Māa̍ti̍u̍ 13

Tālo̍o̍ a̍ yɛ̄īyi̍i̍ nda̍ sa᷄ŋ nde̍ o̍kɔ̄ɔ̄

(Ma̍kī 4:1-9; Lu̍kū 8:4-8)

1O̍ ko̍ŋ kɔ̍ɔ̍lī, mi̍ Chi̍i̍sū fa̍ŋa᷄ŋ pa̍a̍le̍ le̍ŋ o̍ chīɛ̄ī o̍ wa̍ wo̍ mbo̍ kūā o̍ mɛ̄ŋmā ībūŋga᷄ŋ īkɛ̄i̍. Mbo̍ chāl wāŋnda̍ pɛ̄ɛ̄kōo̍. 2Wāŋnda̍ wa̍ ndu̍ ā bālāā fāŋgā bɛ̍ndōo̍. Le̍ he̍ī, mbo̍ lūɛ̄ī o̍ dɛ̄ndɔ̄ɔ̍ ni᷄ŋ mbo̍ chāl lēni᷄ŋ o̍ mɛ̄ŋnda̍ŋ chōo̍. Mi̍ fāŋgāa̍ sīm o̍ kɔ̄ŋgɔ̍. 3O̍ ko̍ŋ, mi̍ Chi̍i̍sū pɛ̍ɛ̍kū nda̍ sɔ̄ɔ̍ŋ bɔ̍ɔ̍ bɔ̍ɔ̍ o̍ tāle̍la̍ŋ ni᷄ŋ.

Mbo̍ dīmī āā, “Pōo̍ chɛ̍ŋ ni̍ mbo̍ kūā wāa̍ o̍ chīɛ̄ī ndūɛ̍i̍ ni̍ŋ. Mɛ̄ɛ̍ o̍ sa̍ŋ yɛ̄i̍ye̍, mi̍ ī pūm ī dēl o̍ nɛ̄ī kɔ᷅llo̍. Mi̍ ī pūm ī dēl o̍ lɛ̄ŋndē ba̍ndi̍la̍le̍ŋ chōo̍, nāa̍ lɛ̄ŋndē bɔ̄ɔ̍ le̍ cho̍ le̍ wa̍. Mi̍ ī pūm ī dēl o̍ lɛ̄ŋndē ŋ̄yɔ̄le̍ŋ. Mi̍ ī pūm ī dēl o̍ lɛ̄ŋndē kɛ̄ndɛ̄le̍ŋ chōo̍. 4O̍ ko̍ŋ kɔ̍ɔ̍lī, mi̍ yōūwa̍ hu᷄ŋ chɔ̍ɔ̍vīāā yɛ̄īyi̍i̍ de̍l o̍ nɛ̄ī kɔ᷅llo̍ ve̍. 5Yɛ̄īyi̍i̍ de̍l o̍ lɛ̄ŋndē ba̍ndi̍la̍le̍ŋ chōo̍ ve̍, mi̍ ī kēlēŋā wūlɔ̄ɔ̄. Kāni̍ fo̍ndōle̍, lɛ̄ŋnde̍ŋ lē ve̍ le̍ bɔ̍ɔ̍ lo̍ŋ te̍. 6Kɛ̍, mɛ̄ɛ̍ pāa̍le̍ŋ lē fūla̍ mi̍ lē lūāā ndi̍, mi̍ ī nyāmālā, mi̍ ī vēsa᷄ŋ, kāni̍, pūūndo̍ŋ ŋ̄ ku̍ē lɛ᷅ŋ la̍nda̍ŋ te̍. 7I̍ de̍l o̍ lɛ̄ŋndē ŋ̄yɔ̄le̍ŋ nde̍, ndi̍ ndi̍ mi̍ ī wūl hɔ̄lāā tūlu̍ a̍ yɔ̄ɔ̍ŋ. Mi̍ yɔ̄ɔ̍ŋ sɔ̄ɔ̄ŋgūū mi̍ ŋ̄ kāyā kāya᷄ŋ ndi̍ mi̍ ŋ̄ dīī ndi̍. 8Mi̍ i̍ de̍l o̍ lɛ̄ŋndē kɛ̄ndɛ̄le̍ŋ chōo̍ ve̍ ī nāŋ ta̍u̍ ta̍u̍. Mi̍ ī pūm ī kūām yāsāla̍ŋ kɛ̄mɛ̄, ī pūm be̍le̍-ŋɔ̍mpu᷅m, ī pūm yāsāla̍ŋ be̍le̍-ya̍a̍.”

9Mi̍ Chi̍i̍sū di̍mī o̍ mɛ̄ɛ̄lu̍la̍ŋ āā, “Nūm o̍ nu᷄m nɔ̍ nīlē tūɛ̄īyāā īsɔ̄ɔ̍ pɛ̍, mɛ̄ɛ̍ ya̍ŋ ni᷅la̍ŋ, mā tūēī, mā sīna̍ pɛ̄ŋgu̍.”

