Māa̍ti̍u̍ 12

Nyɛ̄ Chi̍i̍sū di̍mi̍ a̍ pāa̍le̍ pɛ̍ŋgīāālē Mɛ̄lɛ̄ka̍le̍ŋ̍ o̍kɔ̄ɔ̄ wo̍

(Ma̍kī 2:23-28; Lu̍kū 6:1-5)

1Mɛ̄ɛ̍ te̍le̍ŋ ti̍ŋ hīōū, mi̍ Chi̍i̍sū nda̍ bu̍ɛ̍i̍yāā ndūa̍a̍ ā wā kɔ̄la̍ŋ ma̍ wā kēēkōo̍ o̍ chīɛ̄ī pūm ni᷄ŋ o̍ pāa̍le̍ pɛ̍ŋgīāā lē Mɛ̄lɛ̄ka̍le̍ŋ chōo̍. Tɔ̄lɔ̄ɔ̍ wa̍ o̍ chīɛ̍i̍ he̍ī ni᷄ŋ ndo̍, ā vēēlu̍ ndu̍ āā, wi̍t. Yīa̍a̍ŋ mā wa̍ bu̍ɛ̍i̍yāa̍ Chi̍i̍sūa̍a̍ nɛ̄īyo̍. O̍ ko̍ŋ, ma̍ wā tɔ̄lɔ̄ɔ̍ ho̍ō yōmɔ̄ɔ̍ mā dīā. 2Ndu̍yɛ̍, mi̍ ku̍ndā Fālīsi̍īya̍ chā nda̍. Ma̍ lō lo̍ŋ ma̍ dīmūl Chi̍i̍su̍ āā, “Bu̍ɛ̍i̍yāā nūmnda̍ chō sɔ̄ɔ̍ŋ wānā to̍sā o̍ pāa̍le̍ nāāle̍ pɛ̍ŋgīāāle̍ŋ chōo̍ le̍ wo̍ŋ tōsāa̍.”

3-4Mi̍ Chi̍i̍sū mu̍lūl nda̍ āā, “Lā chi̍ wɔ̍ o̍ Yāu̍ Mɛ̄lɛ̄ka̍a̍ ni᷄ŋ a̍ nyɛ̄ Māsāa̍ Dēēve̍ ndu̍ o̍o̍ to̍sa̍ wo̍ o̍kɔ̄ɔ̄ le̍? Bōōndi̍i̍ pi᷅lɛ̍ Dēēve̍ ni̍ nda̍ wānāa̍ wa̍ ndu̍ kɔ̄ɔ̄lī wa̍, mɛ̄ɛ̍ yīa̍a̍ŋ mā wa̍ nda̍ nɛ̄īyo̍, mbo̍ lūɛ̄ī o̍ chīɛ̍i̍ Mɛ̄lɛ̄ka̍a̍ ni᷄ŋ, ndu̍ ni̍ nda̍ wānāa̍ wa̍ ndu̍ kɔ̄ɔ̄lī wa̍, ma̍ dīā bēe̍dīi̍ wa̍ ō yɔ̄ŋga᷄ŋ le̍ Mɛ̄lɛ̄ka̍ wo̍. Nda̍ a̍a̍ nɔ̍ mī nda̍ a̍a̍ de᷅ ndu̍ le̍. Wāna̍ so̍lī sa̍lāa̍ wo̍, ndu̍ ko̍ni̍ ndu̍ o̍o̍ nɔ̍ ni̍ mbō dē bēe̍dīi̍ ko̍ŋ. 5Lā chi̍ wɔ̍ vɛ̍lɛ̄ dīōmnda̍ cho̍ lā pōōnyīāā o̍ yāu̍ lāsāwa̍ Mɛ̄lɛ̄ka̍a̍ ni᷄ŋ nda̍ŋ te̍? Ī chō ī pōōnyīāā māā o̍ pāa̍le̍ o̍ pāa̍le̍ nāāle̍ pɛ̍ŋgīāā chōo̍, wānāa̍ so̍lī sa̍lāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍ ā chō sāwa̍ pāa̍le̍ nāāle̍ pɛ̍ŋgīāāle̍ŋ tɛ̄ɛ̄mbūūwo̍. Kɛ̍ ndu̍yɛ̍, ī chō ī dīmīāā māā o̍ ko̍ŋ ni̍ŋ kpo̍u̍ ā tōsa̍ yɔ᷅ŋ wɔ̄ɔ̍ŋ te̍. 6Mī di̍mu̍l nya̍, sūɛ̍i̍ sɛ̍nɛ̄ī hīŋ ī hīōū chīɛ̄ī na̍a̍ ŋ̄ sōlī sa̍lāa̍ wo̍. 7Yāu̍ Mɛ̄lɛ̄ka̍a̍ dīmi̍ āā, ‘Ō cho̍ vi̍sīa̍a̍ sa̍lāa̍ sōlīo̍o̍ le̍ ya̍ Mɛ̍lɛ̄ka̍ ya̍ hɛ̍na̍ŋ te̍. Nyɛ̄ ya̍ I̍ hɛ̍na̍ŋ ndo̍ ndu̍ cho̍ wāŋndā chīe̍e̍ya̍ nyīɛ̍ɛ̍ye̍ tūīīnɔ᷄ŋndo̍ ni̍.’ ” Mi̍ Chi̍i̍sū hi̍a̍ū lāchī a̍ nda̍ dīmūllo̍ āā, “Tē nya̍ a̍a̍ si̍nā nyɛ̍ di̍mi̍ŋ ho̍ō wo̍ pɛ̄ŋgu̍ pɛ̍, nya̍ a̍a̍ pɛ̍ɛ̍sā wa᷅ŋnda̍ ha̍ā māā ā tōsa̍ yɔ̄ŋ wɔ̄ɔ̍ŋndo̍ le̍. 8Kāni̍ fo̍ndōle̍, wāna̍ nda̍ vēēlū ho̍ō āā, Po̍ Wānā Pɔ̍nɔ̍ɔ̍ wo̍, ndu̍ kɛ̍ɛ̍sīāā nyɛ᷅ wānā to̍sā o̍ pāa̍le̍ nāāle̍ pɛ̍ŋgīāāle̍ŋ chōo̍ wo̍ ni̍ a̍ nyɛ̄ wānā to̍sā le̍cho̍o̍ le̍ wo̍.”

