Lu̍kū 21

A̍ mɛ̄ɛ̍ chūā vīi̍yo̍ ō ke̍ Mɛ̄lɛ̄ka̍ yɛ̍

(Ma̍kī 12:41-44)

1Bōōndi̍i̍ pi᷅lɛ̍ Chi̍i̍sū wa̍ īchāli̍ o̍ chīɛ̍i̍ Mɛ̄lɛ̄ka̍a̍ ni᷄ŋ, mbo̍ wā mɛ̄ɛ̄ndīa̍ŋndo̍. O̍ ko̍ŋ kɔ̍ɔ̍lī, mbo̍ chā wānāā sūlāa̍ kēlā nda̍ nɔ̄ le̍ Mɛ̄lɛ̄ka̍ la̍ŋ dɔ̄wɔ̄ɔ̍ o̍ kɔ̍fū nda̍ dūāū ka̍ni̍ŋ Mɛ̄lɛ̄ka̍ŋ ndo̍ ni᷄ŋ. 2Mbo̍ chā mi̍ chūā tāmbɛ̍i̍ pi᷅lɛ̍ ō pɔ̍nɔ̍ ndɔ̄ vi᷅ wo̍ hūŋ. Mbo̍ dūāū ka̍ni̍ŋ pɔ̍mbɔ᷄ŋ ŋ̄ mūu̍ŋ. 3O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Mī di̍mu̍l nya̍, chūā vīi̍ ta̍mbɛ̍i̍yo̍ ho̍ō, ndu̍ hi̍o̍ū ka̍ni̍o̍ŋ dɔ̄wɔ̄ɔ̄ a̍ ha̍ā kpo̍u̍. 4Wāŋnda̍ ha̍ā kpo̍u̍ ā nɔ̄ ta̍u̍. Ndu̍yɛ̍, nyɛ̄ nda̍ nɔ̄ wo̍ ō ti᷄ŋ ko̍ni̍ nda̍ dɔ̄ū ni̍. Kɛ̍ chūa̍a̍ ho̍ō ndu̍, a̍ bā ndɔ̄ ha̍vɛ̍i̍ ko̍ŋ kpo̍u̍, mbo̍ dūāū ka̍ni̍ŋ pɔ̍mbɔ̄ŋ o̍ ti̍i̍nda̍ŋ ndo̍ŋ fa̍ū.”

Chi̍i̍sū so̍ō a̍ chīɛ̍i̍ Mɛ̄lɛ̄ka̍ pīɔ̄llo̍ o̍kɔ̄ɔ̄

(Māa̍ti̍u̍ 24:1-2; Ma̍kī 13:1-2)

5Mi̍ wāŋnda̍ ā pūm ā dīmūl Chi̍i̍sū a̍ chīɛ̍i̍ Mɛ̄lɛ̄ka̍a̍ o̍kɔ̄ɔ̄ āā, “To̍fa̍ wɔ̍ mɛ̄ɛ̍ chīɛ̄īyo̍ ho̍ō chō ō tāŋgūlāā a̍ pōūtā kɛ̄ndɛ̄lā bɛ̄ndūla̍ŋ yɛ̍. To̍fa̍ wɔ̍ nyɛ᷅m kɛ̄ndɛ̄ŋ wāŋnda̍ yɔ̄ŋgu̍ le̍ Mɛ̄lɛ̄ka̍ wo̍ŋ.” Mi̍ Chi̍i̍sū lo᷅ lo̍ŋ mbo̍ di̍mūl nda̍ āā, 6“Nyɛ̄ o̍ nyɛ̄ nya̍ chō chɔ̄ɔ̍, bōōndi̍i̍ cho̍ fūūlūū mī wāŋnda̍ pēsi̍ mu̍ŋ wɔ̍ wɔ̍. Pōūwo̍ ō pīlɛ̍ bɛ̍ɛ̍ lo᷅ ni̍ŋ o̍ chāa̍ŋ ndɔ̄ cho̍o̍ le̍.”