Le̍ sa̍bū Chi̍i̍sū ndu̍ o̍o̍ su̍a̍ā o̍ tāle̍la̍ŋ ni᷄ŋ ndo̍

(Ma̍kī 4:10-12; Lu̍kū 8:9, 10)

10Mi̍ Chi̍i̍sū bu̍ɛ̍i̍yāā ndūa̍a̍ hūŋ nāa̍ ndu̍ chu̍a̍. Ma̍ nyūnā ndu̍ āā, “Le̍ yɛ̄ɛ̍nɛ̍ ŋ̄ wā yɛ̍ wāŋnda̍ sūɛ̍i̍ Mɛ̄lɛ̄kɛ̍i̍ pɛ̄ɛ̄kōo̍ mɛ̄ɛ̍ mā sōō o̍ tāle̍la̍ŋ ni᷄ŋ a̍ di̍mī ndi̍ de᷅ŋ te̍?”

11Mi̍ Chi̍i̍sū mu̍lūl nda̍ āā, “Nya̍ Mɛ̄lɛ̄ka̍ chɛ᷄l le̍ mī lā sīna̍ nyɛ᷄m wa̍ ŋ̄ vīāŋna᷄ŋ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄ wo̍ŋ ni̍. Kɛ̍, wāŋnda̍ ā tūa̍a̍ nda̍ nda̍, Mɛ̄lɛ̄ka̍ chɛ᷄l mā sīna̍ mu̍ŋ te̍. 12Kāni̍, wānā o̍ wāna̍ nɔ̍ o̍ bā, wānā ko̍ŋ ndu̍ Mɛ̄lɛ̄ka̍ chō chɔ̄ɔ̄lū kē ni̍, mbō sɔ̄la̍ ta̍u̍ ta̍u̍. Kɛ̍, wāna̍ nɔ̍ o̍ bā le̍ wo̍ ō pɔ̄mbɔ̄ o̍ nɔ̍ o̍ bā wo̍ bɛ̍ɛ̍, Mɛ̄lɛ̄ka̍ chō ndu̍ pōōndā o̍ bā. 13Le̍ sa̍bū ya̍ I̍ cho̍ nda̍ pɛ̄ɛ̄kōo̍ o̍ tāle̍la̍ŋ ni᷄ŋ ndo̍ cho̍ ni̍ māā wāŋnda̍ mā nu̍a̍, kɛ̍ ā chi᷅ le̍. Ndu̍yɛ̍ mā ya᷄ŋ nīla̍ŋ, kɛ̍ ā tu̍i̍ī le̍, ndu̍yɛ̍ ā si̍nā pɛ̍ŋgu̍ le̍. 14O̍ he̍ī ni᷄ŋ, ā tōsa̍ mi̍ nyɛ̄ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ di̍mi̍ sīndɛ̄ wo̍ ō yɔ̄nu᷄ŋ. Mbo̍ dīmī māā Mɛ̄lɛ̄ka̍ dīmi̍ āā,

‘Wāŋnda̍ ha̍ā ā yāŋ ni̍ŋ ni᷅la̍ŋ, mā ya᷄ŋ, kɛ̍ ā sɔ̍lā si̍nā pɛ̄ŋgu̍ le̍.

Ā nūā ni̍ŋ, mā nu̍a̍, kɛ̍ ā sɔ̍lā si̍nā pɛ̄ŋgu̍ a̍ nyɛ̄ nda̍ chō chɔ̄ɔ̍ wo̍ le̍.

Wāŋnda̍ mā nu̍a̍, kɛ̍ ā chi᷅ le̍. Ndu̍yɛ̍, mā ya᷄ŋ nīla̍ŋ, kɛ̍ ā tu̍i̍ī le̍, ndu̍yɛ̍, ā si̍nā pɛ̍ŋgu̍ le̍.

15Sa̍bū ko᷄ŋ cho̍ ni̍ māā ā nɔ̍ yi̍ya᷄ŋ te̍. Ā wōūnu̍ŋ so̍o̍ŋ o̍ lānī,

ndu̍yɛ̍, ma̍ kīndā hɔ̄lta̍ŋ.

Tē nda̍ a̍a̍ to̍sa̍ le̍nde̍ le̍, ā wa̍ chɔ̄ a̍ hɔ̄ltā ndāla̍ŋ,

mī nda̍ a̍a̍ tu̍e̍ī a̍ nīlā ndāla̍ŋ.

Ndu̍yɛ̍, hūlmā nda᷄ŋ mā wa̍ sīnā pɛ̄ŋgo̍o̍ sɔ̄lā.

O̍ ko̍ŋ, ā wa̍ mūli᷄ŋ nāa̍ ya̍ chu̍a̍

mi̍ ya̍ i̍i̍ si̍ŋgi̍ nda̍.’

16“Kɛ̍ ndu̍yɛ̍, nya̍ nya̍, lā pɛ̄l tɔ̄nɔ̄ɔ̍. Kāni̍ fu̍u̍le̍, hɔ̄ltā nyāla̍ŋ lā chā. Ndu̍yɛ̍, nīlā nyāla̍ŋ lā tūɛ̄ī su̍ɛ̍i̍. 17Mī di̍mu̍l nya̍, wānāa̍ su̍a̍ā le̍ Mɛ̄lɛ̄ka̍ wa̍ ā ka̍ ka̍ a̍ wānāa̍ Mɛ̄lɛ̄ka̍a̍ ā fāŋgā fa̍ŋgā, nda̍ a̍a̍ nɔ̍ yēēmɛ̍i̍ le̍ sɔ̄ɔ̍ŋ nya̍ chē mu᷅ŋ ndo̍ŋ chɔ̄ɔ̍. Kɛ̍ ā chi̍ mu̍ŋ te̍. Nda̍ a̍a̍ nɔ̍ yēēmɛ̍i̍ le̍ mī nda̍ a̍a̍ tu̍e̍ī sɔ̄ɔ̍ŋ nya̍ tūēī mu᷅ŋ ndo̍ŋ. Kɛ̍ ā tūi̍i̍ mu̍ŋ te̍.”