Chi̍i̍sū si̍ŋgi̍ po̍ bā vēsɛ̍i̍yo̍

(Ma̍kī 3:1-6; Lu̍kū 6:6-11)

9O̍ ko̍ŋ kɔ̍ɔ̍lī, mi̍ Chi̍i̍sū fa̍ŋa᷄ŋ o̍ fo̍ndāŋ ko̍ŋ. Mbo̍ kūā o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ō pūm. 10Po̍ pi᷅lɛ̍ wa̍ lo̍ŋ a̍ bāa̍ ndu̍ ō vēsɛ̍i̍. Ndu̍yɛ̍, wānāā pūm ā wa̍ lo̍ŋ nda̍ a̍a̍ hɛ̍na̍ŋ mī nda̍ a̍a̍ ho̍l Chi̍i̍su̍ sūɛ̍i̍. Le̍ he̍ī ma̍ nyūnā ndu̍ āā, “Vɛ̄ɛ̍nɛ̍ sāwa̍ pāa̍le̍ nāāle̍ pɛ̍ŋgīāāle̍ŋ ō dīmi̍ yɛ̄? Bāā wānā si̍ŋgī wa᷅na̍ nāa̍ lēchōo̍, bāā wānā si̍ŋgī le̍?”

11Mi̍ Chi̍i̍sū lo᷅ lo̍ŋ mbo̍ nyūnā nda̍ āā, “Nya̍ cho̍ ha̍ā na̍ŋnu᷄ŋ ki̍nɛ̍i̍ ya̍, tē wāŋndo̍ ō pīlɛ̍ nɔ̄ yɛ̄ sāa̍, mī sāā ko̍ŋ ō de᷄l o̍ so̍o̍ŋndo̍ ni᷄ŋ, kɛ̍ ndu̍yɛ̍, ō pāa̍le̍ nāāle̍ pɛ̍ŋgīāāle̍ŋ chōo̍. Bāā wānā ko̍ŋ ō ku̍ē mbō kɔ̍ so̍lī ndu̍ o̍ pāa̍le̍ŋ nde᷅ŋ chōo̍ le̍? Sōlīo̍o̍ o̍ so̍lī ndu̍ ni̍. 12Tē lā tōsa̍ ke̍ŋ o̍ pāa̍le̍ nāāle̍ pɛ̍ŋgīāāle̍ŋ chōo̍ pɛ̍ le̍ sāa̍, bāā wāna̍ chi̍o̍o̍ yɛ̄? Ō hīu̍ a̍ sāa̍ po̍lo̍ŋ po̍lo̍ŋ te̍? Le̍la̍ŋ, sāwā na̍a̍ māChu̍ūwo̍ ō kūūna̍ na̍a̍ le̍ tōnya̍ tōsā o̍ pāa̍le̍ le̍ŋ chōo̍ le̍.” 13Mi̍ Chi̍i̍sū di̍mūl po̍ bā vēsɛ̍i̍yo̍ āā, “Si̍ɛ̍ndi̍ ba̍a̍.”

