Chɛ̄nɛ̍se̍ē 28

1O̍ ko̍ŋ kɔ̍ɔ̍lī, mi̍ Āa̍se̍ ve̍e̍lū Che̍kɔ̍pū. Mɛ̄ɛ̍ o̍ hi᷅ŋ, mbo̍ yīl ndu̍ āā, “Mɛ̄lɛ̄ka̍ wa̍ nu̍m kɔ̄ɔ̄lī.” Mbo̍ sīlā ndu̍ āā, “Che̍kɔ̍pū, chūāā lāāndūa̍a̍ Ke̍nāŋ na̍nu᷄ŋ ki̍nɛ̍i̍, ō pīlɛ̍ bɛ̍ɛ̍ chu̍ā o̍ nɔ̄ ni̍ŋ te̍ pa̍. 2Le̍la̍ŋ, chɔ̍ŋ mā kūɛ̄ Mɛ̄sōpōte̍e̍mīāā o̍ fi̍nyā nūm ma̍mā lo̍, ndu̍ yɔ̍nūŋ māā Bɛ̄tīhɔ̍ɔ̄ ni̍. A̍ kūɛ̄ pɛ̍, a̍ chu̍a̍ chūāūwāa̍ Le̍bāŋ bɔ̍m nūm nda̍ ō pīlɛ̍ o̍ nɔ̄ɔ̍ ni᷄ŋ.” 3Mi̍ Āa̍se̍ du̍a̍ū ndu̍ sa̍lā āā, “Mbɔ̄ māā Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō dɔ̄u̍ nu̍m sa̍lā mā vēlū ŋ̄chūāū mā kūi̍i̍ mā sīmnu᷄ŋ ka̍a̍la̍ fa̍ŋgā fɔ̍. 4Mɛ̄lɛ̄ka̍ dɔ̄u̍ nu̍m sa̍lā nya̍ pūlālē nūmnde̍ŋ mɛ̄ɛ̍ o̍ dɔ̍ū E̍bīlāha᷅m sa̍lā yɛ̍, mī lɛ̄ŋndē nya̍ chō le᷅ŋ ni᷄ŋ la̍mi̍a̍l te̍ŋ, lē Mɛ̄lɛ̄ka̍ ke̍ sīndɛ̄ E̍bīlāha᷅m nde̍ŋ, mī lē wa̍ nyɛ̄ nyā fɔ̍.” 5Ō ko̍ŋ, mi̍ Āa̍se̍ yɔ̄ŋ Che̍kɔ̍pū lɛ̄ŋndē Mɛ̄sōpōte̍e̍mīāā le̍ŋ. Mi̍ Che̍kɔ̍pū cha̍ŋ kɔ᷅la̍ŋ Mɛ̄sōpōte̍e̍mīāā nāa̍ Le̍bāŋ bɔ̍m ndɔ̄ chu̍a̍. Le̍bāŋ yɛ̍, fi̍nyā ndɔ̍ wa̍ Bɛ̄tīhɔ̍ɔ̄ ni̍, A̍lūāme̍ēnɔ̄ɔ̍. Lūībɛ̍kā o̍ ve̍lū Che̍kɔ̍pū nda̍ I̍īsɔ̄ wo̍, yēma̍ ndɔ̍ wa̍ Le̍bāŋ ni̍.

I̍īsɔ̄ chu̍a̍ la̍nɔ̍ che᷅le̍ŋ

6O̍ ko̍ŋ kɔ̍ɔ̍lī, mi̍ I̍īsɔ̄ sa̍a̍lu᷄ŋ māā Āa̍se̍ dɔ̍ū Che̍kɔ̍pū sa̍lā mbo̍ fāŋā ndu̍ lo̍ŋ mbo̍ yɔ̄ŋ ndu̍ Mɛ̄sōpōte̍e̍mīāā le̍ mbō kɔ̍ chu̍ā la̍nɔ̍ɔ̍ lo̍ŋ. Mbo̍ sāālu᷄ŋ māā sa̍lā Āa̍se̍ wa̍ Che̍kɔ̍pū dɔ̄wɔ̄ɔ̍ wo̍, mbo̍ sīlā ndu̍ āā, “Chu̍ā la̍nɔ̍ wa̍ā Ke̍nāŋ na̍nu᷄ŋ te̍.” 7Mi̍ I̍īsɔ̄ sa̍a̍lu᷄ŋ māā Che̍kɔ̍pū, sīlā o̍ sīlā fi̍nyā ndɔ̄ nda̍ kāla̍ ndɔ̄ a̍ si̍la̍ ndu̍, māā ō chu̍a̍ sīlālā lāŋ, mbo̍ kūā Mɛ̄sōpōte̍e̍mīāā. 8O̍ ko̍ŋ, mi̍ I̍īsɔ̄ sa̍a̍lu᷄ŋ māā fi̍nyā ndɔ̄ ni̍ŋ kɔ̍l mī ndu̍ o̍o̍ chu̍a̍ lāāndūāā Ke̍nāŋ nda̍ le̍. 9Kɛ̍ o̍ ko̍ŋ ni̍ŋ fa̍ū, lāāndūāā tāsi̍a̍a̍ ā lo̍ ndu̍ o̍ bā, mbo̍ kūā vɛ̄lɛ̄ nāa̍ I̍si̍mɛ̄ɛ̄l chu̍a̍, ndu̍ yɔ̍nūŋ māā po̍ E̍bīlāha᷅m ndo̍ ni̍. Mbo̍ kɔ̍ ka̍a̍lā chūā ndɔ̄ɔ̍, dīōla̍ŋ āā, Māhāla̍tī, yēmāa̍ Nɛ̄ba̍yɔ̍tī.