Chi̍i̍sū tɛ̍ɛ̍si̍a̍a̍ tālo̍o̍ a̍ yɛ̄īyi̍i̍ nda̍ sa᷄ŋ nde̍ o̍kɔ̄ɔ̄

(Ma̍kī 4:13-20; Lu̍kū 8:11-15)

18Mi̍ Chi̍i̍sū di̍mūl nda̍ āā, “Lā ya᷄ŋ ni᷅la̍ŋ mī lā tūēī tālo̍o̍ tɛ̄ɛ̄sīa̍a̍ a̍ yɛ̄īyi̍i̍ nda̍ sa᷄ŋ nde̍ o̍kɔ̄ɔ̄. 19Yɛ̄īyi̍i̍ de̍l o̍ nɛ̄ī ye̍ i̍ chō māchūāā wāŋnda̍ ā pūm. Mā tūēī yōōŋgōo̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄. Kɛ̍, ā si̍nā ndu̍ pɛ̄ŋgu̍ le̍. Tē ā tūēī pɛ̍ di̍o̍m Mɛ̄lɛ̄ka̍a̍, Māsa̍ Nyi̍nāā Wɔ̄ɔ̍ŋnda̍ hu᷄ŋ po̍o̍ndā ndu̍ nda̍ o̍ lākɔ̄l. 20Yɛ̄īyi̍i̍ de̍l o̍ lɛ̄ŋndē ba̍ndi̍la̍le̍ŋ chōo̍ ve̍ ī chō māchūāā māā wāŋnda̍ ā pūm. Tē ā tūēī dɔ̍ɔ̍ pɛ̍ di̍o̍m Mɛ̄lɛ̄ka̍a̍, ā chɛ᷄l ndu̍ a̍ kɔ̄l kɛ̄ndɛ̄. 21Kɛ̍, mɛ̄ɛ̍ pūūndu᷅ŋ tɔ̄lɔ̄ɔ̍ ŋ̄ nɔ̍lā lu̍ɛ̍i̍yɔ̄ɔ̍ la̍nda̍ŋ o̍ lɛ̄ŋndē ba̍ndi̍la̍le̍ŋ te̍ yɛ̍, le̍nde̍ ko̍ni̍ wāŋnda̍ ha̍ā chō ni̍. Dīo̍m Mɛ̄lɛ̄ka̍a̍ ō lu̍e̍ī di̍ nda̍ o̍ lākɔ̄l te̍. Mī wāŋnda̍ ha̍ā ā lāāla̍ŋ le̍ te̍le̍ŋ bi̍ŋgī. Kɛ̍, tē nyɛ̄ kīndīlāa̍ hīŋ nda̍ chōo̍ pɛ̍, kɛ̄lɛ̄ŋgāā mī wāŋnda̍ tūsi̍ nda̍ nyɛ̄ pālāa̍ chōo̍ le̍ mɛ̄ɛ̍ nda̍ chɛ᷄l dīo̍m Mɛ̄lɛ̄ka̍a̍ yɛ̍ pɛ̍, ā ma᷄l bɛ̍ɛ̍ di̍ōm kālāa̍. 22Yɛ̄īyi̍i̍ de̍l o̍ lɛ̄ŋndē ŋ̄yɔ̄le̍ŋ nde̍ ī chō māchūāā māā wāŋnda̍ ā pūm a̍ tu̍ɛ̍ī dīo̍m Mɛ̄lɛ̄ka̍a̍ wa̍, kɛ̍ ndu̍yɛ̍, ā vīōū pɛ̍ kpɛ̍ɛ̍ būūla᷄ŋ nyɛ̄m chi̍e̍ēŋndo̍ŋ a̍ yēēmɛ̍i̍ sūllo̍ ŋ̄ lūɛ̄ī nda̍ o̍ lākɔ̄l. O̍ ko̍ŋ, mī ŋ̄ kāya̍ ka̍ya̍ŋ di̍o̍m Mɛ̄lɛ̄ka̍ nda̍ tūēī yo̍, mɛ̄ɛ̍ yɔ̄ɔ̍ŋ ŋ̄ kāyā kāya᷄ŋ tɔ̍lɔ̄ɔ̍ yɛ̍. O̍ ko̍ŋ, mī dīōm kālāa̍ fōōfi̍ nda̍ ni᷄ŋ, mɛ̄ɛ̍ tɔ̄lɔ̄ɔ̍ fōōfi̍ nu̍a̍ā yɛ̍. 23Yɛ̄īyi̍i̍ de̍l o̍ lɛ̄ŋndē kɛ̄ndɛ̄le̍ŋ chōo̍ ve̍ ī chō māchūāā māā wāŋnda̍ ā pūm a̍ tu̍ɛ̍ī yōōŋgū kɛ̄ndɔ̄ɔ̍ wa̍. Ā tūēī ndu̍ pɛ̍, ā sīna̍ ndu̍ pɛ̄ŋgu̍. O̍ ko̍ŋ, ā chɔ᷄m tɔ̄nɔ̄ɔ̍ mɛ̄ɛ̍ yɛ̄i̍ye̍ o̍ lɛ̄ŋndē kɛ̄ndɛ̄le̍ŋ chōo̍ i̍ yɔ̍ŋgū kɔ̄mnde̍ŋ yɛ̍. Ō pūm mbō yɔ̄ŋgu̍ kɔ̄mnde̍ŋ kɛ̄mɛ̄. Ō pūm yɛ̍ mbō yɔ̄ŋgu̍ be̍le̍-ŋɔ̍mpu᷅m, ō pūm be̍le̍-ya̍a̍.”