Mi̍ pōo̍ sīɛ̄ndī bāa̍. O̍ ko̍ŋ, mi̍ bā ndɔ̄ɔ̍ mīīŋgū ndu̍ yɔ̄nɔ᷄ŋ nyɛ̍ kɛ̄ndɛ̍ī. Mbo̍ sīmnu᷄ŋ mɛ̄ɛ̍ ō pīlɔ̍ɔ̍ chō yɛ̍. 14O̍ ko̍ŋ kɔ̄ɔ̄lī, mi̍ ku̍ndā Fālīsi̍īya̍ fūlā ma̍ kɔ̍ bi̍ī bɔ̄ŋa᷅ŋndo̍ le̍ mɛ̄ɛ̍ nda̍ lōōkū mā dīī Chi̍i̍sū yɛ̍.

Chi̍i̍sū ndu̍ cho̍ wāna̍ Mɛ̄lɛ̄ka̍ hɛ̄li̍ wo̍ ni̍

15Mɛ̄ɛ̍ Chi̍i̍sū tu̍e̍ī nyɛ̄ ku̍ndā Fālīsi̍īya̍ kɛ̄ɛ̄si̍a̍a̍ le̍ tōsāa̍ wo̍, mbo̍ fāŋa᷄ŋ o̍ fo̍ndāŋ kōŋ. Ndu̍yɛ̍, mi̍ wāŋnda̍ tūāl ndu̍ kɔ̄ɔ̄lī fāŋgā bɛ̍ndōo̍. O̍ ko̍ŋ kɔ̍ɔ̍lī, mi̍ Chi̍i̍sū si̍ŋgī a̍ wa̍ a̍ nāāla̍ŋ nda̍. 16Kɛ̍ ndu̍yɛ̍, mbo̍ sīlā nda̍ māā ā di̍mūl wāŋnda̍ a̍ ndu̍ o̍kɔ̄ɔ̄ le̍. 17Chi̍i̍sū to̍sa̍ he̍ī le̍ hāli̍ kpe̍ŋ mī nyɛ̄ Mɛ̄lɛ̄ka̍ dɔ̄ū Āīsa̍yā, wāna̍ su̍a̍a̍ le̍ ndu̍ wo̍, o̍ sōndō wo̍, ō tōsa̍ŋ. 18Mbo̍ dīmī āā,

“Mi̍ chē bu̍ɛ̍ī ni̍ ya̍ I̍ hɛ̍li̍ wo̍.

I̍ ka̍a̍la̍ ndu̍. Ndu̍yɛ̍, I̍ hi̍ni̍ kɔ̄l a̍ ndu̍.

I̍ cho̍ tōsā mī Nyi̍nā nūu̍ tōl ndu̍ kɔ̄ɔ̄lī.

Ndu̍yɛ̍, ō dīmūl ni̍ŋ wa᷅ŋnda̍ bā o̍ bā fe̍e̍ nyɛ᷅ ya̍ I̍ kɛ̍ɛ̍si̍a̍a̍ le̍ tōsāa̍ wo̍.

19Ō cho̍ wa᷅na̍ sɛ̍ɛ̍ŋgi̍āŋ a̍ wānā le̍ o̍ cho̍ le̍.

Ndu̍yɛ̍, ō cho̍ wa᷅na̍ si̍m o̍ lu᷅ŋ mbō kēlū yōŋgā le̍.

20O̍ ko̍ŋ kɔ̍ɔ̍lī, ō bīūnūŋ ni̍ŋ wa̍nāa̍ nɔ̍ di̍a̍llūŋ kālā le̍ wa̍,

ndu̍yɛ̍, mbō tōsa̍ tōnya̍a̍ nāa̍ wānāa̍ cho̍ a̍ kɔ̄ltā tāmbɛ̍i̍la̍ŋ nda̍ chūā.

Ō chō lō he̍ī tōsāa̍ ha̍a̍a̍

mbō lo̍ o̍ ko̍ŋ mbō mūli̍ wāŋnda̍ kɔ̄lta̍ŋ,

ndu̍yɛ̍, mā tōsa̍ nyɛ̄ Mɛ̄lɛ̄ka̍ hɛ̄na̍ŋ ndo̍.

