Chɛ̄nɛ̍se̍ē 27

Āa̍se̍ dɔ̍ū Che̍kɔ̍pū sa̍lā

1Mi̍ ī yɔ̄nu᷄ŋ, mi̍ Āa̍se̍ yu̍wā ni᷅ŋ ta̍u̍. A̍ bōōndi̍i̍ ke̍ŋ, ndu̍ o̍o̍ chi᷅ lɛ̍ le̍. Mbo̍ vēēlū po̍ ndɔ̍ tāso̍o̍ I̍īsɔ̄, āā, “Po̍ nūu̍.”

Mi̍ I̍īsɔ̄ chɛ᷅l āā, “Ēe̍.”

2Mbō dīmūl ndu̍ āā, “I̍ yu̍wa̍. I̍ si̍nā pa̍a̍le̍ ya̍ I̍ cho̍ wu̍ le̍. 3Le̍la̍ŋ, chu̍a̍ wo̍lɔ̄ɔ̄lā nūmnda̍ lēdōōsūla̍ŋ, chīɔ̄ū nūmndo̍ ni̍ a̍ bɔ̄lɔ̄ nu̍m māchīŋɔ̍ɔ̍, mā kɔ̍ to̍sāl la̍ dōōsūle̍ŋ. 4Tē ā hīŋ pɛ̍, a̍ hu̍ŋ yo̍ū ya̍ nyɛ̄ dīa̍a̍ ō yēēlɛ̍i̍, mɛ̄ɛ̍ o̍ hɛ̍na̍ŋ ya̍ yɛ̍. A̍ ya̍u̍ pɛ̍, a̍ chu̍u̍ ya̍ I̍ de᷅, I̍ dɔ̍ū nu̍m sa̍lā, lɔ̍ɔ̍pa̍ ya̍ I̍ wu᷅.”

5Mɛ̄ɛ̄māā bōōndi̍i̍ Āa̍se̍ wa̍ sūɛ̍i̍ nāa̍ I̍īsɔ̄ chu̍a̍ ve̍, Lūībɛ̍kā wa̍ nīla̍ŋ yāŋɔ̄ɔ̍. O̍ ko̍ŋ kɔ̍ɔ̍lī, mi̍ I̍īsɔ̄ cha̍ŋ mbo̍ kūā dōōsūle̍ŋ yōndōo̍ ni᷄ŋ. 6Mɛ̄ɛ̍ I̍īsɔ̄ hi̍o̍ū dɔ̍ɔ̍, mi̍ Lūībɛ̍kā di̍mūl Che̍kɔ̍pū po̍ ndɔ̄ āā, “Che̍kɔ̍pū, I̍ tu̍e̍ī mi̍ fi̍nyā nūm wa᷅ I̍īsɔ̄ bɛ̍nu᷄m dīmūllo̍, 7‘Māā ō kɔ̍ to̍sāl ndu̍ dōōsūle̍ŋ mbō hu᷄ŋ yo̍ū ndu̍ nyɛ̄ dīa̍a̍ ō yēēlɛ̍i̍, mɛ̄ɛ̍ o̍ hɛ̍na̍ŋ yɛ̍, mbō dē. Āā tē ō dē pɛ̍, ō dɔ̄ū ndu̍ sa̍lā o̍ Mɛ̄lɛ̄ka̍ Ya̍a̍wɛ̄ɛ̄ lo̍ lɔ̍ɔ̍pa̍ o̍ wu᷅.’ 8Le̍la̍ŋ, to̍sa̍ mɛ̄ɛ̍ ya̍ I̍ cho̍ nu̍m dīmūl lɛ̍, po̍ nūu̍. 9Kɔ̍ na̍a̍ ma̍ndāā lāchɔ̄lūa̍a̍ mā kɔ̍ chu̍ū ya̍ chūīŋāā fɔ̍ŋndu̍a̍a̍ ā ŋīɔ̍ɔ̍ŋ. Ā hīŋ a̍ nda̍ pɛ̍, I̍ ya̍u̍ nyɛ̄ dīa̍a̍ ō yēēlɛ̍i̍ mɛ̄ɛ̍ o̍ hɛ̍nāŋ fi̍nyā nu᷄m yɛ̍. 10Tē I̍ chi̍i̍ pɛ̍, a̍ yo̍u̍ fi̍nyā nu᷄m o̍ kɔ̍ di̍ō, ō dɔ̄ū nu̍m sa̍lā lɔ̍ɔ̍pa̍ o̍ wu᷅.”