Chi̍i̍sū di̍mi̍ tālo̍o̍ a̍ bi᷄l vi᷅l o̍ yɛ̄īyi̍i̍ kɛ̍ndɛ̄i̍ ni᷄ŋ ndo̍ o̍kɔ̄ɔ̄

24Mi̍ Chi̍i̍sū di̍mūl wāŋnda̍ tāle̍ chēle̍ŋ a̍ Māsāle̍ Mɛ̄lɛ̄ka̍le̍ŋ o̍kɔ̄ɔ̄ āā, “Māsāle̍ Mɛ̄lɛ̄ka̍le̍ŋ lē chō māchūāā mɛ̄ɛ̍ i̍ yɔ̍nu̍ŋ o̍ tālo̍o̍ ho̍ō ni᷄ŋ yɛ̍. Po̍ pi᷅lɛ̍ chɛ̍ŋ ni̍ mbo̍ sāŋ yɛ̄i̍yi̍i̍ kɛ̍ndɛ̄i̍ o̍ chīɛ̄ī ndūɛ̍i̍ ni᷄ŋ. 25Nyūmmā pīlɛ̍ mɛ̄ɛ̍ wāŋnda̍ lɔ᷄l kpe̍de̍, mi̍ ya̍a̍mɔ̍ɔ̍ ndɔ̄ɔ̍ cha᷄ŋ mbo̍ kɔ̍ sa᷅ŋ ku̍lu̍la̍ bīl wɔ̄ɔ̍ŋ pūm lēni᷄ŋ. Mbo̍ kūānu᷄ŋ. 26O̍ ko̍ŋ kɔ̍ɔ̍lī, mi̍ yɛ̄īyi̍i̍ kɛ̍ndɛ̄i̍ he̍ī ī mɔ̄sɔ̄ŋā wūlɔ̄ɔ̄ a̍ bīl ko̍ŋ. Mi̍ ī hīndū. Mɛ̄ɛ̍ i̍ chu̍u̍lu̍, ma̍ sīnā māā bīl wɔ̄ɔ̍ŋndo̍ vīl lātūlu̍ a̍ yɛ̄i̍ye̍ he̍ī. 27Mi̍ wāna̍ īchīɔ̍ɔ̍ bu̍ɛ̍i̍yāā ndūa̍a̍ nyūnā ndu̍ āā, ‘Fāllo̍, a̍ sa̍ŋ yɛ̄īyi̍i̍ kɛ̍ndɛ̄i̍ o̍ chīɛ̄ī nūmnde̍ ni᷄ŋ, kɛ̍, vɛ̄ɛ̄ bi᷅llo̍ ho̍ō lōōku̍ yɛ̄ lūɛ̄īyɔ̄ɔ̄ lēni᷄ŋ?’ 28Mi̍ wāna̍ īchīɔ̍ɔ̍ dīmūl nda̍ āā, ‘Ya̍a̍mɔ̍ɔ̍ to̍sa̍ wa̍lta̍ŋ nda᷅ŋ ni̍.’ Ma̍ lō o̍ ko̍ŋ ma̍ nyūnā ndu̍ āā vɛ̄ɛ̄, ‘Ŋ̄ kɔ̍ su̍i̍ŋgī bīl kōŋ lēni᷄ŋ?’ 29Mbo̍ dīmūl nda̍ āā, ‘Ɛ̄ ɛ̍, lā su̍i̍ŋgī ndu̍ te̍le̍ŋndo̍ ho̍ō le̍, yɔ̄ŋi̍ nya̍ mɔ̄sɔ̍ŋa̍ yɛ̍i̍yi̍i̍ kɛ̍ndɛ̄i̍ ī ti᷄ŋ sūŋgī a̍ bīllo̍. 30Lā ma᷄l ndi̍ ī hīndu̍ la̍tu̍lu̍ a̍ bīl kōŋ, mbō lo̍ o̍ ko̍ŋ mī ī fūūlu̍u̍ te̍le̍ŋ ku̍a̍u̍wāa̍. Tē te̍le̍ŋ ku̍a̍u̍wāa̍ fūūlu̍u̍ pɛ̍, I̍ di̍mu̍l wānāā kūāūwāa̍ ā sūīŋgi̍ fɛ̍lɛ̍ŋ bi᷅l kōŋ. Ā sūīŋgi̍ pɛ̍, ā yīu̍ ndu̍ kpɔ̄ŋnda̍ŋ ā lōm. O̍ ko̍ŋ kɔ̍ɔ̍lī, ā kōū yɛ̄īyi̍i̍ nīi̍ ā dɔ̄ū o̍ ya̍ lo̍ ko̍nda̍.’ ”

Chi̍i̍sū di̍mi̍ tāle̍ chēle̍ŋ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄

(Ma̍kī 4:30-32; Lu̍kū 13:18, 19)