21Ndu̍ cho̍ wāna̍ wāŋnda̍ kpo̍u̍ o̍ chi̍e̍ēŋndo̍ chōo̍ a̍ ti̍i̍ndāŋ ni̍ŋ ndo̍ ni̍.”

Wāŋnda̍ dīmi̍ māā Bɛ̄ɛ̍si̍bɔ̄ɔ̄ ma̍lā Chi̍i̍su̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ ni̍

(Ma̍kī 3:20-30; Lu̍kū 11:14-23)

22O̍ ko̍ŋ kɔ̍ɔ̍lī, mi̍ wānāā pūm ā hūŋ a̍ po̍ pi᷅lɛ̍ nāa̍ Chi̍i̍sū chu̍a̍. Nyi̍nā wɔ̄ɔ̍ŋndo̍ wa̍ ndu̍ kɔ̄ɔ̄lī. Pōo̍ ho̍ō ndu̍ o̍o̍ su̍ū le̍. Ndu̍yɛ̍, ō wa̍ vɛ̄lɛ̄ ō sūmɛ̍i̍. Hūnɔ̄ɔ̍ a̍ ndu̍ nāa̍ Chi̍i̍sū chu̍a̍, mi̍ Chi̍i̍sū si̍ŋgī ndu̍. O̍ ko̍ŋ, mi̍ pōo̍ sūāā, ndu̍yɛ̍, mbo̍ chā. 23Mi̍ kɔ̄ndɔ̄fi̍llo̍ bīī wāŋnda̍ kpo̍u̍ a̍ nyɛ̄ Chi̍i̍sū to̍sa̍ wo̍. Ma̍ sāā dīmu̍la᷅ŋndo̍ āā, “Kɛ̄lɛ̄ŋgāā mbō wa̍ dɔ̍ɔ̍ ndu̍ cho̍ Po̍ Dēēve̍ wo̍ ni̍.”

24Mɛ̄ɛ̍ ku̍ndā Fālīsi̍īya̍ tūēī le̍nde̍ ma̍ dīmī āā, “Mbɔ̄ Bɛ̄ɛ̍si̍bɔ̄ɔ̄ o̍ cho̍ māsa̍ nyi̍nāā wɔ̄ɔ̍ŋnda̍ wo̍, ndu̍ ke᷅ ndu̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī ni̍.”

25Kɛ̍, mi̍ Chi̍i̍sū si̍nā nyɛ̍ wa̍ nda̍ o̍ lākɔ̄l lo̍. Mbo̍ dīmūl nda̍ āā, “Lēlɛ̄ŋ o̍ lēlɛ̄ŋ, tē lē pīɔ̄ūvi̍āŋ ku̍ndāla̍ŋ pɛ̍, mā sāa̍ sɔ̍ŋgɔ̄ɔ̍ vēllāa̍ vēllē pɛ̍, lɛ̄ŋndē lēŋ tāmbe̍i̍ le̍ ta̍mbū ni̍. Ndu̍yɛ̍, chi̍e̍e̍ o̍ chi̍e̍e̍ kɛ̄lɛ̄ŋgāā yu̍ŋgu̍ o̍ yu̍ŋgu̍ tē ō pīɔ̄ūvi̍āŋ ku̍ndāla̍ŋ pɛ̍, mā sāa̍ sɔ̍ŋgɔ̄ɔ̍ vēllāa̍ vēllē pɛ̍, pīɔ̄llo̍ o̍ pi̍ɔ̄l ni̍. 26Le̍la̍ŋ, tē ku̍ndāla̍ŋ o̍ māsāle̍ Sēta̍nā māsa̍ nyi̍nāā wɔ̄ɔ̍ŋnda̍ ni᷄ŋ, la̍ sa̍a̍ sɔ̍ŋgɔ̄ɔ̍ vēllāa̍ vēllē pɛ̍, vɛ̄ɛ̍nɛ̍ māsāle̍ ndɔ̄le̍ŋ lē sīm yɛ̍? 27Mɛ̄ɛ̍ nya̍ dīmi̍ māā māsa̍ nyi̍nāā wɔ̄ɔ̍ŋnda̍, Bɛ̄ɛ̍si̍bɔ̄ɔ̄ māā ndu̍ ke᷅ ya̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī ni̍ yɛ̍, mɛ̄ɛ̍ wānāā nyāa̍ nda̍ nda̍ ō nɛ̄ɛ̍nɛ̍ ke̍ yɛ̄ nda̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī? 28Tē ō wa̍ yɛ̄ pɛ̍ māā Mɛ̄lɛ̄ka̍ ndu̍ ke̍ ya̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī ni̍, mɛ̄ɛ̍ ke̍ŋ chɔ̍m māā Mɛ̄lɛ̄ka̍ kāndu̍ wāa̍ māsāa̍ nya̍ chōo̍.”

