Lu̍kū 22

Chu̍dā kɛ̍ɛ̍si̍a̍a̍ le̍ Chi̍i̍su̍ pīsīo̍o̍

(Māa̍ti̍u̍ 26:1-5; Ma̍kī 14:1, 2; Chɔ᷄ŋ 11:45-53)

1Te̍le̍ŋndo̍ wa̍ ni᷅ŋ kpɛ̍ɛ̍lūŋ, le̍ bɔ̄ŋa᷅ŋ wāŋnda̍ dīā be̍e̍dīi̍ nda̍ do̍ū yi̍i̍sīi̍yo̍ le̍ wo̍. Nda̍ a̍a̍ ve̍e̍lū vɛ̍lɛ̄ bɔ̄ŋa᷅ŋndo̍ ho̍ō āā, bɔ̄ŋa᷅ŋndo̍ le̍ lōōnɔ᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄. 2Mi̍ wānāā bɛ̄ndūāā sōlīāā lāsa̍lāa̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, ā wā nɛ̄īla̍ŋ nūūvīa̍a̍ le̍ mā dīī Chi̍i̍sū. Kɛ̍, ā wa̍ sīōōŋnde̍ le̍ wāŋnda̍.

3O̍ ko̍ŋ kɔ̍ɔ̍lī, mi̍ Sēta̍nā māsa̍ nyi̍nāā wɔ̄ɔ̍ŋnda̍ tūāl Chu̍dā kɔ̄ɔ̄lī, ō nda̍ a̍a̍ ve̍e̍lū vɛ̍lɛ̄ a̍a̍ Īsīka̍a̍līɔ̄ɔ̄ wo̍. Ndu̍yɛ̍ nda̍ wa̍ bu̍ɛ̍i̍yāā ŋ̄wāŋ tɔ̍ a̍ ā ŋīɔ̍ɔ̍ŋāa̍ Chi̍i̍sūa̍a̍ ni̍. 4Mbo̍ kūā ma̍ kɔ̍ sūūki̍āŋ nda̍ wānāā bɛ̄ndūāā sōlīāā lāsa̍lāa̍, a̍ wānāā bɛ̄ndūāā pōli̍si̍i̍ya̍ a̍ ma̍ndā chi̍ɛ̍ī Mɛ̄lɛ̄ka̍a̍ wa̍. Ma̍ kɛ̄ɛ̄sīāā nda̍ nda̍ā le̍ mɛ̄ɛ̍ o̍ lo̍o̍kū Chi̍i̍su̍ pīsī nda̍ o̍ bā yɛ̍. 5Ndu̍yɛ̍, ma̍ nāŋ kɔ̄l ta̍u̍ a̍ nyɛ̄ Chu̍dā to̍sa̍ wo̍. Ma̍ chɛ̄la᷅ŋ le̍ mā ke̍ ndu̍ nyɛ̄ sɔ̄lāa̍. 6Mi̍ Chu̍dā chɛ᷅l nyɛ̄ nda̍ kɛ̄ɛ̄si̍a̍a̍ wo̍. O̍ ko̍ŋ kɔ̍ɔ̍lī, mbo̍ sāā nɛ̄īla̍ŋ nūūvīa̍a̍ le̍ mɛ̄ɛ̍ o̍ lo̍o̍kū mbō tōsa̍ mā tīu̍ Chi̍i̍su̍ bā, kɛ̍ wāŋnda̍ si̍nā a̍ ndi̍ o̍kɔ̄ɔ̄ māā ndu̍ le̍ pi̍si̍ ndu̍ le̍ yɛ̍.

Chi̍i̍sū ve᷅m bu̍ɛ̍i̍yāā ndūa̍a̍ le̍ nyɛ̄ dīāā bɔ̄ŋa᷅ŋ lōōna᷄ŋndo̍ tōōsīa̍a̍

(Māa̍ti̍u̍ 26:17-25; Ma̍kī 14:12-21; Chɔ᷄ŋ 13:21-30)

7Mi̍ pāa̍le̍ wāŋnda̍ dīā be̍e̍dīi̍ nda̍ do̍ū yi̍i̍sīi̍ le̍ wo̍ lē fūūlūū. O̍ pāa̍le̍ŋ nde᷅ŋ chōo̍, nda̍ a̍a̍ dīī sa̍a̍ le̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ ni̍. 8O̍ ko̍ŋ kɔ̍ɔ̍lī, mi̍ Chi̍i̍sū vi̍ām Pītɛ̍ nda̍ Chɔ᷄ŋ. Mbo̍ dīmūl nda̍ āā, “Lā kɔ̍ mī lā kɔ̍ to̍o̍sīāā nyɛ̄ dīa̍a̍ le̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ mī ŋ̄ dēnūŋ.”

9Ma̍ nyūnā ndu̍ āā, “Kūɛ̍ɛ̍nɛ̍ ŋ̄ hɛ̄na̍ŋ yɛ̍ mī ŋ̄ tōōsīa̍a̍ nyɛ̄ dīāā kālāa̍?”