31Mi̍ Chi̍i̍sū di̍mūl nda̍ tāle̍ chēle̍ŋ. Mbo̍ dīmī āā, “Māsāle̍ Mɛ̄lɛ̄ka̍le̍ŋ lē chō māchūāā māā nyɛ̍ yɔ̍nu̍ŋ o̍ tālo̍o̍ ho̍ō ni᷄ŋ ndo̍. Tē wāŋndo̍ chu̍a̍ pɛ̍ ku̍lu̍ tɔ̄lɔ̄ɔ̄ pūm mā vēēlū ndu̍ āā, mɔ̍si̍tāā, ō tɔ̄l ndu̍ o̍ kpe̍le̍ ndɔ̄ɔ̍ ni᷄ŋ. 32Ku̍lu̍ tɔ̄lɔ̄ɔ̍ ho̍ō yɛ̍, ndu̍ hi̍o̍ū mɛ̄sɛ̄lā a̍ ku̍lu̍la̍ŋ kpo̍u̍. Kɛ̍ ndu̍yɛ̍, tē ō vīl pɛ̍, ō hīndū, ō sīmnu᷄ŋ yɔ᷅mndo̍ ō bɛ̄ndōo̍, ō hīōū yɔ̄mnde̍ kpo̍u̍ o̍ fo̍ndāŋ kōŋ. Yōūwa̍ bɛ̍ɛ̍ mā hu᷄ŋ ta̍ŋgūl wāa̍ŋnde̍ o̍ lɛ̄ūwūŋ ndɔ᷄ŋ chōo̍.”

Chi̍i̍sū tu̍u̍ māsāle̍ Mɛ̄lɛ̄ka̍le̍ŋ a̍ yi̍i̍sīi̍ nda̍ lūām bēe̍dīi̍yo̍ wo̍

(Lu̍kū 13:20, 21)

33Mi̍ Chi̍i̍sū di̍mūl nda̍ vɛ̄lɛ̄ tāle̍ chēle̍ŋ āā, “Māsāle̍ Mɛ̄lɛ̄ka̍le̍ŋ lē chō māchūāā māā nyɛ̍ yɔ̍nu̍ŋ o̍ tālo̍o̍ ho̍ō ni᷄ŋ ndo̍. Tē wāŋndo̍ chu̍a̍ pɛ̍ ko᷅lo̍ nda̍ lūām bēe̍dīi̍yo̍ wo̍, mbō dɔ̄ū yi̍i̍sīi̍yo̍ lēni᷄ŋ nyɛ̍ pɔ̄mbɔ̄, mbō bīŋu̍la᷅ŋ a̍ mɛ̄ŋnda̍ŋ, kōlō ko̍ŋ ō wa̍ bɛ̍ɛ̍ ta̍u̍, tē ō cha᷄l dɔ̍ɔ̍ pɛ̍ kpɛ̍ɛ̍, yi̍i̍sīi̍ ko̍ŋ ō tīu̍ lēni᷄ŋ si̍lɔ̍. O̍ ko̍ŋ, kōlo̍ bēe̍dīi̍ li̍ndāā kōŋ kpe̍de̍ o̍ hi̍ndū pɔ̍fūū.”

Le̍ sa̍bū Chi̍i̍sū su̍a̍ā nāa̍ wāŋnda̍ chūā o̍ tāle̍la̍ŋ ni᷄ŋ ndo̍

(Ma̍kī 4:33, 34)

34Sɔ̄ɔ̍ŋ Chi̍i̍sū di̍mu̍l mu᷅ŋ wāŋnda̍ wo̍ŋ kpo̍u̍ o̍ tāle̍la̍ŋ ni᷄ŋ ndu̍ o̍o̍ di̍mī mu̍ŋ ni̍. Ndu̍ o̍o̍ di̍mūl nda̍ īsɔ̄ɔ̍ o̍ īsɔ̄ɔ̍ fo̍ndō le̍ mɛ̄ɛ̍ o̍ tāle̍la̍ŋ ni᷄ŋ. 35Sa̍bū ko᷄ŋ cho̍ ni̍ māā le̍ mī nyɛ̄ wāna̍ su̍a̍ā le̍ Mɛ̄lɛ̄ka̍ wo̍ ō dīmi̍ ho̍ō wo̍ ō yɔ̄nu̍ŋ. Mbo̍ dīmī āā,

“O̍ tāle̍la̍ŋ ni᷄ŋ ya̍ cho̍ wā sūɛ̍i̍ nāa̍ nda̍ chūā ni̍.

Sɔ̄ɔ̍ŋ wānā o̍ wānā si̍na̍ wɔ̍ pa̍a̍ndū a̍ mu̍ŋ o̍kɔ̄ɔ̄ le̍ wo̍ŋ,

chɔ̍ŋ bɛ̍ɛ̍ a̍ chi̍e̍ēŋndo̍ kāndɔ᷄ŋndo̍,

I̍ cho̍ nda̍ mu̍ŋ dīmūl.”

Chi̍i̍sū tɛ̍ɛ̍si̍a̍a̍ tāle̍ bi᷄l vi᷅l o̍ yɛ̄īyi̍i̍ kɛ̍ndɛ̄i̍ ni᷄ŋ ndo̍

36Mi̍ Chi̍i̍sū mɛ̍ī fāŋgā bɛ̍ndōo̍ ho̍ō mbo̍ mīīŋgū o̍ chīɛ̄īyo̍. Mɛ̄ɛ̍ o̍ mi̍i̍ŋgu̍, mi̍ bu̍ɛ̍i̍yāā ndūa̍a̍ hūŋ nāa̍ ndu̍ chu̍a̍. Ma̍ dīmūl ndu̍ āā, “Māsānɔ̄ɔ̍, tɛ̍ɛ̍si̍a̍l na̍a̍ tāle̍ ŋ̄ dīmi̍ a̍ bi᷄l vi᷅l o̍ yɛ̄i̍ye̍ ni᷄ŋ ndo̍ o̍kɔ̄ɔ̄.”