29Mi̍ Chi̍i̍sū di̍mī vɛ̄lɛ̄ āā, “Le̍ mī wānā lu̍ɛ̍ī o̍ wāna̍ dīāllūŋ kālāa̍ lo̍ chi̍ɛ̍ī ni̍ŋ mā chu̍a̍ nyɛ̄m ndɔ᷄ŋ kpo̍u̍, mɛ̄ɛ̍ mā bīī ndu̍ fɛ̍ɛ̍ŋ mā yi̍i̍ ndu̍ po᷅ŋ bɛ̄ndū. Tē ō cho̍ ko̍ŋ te̍, wānā nɔ̍lā mā lūɛ̄ī mā chu̍a̍ nyɛ̄m ndɔ᷄ŋ te̍.

30“Wānā o̍ wāna̍ ve̍ ku̍mbūī nīi̍ le̍, mɛ̄ɛ̍ ndu̍ kpe̍e̍kpe̍i̍ cho̍ sɔ̍ŋgɔ̄ɔ̍ a̍ ya̍ ni̍. Ndu̍yɛ̍, wānā o̍ wāna̍ ma̍la̍ ya̍ sāa̍ nīa̍a̍ chūūŋgīāā nāa̍ pi᷅lɛ̍ le̍, mɛ̄ɛ̍ ndu̍ cho̍ nda̍ pūūsi̍a̍a̍ ni̍. 31Le̍la̍ŋ, mī di̍mu̍l nya̍, Mɛ̄lɛ̄ka̍ mbō ma᷄l wānā le̍ yɔ̄ŋ o̍ yɔ̄ŋ wɔ̄ɔ̍ŋ ŋ̄ tōsa̍ a̍ nyɛ̄ o̍ nyɛ̄ wɔ̄ɔ̍ŋ ŋ̄ dīmi̍. Kɛ̍ ndu̍yɛ̍, wānā o̍ wānā a̍ di̍mi̍ dīōmndā wɔ̄ɔ̍ŋnda̍ŋ a̍ Nyi̍na̍ Mɛ̄lɛ̄ka̍a̍ pɛ̍, yɔ̄ŋ wɔ̄ɔ̍ŋ kōŋ ndu̍ ndu̍ Mɛ̄lɛ̄ka̍ me᷅l nu̍m le̍ ndu̍ le̍. 32Ndu̍yɛ̍, wānā o̍ wāna̍ di̍mi̍ dīōm wɔ̄ɔ̍ŋ a̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍, ō sɔ̄lā ma̍lɔ̄ɔ̍ le̍ ndu̍. Kɛ̍, wānā o̍ wāna̍ di̍mi̍ dīōm wɔ̄ɔ̍ŋndo̍ a̍ Nyi̍na̍ Mɛ̄lɛ̄ka̍a̍ pɛ̍, ō sɔ̍lā ma̍lɔ̄ɔ̄ le̍ ndu̍ le̍. Pɛ̄ŋgo̍o̍ ho̍ō ni̍, a̍ fɛ̍ɛ̍ŋ a̍ fɛ̍ɛ̍ŋ bɛ̍ɛ̍ ō sɔ̍lā ma̍lɔ̄ɔ̄ le̍.”

Mɛ̄ɛ̍ yɔ̄mndo̍ wā yɛ̍ le̍nde̍ o̍ ku̍ām ni̍

(Lu̍kū 6:43-45)