Sīlāa̍ a̍ dɛ̍nɛ̍ pa̍lāa̍ a̍ yɛ̄lē tūlāāle̍ wa᷅ ni̍ŋ nde̍ŋ

(Māa̍ti̍u̍ 24:3-14; Ma̍kī 13:3-13)

7Mi̍ wāŋnda̍ lō o̍ ko̍ŋ, ma̍ nyūnā Chi̍i̍su̍ āā, “Ti̍chā, chɔ̍m ndɔ̍ na̍a̍ bōōndi̍i̍ sɔ̄ɔ̍ŋ mu᷅ŋ ŋ̄ chō hūnɔ̄ɔ̄ yɔ̄nɔ᷄ŋ nde̍. Ɔ̍ɔ̄ tāāmāsi̍ yɔ̍nūŋ ni̍ŋ le̍ sīnāa̍ māā te̍le̍ŋndo̍ fūūlu̍u̍ le̍ mī sūɛ̍i̍ he̍ī yɔ̄nu̍ŋ ndo̍?”

8Mbo̍ mūlī āā, “Lā mānda̍ŋ, yɔ̍ŋi̍ wānā o̍ wānā hu̍i̍ nya̍. Kāni̍ fo̍ndōle̍, wānāā fāŋgā fa̍ŋgā ā hūŋ ni̍ŋ mā chu̍a̍ dīōlā nīla̍ŋ mā dīmi̍ māā nda̍ cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍. Ndu̍yɛ̍, ā hūŋ hi̍ŋ mā dīmi̍ āā, ‘Te̍le̍ŋndo̍ fūūlu̍u̍.’ Kɛ̍, lā tu̍āl nda̍ kɔ̄ɔ̄lī le̍. 9Tē lā tūēī pɛ̍ mī chɔ̄ūla̍ŋ lā wa̍, ndu̍yɛ̍ mī lā tūēī mī wāŋnda̍ sīmu̍l māsāa̍ ndāa̍, lā yɔ᷅ŋ īsīōōŋ te̍. Sɔ̄ɔ̍ŋ mu᷅ŋ fɛ̍lɛ̍ŋ ŋ̍ nɔ̍ le̍ yɔ̄nɔ᷄ŋndo̍. Kɛ̍, mu̍ŋ yɔ̍nu̍ŋ bɛ̍ɛ̍, ko̍ŋ chɔ᷅m māā mɛ̄ɛ̄lu̍la̍ chi̍e̍ēŋndo̍ le̍ la̍ fu̍u̍lu̍u̍ la̍ŋ te̍.”