37Mi̍ Chi̍i̍sū lo᷅ lo̍ŋ mbo̍ dīmūl nda̍ āā, “Wāna̍ sa̍ŋ yɛ̄īyi̍i̍ kɛ̍ndɛ̄i̍ yo̍ ndu̍ cho̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ni̍. 38Chi̍e̍ēŋndo̍ ndu̍ cho̍ chīɛ̍i̍ he̍ī ni̍. Yɛ̄īyi̍i̍ kɛ̍ndɛ̄i̍ he̍ī chō māchūāā wānāā Mɛ̄lɛ̄ka̍ chō chōo̍ ma̍sāa̍ wa̍. Ku̍lu̍la̍ bīl kōŋ la̍ŋ la̍ cho̍ wānāā Māsa̍ Nyi̍nāā Wɔ̄ɔ̍ŋnda̍ chō chōo̍ ma̍sāa̍ wa̍ ni̍. 39Ya̍a̍mɔ̍ɔ̍ sa̍ŋ ku̍lu̍la̍ bīllo̍ wo̍, ndu̍ cho̍ māchūāā Māsa̍ Nyi̍nāā Wɔ̄ɔ̍ŋnda̍ ni̍. Te̍le̍ŋ ku̍a̍u̍wāa̍ ndu̍ cho̍ māchūāā te̍le̍ŋ chi̍e̍ēŋndo̍ ho̍ō ō hūŋ ni̍ŋ o̍ mɛ̄ɛ̄lu̍la̍ŋ ndo̍ ni̍. Wānāā kūāūwāa̍ nda̍ cho̍ ki̍i̍la̍a̍ Mɛ̄lɛ̄ka̍a̍ ni̍. 40Bīl wānāā kūāūwāa̍ sūīŋgī ni̍ŋ ma̍ lōm ndo̍, ndu̍ cho̍ māchūāā nyɛ̍ yɔ̍nūŋ ni̍ŋ o̍ chi̍e̍ēŋndo̍ ho̍ō mɛ̄ɛ̄lu̍la̍ŋ ndo̍ ni̍. 41Wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chō hūnɔ̄ɔ̄ ki̍i̍la̍a̍ ndūa̍a̍ vīōmɔ̄ɔ̄ mā sōōlu̍u̍ nyɛ̄ o̍ nyɛ̍ to̍sā mī wāŋnda̍ tōsā yɔ᷅ŋ wɔ̄ɔ̍ŋndo̍. Ndu̍yɛ̍, mī ki̍i̍la̍a̍ ndūa̍a̍ ā sōōlu̍u̍ wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍, wānāa̍ cho̍ le̍ māsāle̍ Mɛ̄lɛ̄ka̍le̍ŋ nda̍ tɛ̄ɛ̄ŋ. 42O̍ ko̍ŋ kɔ̍ɔ̍lī, mā wōu̍ wānāā wɔ̄ɔ̍ŋnda̍ ha̍ā o̍ nyɛ̄ pālāā fɛ̍ɛ̍ŋ fɛ̍ɛ̍ŋndo̍ ni᷄ŋ mɛ̄ɛ̍ nda̍ wōū wa᷅ŋndo̍ nu̍a̍ā o̍ sa᷄l lēyīŋ bɛ̄ndū bɛ̍ndōo̍ ni᷄ŋ yɛ̍. Lo̍ŋ nda̍ wā ni̍ŋ ko̍ŋu̍llo̍ ni̍, mā sūām chīŋndo̍ŋ a̍ nyɛ̄ nɛ̄īyāa̍. 43O̍ ko̍ŋ, wānāa̍ to̍sā nyɛ᷅ Mɛ̄lɛ̄ka̍ hɛ̄na̍ŋ ndo̍ wa̍, nda̍ nda̍ chō wā nāa̍ Mɛ̄lɛ̄ka̍ fi̍nyā ndā cho̍ o̍ māsāle̍ŋ chōo̍ wa̍. Ndu̍yɛ̍, wāŋnda̍ ha̍ā ā wā ni̍ŋ di̍o̍ndɔ̄ɔ̍ ŋɛ̄lɛ̄ŋgi̍ ŋɛ̍lɛ̄ŋgi̍ mɛ̄ɛ̍ pāa̍le̍ŋ lē chō nu̍a̍ā yɛ̍.” Mi̍ Chi̍i̍sū di̍mūl nda̍ āā, “Tē lā nɔ̄ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ, mī lā tūēī, mī lā sīna̍ pɛ̄ŋgu̍.”