33Mbo̍ hīāū lāchī a̍ sūɛ̍i̍ o̍ lētāle̍ ni᷄ŋ āā, “Le̍ mī yɔ̄mndo̍ ō yɔ̄ŋgu̍ kōmɔ̄ɔ̄ kɛ̄ndɔ̄ɔ̍, mɛ̄ɛ̍ mbō wa̍ nyɛ̄ kɛ̄ndɛ̍ī. Kɛ̍, tē yɔ̄mndo̍ ō nɔ̄ sɔ̄ŋndo̍ pɛ̍, kōmɔ̄ɔ̄ fōōfi̍ɛ̍i̍yo̍ o̍ yɔ̍ŋgū ni̍. O̍ kōmɔ̄ɔ̍ wānā si̍nā ni̍, tē yɔ̄mndo̍ chō pɛ̍ nyɛ̍ kɛ̄ndɛ̍ī.” 34Mi̍ Chi̍i̍sū di̍mūl wāŋnda̍ ha̍ā āā, “Lā wɔ̄u̍. Lā chō kɛ̄ūwāā bɛ̄ndū. Lā cho̍ o̍ nɛ̄ī kpo̍so̍ŋ te̍. Kāni̍ fo̍ndōle̍, le̍ yīya᷄ŋ nya̍ yīya̍ŋ māā kɔ̄ltā nyāla̍ŋ lā wā la̍ pi̍a̍ā a̍ yɔ̄ŋndā wɔ̄ɔ̍ŋnda̍ŋ, kɛ̍ ndu̍yɛ̍, mī lā sūāā vɛ̍lɛ̄ dīōmndā kɛ̄ndɛ̄la̍ŋ ndo̍. Kāni̍ fo̍ndōle̍, sɔ̄ɔ̍ŋ wa᷅ ŋ̍ pi̍a̍ā o̍ kɔ̄llo̍ ni᷄ŋ ndo̍ŋ, mu̍ŋ sōndōo̍ dīmī ni̍. 35Ndu̍yɛ̍, sɔ̄ɔ̍ŋ kɛ̍ndɛ᷄ŋ cho̍ ŋ̄ kɛ̄sīāā o̍ kɔ̄l wānā kɛ̍ndɔ̄ɔ̍ ni᷄ŋ ndo̍ŋ, mu̍ŋ ko̍ni̍ o̍ so̍lī chi̍e̍ēŋ ni̍. Sɔ̄ɔ̍ŋ wɔ̍ɔ̍ŋ cho̍ ŋ̄ kɛ̄sīāā o̍ kɔ̄l wānā wɔ̍ɔ̍ŋndo̍ ni᷄ŋ ndo̍ŋ, mu̍ŋ o̍ so̍lī chi̍e̍ēŋ ni̍.

36“Ndu̍yɛ̍, lā kɛ̄si̍ŋ o̍ kɔ̄l māā wānā o̍ wāna̍ so̍ō dīōm ndu̍ o̍o̍ nɔ̍ le̍ dīmī le̍ wo̍ pɛ̍, wānāā kāŋ mɛ̄ɛ̍ mā hu᷄ŋ dɔ̍u̍nu᷄ŋ ko̍na̍ o̍ Mɛ̄lɛ̄ka̍ lo̍ a̍ dīōmndā lāŋ o̍kɔ̄ɔ̄ o̍ pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ chōo̍. 37Dīōmnda̍ cho̍ nya̍ fūlāa̍ o̍ sōndō la̍ŋ, a̍ la̍ŋ Mɛ̄lɛ̄ka̍ chō hūnɔ̄ɔ̄ nya̍ yāmɛ̍i̍ kīlūl ni̍, tē lā nɔ̄ di̍, ɔ̄ɔ̄ tē lā nɔ̍ di̍ le̍.”

Ā dīmu̍l Chi̍i̍sū le̍ mbō tōsa̍ ka̍a̍ma̍a̍

(Ma̍kī 8:11, 12; Lu̍kū 11:29-32)

38O̍ ko̍ŋ kɔ̍ɔ̍lī, mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ ku̍ndā Fālīsi̍īya̍ ā pūm ā dīmūl Chi̍i̍su̍ āā, “Ti̍chā, ŋ̄ hɛ̄na̍ŋ mā to̍sa̍ ka̍a̍ma̍a̍ mī ŋ̄ chē.”