10Mbo̍ hīāū lāchī a̍ dīmīo̍o̍ āā, “Māsāa̍ a̍ māsāa̍ ā sɔ̄ŋgā ni̍ŋ mī lɛ̄ŋnde̍ŋ a̍ lɛ̄ŋnde̍ŋ ā sɔ̄ŋga̍. 11Lɛ̄ŋnde̍ŋ lē nyīīya̍ ni̍ŋ ta̍u̍ o̍ fo̍ndāŋndā fāŋgā fa̍ŋgā. Yīa̍a̍ŋ mā dēl ni̍ŋ, ndu̍yɛ̍ mī nāāla̍ ta̍ŋ wa᷅ŋnda̍ la̍ŋ lā kūi̍i̍ o̍ fo̍ndāŋndā fāŋgā fa̍ŋgā. Sɔ̄ɔ̍ŋ ŋ̄sīōōŋndo̍ŋ, ŋ̄ chō yɔ̄nɔ᷄ŋ mī kpālōla̍ bɛ̍ndūla̍ŋ lā yɔ̄nu̍ŋ o̍ ha̍la̍a̍ ni᷄ŋ. 12Kɛ̍, lɔ̍ɔ̍pa̍ mu᷅ŋ yɔ̄nūŋ, ā chō nya̍ bīyɔ̄ɔ̄ mā tūsi̍ nya̍ nyɛ̄ pālāa̍ chōo̍. Ā chō lākɔ̄ a̍ nya̍ o̍ tōŋgōla̍ Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ, mā kɔ̄ɔ̄sa̍ a̍ nya̍ mā dɔ̄ū nya̍ o̍ chīɛ̄īlā mānyūmnda̍ŋ ni᷄ŋ. Ndu̍yɛ̍, ā chō lākɔ̄ a̍ nya̍ o̍ māsāā bɛ̍ndūa̍a̍ lo̍ a̍ wānāa̍ cho̍ lɛ̄ŋnde̍ŋ bōlle̍ŋ nda̍ le̍ sa̍bū nūu̍. 13Tē ā kūɛ̄ a̍ nya̍ pɛ̍, a̍ bōōndi̍i̍ ke̍ŋ nya̍ sɔ̄lā ni᷅ŋ fo̍ndāa̍ le̍ nda̍ nyɛ̄ nya̍ sīnā a̍ ya̍ o̍kɔ̄ɔ̄ wo̍ dīmūllo̍ ni̍. 14Ndu̍yɛ̍, lā kɛ̄si̍ŋ su̍ɛ̍i̍ he̍ī o̍ kɔ̄l nyɛ̄ kɛ̄ndɛ̍ī. Tē ā kūɛ̄ le̍ kɔ̍ɔ̍sɔ̍ɔ̍ a̍ nya̍ pɛ̍, lā kɛ̍ɛ̍sīāā pɔ̄ɔ̄ mɛ̄ɛ̍ nya̍ kɔ̄ɔ̄sā yɛ̍ le̍. 15Kāni̍ fu̍u̍le̍, ya̍ pi̍la̍ I̍ cho̍ nya̍ dīōmndā nya̍ nɔ̄ le̍ dīmīo̍o̍ la̍ŋ dɔ̄wɔ̄ɔ̄ o̍ sōndō, ndu̍yɛ̍ mī I̍ ke̍ nya̍ kɔ̄l kālo̍o̍ mɛ̄ɛ̍ nya̍ kɔ̄ɔ̄sā yɛ̍. O̍ ko̍ŋ, wānāa̍ ku̍ā ka̍ŋ a̍ nya̍ o̍ māsāa̍ lo̍ wa̍, ā nɔ̍lā mā si᷄m nya̍ bɛ̍ɛ̍ o̍ hɔ̄l a̍ kɔ̍ɔ̍sɔ̍ɔ̍ le̍. 16Ndu̍yɛ̍, wānāa̍ ve̍lū nya̍ wa̍ bɛ̍ɛ̍, a̍ bɛ̄ndāā nyāa̍, a̍ pɔ̄mbūāā nyāa̍, a̍ wānāya᷅ŋ nya᷄ŋ, a̍ ndi̍a̍a̍mɔ̍ɔ̍wa̍a̍ nyāa̍, ā chō nya̍ mālɔ̄ɔ̄ wānāa̍ kɔ̍ɔ̍sā a̍ wāŋnda̍ wa̍ o̍ bā. O̍ ko̍ŋ kɔ̍ɔ̍lī, mī wānāa̍ kɔ̍ɔ̍sā a̍ wāŋnda̍ wa̍ tōsa̍ mī nya̍ pūm nda̍ sɔ̄la̍ pīɔ̍mnda̍ŋ. 17Wāŋnda̍ kpo̍u̍, ā chō nya̍ yɛ̄le̍ŋ tūl le̍ mɛ̄ɛ̍ nya̍ lāāla̍ŋ a̍ ya̍ yɛ̍. 18Kɛ̍ ndu̍yɛ̍, nyɛ̄ o̍ nyɛ̄ yɔ̍nūŋ ni̍ŋ nya̍ le̍. Yīīŋnde̍ŋ lē pīlɛ̍ bɛ̍ɛ̍ nya̍ o̍ lēbōl lē yɔ̍nūŋ ni̍ŋ nyɛ̍ le̍. 19Lā si᷄m a̍ dīāllūŋ kālā. O̍ ko̍ŋ, lā nɔ̄lā mī lā pīŋi̍ yōōmūlā nyāla̍ŋ.”