10Mbo̍ mūlī āā, “Lā kɔ̍ chi̍e̍e̍. Tē lā wa̍ hēlɔ̄ɔ̍ chi̍e̍e̍ pɛ̍, lā chō bɔ̄ŋa᷅ŋ a̍ pōo̍ a̍ mɛ̄ŋnda̍ŋ ndu̍ o̍ lēbōl o̍ kpɛ̍ɛ̍nɛ̍i̍ ni᷄ŋ. Lā to᷄l ndu̍ kɔ̄ɔ̄lī mī lā kūɛ̄ o̍ chīɛ̄ī o̍ cho̍ lūɛ̄īyɔ̄ɔ̄ wo̍. 11Tē lā fūūlu̍u̍ pɛ̍, lā dīmu̍l wa᷅na̍ chīɛ̄īyo̍ āā, ‘Ti̍chā dīmi̍ māā na̍a̍ ŋ̄ nyūna̍ nu̍m āā, Kūɛ̍ɛ̍nɛ̍ chīɛ̄ī ndɔ̍ īsūmīāllo̍ chō yɛ̄ nāa̍ o̍ cho̍ nyɛ̄ dīāā wāŋnda̍ dīā le̍ lōōnɔ᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ wo̍ di̍o̍ nda̍ bu̍ɛ̍i̍yāā ndūa̍a̍ wa̍?’ 12Ō chō nya̍ chīɛ̄ī fɛ̄kɛ̄īyo̍ chɔ̄m o̍ chīɛ̄ī chōo̍ cho̍o̍ wo̍. Ndu̍yɛ̍, chīɛ̄īyo̍ ho̍ō nɔ̄ nyɛ̄ o̍ nyɛ̄ fe̍e̍ nɔ̍ le̍ wāa̍ lēni᷄ŋ. Lā bɛ̄ɛ̄ndi̍a̍a̍ nyɛ̍ dīa̍a̍ lo̍ŋ.”

13Ma̍ kūā chi̍e̍e̍. Mɛ̄ɛ̍ nda̍ kūɛ̄, ma̍ kōmāl nyɛ̄ o̍ nyɛ̄ fe̍e̍ mɛ̄ɛ̍ Chi̍i̍sū di̍mu̍l nda̍ yɛ̍. Ma̍ tōōsīāā nyɛ̄ dīāā wāŋnda̍ dīā le̍ lōōnɔ᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ wo̍ lo̍ŋ.

Mɛ̄ɛ̍ nyɛ̄ dīāā wānāā lāāla᷄ŋnda̍ kāndu̍ŋ yɛ̍

(Māa̍ti̍u̍ 26:26-30; Ma̍kī 14:22-26; Kɔ̄li̍ŋtīāŋ Tāso̍o̍ 11:23-25)

14Mɛ̄ɛ̍ bōōnde̍i̍ fūūlu̍u̍ le̍ nyɛ̄ dīa̍a̍ ho̍ō, mi̍ Chi̍i̍sū cha᷅l nyɛ̄ dīa̍a̍ dīo̍o̍ nda̍ wānāā o̍ ve᷅m hɔ̄ltē ndɔ̄ wa̍. 15Mbo̍ dīmūl nda̍ āā, “I̍ wa̍ ni᷅ŋ yēēmɛ̍i̍ le̍ nyɛ̄ dīāā lōōna᷄ŋndo̍ ho̍ō dīo̍o̍ na̍a̍ nya̍ā lɔ̍ɔ̍ pa̍ wāŋnda̍ tōsā mī bi̍ī mɔ̍nɛ̍i̍. 16Mī di̍mu̍l nya̍, ō fūla̍ o̍ ō na̍a̍ ŋ̄ chō ho̍ō dīo̍o̍ wo̍ kɔ̄ɔ̄lī, I̍ di᷅ lɛ̍ ni̍ŋ nyɛ̄ dīāā hīāūwāā chōo̍ che᷅le̍ŋ te̍, mbō lo̍ o̍ ko̍ŋ ha̍a̍a̍ mī nyɛ̄ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ o̍ si̍m le̍ ndu̍ wo̍, ō yɔ̄nu̍ŋ o̍ māsāle̍ Mɛ̄lɛ̄ka̍le̍ŋ ni᷄ŋ.”

17Mbo̍ chūā tāālāa̍, a̍ mūɛ̄īmā mākīle̍pīi̍ya̍ŋ lēni᷄ŋ mbo̍ mēl Mɛ̄lɛ̄ka̍ ba̍li̍ka̍. Mbo̍ dīmūl nda̍ āā, “Lā bīi̍ ta̍a̍lāa̍ ho̍ō mī lā kēna᷅ŋ mī lā ko᷄l.” 18Mbo̍ dīmūl nda̍ āā, “Mī di̍mu̍l nya̍, chɔ̍ŋ a̍ hāū, I̍ ko᷅l lɛ̍ ni̍ŋ ma̍mu̍ɛ̍i̍ te̍, mbō lo̍ o̍ ko̍ŋ ha̍a̍a̍ mī bōōndi̍i̍ Mɛ̄lɛ̄ka̍ chō wā Māsāa̍ wāŋnda̍ chōo̍ ve̍ fūūlu̍u̍.”