11Kɛ̍, mi̍ Che̍kɔ̍pū di̍mūl kāla̍ ndɔ̄ āā, “Kɛ̍ bɛ̄ nūu̍ ndu̍ nɔ̍ yīīŋnde̍ lēkɔ̄ɔ̍ ta̍u̍. Ya̍ yɛ̍ kɔ̄ɔ̍le̍ŋ ya̍ kpɔ̍lɔ̄kɔ̍. 12Tē ō lo̍ yɛ̄ o̍ ko̍ŋ mī kɛ̄kɛ̍ pīīli̍a̍ŋ ya̍ dīāllo̍ŋ? Te̍ ō sīna̍ pɛ̍ māā ya̍ ni̍, ō chō dīmī māā I̍ hu̍i̍i̍ ndu̍, o̍ ko̍ŋ, mbō mīī ya̍ mēnā o̍ Mɛ̄lɛ̄ka̍ lo̍.”

13Mi̍ kāla̍ ndɔ̄ di̍mūl ndu̍ āā, “Ō wa̍ sūɛ̍i̍ sēndi̍ pɛ̍, sēndi̍ kōŋ ō wa̍ ya̍ pi̍la̍ chōo̍. Nūm to̍sa̍ su̍e̍e̍ mɛ̄ɛ̍ ya̍ I̍ di̍mu̍l nu̍m yɛ̍, mā chu̍u̍ ya̍ chɔ̄lūāā ŋīɔ̍ɔ̍ŋnda̍.” 14O̍ ko̍ŋ, mi̍ Che̍kɔ̍pū ku̍ā mbo̍ kɔ̍ hu᷅ŋ a̍ chūīŋāā fɔ̍ŋndu̍a̍a̍ ŋi̍ɔ̍ɔ̍ŋnda̍ nāa̍ kāla̍ ndɔ̄ chu̍a̍. Mi̍ kāla̍ ndɔ̄ bɛ̍ɛ̍ndīāā nyɛ̄ dīa̍a̍ ō yēēlɛ̍i̍ mɛ̄ɛ̍ o̍ hɛ̍na̍ŋ fi̍nyā ndɔ̍ yɛ̍. 15Mi̍ Lūībɛ̍kā mu̍li᷄ŋ mbo̍ chūā nyɛ̄la̍ I̍īsɔ̄ la̍ wa̍ chīɛ̄ī ni̍ŋ ndu̍ o̍ bā la̍ŋ, lā kɛ̄ndɛ̄ kɛ̍ndɛ̄la̍ŋ, mbo̍ wōū Che̍kɔ̍pū. 16Mbo̍ chūā yāu̍la̍ chūīŋāā nda̍ dīī ya̍, mbo̍ hōlī ndu̍ o̍ bāla̍ŋ a̍ kɛ̄se̍i̍ nāa̍ o̍ nɔ̍ i̍yi̍i̍ŋ te̍ wa̍. 17Mbo̍ chūā nyɛ̄ dīāā yēēlɛ̍i̍ o̍ ya̍u̍ wo̍, a̍ bēe̍dīi̍ o̍ to̍o̍si̍a̍a̍ wo̍ mbo̍ kē Che̍kɔ̍pū.

18Mi̍ Che̍kɔ̍pū ku̍ā a̍ ndu̍ nāa̍ fi̍nyā ndɔ̄ chu̍a̍. Mbo̍ vēēlū āā, “Kɛ̄kɛ̍, kɛ̄kɛ̍.”

Mi̍ fāllo̍ chɛ̄l āā, “Ēe̍.” Mbo̍ nyūnā āā, “Nūm nɛ̄ɛ̍nɛ̍?”

19Mi̍ Che̍kɔ̍pū di̍mī āā, “Ya̍ ni̍ kɛ̄kɛ̍, po̍ nu̍m tāso̍o̍ I̍īsɔ̄ ni̍. I̍ to̍sa̍ nyɛ̄ ŋ̄ dīmi̍ wo̍. Chɔ̍ŋ ni̍ko̍ mā dē nyɛ̄ māhīlū ya̍ I̍ ya̍u̍ wo̍, mā dɔ̄ū ya̍ sa̍lā.”

