍ chīɛ̄ī mānyūmndo̍ ni᷄ŋ. 11Ma̍ hūŋ a̍ bōllē Chɔ᷄ŋnde̍ŋ o̍ wo̍lɛ̄i̍yo̍ ni᷄ŋ ma̍ kē chūāāmbɔ̄ɔ̍. Mbo̍ yōū kāla̍ ndɔ̄. 12O̍ ko̍ŋ kɔ̍ɔ̍lī, mi̍ bu̍ɛ̍i̍yāa̍ Chɔ᷄ŋ nda̍ kūā ma̍ kɔ̍ chu̍ā dīāllu᷄ŋ ndɔ᷄ŋ ma̍ kɔ̍ chɔ̍. Mɛ̄ɛ̍ nda̍ chīi̍ ndu̍ chɔ̄, ma̍ kɔ̍ di̍mūl Chi̍i̍sū a̍ nyɛ̍ yɔ̍nu̍ŋ ndo̍ o̍kɔ̄ɔ̄.

Chi̍i̍sū ke̍ fāŋgā bɛ̍ndōo̍ nyɛ̄ dīa̍a̍

(Ma̍kī 6:30-44; Lu̍kū 9:10-17; Chɔ᷄ŋ 6:1-14)

13Mɛ̄ɛ̍ Chi̍i̍sū tu̍e̍ī māā ā dīī Chɔ᷄ŋ Wānā Yi̍ŋāa̍, mbo̍ māl mbo̍ lūɛ̄ī o̍ dɛ̄ndɔ̄ɔ̍ ni᷄ŋ. Mbo̍ kūānu᷄ŋ na̍a̍ do̍ŋ do̍ŋnda̍ ndu̍ pīlɛ̍. Kɛ̍ ndu̍yɛ̍, mi̍ wāŋnda̍ tūɛ̄ī a̍ ndu̍ o̍kɔ̄ɔ̄. Tūēīyɔ̄ɔ̍ a̍ ndu̍ o̍kɔ̄ɔ̄, ma̍ fūlā o̍ chi̍o̍o̍ŋ ma̍ kēī a̍ nɛ̄i̍ ŋ̄pēlōo̍ ma̍ kūā ndu̍ kɔ̄ɔ̄lī. 14O̍ ko̍ŋ kɔ̍ɔ̍lī, mi̍ Chi̍i̍sū fu̍lā o̍ dɛ̄ndɔ̄ɔ̍ ni᷄ŋ mbo̍ hēl o̍ kɔ̄ŋgɔ̍. Mɛ̄ɛ̍ o̍ che᷅ wāŋnda̍ fāŋgā bɛ̍ndōo̍, mi̍ nyīɛ̍ɛ̍ye̍ bīī ndu̍ le̍ nda̍. Mbo̍ sīŋgī wānāā lānāā nda̍ hīŋ nda̍.

15O̍ ko̍ŋ kɔ̍ɔ̍lī, mɛ̄ɛ̍ nyūmnda̍ŋ mā kāndu̍ tōlɔ̄ɔ̍, mi̍ bu̍ɛ̍i̍yāā ndūa̍a̍ hūŋ nāa̍ ndu̍ chu̍a̍. Ma̍ dīmūl ndu̍ āā, “Māsānɔ̄ɔ̍, te̍le̍ŋndo̍ chō ni᷅ŋ ō kūāna᷄ŋ la̍nda̍ŋ. Ndu̍yɛ̍, ā chē mɛ̄ɛ̍ na̍a̍ ŋ̄ chō yōndōo̍ ni᷄ŋ na̍nu᷄ŋ yɛ̍. Le̍la̍ŋ, di̍mu̍l wa᷅ŋnda̍ ā kɔ̍ mā kɔ̍ nu̍u̍vīāā nyɛ̄ dīa̍a̍ o̍ sɔ̄ndɔ̄kɔ̍lta̍ŋ mā pēndū.”

16Mi̍ Chi̍i̍sū lo᷅ lo̍ŋ mbo̍ dīmūl nda̍ āā, “Ā ku̍ā īnɛ̍ le̍. Lā ke̍ nda̍ nyɛ̄ dīa̍a̍ ā di̍o̍.”

17Mi̍ bu̍ɛ̍i̍yāā ndūa̍a̍ dīmūl ndu̍ āā, “Bēe̍dīi̍yo̍ kpūŋgba᷄ŋ ŋ̄ ŋūɛ̍ɛ̍nu̍ a̍ sūūwa̍ ā ŋīɔ̍ɔ̍ŋ ko̍ni̍ na̍a̍ ŋ̄ nɔ̄ ni̍.”