19Mi̍ Chi̍i̍sū chu̍ā bēe̍dīi̍yo̍. Mbo̍ mēl Mɛ̄lɛ̄ka̍ ba̍li̍ka̍. Mbo̍ yīmī yīmī mbo̍ kē nda̍. Mbo̍ dīmūl nda̍ āā, “Dīāllūŋ nu᷄ŋ cho̍ mu᷅ŋ ni̍. [Mu̍ŋ cho̍ ŋ̄ yɔ̄ŋga᷄ŋ le̍ nya̍ ni̍. Lā wa̍ he̍ī tōsāa̍ le̍ lōōnɔ᷄ŋndo̍ a̍ ya̍.” 20Mɛ̄ɛ̍ nda̍ chīi̍ nyɛ̄ dīa̍a̍ di̍o̍, mbo̍ chūā tāālāa̍ a̍ mūɛ̄īmā mākīle̍pīi̍ya̍ŋ lēni᷄ŋ. Mbo̍ mēl Mɛ̄lɛ̄ka̍ ba̍li̍ka̍. Mbo̍ kē nda̍. Mbō dīmī āā, “Ma̍ŋ ma̍ cho̍ kpe̍ma̍ sɛ̍nɛ̄īyo̍ ni̍. Ma̍ŋ ma̍ ta̍la̍ le̍ nya̍ ni̍. Kōo̍ma̍ nīa̍ŋ ma̍ yi̍i̍ kpe̍ma̍a̍ ho̍ō ni̍.”]

21O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Wāna̍ na̍a̍ ŋ̄ chō nyɛ̄ dīa̍a̍ dīo̍o̍ lātūlu̍ wo̍ chō ya̍ pīsī. 22Ndu̍yɛ̍, ī chō yɔ̄nɔ᷄ŋ a̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ mɛ̄ɛ̍ i̍ cho̍ pāāndū ī kɛ̄ɛ̄sīa̍ŋ a̍ ndu̍ o̍kɔ̄ɔ̄ yɛ̍. Kɛ̍, wāna̍ cho̍ ndu̍ pīsī wo̍ nyɛ̄ pālāa̍ wā ni̍ŋ bɔ̍ɔ̍ le̍ ndu̍.”

23Mɛ̄ɛ̍ o̍ di̍mi̍ le̍nde̍, mi̍ bu̍ɛ̍i̍yāā ndūa̍a̍ kāndū nyūūni̍āŋndo̍ le̍ wāna̍ kɛ̍ɛ̍si̍a̍a̍ le̍ he̍ī tōsāa̍ wo̍.

Wāna̍ cho̍ wānā bɛ̍ndōo̍ wo̍

24Mi̍ bu̍ɛ̍i̍yāā ndūa̍a̍ kāndū sɛ̄ɛ̄ŋgi̍āŋndo̍ nda̍ pi̍la̍ tɛ̄ɛ̄ŋ le̍ wāna̍ wa᷅ wa̍nā bɛ̍ndōo̍ nda̍ tɛ̄ɛ̄ŋ ndo̍. 25Mi̍ Chi̍i̍sū di̍mūl nda̍ āā, “Māsāa̍ o̍ chi̍e̍ēŋndo̍ ni᷄ŋ kīndīlāa̍ nda̍ kīndīlā wa̍nāā nda̍ chō chōo̍ wa̍ ni̍. Ndu̍yɛ̍, mī wāŋnda̍ vēēlu̍ wānāā bɛ̄ndūa̍a̍ āā, wānāa̍ ma̍lā wa᷅ŋnda̍ wā. 26Kɛ̍, nya̍ nya̍, ī wāā le̍nde̍ i̍ nɔ̍ mī ī yɔ̄nu̍ŋ nya̍ tɛ̄ɛ̄ŋ te̍. Nya̍ nya̍, wāna̍ cho̍ wānā bɛ̍ndōo̍ nya̍ tɛ̄ɛ̄ŋ ndo̍ ō sīmnu̍ŋ wa̍nā pɔ̍mbu̍ɛ̍i̍na̍a̍ le̍ ha̍ā kpo̍u̍. Ndu̍yɛ̍, wāna̍ cho̍ wāŋnda̍ lāchī wo̍ ō wa̍ wa̍nā vi̍a̍māā le̍ ha̍ā.” 27Mbo̍ nyūnā āā, “Wāna̍ cha̍l nyɛ̄ dīa̍a̍ dīo̍o̍ wo̍ a̍ wāna̍ si̍m ndu̍ īkɛ̄i̍ le̍ vīmīla̍ŋ ndo̍, ɔ̍ɔ̄ wāna̍ hi̍o̍ū wo̍? Wāna̍ cha᷅l nyɛ̄ dīa̍a̍ dīo̍o̍ wo̍.” Mbo̍ dīmī āā, “Ya̍ I̍ cho̍ māchūāā nya̍ tɛ̄ɛ̄ŋ māā wānā vi̍a̍māā.”