20Kɛ̍ mi̍ Āa̍se̍ di̍mī āā, “A̍ ke̍le̍ŋa̍ bɔ̄ɔ̍, vɛ̄ɛ̍nɛ̍ ŋ̄ lōōku̍ yɛ̄ vīsīo̍o̍ sāālɔ᷄ŋ nu̍a̍ā chɔ̍ chɔ̍?”

Mi̍ Che̍kɔ̍pū di̍mī āā, “Mɛ̄lɛ̄ka̍ Ya̍a̍wɛ̄ɛ̄ ō ŋ̄ chō pīɛ̄īyo̍ wo̍, ndu̍ kpo̍so̍ŋ yo̍o̍la̍ ya̍ nu̍a̍ā ni̍.”

21Mi̍ Āa̍se̍ di̍mī āā, “Sɔ̍ɔ̍ŋgu̍u̍ wɔ̍ na̍nu᷄ŋ I̍ pi̍lāŋ nu̍m, tē I̍īsɔ̄ po̍ nī ŋ̄ chō lēkɛ̍ndɛ̍ī ni̍.” 22Mi̍ Che̍kɔ̍pū sɔ̍ɔ̍ŋgūū fi̍nyā ndɔ̍ īkɛ̄i̍. Mi̍ Āa̍se̍ pi̍i̍līa̍ŋ ndu̍, mbo̍ dīmī āā, “Dīōmndo̍ ndu̍, dīo̍m Che̍kɔ̍pū wo̍, kɛ̍ bāla̍ŋ nda̍ŋ, bāla̍ I̍i̍sɔ̄la̍ŋ.” 23Ō sīna̍ māā Che̍kɔ̍pū le̍, kāni̍ fo̍ndōle̍, mɛ̄ɛ̍ yīīŋnde̍ wa̍ I̍īsɔ̄ yɛ̍ ko̍ni̍ yīīŋnde̍ wa̍ ndu̍ ni̍. O̍ ko̍ŋ kɔ̍ɔ̍lī, mbo̍ dūāū ndu̍ sa̍lā. 24Mbo̍ nyūnā ndu̍ āā,

“I̍īsɔ̄ po̍ nī, nūm kpe̍e̍kpe̍i̍ ni̍?”

Mbo̍ chɛ̄l āā, “E̍ī, ya̍ I̍īsɔ̄ ni̍.”