18Mi̍ Chi̍i̍sū di̍mūl nda̍ āā, “Lā hu᷄ŋ a̍ ndu̍ nāa̍ ya̍ chu̍a̍.” 19O̍ ko̍ŋ kɔ̍ɔ̍lī, mbo̍ dīmūl wāŋnda̍ āā, “Lā cha᷄l o̍ bīllo̍ chōo̍.” Mi̍ Chi̍i̍sū bi̍ī bēe̍dīi̍ kpūŋgbāŋ ŋu̍ɛ̍ɛ̍no̍o̍ a̍ sūūwāā ŋīɔ̍ɔ̍ŋnda̍. Mbo̍ tōfā chōo̍ cho̍o̍ mbo̍ mēl Mɛ̄lɛ̄ka̍ ba̍li̍ka̍. Mbo̍ yīmī yīmī ndu̍ būŋga᷄ŋ. Mbo̍ kē bu̍ɛ̍i̍yāā ndūa̍a̍ le̍ mā pīɔ̍u̍ wāŋnda̍. Mi̍ bu̍ɛ̍īyāā ndūa̍a̍ pīɔ̄ū wāŋnda̍. 20Nda̍ kpo̍u̍ ma̍ di̍ā. Ma̍ pūm. Ma̍ dēmā. Mi̍ bu̍ɛ̍īya̍ chɔ̄ɔ̄vīāā ō bīŋgī bi̍ŋgī nda̍ dēma̍ wo̍, ma̍ dūāū o̍ kāmbɛ̍i̍la̍ŋ ni᷄ŋ. Mbo̍ pīā kāmbɛ̍i̍la̍ŋ tɔ̍ a̍ lā tīɔ̍ɔ̍ŋ. 21Wāŋ lāāndūa̍a̍ a̍ chūāāmbūa̍a̍ ā cho̍ le̍cho̍o̍ le̍. Kɛ̍, pūa̍a̍ su̍e̍e̍ a̍ de᷅ nyɛ̄ dīa̍a̍ ho̍ō wa̍, ā wa̍ wāa̍la̍ŋ lā ŋūɛ̍ɛ̍nu̍.

Chi̍i̍sū ku̍ɛ̄ o̍ mɛ̄ŋnda̍ŋ chōo̍

(Ma̍kī 6:45-52; Chɔ᷄ŋ 6:15-21)

22O̍ ko̍ŋ kɔ̍ɔ̍lī, mi̍ Chi̍i̍sū di̍mūl bu̍ɛ̍i̍yāā ndūa̍a̍ le̍ mā lūɛ̄ī o̍ dɛ̄ndɔ̄ɔ̍ ni᷄ŋ mā ta᷄ŋ pɔ̄ɔ̄ o̍ mɛ̄ŋmā ībūŋga᷄ŋ lēe̍lōo̍. Mi̍ ndu̍ pi̍la̍ lo᷅ a̍ mākɔ̄ɔ̄ le̍ fāŋgāa̍ pīɔ̄lɔ̄ɔ̍. 23Mɛ̄ɛ̍ o̍ chi̍i̍ fāŋgāa̍ pīɔ̄lɔ̄ɔ̄, mbo̍ hēl o̍ pēmbēi̍ chōo̍ ndu̍ pīlɛ̍ le̍ Mɛ̄lɛ̄ka̍ pīɛ̄īyo̍. Ō lo̍ lo̍ŋ mi̍ nyūmnda̍ŋ mā tūāl. 24A̍ bōōndi̍i̍ ke̍ŋ dɛ̄ndɔ̄ɔ̍ ndu̍ o̍o̍ wa̍ ni᷅ŋ kɔ᷄ŋnda̍ŋ la̍nda̍ŋ o̍ mɛ̄ŋnda̍ŋ chōo̍. Ndu̍yɛ̍, hūēīye̍ wa̍ hūnɔ̄ɔ̍ a̍ hɔ̄ŋndo̍ nda̍ lāchī kpe̍e̍kpe̍i̍, mi̍ mɛ̄ŋnda̍ŋ mā wā dɛ̄ndɔ̄ɔ̍ hīīlūūwo̍ yo̍kpa᷄ŋ yo̍kpa᷄ŋ bɛ̍ndū.

25A̍ te̍le̍ŋ pāa̍le̍ si̍a̍āle̍ŋ, mi̍ Chi̍i̍sū tu̍āl bu̍ɛ̍i̍yāā ndūa̍a̍ kɔ̄ɔ̄lī o̍ mɛ̄ŋnda̍ŋ chōo̍. 26Mɛ̄ɛ̍ nda̍ chē ndu̍ hūnɔ̄ɔ̍ o̍ mɛ̄ŋnda̍ŋ chōo̍, mi̍ sīōōŋnde̍ bīī nda̍. Ma̍ mɛ̄lī ye̍e̍la̍ŋ. Ma̍ dīmī āā, “Nyi̍nāā ni̍.”