28Mbo̍ hīāū lāchī a̍ sūɛ̍i̍ āā, “Nya̍ wa̍ hɔ̄lāā tūlu̍ a̍ ya̍ ni̍, mi̍ lā lō a̍ ya̍ hɔ̍lāā tūlu̍, ha̍a̍a̍ o̍ nyɛ̄ o̍ nyɛ̄ pālāa̍ ke̍e̍ku̍ ya̍ chōo̍. Lā me᷄l la̍ le̍. 29Fi̍nyā nūu̍ chu̍a̍ ya̍ le̍ mī wa̍ māsāa̍. Ndu̍yɛ̍, le̍nde̍ ko̍ni̍ ya̍ I̍ cho̍ nya̍ chūā le̍ mī lā wa̍ lāmāsā ni̍. 30O̍ ko̍ŋ, na̍a̍ nya̍ā mī ŋ̄ dē nyɛ̄ dīa̍a̍ o̍ hɛ̄ŋgɛ̍i̍ pi᷅lɔ̍ɔ̍ ni᷄ŋ, lɔ̍ɔ̍ ya̍ I̍ cho̍ wā māsāa̍ wo̍. Ndu̍yɛ̍, I̍ cho̍ tōsā mī lā sīmnu᷄ŋ ma̍sāa̍, mī lā hu᷄ŋ kɔ̍ɔ̍sā a̍ wānāā kāa̍la̍ tɔ̍ a̍ lā tīɔ̍ɔ̍ŋnda̍, a̍ fu̍la̍ o̍ pūlāle̍ I̍sɔ̄lūɛ̄īle̍ŋ chōo̍ wa̍.”

Chi̍i̍sū di̍mi̍ māā Pītɛ̍ cho̍ ndu̍ kɛ̄ɛ̄

(Māa̍ti̍u̍ 26:31-35; Ma̍kī 14:27-31; Chɔ᷄ŋ 13:36-38)

31Mi̍ Chi̍i̍sū ve̍e̍lū Pītɛ̍ āā, “Sa̍i̍mɔ̄ŋ, Sa̍i̍mɔ̄ŋ, Sēta̍nā, māsa̍ nyi̍nāā wɔ̄ɔ̍ŋnda̍, dīmu̍l Mɛ̄lɛ̄ka̍ le̍ mbō tɔ̄ɔ̄nda̍ŋ nya̍ bu̍ɛ̍i̍yāā nīa̍a̍. Ō chō tōsā a̍ nya̍ mɛ̄ɛ̍ nda̍ hɛ̄ī wi̍tīi̍yo̍ŋ nu̍a̍ā yɛ̍. 32Kɛ̍, I̍ pi̍ɛ̍i̍ Mɛ̄lɛ̄ka̍ le̍ nūm Sa̍i̍mɔ̄ŋ, yɔ̄ŋi̍ ŋ̄ ma᷄l ti̍i̍nda᷄ŋ ŋ̄ nɔ̄ o̍ ya̍ ni̍ŋ ndo̍. Ndu̍yɛ̍, tē a̍ mi̍i̍ŋgu̍ ya̍ o̍ ībūŋ pɛ̍, lu̍e̍i̍ cha̍a̍ŋāā nūmnda̍ kpāāyāa̍.”

33Mi̍ Pītɛ̍ di̍mī āā, “Māsānɔ̄ɔ̍, I̍ cho̍ ō bɛ̄ɛ̄ndīa̍ŋ mā dɔ̄ū na̍a̍ chīɛ̄ī ni̍ŋ na̍a̍ nūm. Ndu̍yɛ̍, ā yɔ᷄ŋ bɛ̍ɛ̍ āā pīɔ̍mndo̍ ni̍, I̍ cho̍ ō bɛ̄ɛ̄ndīa̍ŋ mī ŋ̄ vī na̍a̍ nūm.”

34Mi̍ Chi̍i̍sū di̍mūl ndu̍ āā, “Mī di̍mu̍l nu̍m Pītɛ̍, sɔ̄ɔ̍ cho̍ si̍ɔ̍dīi̍ kōōwā le̍, mā vi̍i̍nu̍ŋ le̍ya̍a̍ māā a̍ si̍nā ya̍ le̍.”

Chi̍i̍sū si̍la̍ bu̍ɛ̍īyāā ndūa̍a̍

35Mi̍ Chi̍i̍sū nyu̍nā nda̍ āā, “Bōōndi̍i̍ ya̍ I̍ ve᷅m nya̍ mi̍ di̍mūl nya̍ māā wānā ku̍ā a̍ ŋ̄ka̍ni̍ le̍ ve̍, kɛ̄lɛ̄ŋgāā lāwōlɔ̄ɔ̄, kɛ̄lɛ̄ŋgāā lā kɔ̄ɔ̄vɛ̄i̍, pɛ̄ŋnde̍ŋ le̍ le̍e̍ bi̍ī nya̍ le̍ nyɛ̄ o̍ nyɛ̍?”