A̍ Chūlu̍sɛ̄lɛ̄m pīɔ̄lɔ̄ɔ̍ o̍kɔ̄ɔ̄

(Māa̍ti̍u̍ 24:15-21; Ma̍kī 13:14-19)

20Mi̍ Chi̍i̍sū di̍mī āā, “Lā chō chɔ̄ mī wānāā chɔ̄ūwa̍ hu᷄ŋ ba̍lū Chūlu̍sɛ̄lɛ̄m. Tē he̍ī yɔ̄nu̍ŋ pɛ̍, mɛ̄ɛ̍ lā sīna̍ ni̍ko̍ māā te̍le̍ŋndo̍ fūūlu̍u̍ le̍ mā pɛ̄l ndu̍. 21Tē he̍ī yɔ̄nu̍ŋ pɛ̍, mɛ̄ɛ̍ wānāa̍ cho̍ o̍ lɛ̄ŋndē Chūdi̍a̍āle̍ŋ ni᷄ŋ nda̍ ā nyāānu̍ŋ o̍ pēmbo᷄ŋ. Wānāa̍ cho̍ Chūlu̍sɛ̄lɛ̄m nda̍ ā ma᷄l mā nyāānu̍ŋ. Ndu̍yɛ̍, wānāa̍ cho̍ o̍ sɔ̄ndɔ̄kɔ̍lta̍ŋ nda̍ ā ku̍ā Chūlu̍sɛ̄lɛ̄m chi̍e̍e̍ le̍. 22Kāni̍ fo̍ndōle̍, bōōndi̍i̍ ke̍ŋ Mɛ̄lɛ̄ka̍ chō wānāā ndūa̍a̍ I̍sɔ̄lūɛ̄ī nyɛ̄ pālāa̍ tūsī chōo̍ ni̍. Ndu̍yɛ̍ o̍ he̍ī ni᷄ŋ, mī nyɛ̄ o̍ nyɛ̍ cho̍ ō pōōnyīāā o̍ Yāu̍ Mɛ̄lɛ̄ka̍a̍ ni᷄ŋ mbō yɔ̍nu̍ŋ mɛ̄ɛ̍ o̍ cho̍ ō pōōnyīāā yɛ̍. 23Nyɛ̄ pālāa̍ wā ni̍ŋ bɔ̍ɔ̍ le̍ wānāā lāyo᷄lla̍ a̍ ko̍msa̍a̍ o̍ pālɛ̍i̍ ke̍ŋ ni᷄ŋ. Kāni̍ fo̍ndōle̍, nyɛ̄ kīndīlāā bɛ̄ndōo̍ chō hūnɔ̄ɔ̄ o̍ chi̍e̍ēŋndo̍ ho̍ō chōo̍. Mɛ̄lɛ̄ka̍ chō nyɛ̄ pālāa̍ tūsī wāŋnda̍ ha̍ā chōo̍. 24Ya̍a̍mɔ̍ɔ̍wa̍ chō ā ti᷄ŋ dīyɔ̄ɔ̄ a̍ mɔ̄ɔ̍ŋ, ndu̍yɛ̍ mā kūɛ̄ a̍ ā ti᷄ŋ o̍ bīyɔ̄ɔ̍ ni᷄ŋ o̍ lɛ̄ŋnde̍ ni᷄ŋ ba᷅ o̍ bā fe̍e̍ o̍ chi̍e̍ēŋndo̍ chōo̍. Wāŋnda̍ Chūlu̍sɛ̄lɛ̄m ā chō wā wānāa̍ cho̍ a̍ Chu̍ū le̍ wa̍ o̍ bā bɛ̄ŋgu̍, ndu̍yɛ̍ mā lo̍ nda̍ nyɛ̄ pālāa̍ tūsīo̍o̍ chōo̍, ha̍a̍a̍ mbō lo̍ o̍ ko̍ŋ mī bōōndi̍i̍ Mɛ̄lɛ̄ka̍ yūlū le̍ mī wānāa̍ cho̍ a̍ Chu̍ū le̍ wa̍, ā wa̍ wāŋnda̍ Chūlu̍sɛ̄lɛ̄m chōo̍ ve̍ ī fūūlu̍u̍ o̍ mɛ̄ɛ̄lu̍la̍ŋ.”