39Kɛ̍, mi̍ Chi̍i̍sū mu̍lūl nda̍ āā, “Wāŋnda̍ te̍le̍ŋndo̍ ho̍ō ā chō wānāā wɔ̍ɔ̍ŋāā bɛ̄ndū. Ā tu̍i̍ī Mɛ̍lɛ̄ka̍ dīōm te̍. Lā nyūna̍ ya̍ le̍ ka̍a̍ma̍a̍ tōsāa̍ le̍ wāa̍ māā tāāmāsi̍. Kɛ̍, ka̍a̍ma̍ā chēle̍ŋ bɛ̍ɛ̍ cho̍ to̍sa᷄ŋ le̍ nya̍ le̍, mɛ̄ɛ̍ ka̍a̍ma̍a̍ yɔ̍nu̍ŋ a̍ Cho̍nā wo̍, wāna̍ su̍a̍ā le̍ Mɛ̄lɛ̄ka̍ wo̍. 40Mɛ̄ɛ̍ Cho̍nā chu̍a̍ pālɛ̍i̍ ī yāa̍ a̍ nyūmnda̍ŋ mā yāa̍ sūūwo̍ o̍ dēmbē yɛ̍, le̍nde̍ wānā nda̍ vēēlū āā, Po̍ Wānā Pɔ̍nɔ̍ɔ̍ wo̍ chūā ni̍ŋ pa̍lɛ̍i̍ ī yāa̍ a̍ nyūmnda̍ŋ mā yāa̍ o̍ pūūlōo̍ bɛ̄ŋgu̍ ni̍. 41Ndu̍yɛ̍, wāŋnda̍ Ni̍ni̍vɛ̄ɛ̄ chi̍e̍e̍ ā mīīŋgū ni̍ŋ yo̍o̍mū o̍ pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ chōo̍ nda̍ wāŋnda̍ te̍le̍ŋndo̍ ho̍ō. O̍ ko̍ŋ, mī wāŋnda̍ Ni̍ni̍vɛ̄ɛ̄ a̍ si̍m mā bīī wāŋnda̍ te̍le̍ŋndo̍ ho̍ō tɛ̄ɛ̄. Kāni̍ fo̍ndōle̍, mɛ̄ɛ̍ Cho̍nā di̍mu̍l wāŋnda̍ Ni̍ni̍vɛ̄ɛ̄ sūɛ̍i̍ Mɛ̄lɛ̄kɛ̍i̍, ma̍ māl yɔ̄ŋndā ndāla̍ wɔ̍ɔ̍ŋnda̍ŋ. Nāa̍ wāŋnda̍ Ni̍ni̍vɛ̄ɛ̄ a̍ tu̍e̍ī yɔ̄ nyɛ̄ Cho̍nā di̍mi̍ wo̍ ma̍ māl yɔ̄ŋndā ndāla̍ wɔ̍ɔ̍ŋnda̍ŋ, wāŋnda̍ te̍le̍ŋndo̍ ho̍ō yɛ̍? Kɛ̍, lā sīna̍ pɛ̍ŋgu̍ māā wānā cho̍ na̍nu᷄ŋ ō hīōū Cho̍nā. 42Ndu̍yɛ̍, wānā la̍nɔ̍ ma̍sa̍ chɛ̍ŋ o̍ lɛ̄ŋnde̍ Si̍ɛ̍bāle̍ŋ ni᷄ŋ ndo̍, nda̍ wāŋnda̍ te̍le̍ŋndo̍ ho̍ō ā mīīŋgū ni̍ŋ yo̍o̍mū o̍ pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ chōo̍. Ndu̍yɛ̍, mbō si᷄m mbō bīī wāŋnda̍ te̍le̍ŋndo̍ ho̍ō tɛ̄ɛ̄. Kāni̍ fo̍ndōle̍, mi̍ chūa̍a̍ ho̍ō kīālū o̍ lɛ̄ŋnde̍ŋ mɛ̄ɛ̄lu̍la̍ŋ kpa̍li̍ mbo̍ hūŋ le̍ dīōmndā kɔ̄l kālu̍la̍ Sɔ̍lɔ̍mɔ̄ŋ ndu̍ o̍o̍ di̍mī la̍ŋ nīla̍ŋ yāŋɔ̄ɔ̍. Nāa̍ ndu̍ ke̍lū wɔ̄ kpa̍li̍ mbo̍ hūŋ le̍ Sɔ̍lɔ̍mɔ̄ŋ nīla̍ŋ yāŋɔ̄ɔ̍, wāŋnda̍ te̍le̍ŋndo̍ ho̍ō yɛ̍? Kɛ̍, lā sīna̍ pɛ̍ŋgu̍ māā wānā cho̍ na̍nu᷄ŋ ō hi̍o̍ū Sɔ̍lɔ̍mɔ̄ŋ.”

Nyi̍nā wɔ̄ɔ̍ŋ nda̍ tūāū wa᷅ŋndo̍ kɔ̄ɔ̄lī wo̍ ō mīīŋgū vɛ̍lɛ̄

(Lu̍kū 11:24-26)