Ma̍ mūlī āā, “Pɛ̄ŋndē bīi̍ na̍a̍ le̍ nyɛ̄ o̍ nyɛ̄ le̍.”

36Mbo̍ dīmūl nda̍ āā, “Kɛ̍, I̍ cho̍ ni᷅ŋ nya̍ dīmūl pɛ̄ŋgo̍o̍ ho̍ō māā wāna̍ nɔ̍ īka̍ni̍ pɛ̍, ō chu̍a̍. Wāna̍ nɔ̍ lāwōlɔ̄ɔ̄ pɛ̍, ō chu̍a̍. Wāna̍ nɔ̍ mu̍ɛ̍ī fāŋ te̍, ō pīsi̍ do᷅ma̍ ndɔ̄ɔ̍ mbō pēndū. 37Mī di̍mu̍l nya̍, mɛ̄ɛ̍ mī nyɛ̍ di̍mi̍ŋ o̍ Yāu̍ Mɛ̄lɛ̄ka̍a̍ ni᷄ŋ a̍ ya̍ o̍kɔ̄ɔ̄ wo̍, ō yɔ̄nu̍ŋ. Ī chō ī pōōnyīāā āā, ‘Ma̍ hīvī ndu̍ kūmbū wānāā yɔ̄ŋ wɔ̄ɔ̍ŋnda̍’. Nyɛ̍ di̍mi̍ŋ ho̍ō wo̍ chō ni᷅ŋ le̍ yɔ̄nɔ᷄ŋndo̍.”

38Mi̍ bu̍ɛ̍īya̍ dīmī āā, “Mi̍ che᷄ŋ mɔ̍ɔ̄ŋ fāŋndo̍ŋ ŋ̄ mūu̍ŋ.”

Mbo̍ dīmī āā, “Ko̍ŋ cho̍ lētūu̍.”

Chi̍i̍sū pi̍ɛ̍i̍ Mɛ̄lɛ̄ka̍ o̍ pēmbēi̍ chōo̍

(Māa̍ti̍u̍ 26:36-46; Ma̍kī 14:32-42)

39Mi̍ Chi̍i̍sū fa̍ŋa᷄ŋ chi̍e̍e̍. Mbo̍ kūā o̍ Pēmbīī Yɔ̄mīī Ɔ̄li̍fīi̍ve̍ chōo̍ māā pāāndū. Mi̍ bu̍ɛ̍i̍yāā ndūa̍a̍ tūāl ndu̍ kɔ̄ɔ̄lī. 40Mɛ̄ɛ̍ o̍ fu̍u̍lu̍u̍ o̍ fo̍ndāŋ o̍ wa̍ kɔ̄l lo̍, mbo̍ dīmūl bu̍ɛ̍i̍yāā ndūa̍a̍ āā, “Lā pīɛ̍i̍ Mɛ̍lɛ̄ka̍ māā tē nyi̍nā wɔ̄ɔ̍ŋndo̍ tɔ̄ɔ̄nda̍ŋ nya̍ pɛ̍, māā lā to̍sā yɔ᷅ŋ wɔ̄ɔ̍ŋ te̍.”

41Mbo̍ fāŋa᷄ŋ nda̍ īkɛ̄i̍, mbo̍ hīāū ti᷄ŋ lāchī le̍ nɛ̄īyo̍ be̍le̍-ya̍a̍. Mbo̍ bāŋ wūla̍ŋ. Mɛ̄ɛ̍ o̍ ba̍ŋ wūla̍ŋ, mbo̍ pīɛ̄ī Mɛ̄lɛ̄ka̍, āā, 42“Fi̍nyā nūu̍, tē ā chɛ̄l pɛ̍, mɛ̄ɛ̍ fa̍ŋa̍ ya̍ tāāla̍ īmɔ̍nɔ̍ɔ̍ ho̍ō kūēē. Kɛ̍ ndu̍yɛ̍, to̍sā nyɛ̍ cho̍ ya̍ o̍ kɔ̄l lo̍ le̍. To̍sa̍ nyɛ̍ cho̍ nu̍m o̍ kɔ̄l lo̍.” 43O̍ ko̍ŋ kɔ̍ɔ̍lī, mi̍ ki̍i̍la̍nɔ̍ɔ̍ cha᷄ŋ o̍ ɛ̄chɛ̍nɛ̄ mbo̍ hūŋ nāa̍ ndu̍ chu̍a̍. Mbo̍ lūēī ndu̍ kpāāyāa̍. 44Chi̍i̍sū kɔ̄l ndɔ̄ɔ̍ wa̍ ō pīāā a̍ mɔ̍nɛ̍i̍. Le̍ he̍ī, mbo̍ chɔ̄ɔ̄lū Mɛ̄lɛ̄ka̍ pīɛ̄ī kpe̍e̍kpe̍i̍. Lāli̍i̍ wa̍ ndu̍ fūlāa̍ lēkɔ̄ɔ̍ mī ī dēlī lɛ᷅ŋ nde̍, ī wa̍ māwāā mɛ̄ɛ̍ kōo̍wa̍ŋ mā wā fu̍lāa̍ nu̍a̍ā mī mā dēlī pa᷅ pā yɛ̍.