25Mbo̍ dīmūl ndu̍ āā, “Mɛ̄ɛ̍ chu̍u̍ ya̍ nyɛ̄ dīa̍a̍ mī de᷅, mī dɔ̍ū nu̍m sa̍lā.” Mbo̍ chūū ndu̍, mbo̍ dīā. Mbo̍ chūū vɛ̄lɛ̄ ndu̍ mūɛ̄īya̍ŋ mbo̍ kōl. 26O̍ ko̍ŋ kɔ̍ɔ̍lī, mi̍ Āa̍se̍ fi̍nyā ndɔ̄ di̍mūl ndu̍ āā, “Sɔ̍ɔ̍ŋgu̍u̍ na̍nu᷄ŋ mā kɔ̍ma̍ŋ ya̍ mā sɔ̍sa̍ ya̍ kūu̍wo̍ po̍ nūu̍.” 27O̍ ko̍ŋ, mi̍ Che̍kɔ̍pū sɔ̍ɔ̍ŋgūū ndu̍ īkɛ̄i̍, mbo̍ kɔ̄ma᷄ŋ ndu̍, mbo̍ sɔ̄sā ndu̍ kūu̍wo̍. Mi̍ Āa̍se̍ tu̍ɛ̍ī nyɛ̄la̍ wa̍ ndu̍ lēkɔ̄ɔ̍ la̍ŋ chūŋ. O̍ ko̍ŋ, mbo̍ dūāū ndu̍ sa̍lā. Mbo̍ dīmī āā, “Ɛ̄ɛ̄ hɛ̍ɛ̄, po̍ nūu̍ chūŋ ndɔ̄ɔ̍ cho̍ ho̍ō ni̍. Yōndō Mɛ̄lɛ̄ka̍ dɔ̄ū sa̍lā wo̍ chūŋ kɛ̄ndɛ̄ ko᷄ŋ cho̍ ho̍ō ni̍. 28Mbɔ̄ māā Mɛ̄lɛ̄ka̍ ō yɔ̄ŋgu̍ pi̍ɔ̍ɔ̍ o̍ lɛ̄ŋnde̍ŋ chōo̍ mbō pɔ̄ɔ̄li̍a̍a̍ lɛ̄ŋnde̍ŋ mī tɔ̄lɔ̄ɔ̄la̍ŋ lā na᷄ŋ mī nyɛ̄ dīa̍a̍ ō kūi̍i̍ a̍ mūɛ̄īya̍ŋ fɔ̍. 29Mbɔ̄ wāŋnda̍ ā wa̍ nu̍m o̍ bā bɛ̄ŋgu̍ mā tōsa̍ wa̍llo̍ le̍ nūm fɔ̍. Mbɔ̄ kāa̍la̍ fa̍ŋgā ā tūndu̍ŋ nu̍m o̍ lābɛ̄ŋgu̍ ni̍ŋ fɔ̍. Nu̍a̍ā ŋ̄ wā pɔ̍mbūāā nūmnda̍ chīla̍ŋ fɔ̍. Mbɔ̄ pūa̍a̍ kālā nu̍mnda̍ ā tūndu̍ŋ nu̍m o̍ lābɛ̄ŋgu̍ ni̍ŋ fɔ̍. Wānā o̍ wāna̍ mɛ̍na̍ nu̍m pɛ̍, wānā ko̍ŋ sēndi̍o̍o̍ chō ndu̍ chōo̍. Kɛ̍ wāna̍ pi̍ɛ̍i̍ pɛ̍ māā Mɛ̄lɛ̄ka̍ dɔ̄u̍ nu̍m sa̍lā, wānā ko̍ŋ Mɛ̄lɛ̄ka̍ dɔ̄u̍ ndu̍ sa̍lā fɔ̍.”

I̍īsɔ̄ nyɔ̍ɔ̍lu̍ māā ā dɔ̄u̍ ndu̍ sa̍lā

30Dīmīo̍o̍ nu̍a̍ā mi̍ Āa̍se̍ chīī Che̍kɔ̍pū sa̍lā dɔ̄wɔ̄ɔ̄, mi̍ Che̍kɔ̍pū fu̍lā. O̍ vīu̍ bɛ̍ɛ̍ kpɛ̍ɛ̍ le̍, mi̍ I̍īsɔ̄ bɛ̍ndɔ̄ cha̍ŋ dōōsūle̍ŋ mbo̍ hūŋ. 31Ndu̍ bɛ̍ɛ̍ mbo̍ yāū nyɛ̄ dīa̍a̍ ō yēēlɛ̍i̍, mbo̍ chūū fi̍nyā ndɔ̍. Mbo̍ dīmūl fi̍nyā ndɔ̍ āā, “Kɛ̄kɛ̍, chɔ̍ŋ mā dē nyɛ̄ māhīlū ya̍ I̍ bɛ̍ɛ̍ndi̍a̍l nu̍m ndo̍, mā dɔ̄ū ya̍ ni̍ko̍ sa̍lā.”

32Mi̍ Āa̍se̍ fi̍nyā ndɔ̄ nyu̍nā ndu̍ āā, “Nūm nɛ̄ɛ̍nɛ̍?”

Mbo̍ dīmī āā, “Ya̍ ni̍. Po̍ nu̍m tāso̍o̍ I̍īsɔ̄ ni̍.”

33Tūēīyɔ̄ɔ̄ kōŋ le̍nde̍, mi̍ Āa̍se̍ nyi̍i̍yā kpa᷅kpā bɛ̄ndū. Mbo̍ dīmī āā, “Mɛ̄ɛ̍ ō nɛ̄ɛ̍nɛ̍ to̍sa̍ yɛ̄ ni᷅ŋ hāū dōōsūle̍ŋ, mbo̍ chūū ya̍ mi̍ di̍ā, mi̍ du̍a̍ū ndu̍ sa̍lā ma̍lāŋ ŋ̄ hūŋ hūnɔ̄ɔ̍ ho̍ō? I̍ chi̍i̍ ni᷅ŋ wānā ko̍ŋ sa̍lā dɔ̄wɔ̄ɔ̄. Sa̍lā kōŋ ō fe̍ŋāŋ ndɛ̍ ndu̍ chōo̍ le̍.”