27Mi̍ Chi̍i̍sū su̍a̍ā nāa̍ nda̍ chūā o̍ lē pīlɛ̍ ni᷄ŋ kpe̍. Mbo̍ dīmūl nda̍ āā, “Lā yɔ᷅ŋ īsīōōŋ te̍. Ya̍ ni̍.”

28Mi̍ Pītɛ̍ lo᷅ lo̍ŋ mbo̍ di̍mūl ndu̍ āā, “Māsānɔ̄ɔ̍, tē nūm lēkɛ̍ndɛ̍ī ni̍, mɛ̄ɛ̍ ve̍e̍lu̍ ya̍ mī hi᷅ŋ nāa̍ nūm chu̍a̍ o̍ mɛ̄ŋnda̍ŋ chōo̍.”

29Mi̍ Chi̍i̍sū di̍mūl ndu̍ āā, “Mɛ̄ɛ̍ hu̍ŋ.” Mi̍ Pītɛ̍ fu̍lā o̍ dɛ̄ndɔ̄ɔ̍ ni᷄ŋ mbo̍ kāndū kɔ̄la̍ŋ nāa̍ Chi̍i̍sū chu̍a̍ o̍ mɛ̄ŋnda̍ŋ chōo̍. 30Kɛ̍, mɛ̄ɛ̍ Pītɛ̍ che᷅ mi̍ hūēīye̍ wā hɔ̄ŋ bɛ̄ndōo̍, mi̍ sīōōŋnde̍ bīī ndu̍. O̍ ko̍ŋ, mbo̍ kāndū bɛ̍ɛ̍ mɔ̍ɔ̍wāa̍ o̍ mɛ̄ŋnda̍ŋ bɛ̄ŋgu̍. Mbo̍ māl yi̍o̍o̍ lē pīlɛ̍ kpe̍ āā, “Māsānɔ̄ɔ̍, pi̍ŋi̍ ya̍ fɔ̍.”

31Mi̍ Chi̍i̍sū si̍ɛ̍ndī bāa̍ lē pīlɛ̍ kpe̍ mbo̍ sāā ndu̍. Mbo̍ dīmūl ndu̍ āā, “Pītɛ̍ a̍ nɔ̍ la̍a̍la᷄ŋ bɔ̍ɔ̍ le̍ ma᷅. Vɛ᷅ a̍ hi̍u̍ la̍chi̍ a̍ lāāla᷄ŋndo̍ le̍?”

32Mi̍ Pītɛ̍ lu̍ɛ̍ī ni᷅ŋ o̍ dɛ̄ndɔ̄ɔ̍ ni᷄ŋ nda̍ Chi̍i̍sū. O̍ ko̍ŋ kɔ̍ɔ̍lī, mi̍ hūēīye̍ pɛ̄ŋgī hɔ̄ŋndo̍. 33Mi̍ bu̍ɛ̍i̍yāa̍ wa̍ o̍ dɛ̄ndɔ̄ɔ̍ ni᷄ŋ nda̍ ā bāŋ wūla̍ŋ Chi̍i̍sū o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. Ma̍ dīmūl ndu̍ āā, “A̍ tōnya̍, Po̍ Mɛ̄lɛ̄ka̍a̍ kpe̍e̍kpe̍i̍ ŋ̄ chō ni̍.”

Chi̍i̍sū si̍ŋgi̍ wānāā lānāāwa̍ Kɛ̄nɛ̍sa̍lūɛ̄ī

(Ma̍kī 6:53-56)

34Ma̍ tāŋ mɛ̄ŋmā ībūŋga᷄ŋ. Ma̍ hūŋ o̍ kɔ̄ŋgɔ̍ lɛ̄ŋndē Kɛ̄nɛ̍sa̍lūɛ̄īle̍ŋ. 35Ndu̍yɛ̍, mi̍ wāŋnda̍ o̍ fo̍ndāŋ kōŋ ā sīnā māā Chi̍i̍sū ni̍. Sīnāa̍ māā ndu̍ ni̍, ma̍ yōōŋga᷅ŋ o̍ tāndā kōŋ ni᷄ŋ māā Chi̍i̍sū hi᷅ŋ. Ma̍ hūŋ a̍ wānāā lānāāwa̍ lo̍ŋ kpo̍u̍ nāa̍ ndu̍ chu̍a̍. 36Ndu̍yɛ̍, mi̍ wānāā lānāāwa̍ nyɔ̄ɔ̄lū Chi̍i̍sū le̍ mā pīla̍ŋ bɛ̍ɛ̍ do᷅ma̍ ndɔ̄ɔ̍ bɔ̄ɔ̄le̍ŋ. Wānāa̍ pi̍la̍ŋ do᷅ma̍ ndɔ̄ɔ̍ bɔ̄ɔ̄le̍ŋ nda̍, ma̍ sīāŋgū kpo̍u̍.

Currently Selected:

Māa̍ti̍u̍ 14: YM

Highlight

Copy