45Mɛ̄ɛ̍ o̍ chi̍i̍ pīɛ̄īle̍ŋ mbo̍ cha᷄ŋ, mbo̍ mīīŋgū nāa̍ bu̍ɛ̍i̍yāā ndūa̍a̍ chūā. Mīīŋgōo̍, mbo̍ kōmāl nda̍ o̍ mālɔ̄, kāni̍ fo̍ndōle̍, ā wa̍ ā sāŋgāā a̍ mɔ̍nɛ̍i̍ wa̍ nda̍ ve̍. 46Mbo̍ nyūnā nda̍ āā, “Bāā mī lā lɔ᷄l pɛ̄ŋgo̍o̍ ho̍ō?” Mbo̍ dīmūl nda̍ āā, “Lā chɔ᷄ŋ lā pīɛ̍i̍ Mɛ̍lɛ̄ka̍ māā, tē tɔ̄ɔ̄nda᷄ŋndo̍ kōma̍l nya̍ pɛ̍, lā to̍sā yɔ᷅ŋ wɔ̄ɔ̍ŋ te̍.”

A̍ mɛ̄ɛ̍ nda̍ bīī Chi̍i̍sū yɛ̍ o̍kɔ̄ɔ̄

(Māa̍ti̍u̍ 26:47-56; Ma̍kī 14:43-50; Chɔ᷄ŋ 18:3-11)

47Chi̍i̍sū lo̍ sūɛ̍i̍ mi̍ wāŋnda̍ hūŋ fāŋgā bɛ̍ndōo̍. Bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ ō pīlɔ̍ɔ̄ dīōla̍ŋ Chu̍dā, ndu̍ wa̍ nda̍ lāchī ni̍. Mɛ̄ɛ̍ o̍ fu̍u̍lu̍u̍, mbo̍ kūā le̍ Chi̍i̍su̍ kɔ̄ma᷄ŋndo̍ mbō sɔ̄sa̍ ndu̍ kūu̍wo̍. 48Mi̍ Chi̍i̍sū nyūnā ndu̍ āā, “Chu̍dā, mā sɔ̍sa̍ wa᷅na̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ kūu̍wo̍ le̍ ndu̍ pīsīo̍o̍ wāŋnda̍ o̍ ba̍?”

49Mɛ̄ɛ̍ bu̍ɛ̍i̍yāa̍ Chi̍i̍sūa̍a̍ sīna̍ nyɛ̍ wa̍ hūnɔ̄ɔ̄ yɔ̄nɔ᷄ŋ ndo̍, ma̍ nyūnā Chi̍i̍sū āā, “Māsānɔ̄ɔ̍, ŋ̄ sɔ̄ŋga̍ a̍ nda̍ a̍ mɔ̄ɔ̄ŋ na᷄ŋ?” 50O̍ ko̍ŋ kɔ̍ɔ̍lī, mi̍ ō pīlɔ̍ɔ̄ lɔ̄wā bɛ̍ɛ̍ chɛ᷅ māsa̍ wānāā sōlīāā lāsa̍lāa̍, mbo̍ kīālū ndu̍ nīlē bā kɛ̄ndɛ̄le̍ŋ kpa̍li̍.

51Kɛ̍, mi̍ Chi̍i̍sū di̍mī āā, “Lā pɛ̄ŋgi̍ le̍nde̍. Lā sɔ̍ŋgā le̍.” Mbo̍ pīla᷄ŋ po̍o̍ nīle̍ŋ mbo̍ sīŋgī ndu̍.