Sɔ̄ɔ̍ŋ yɔ̍nūŋ ni̍ŋ o̍ chi̍e̍ēŋndo̍ mɛ̄ɛ̄lu̍la̍ŋ ndo̍ŋ

(Māa̍ti̍u̍ 24:29-31; Ma̍kī 13:24-27)

25Mi̍ Chi̍i̍sū di̍mī vɛ̄lɛ̄ āā, “Sɔ̄ɔ̍ŋ lākpālo᷄ŋ chō yɔ̄nɔ᷄ŋ o̍ pāa̍le̍ŋ, a̍ pāŋge̍i̍, a̍ lōo̍ŋ. Būūla᷄ŋ bɛ̍ndōo̍ wā ni̍ŋ lɛ᷅ŋnde̍ o̍ chi̍e̍ēŋndo̍ chōo̍, mī kɔ̄lta̍ŋ lā lāāsi̍a̍ŋ wa᷅ŋnda̍ a̍ kpōku̍ kpo᷅ku̍ bɛ̍ndū pēē mɛ̄ŋmā īhɛ᷄llo̍ ō wā ni̍ŋ ndo̍. 26Wāŋnda̍ wōū ni̍ŋ kpa̍nɛ̍i̍ a̍ sīōōŋnde̍. Ā wā ni̍ŋ a̍ kɔ̄ltā lānda᷄ŋnda̍ŋ le̍ nyɛ̍ cho̍ hūnɔ̄ɔ̄ yɔ̄nɔ᷄ŋ o̍ chi̍e̍ēŋndo̍ chōo̍ wo̍. Kāni̍ fo̍ndōle̍, kpāāyāla̍ŋ chōo̍ cho̍o̍ la̍ cho̍ fāŋa᷄ŋ o̍ fo̍ndāŋndā ndāla̍ŋ. 27O̍ ko̍ŋ kɔ̍ɔ̍lī, wāŋnda̍ chō wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chɔ̄ hūnɔ̄ɔ̍ o̍ yu̍mbu̍ yu̍mbo̍o̍ ni᷄ŋ, a̍ kpāāyāa̍, a̍ nāŋɔ̄ɔ̄ bɛ̄ndōo̍. 28Tē sɔ̄ɔ̍ŋ mu᷅ŋ kāndu̍ yɔ̄nɔ᷄ŋndo̍ pɛ̍, lā wa̍ ni̍ko̍ le̍hɔ̍l o̍ nɛ̄ī, kāni̍ fo̍ndōle̍ māā bōōndi̍i̍ Mɛ̄lɛ̄ka̍ chō nya̍ pīŋī ve̍ ī chō ni᷅ŋ kpɛ̍ɛ̍lūŋ.”

Pɛ̄ɛ̄kōo̍ a̍ yɔ̄mndo̍ o̍kɔ̄ɔ̄

(Māa̍ti̍u̍ 24:32-35; Ma̍kī 13:28-31)

29Mi̍ Chi̍i̍sū di̍mūl nda̍ tālo̍o̍ ho̍ō āā, “Lā lōōnu̍ŋ a̍ yɔ̄m fi̍kīi̍yo̍, a̍ yɔ̄mīī chēle̍ŋnde̍. 30Tē lā chē pɛ̍ mī yɔ̄mnde̍ he̍ī ī kāndu̍ pēī sɛ̍nɛ̄īye̍ sōlīo̍o̍, nya̍ pi̍la̍ sīna̍ dɔ̍ɔ̍ māā sīālte̍ŋ lē chō ni᷅ŋ kpɛ̍ɛ̍lūŋ.” 31Mi̍ Chi̍i̍sū di̍mī āā, “Le̍nde̍ ko̍ni̍, i̍ cho̍ ni̍. Tē lā chē pɛ̍ mī sɔ̄ɔ̍ŋ mu᷅ŋ ŋ̄ wa̍ yɔ̄nɔ᷄ŋndo̍, lā sīna̍ ni̍ko̍ māā te̍le̍ŋ Mɛ̄lɛ̄ka̍ chō kāndɔ̄ɔ̄ wāa̍ wāŋnda̍ chōo̍ ma̍sāa̍ wo̍, chō ni᷅ŋ kpɛ̍ɛ̍lūŋ.