Tālo̍o̍ a̍ nyɛ̄m sɔ̄la᷄ŋ wa̍ ŋ̄ tūwāā lɛ̄ŋ ndo̍ŋ

44O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Māsāle̍ Mɛ̄lɛ̄ka̍le̍ŋ lē chō māchūāā māā nyɛ̍ yɔ̍nu̍ŋ o̍ tālo̍o̍ ho̍ō ni᷄ŋ ndo̍. Pōo̍ chɛ̍ŋ ni̍, mbo̍ sāālu᷄ŋ nyɛ᷅m ba̍ā kālā ka̍lāŋ bɛ̄ndo᷄ŋ ŋ̄ tūwāā lɛ̄ŋ yōndōo̍ ni᷄ŋ. Sāālɔ᷄ŋndo̍ mu̍ŋ, mbo̍ mīŋgī kūmbɔ̄ɔ̄ ki̍nɛ̍i̍. Mbo̍ mīīŋgū a̍ kɔ̄l kɛ̄ndɛ̄ kōŋ mbo̍ kɔ̍ pi̍sī nyɛ̄ o̍ nyɛ̄ fe̍e̍ o̍ nɔ̍. Mbo̍ kɔ̍ pi̍o̍ndū lɛ̄ŋndē nyɛ̄m mu᷅ŋ ŋ̄ wa̍ ŋ̄ tūwāā lēni᷄ŋ nde̍ŋ.”

Tālo̍o̍ a̍ pōū ba̍ā kālā ka̍lāa̍ o̍kɔ̄ɔ̄

45O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Māsāle̍ Mɛ̄lɛ̄ka̍le̍ŋ lē chō māchūāā vɛ̄lɛ̄ mɛ̄ɛ̍ i̍ di̍mi̍ŋ o̍ tālo̍o̍ ho̍ō ni᷄ŋ yɛ̍, mɛ̄ɛ̍ wāŋndo̍ ō wā po̍ūtā ba̍ā kālāla̍ŋ nūūvīa̍a̍ le̍ pīōndɔ̄ɔ̍ yɛ̍. 46Tē ō lo̍ nūūvīa̍a̍ pɛ̍ mbō sāālu̍ŋ po̍ū ba̍ā kālā bɛ̄ndōo̍, ō mīīŋgu̍ ō kɔ̍ pi̍sī nyɛ̄m ndɔ᷄ŋ kpo̍u̍, hāli̍ kpe̍ŋ mbō pēndū ndu̍. Ō pīsi̍ pɛ̍, ō kɔ̍ pi̍o̍ndū.”

Tālo̍o̍ a̍ wānāā yɔ̄ɔ̄yāa̍ o̍kɔ̄ɔ̄

47Mbo̍ dīmī vɛ̄lɛ̄ āā, “Māsāle̍ Mɛ̄lɛ̄ka̍le̍ŋ lē chō ko̍ mɛ̄ɛ̍ i̍ yɔ̍nu̍ŋ o̍ tālo̍o̍ ho̍ō ni᷄ŋ yɛ̍. Wānāā yɔ̄ɔ̄yāa̍ wūu̍ pɛ̍ ya̍lāla̍ nda̍la̍ŋ o̍ mɛ̄ŋmā ībūŋga᷄ŋ ni᷄ŋ, sūū o̍ sūū ko̍ ā bīī le̍ni̍ŋ. 48Tē yālāla̍ŋ lā pɛ̍ pɛ̍ cha̍ a̍ sūūwa̍, ā na᷄ŋ o̍ kɔ̄ŋgɔ̍. Ā na᷄ŋ pɛ̍ o̍ kɔ̄ŋgɔ̍, ā cha᷄l ā hɛ̄li̍ nda̍. Sūūwāa̍ na̍ŋ le̍ dīo̍o̍ wa̍ ki̍nɛ̍i̍, ā dɔ̄ū ka̍ŋ o̍ kāmbɛ̍i̍la̍ŋ ni᷄ŋ. A̍ ni̍ŋ le̍ di̍o̍ le̍ wa̍ ki̍nɛ̍i̍, ā vīōū ka̍ŋ. 49Le̍nde̍ i̍ yɔ̍nūŋ ni̍ŋ o̍ chi̍e̍ēŋndo̍ mɛ̄ɛ̄lu̍la̍ŋ ni̍. Ki̍i̍la̍a̍ Mɛ̄lɛ̄ka̍a̍ ā bālū ni̍ŋ mā hɛ̄li̍ wānāā wɔ̄ɔ̍ŋnda̍ mā sōli̍ nda̍ wānāa̍ to̍sā nyɛ᷅ Mɛ̄lɛ̄ka̍ hɛ̄na̍ŋ ndo̍ wa̍ tɛ̄ɛ̄ŋ. 50O̍ ko̍ŋ kɔ̍ɔ̍lī, mā wōu̍ nda̍ o̍ nyɛ̄ pālāā fɛ̍ɛ̍ŋ fɛ̍ɛ̍ŋndo̍ ni᷄ŋ mɛ̄ɛ̍ nda̍ wōū wāŋndo̍ nu̍a̍ā o̍ sa᷄l lēyīŋ bɛ̄ndū bɛ̄ndōo̍ ni᷄ŋ yɛ̍. Lo̍ŋ nda̍ wā ni̍ŋ ko̍ŋu̍llo̍ ni̍ mā sūām chi᷅ŋndo̍ŋ a̍ nyɛ̄ nɛ̄īyāa̍.”

Nyɛ̄m sɛ̄nɛ̄īyo̍ŋ a̍ ŋ̄ pāāndo᷄ŋ

51O̍ ko̍ŋ kɔ̍ɔ̍lī, mi̍ Chi̍i̍sū nyu̍nā nda̍ āā vɛ̄ɛ̄, “Lā sīna̍ pa̍ sɔ̍ɔ̍ŋ ya̍ di̍mi̍ mu᷅ŋ ndo̍ŋ pɛ̄ŋgu̍?”