52Mi̍ Chi̍i̍sū lo᷅ o̍ ko̍ŋ, mbo̍ sūāā nāa̍ wānāa̍ hi᷅ŋ ndu̍ bīyɔ̄ɔ̍ wa̍ chūā. Ndu̍yɛ̍, wānāā bɛ̄ndūāā sōlīāā lāsa̍lāa̍ ni̍, a̍ wānāā bɛ̄ndūa̍a̍ le̍ pōli̍si̍i̍ya̍, a̍ ma̍ndā chi̍ɛ̍ī Mɛ̄lɛ̄ka̍a̍ wa̍, a̍ lāŋgba̍ā kālla̍, nda̍ nda̍ a̍a̍ hi᷅ŋ le̍ ndu̍ bīyɔ̄ɔ̍ ni̍. Mbo̍ nyūnā nda̍ āā, “Lā vɛ᷅ hūnɔ̄ɔ̍ a̍ mɔ̄ɔ̍ŋ a̍ yɔ̄mīī bīŋgīe̍i̍ le̍ ya̍ bīyɔ̄ɔ̍ mɛ̄ɛ̍ nda̍ yɔ̄ŋ ko̍ āā, vīīnɔ̄ɔ̍ ya̍ cho̍ ni̍?” 53Mbo̍ dīmī āā, “Le̍ lēpāa̍ o̍ lēpāa̍, na̍a̍ nya̍ā ŋ̄ chō o̍ bɛ̍ɛ̄ chīɛ̍i̍ Mɛ̄lɛ̄ka̍a̍, lā bīi̍ ya̍ pɛ̄ŋgu̍ ko̍ŋ te̍. Kɛ̍ ndu̍yɛ̍, te̍le̍ŋ nyāa̍ fu̍u̍lu̍u̍ ho̍ō ni̍, te̍le̍ŋ nyūmnda̍ŋ mā chō ho̍ō mi̍ nyi̍nā wɔ̄ɔ̍ŋndo̍ wā māsāa̍ wo̍.”

Pītɛ̍ vi̍i̍nu̍ŋ māā ō si̍nā Chi̍i̍sū le̍

(Māa̍ti̍u̍ 26:57-58, 69-75; Ma̍kī 14:53-54, 66-72; Chɔ᷄ŋ 18:12-18, 25-27)

54O̍ ko̍ŋ kɔ̍ɔ̍lī, ma̍ bīī Chi̍i̍sū. Bīyɔ̄ɔ̍ ndu̍, ma̍ kūā a̍ ndu̍ o̍ wānā bɛ̍ndū sōlīāā lāsa̍lāa̍ lo̍ chi̍ɛ̍ī ni̍ŋ. Kɔ̄lā nda̍ wa̍ a̍ Chi̍i̍sū la̍ŋ, mi̍ Pītɛ̍ tu̍āl ndu̍ kɔ̄ɔ̄lī, kɛ̍ mbo̍ lōnu᷄ŋ ti̍ŋ kɔ̍ɔ̍lī. 55Kɔ̄la̍ŋ a̍ Chi̍i̍sū, mi̍ wāŋnda̍ kīīsūū yīŋnde̍ŋ o̍ bɛ̍ɛ̄ ma̍ chāl hāŋgɔ̄ɔ̍. Mi̍ Pītɛ̍ cha᷅l nda̍ tɛ̄ɛ̄ŋ. 56Cha̍lle̍ hāŋgɔ̄ɔ̍, mi̍ chūāāmbɔ̄ to̍sā wa̍llo̍ chīɛ̄ī ni̍ŋ lo̍ŋ ndo̍ chā Pītɛ̍ hɔ̄lla̍ o̍ yīŋnde̍ŋ. Mɛ̄ɛ̍ o̍ to̍fa̍ ndu̍ chi̍ŋ, mbo̍ dīmī āā, “Pōo̍ ho̍ō wa̍ā wa̍ ndu̍ kɔ̄ɔ̄lī ni̍.”

57Kɛ̍, mi̍ Pītɛ̍ vi̍i̍nu᷄ŋ. Mbo̍ dīmī āā, “I̍ si̍nā ndu̍ le̍, chūa̍a̍.”

58Vīōūwɔ̄ɔ̍ vɛ̄lɛ̄ kpɛ̍ɛ̍, mi̍ wānā che᷅le̍ŋ chā ndu̍. Mi̍ ndu̍ dīmī vɛ̄lɛ̄ āā, “Nūm bɛ̍ɛ̍ wāna̍ ndɔ̄ɔ̍ ŋ̄ chō ni̍.”

Kɛ̍, mi̍ Pītɛ̍ di̍mī āā, “Pōo̍ I̍ cho̍ wa᷅na̍ ndɔ̄ kpo̍so̍ŋ te̍.”

59Mɛ̄ɛ̍ ha̍vɛ̍i̍yo̍ hīōū ō pīlɛ̍, mi̍ wānā che᷅le̍ŋ dīmī vɛ̄lɛ̄ ō kālā ka̍lā āā, “Lē kɛ̍ndɛ̍ī lāŋu̍nɔ̄ɔ̍ ho̍ō wa̍ā nda̍ wa̍ ndu̍ kɔ̄ɔ̄lī ni̍. Kāni̍ fo̍ndōle̍, o̍ lɛ̄ŋndē Kāli̍līle̍ŋ ni᷄ŋ o̍ fu̍la̍ ni̍.”

60Mi̍ Pītɛ̍ mu̍lī āā, “Pōo̍, I̍ si̍nā nyɛ᷅ ŋ̄ chō bɛ̍ɛ̍ di̍mīo̍o̍ wo̍ pɛ̄ŋgu̍ le̍.”