43O̍ ko̍ŋ kɔ̍ɔ̍lī, mi̍ Chi̍i̍sū di̍mi̍ āā, “Tē nyi̍nā wɔ̄ɔ̍ŋndo̍ wa̍ wāŋndo̍ kɔ̄ɔ̄lī pɛ̍, wānā ko̍ŋ ō wā ma̍va̍ā māā chīɛ̄ī ndɔ̄. Le̍ sa̍bōo̍ ho̍ō, tē ā tōū nyi̍nāā wāŋndo̍ kɔ̄ɔ̄lī pɛ̍, nyi̍nā kōŋ ō kɔ̍ ba̍lū nūūvīa̍a̍ la̍u̍ la̍u̍ o̍ po̍llo̍ ni᷄ŋ le̍ nāa̍ cha̍lāa̍. Tē ō sēēlu̍ŋ na̍a̍ cha̍lāā le̍, 44ō dīmi̍ āā, ‘I̍ cho̍ mīīŋgū o̍ chīɛ̄ī ni̍ ya̍ wa̍ wo̍.’ Tē ō hīŋ yɛ̄ pɛ̍ mbō kōma̍l wa̍nā le̍ni̍ŋ te̍, ndu̍yɛ̍, mbō wa̍ ō bāsāā a̍ nyɔ̄ɔ̍ŋ lēni᷄ŋ ŋ̍ bɛ̍ɛ̍ndīāā nyɛ̄ kɛ̄ndɛ̍ī pɛ̍, 45ō kɔ̍ ve̍e̍lū nyi̍nāā wɔ̄ɔ̍ŋāā chēle̍ŋ a̍ ŋɔ᷄mmɛ̍ū a̍ hi̍o̍ū ndu̍ kɔ̄l ve̍sɛ̍i̍ ya̍. Ā hīŋ pɛ̍, ā hu᷄ŋ to᷅l wānā ko̍ŋ kɔ̄ɔ̄lī. O̍ ko̍ŋ, mɛ̄ɛ̄lu̍la̍ wānā ko̍ŋ la̍ŋ la̍ hi̍a̍ū ni᷅ŋ bɛ̍ɛ̍ le̍wɔ̍u̍ a̍ mɛ̄ɛ̍ o̍ wa̍ o̍ tāse̍la̍ ndɔ̄ɔ̍ yɛ̍.” Mi̍ Chi̍i̍sū di̍mī āā, “Le̍nde̍ i̍ cho̍ yɔ̄nɔ᷄ŋ a̍ wānāā wɔ̄ɔ̍ŋnda̍ te̍le̍ŋndo̍ ho̍ō ni̍.”

Wānāa̍ cho̍ wānāā kpe̍e̍kpe̍i̍ya̍a̍ Chi̍i̍sūa̍a̍ wa̍

(Ma̍kī 3:31-35; Lu̍kū 8:19-21)

46Chi̍i̍sū wa̍ hīōūwɔ̄ɔ̍ lāchī a̍ sūɛ̍i̍. O̍ ko̍ŋ, mi̍ kāla̍ ndɔ̄ a̍ Chi̍i̍sū pɔ̄mbūāā ndūa̍a̍ hūŋ ma̍ sīm o̍ bɛ̍ɛ̄. Ma̍ dīmī māā ā hɛ̄na̍ŋ mā chē ndu̍. 47Mi̍ wānāa̍ wa̍ lo̍ŋ nda̍ dīmūl Chi̍i̍sū āā, “Kālā nu̍m nda̍ pɔ̄mbūāā nūmnda̍ ā chō o̍ bɛ̍ɛ̄. Ā hɛ̄na̍ŋ mā chē nūm.”

48Mi̍ Chi̍i̍sū lo᷅ lo̍ŋ mbo̍ nyūnā āā, “Ō nɛ̄ɛ̍nɛ̍ cho̍ yɛ̄ kāla̍ nūu̍? Ndu̍yɛ̍, ō nɛ̄ɛ̍ni̍a̍ā cho̍ yɛ̄ pɔ̄mbūāā nīa̍a̍?” 49Mbo̍ yūlū bu̍ɛ̍i̍yāā ndūa̍a̍. Mbo̍ dīmī āā, “Ha̍ā cho̍ kālāa̍ nīa̍a̍ ni̍. Nda̍ cho̍ pɔ̄mbūāā nīa̍a̍ ni̍.” 50Mbo̍ dīmī āā, “Fi̍nyā nūu̍ o̍ cho̍ ho̍ō o̍ fo̍ndāŋ ndɔ̄ɔ̍ wo̍, wāna̍ to̍sa̍ nyɛ̄ o̍ hɛ̍na̍ŋ ndo̍ pɛ̍, mɛ̄ɛ̍ ndu̍ cho̍ pɔ̄mbɔ̄ nūu̍ ni̍, mɛ̄ɛ̍ ndu̍ cho̍ yēma̍ nūu̍ ni̍, mɛ̄ɛ̍ ndu̍ cho̍ kāla̍ nūu̍ ni̍.”

Currently Selected:

Māa̍ti̍u̍ 12: YM

Highlight

Copy