Ma̍ chɛ̄l āā, “E̍ī.”

52O̍ ko̍ŋ kɔ̍ɔ̍lī, mbo̍ dīmūl ndā āā, “Le̍ sa̍bōo̍ ho̍ō wānā o̍ wāna̍ cho̍ wāna̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ, tē ō wa̍ pɛ̍ mbō sɔ̄la̍ pɛ̄ɛ̄kōo̍ a̍ tōnya̍ cho̍ a̍ māsāle̍ Mɛ̄lɛ̄ka̍le̍ŋ ndo̍ o̍kɔ̄ɔ̄ pɛ̍, mɛ̄ɛ̍ ō chō māchūāā māā wāna̍ wa᷅ ho̍ō yu̍ŋgo̍o̍ bōlle̍ŋ ndo̍. Wāna̍ wa᷅ ho̍ō yu̍ŋgo̍o̍ bōlle̍ŋ ndo̍ ō nɔ̄ wōlɔ̄ɔ̄la̍ŋ. Ō sōli̍ wōlɔ̄ɔ̄la̍ŋ nda᷅ŋ lā pāāndū la̍ŋ pɛ̍, ō mūli̍ŋ ō sōli̍ lā sɛ̄nɛ̄īla̍ŋ, ō sōli̍ŋ kpe̍ku̍ a̍ la̍ŋ ve᷅llāa̍ vēllē.”

Wāŋnda̍ kɛ̄ɛ̍ Chi̍i̍su̍ o̍ ndu̍ lo̍ chi̍e̍e̍

(Ma̍kī 6:1-6; Lu̍kū 4:16-30)

53Mɛ̄ɛ̍ Chi̍i̍sū chi̍i̍ wāŋnda̍ tāle̍la̍ŋ nda᷅ŋ dīmūl, mbo̍ fāŋa᷄ŋ o̍ fo̍ndāŋ kōŋ. 54O̍ ko̍ŋ kɔ̍ɔ̍lī, mbo̍ kūā o̍ ndu̍ lo̍ chi̍e̍e̍. Ndu̍yɛ̍, mbo̍ pɛ̄ɛ̄kū wāŋnda̍ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ. Wānāa̍ tu̍e̍ī pɛ̄ɛ̄kū ndɔ̄ɔ̍ wa̍ mi̍ kɔ̄ndɔ̄fi̍llo̍ bīī nda̍ ta̍u̍ ta̍u̍. Ma̍ wā nyūūni̍āŋndo̍ āā, “Kūɛ̍ɛ̍nɛ̍ o̍ sɔ̍lā yɛ̄ kɔ̄l kālu̍ bɛ̍ndū bɛ̄ndōo̍ ho̍ō? Kūɛ̍ɛ̍nɛ̍ o̍ sɔ̍la̍ yɛ̄ kpāāya̍ o̍ to̍sā kɔ̄ndɔ̄fi̍lta̍ŋ nda᷅ŋ ndo̍? 55Ka̍a̍pi̍ndā po̍ ndɔ̄ɔ̍ le̍ cho̍ ho̍ō le̍? Po̍ Mēēli̍o̍o̍ nya̍ chā nu̍a̍ā ni̍. Chēmi̍si̍ ni̍, a̍ Chōo̍sɛ̍, a̍ Sa̍i̍mɔ̄ŋ, a̍ Chu̍dā, pɔ̄mbūāā ndūa̍a̍ cho̍ ka̍ŋ ni̍. 56Yēmāa̍ ndūa̍a̍ fa̍ū ā chō na̍nu᷄ŋ mɛ̄ɛ̍ na̍a̍ ŋ̄ sūāā nu̍a̍ā yɛ̍.” Ma̍ dīmī āā, “Kɛ̍ kūɛ̍ɛ̍nɛ̍ o̍ sɔ̍la̍ yɛ̄ ni᷅ŋ kɔ̄l kālo̍o̍ ho̍ō a̍ kpāāya̍ o̍ nɔ̍ ho̍ō wo̍?” 57Mi̍ wāŋnda̍ ha̍ā ā kɛ̄ɛ̄ ndu̍.

O̍ ko̍ŋ, mi̍ Chi̍i̍sū di̍mī āā, “Wāŋnda̍ kpo̍u̍ mā ke̍ wāna̍ su̍a̍ā le̍ Mɛ̄lɛ̄ka̍ wo̍ bɛ̄ɛ̄le̍ŋ. Kɛ̍, wāŋnda̍ o̍ ndu̍ lo̍ chi̍e̍e̍ a̍ wānāā nda̍ fūla̍ o̍ yu̍ŋgu̍ pi᷅lɔ̍ɔ̍ chōo̍ wa̍, ā ke᷅ ndu̍ lēbɛ̄ɛ̄ le̍.” 58Chi̍i̍sū nɔ̍la̍ mbō tōsa̍ sɔ̄ɔ̍ŋ kɔ̄ndɔ̄fi̍li̍ ta̍u̍ lo̍ŋ te̍. Kāni̍ fo̍ndōle̍, wāŋnda̍ lo̍ŋ a̍ la̍a̍la̍ŋ a̍ ndu̍ le̍.

Currently Selected:

Māa̍ti̍u̍ 13: YM

Highlight

Copy