Pītɛ̍ chīi̍ bɛ̍ɛ̍ su̍ɛ̍i̍ le̍ mi̍ sɔ̄ɔ̍ kōōwā. 61Mi̍ Māsānɔ̄ɔ̍ Chi̍i̍sū mūli᷄ŋ mbo̍ tōfā Pītɛ̍. Tōfāa̍ ndu̍ ma̍ bɔ̄ŋā hɔ̄lla̍, mi̍ Pītɛ̍ lo̍o̍nu᷄ŋ su̍ɛ̍i̍ Māsānɔ̄ɔ̍ Chi̍i̍sū dīmu̍l ndu̍ ve̍ āā, “Lɔ̍ɔ̍pa̍ sɔ̄ɔ̍ kōōwā si̍ɔ̍dīi̍ ā chō dīmī lēyāa̍ māā a̍ si̍nā ya̍ le̍.” 62Mi̍ Pītɛ̍ fa̍ŋa᷄ŋ lo̍ŋ mbo̍ kɔ̍ cha᷅ŋ cha᷄ŋndo̍ pi̍la̍.

So̍vɛ̄i̍ya̍ ma᷄m Chi̍i̍sū

(Māa̍ti̍u̍ 26:67, 68; Ma̍kī 14:65)

63Mi̍ pūa̍a̍ so̍vɛ̄i̍ya̍ a̍ wa̍ Chi̍i̍sū hɔ̄lte̍ŋ nda̍, ā sāā ndu̍ māmɔ̄ɔ̍ mā lūāā ndu̍. 64Ma̍ yīī ndu̍ kōlāa̍ o̍ hɔ̄l. Tē ā lɔ̄ɔ̄ ni᷅ŋ ndu̍ pɛ̍, ā dīmu̍l ndu̍ āā, “Chɔ̍m ndɔ̍ na̍a̍ wāna̍ lɔ̍ɔ̄ nu̍m ndo̍.” 65O̍ ko̍ŋ kɔ̍ɔ̍lī, ma̍ yīōū ndu̍ ta̍u̍ ta̍u̍.

Ā kūɛ̄ a̍ Chi̍i̍sū nāa̍ lāŋgba̍ā kālāa̍ ki̍a̍lū ya᷅ma̍ŋ nda̍ chūā

(Māa̍ti̍u̍ 26:59-66; Ma̍kī 14:55-64; Chɔ᷄ŋ 18:19-24)

66Mɛ̄ɛ̍ pāa̍le̍ŋ lē sɛ̄, mi̍ lāŋgba̍ā kālāā lēlɛ̄ŋnda̍ ā kɔ̍ bi̍ī bɔ̄ŋa᷅ŋndo̍ nda̍ wānāā bɛ̄ndūāā sōlīāā lāsa̍lāa̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍. Ma̍ hūŋ a̍ Chi̍i̍sū nāa̍ nda̍ chūā. 67Mi̍ lāŋgba̍ā kālla̍ ha̍ā dīmūl Chi̍i̍sū āā, “Tē nu᷄m cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄ī māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, mɛ̄ɛ̍ di̍mu̍l na̍a̍.”

Mi̍ Chi̍i̍sū mu̍lūl nda̍ āā, “I̍ di̍mu̍l nya̍ bɛ̍ɛ̍ māā ya̍ cho̍ Ki̍li̍tī ni̍, lā la̍a̍lāŋ ni̍ŋ te̍. 68Ndu̍yɛ̍ I̍ nyu̍na̍ nya̍ bɛ̍ɛ̍, lā mu̍li̍ ni̍ŋ te̍.” 69Mbo̍ dīmūl nda̍ āā, “Kɛ̍ ndu̍yɛ̍ chɔ̍ŋ a̍ te̍le̍ŋndo̍ ho̍ō mbō kūɛ̄ a̍ lāchī, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chō wā īchāli̍ o̍ fo̍ndāŋ lēbīɔ̍ɔ̍, o̍ bā kɛ̄ndɛ̍ Mɛ̄lɛ̄ka̍ nɔ̍ kpāāyāa̍ wo̍ chōo̍.”

70Ma̍ lō lo̍ŋ nda̍ kpo̍u̍, ma̍ nyu̍na̍ ndu̍ āā, “Mɛ̄ɛ̍ nu᷄m cho̍ po̍ Mɛ̄lɛ̄ka̍a̍ ni̍?”

Mbo̍ mūlūl nda̍ āā, “Nyɛ̄ nya̍ dīmi̍ wo̍ chō tōnya̍ māā ya̍ cho̍ ndu̍ ni̍.”

71Mɛ̄ɛ̍ o̍ di̍mi̍ dɔ̍ɔ̍ le̍nde̍, ma̍ dīmī āā, “Se̍ī māā vɛ̄ɛ̍nɛ̍ wa̍nā ye̍e̍mā yɛ̍ vɛ̄lɛ̄ mbō sōō? Ŋ̄ tūēī ni᷅ŋ ndu̍ pi̍la̍ o̍ sōndō mbo̍ dīmī māā ndu̍ cho̍ Po̍ Mɛ̄lɛ̄ka̍a̍ ni̍.”

Currently Selected:

Lu̍kū 22: YM

Highlight

Copy