34Mɛ̄ɛ̍ I̍īsɔ̄ tu̍e̍ī nyɛ̄ fi̍nyā ndɔ̄ so̍ō wo̍, mbo̍ māl yi̍o̍o̍ kpe̍le̍ŋ a̍ kɔ̄l tāmbɛ̍i̍ wa̍ ndu̍ wo̍. Mbo̍ dīmūl fi̍nyā ndɔ̍ āā, “Kɛ̄kɛ̍ nūu̍, yāndi̍i̍, ya̍ bɛ̍ɛ̍ dɔ̍u̍ ya̍ sa̍lā fɔ̍.”

35Kɛ̍ mi̍ fāllo̍ dīmī āā, “Pɔ̄mbɔ̄ nūm hi᷅ŋ mbo̍ tōsāl la̍ ka̍fāla̍ŋ, mi̍ du̍a̍ū ndu̍ sa̍lā ya̍ i̍i̍ nɔ̍ mī dɔ̍ū nu̍m ndo̍.”

36Mi̍ I̍īsɔ̄ di̍mī āā, “Ā ke̍ fo̍ndō ndu̍ dīōla̍ŋ āā Che̍kɔ̍pū le̍. Mɛ̄ɛ̍ dīi̍ŋ ndɔ̄ɔ̍ o̍ to̍sa̍l la̍ ni᷅ŋ ho̍ō ka̍fāla̍ŋ ni̍. Di̍ ya̍ I̍ nɔ̍ māā po̍ tāso̍o̍ o̍ yu̍ŋgu̍ nāa̍ chōo̍ wo̍ ndu̍ fɛ̍lɛ̍ŋ o̍ bi̍ī ya̍ o̍ bā. Ō bīī vɛ̄lɛ̄ sa̍lā nūu̍.” Mi̍ I̍īsɔ̄ di̍mī āā, “Kɛ̄kɛ̍, a̍ nɔ̍ lɛ̍ sa̍lā o̍ sālā le̍ ya̍ le̍?” Dīmīo̍o̍ cho̍ ko̍ŋ ni̍ māā fi̍nyɛ̄ nɔ̍ kāŋgālāa̍.

37Mi̍ Āa̍se̍ di̍mī āā, “I̍ chi̍i̍ ni᷅ŋ ndu̍ hāndɔ̄ɔ̄ nu̍m bōlle̍ŋ. Pɔ̄mbūāā ndūa̍a̍ bɛ̍ɛ̍ kpo̍u̍ ndu̍ o̍ bā bɛ̄ŋgu̍ nda̍ chō wā ni̍. I̍ chi̍i̍ ndu̍ sa̍lā dɔ̄wɔ̄ɔ̄ le̍ mbo̍ sɔ̄la̍ nyɛ̄ dīa̍a̍ a̍ mūɛ̄īya̍ŋ ta̍u̍. Yɛ̄ɛ̍nɛ̍ ŋ̄ yēēma̍ yɛ̄ ni᷅ŋ mī to̍sa̍l nu̍m, po̍ nūu̍?”

38Mi̍ I̍īsɔ̄ di̍mūl fi̍nyā ndɔ̍ āā, “A̍ nɔ̍ lɛ̍ sa̍lā o̍ sa̍lā chēle̍ŋ te̍? Kɛ̄kɛ̍, ya̍ bɛ̍ɛ̍ yāndi̍i̍ dɔ̍u̍ ya̍ sa̍lā fɔ̍.” Mi̍ I̍īsɔ̄ cha᷅ŋ cha᷄ŋndo̍ pi̍la̍.

39O̍ ko̍ŋ kɔ̍ɔ̍lī, mi̍ Āa̍se̍ fi̍nyā ndɔ̄ di̍mūl ndu̍ āā,

“Fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ lā chō wā lēvīl a̍ nūm.

Ā chō lākɔ̄ la̍nda̍ŋ a̍ fo̍ndāŋ pīɔ̍ɔ̍ sīā wo̍.

40O̍ mūɛ̄ī nūm īfāŋnde̍ ni᷄ŋ nyɛ̄ nūm di̍a̍a̍ chō ni᷅ŋ wā fūlāa̍ ni̍.