32“Mī di̍mu̍l nya̍, wānāa̍ cho̍ yōōmū te̍le̍ŋndo̍ ho̍ō wa̍, ā cho̍ chu̍wɔ̄ɔ̄ wu̍ le̍ ha̍a̍a̍ mī sɔ̄ɔ̍ŋ mu᷅ŋ kpe̍de̍ ŋ̍ yɔ̍nu̍ŋ. 33Ha̍la̍a̍ a̍ chi̍e̍ēŋndo̍ ā fāŋāŋ, kɛ̍ dīōmndā nīla̍ŋ lā fe̍ŋāŋ le̍cho̍o̍ le̍.”

Le̍ sa̍bū na̍a̍ ŋ̄ māndāŋ ndo̍

34“Lā mānda̍ŋ. Lā yɔ̍ŋgu᷄ŋ nya̍ pi̍la̍ o̍ kūūlīāālā nyɛ̄ dīāā la̍ŋ chōo̍, a̍ o̍ kōlɔ̄ɔ̄ kālā ka̍lāa̍ ni᷄ŋ te̍. Ndu̍yɛ̍, lā yɔ̍ŋgu᷄ŋ o̍ kɔ̄l lānda᷄ŋ nyɛ̄ nu̍u̍wāā chi̍e̍ēŋndo̍ ho̍ō ni᷄ŋ te̍. Tē lā yɔ̄ŋgu̍ŋ o̍ nyɔ̄ɔ̍ŋ mu᷅ŋ ni᷄ŋ pɛ̍, pāa̍le̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ nɔ̄ le̍ hūnɔ̄ɔ̍ le̍ŋ lē chō fūūlūū, ndu̍yɛ̍ mī lē kōma̍l nya̍, lā ve᷅ ni̍ŋ kɔ̍l kpo̍so̍ŋ te̍. 35Kāni̍ fo̍ndōle̍, wāŋnda̍ kpo̍u̍ o̍ chi̍e̍ēŋndo̍ chōo̍, pāa̍le̍ŋ nde᷅ŋ lē wōōlū ni̍ŋ nda̍ ko̍ mɛ̄ɛ̍ yāŋɔ̄ɔ̄le̍ŋ lē sāā vi̍sīo̍o̍ nu̍a̍ā yɛ̍. 36Lā mānda̍ŋ. Ndu̍yɛ̍ mī lā pīɛ̍i̍ Mɛ̄lɛ̄ka̍ le̍ te̍le̍ŋ o̍ te̍le̍ŋ. Lā pīɛ̍i̍ Mɛ̍lɛ̄ka̍ le̍ mī lā sɔ̄la̍ kpāāyāa̍ le̍ hīɔ̄lɔ᷄ŋndo̍ o̍ sɔ̄ɔ̍ŋ cho̍ mu᷅ŋ hūnɔ̄ɔ̄ yɔ̄nɔ᷄ŋndo̍ wo̍ŋ ni᷄ŋ, ndu̍yɛ̍ mbō lo̍ o̍ ko̍ŋ, mī lā si᷄m fɛ̍lɛ̍ŋ wāna̍ nda̍ vēēlū āā, Po̍ wānā Pɔ̍nɔ̍ɔ̍ wo̍ o̍ hɔ̄l.”

37Lēpāa̍ o̍ lēpāa̍, Chi̍i̍sū wa̍ wāŋnda̍ pɛ̄ɛ̄kōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Tē nyūmnda̍ŋ mā tōl pɛ̍, ō kūɛ̄ o̍ Pēmbīī Yɔ̄mīī Ɔ̄li̍fīi̍ve̍ ve̍ ō kɔ̍ lɔ̍lnu᷄ŋ lo̍ŋ. 38Ndu̍yɛ̍, dīmīo̍o̍ nu̍a̍ā āā, pāa̍le̍ŋ lē sɛ̄, mī wāŋnda̍ kpo̍u̍ a̍ hi᷅ŋ le̍ ndu̍ nīla̍ŋ yāŋɔ̄ɔ̄ o̍ chīɛ̍i̍ Mɛ̄lɛ̄ka̍a̍ ni᷄ŋ.

Currently Selected:

Lu̍kū 21: YM

Highlight

Copy