Ndu̍yɛ̍, ā chō wā pɔ̄mbɔ̄ nu̍m o̍ bā bɛ̄ŋgu̍.

Kɛ̍, tē a̍ hu̍ŋ fa̍fālā pɛ̍,

ā chō hūnɔ̄ɔ̄ fūlā ō wōlɔ̄ɔ̄lā lūsu̍lɛ̍i̍la̍ la̍ŋ bɛ̄ŋgu̍.”

41O̍ ko̍ŋ kɔ̍ɔ̍lī, mi̍ I̍īsɔ̄ chu̍ā nɛ̄īyɔ᷄ŋndo̍ le̍ Che̍kɔ̍pū le̍ sa̍lā fi̍nyā ndɔ̄ dɔ̍ū Che̍kɔ̍pū wo̍. Mbo̍ dīmī āā, “Che̍kɔ̍pū wo̍ ho̍ō, mɛ̄ɛ̍ mī di̍ī ndu̍. Kɛ̍ fāllo̍ chō fɛ̍lɛ̍ŋ wu̍ mī dɛ̍nɛ̍la̍ ndɔ̄la̍ŋ lā chūū tōōsīāā.”

42Kɛ̍ mi̍ ī yɔ̄nu᷄ŋ, ma̍ kɔ̍ di̍mūl Lūībɛ̍kā nyɛ̄ I̍īsɔ̄ kɛ̍ɛ̍si̍a̍a̍ wo̍. Mɛ̄ɛ̍ nda̍ dīmu̍l ndu̍, mbo̍ vīām le̍ Che̍kɔ̍pū. Mbo̍ dīmūl ndu̍ āā, “I̍īsɔ̄ bɛ̍nūm kɛ̍ɛ̍si̍a̍a̍ le̍ nu̍m dīyɔ̄ɔ̍, le̍ nyɛ̄ ŋ̄ tōsa̍l ndu̍ wo̍. 43Le̍la̍ŋ to̍sa̍ mɛ̄ɛ̍ ya̍ cho̍ nu̍m dīmūl lɛ̍. Chɔ̍ŋ mā kūɛ̄nu᷄ŋ Ha̍lūāŋ nāa̍ yēma̍ nūu̍ Le̍bāŋ chu̍a̍. 44Tē ā kūɛ̄ pɛ̍, wa̍ŋnu̍ŋ ndo̍ŋ le̍ te̍le̍ŋ ti̍ŋ, mbō lo̍ o̍ ko̍ŋ mī bɛ̄ nūm pɔ̍lu̍l kɔ̄l. 45Tē ō pɔ̄lu̍l kɔ̄l pɛ̍, mbō pūɛ̄ɛ̄nu̍ŋ a̍ sūɛ̍i̍ ŋ̄ tōsa̍l ndu̍ ve̍, I̍ yɔ̍ŋ le̍ nūm ā hīŋ. Kɛ̍, ō bɛ̍ndā mī I̍ fu̍la̍ nya̍ nya̍ ŋi̍ɔ̍ɔ̍ŋ vēllāa̍ vēllē pāa̍le̍ pi᷅lɛ̍ le̍ŋ kpe̍ le̍.”

Āa̍se̍ yɔ̍ŋ Che̍kɔ̍pū nāa̍ Le̍bāŋ chu̍a̍

46O̍ ko̍ŋ kɔ̍ɔ̍lī, mi̍ Lūībɛ̍kā di̍mūl Āa̍se̍ āā, “Wāŋ lāāndūāā Hi̍ta̍i̍tīi̍ya̍a̍ I̍īsɔ̄ chu̍a̍ ha̍ā wa̍, ā tōsa̍ mi̍ ta̍mbū kɔ̄l ta̍u̍ ta̍u̍. Ō bɛ̍ndā mī Che̍kɔ̍pū bɛ̍ɛ̍ ndu̍ chu̍a̍ lɛ̄ Hi̍ta̍i̍tīi̍ya̍ ha̍ā o̍ nɔ̄ɔ̍ ni᷄ŋ te̍. Ō nāŋ bɛ̍ɛ̍ mī I̍ vi᷅, mbo̍ hīāū a̍ ke̍ŋ yɔ̍nɔ᷄ŋndo̍.”

Currently Selected:

Chɛ̄nɛ̍se̍ē 27: YM

Highlight

Copy