Lɔ̄mā Che̍kɔ̍pū sɔ̍l Bɛ̍tɛ̄ɛ̄l wa̍ŋ

10O̍ ko̍ŋ kɔ̍ɔ̍lī, mi̍ Che̍kɔ̍pū cha̍ŋ Bīɛ̄ɛ̄si̍ɛ̍bā, mbo̍ bīī kɔ̄la̍ŋ kūmbū Ha̍lūāŋ ndo̍. 11Mbo̍ lō kɔ̄la̍ŋ ha̍a̍a̍, mbo̍ fūūlūū o̍ fo̍ndāŋ pūm, ndu̍yɛ̍ pāa̍le̍ŋ le̍e̍ de̍l ni᷅ŋ. Mbo̍ kɛ̄ɛ̄sīāā le̍ lūa̍a̍ŋ o̍ fo̍ndāŋ kōŋ nyūmmā māŋ. Mbo̍ chūā pōūwo̍, mbo̍ hāndū bōlle̍ŋ lēchōo̍, mbo̍ hīnī lūa̍a̍ŋ. 12Nyūmmā māŋ, mbo̍ sɔ̄l lūa̍a̍ŋ. O̍ lɔ̄mā ndɔ̄ma̍ sɔ̍la᷄ŋ ni᷄ŋ, mbo̍ chā kpēŋgba̍ kāā bɛ̄ndōo̍, chɔ̄nɔ᷄ŋndo̍ lɛ̄ŋ mbo̍ fūūlūū ɛ̄chɛ̍nɛ̄ di̍. Mbo̍ chā ki̍i̍la̍a̍ Mɛ̄lɛ̄ka̍a̍, ā wa̍ tōlɔ̄ɔ̍ o̍ kpēŋgba̍ kāa̍ ho̍ō, mā hēl, mā tūāl. 13O̍ ko̍ŋ kɔ̍ɔ̍lī, mbo̍ chā Mɛ̄lɛ̄ka̍ Ya̍a̍wɛ̄ɛ̄ īsīsi̍ ndu̍ chōo̍. Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ mbo̍ dīmūl Che̍kɔ̍pū āā, “Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ō E̍bīlāha᷅m fi̍nyā nūm ma̍mā a̍ Āa̍se̍ fi̍nyā nūm a̍ pi̍ɛ̍ī yo̍ ni̍. Lɛ̄ŋndē ŋ̄ hīni̍ le̍ŋ cho̍o̍ le̍ŋ, le̍ŋ ya̍ I̍ cho̍ nu̍m kē ni̍, nya̍ wānāa̍ fu̍lā ni̍ŋ o̍ pūlālē nūmnde̍ŋ chōo̍ wa̍. 14Pūlālē nūmnde̍ŋ lē chō kūīī mā wa̍ fāŋgā māā chu̍ndo̍o̍ lɛ̄ŋ. Ā chō kūīī mā tīu̍ bā o̍ bā fe̍e̍. Nūm ni̍, pūlālē nūmnde̍ŋ ni̍, o̍ sābū nyāa̍ ni᷄ŋ ya̍ I̍ cho̍ wāŋnda̍ kpo̍u̍ o̍ chi̍e̍ēŋndo̍ chōo̍ sa̍lā dɔ̄wɔ̄ɔ̄ ni̍.” 15Mi̍ Mɛ̄lɛ̄ka̍ hīāū lāchī a̍ sūɛ̍i̍ nāa̍ Che̍kɔ̍pū chu̍a̍ āā, “I̍ cho̍ nu̍m kɔ̍ɔ̍lī. Bā o̍ bā ŋ̄ kɔ̍ I̍ cho̍ wā nu̍m māndāa̍. I̍ cho̍ nu̍m mīŋgī o̍ lɛ̄ŋnde̍ŋ nde᷅ŋ ni᷄ŋ pi̍la̍. I̍ cho̍ wā lātūlu̍ a̍ nūm, I̍ me᷅l nu̍m te̍, ha̍a̍a̍ mbō lo̍ o̍ ko̍ŋ mī to̍sa̍ nyɛ̄ ya̍ I̍ chu̍e̍l nu̍m būŋgɛ̄i̍ yo̍.”

16O̍ ko̍ŋ kɔ̍ɔ̍lī, mi̍ Che̍kɔ̍pū ti̍a̍ndū. Mɛ̄ɛ̍ o̍ te̍ndū, mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ o̍ cho̍ o̍ fo̍ndāŋndo̍ ho̍ō, I̍ si̍na̍ yɛ̍ bɛ̍ɛ̍ pɛ̍ŋgu̍ nu̍a̍ā le̍.” 17Mi̍ sīōōŋnde̍ bīī ndu̍. Mbo̍ dīmī āā, “Fo̍ndāa̍ ho̍ō chō fo̍ndāŋ kɔ̄ndɔ̄fi̍li̍ bɛ̍ndū. Chīɛ̍i̍ Mɛ̄lɛ̄ka̍a̍ kpe̍e̍kpe̍i̍ cho̍ fo̍ndāa̍ ho̍ō ni̍. Na̍nu᷄ŋ dīō kpākīo̍o̍ chō le̍ lūɛ̍i̍yɔ̄ɔ̍ ɛ̄chɛ̍nɛ̄ ni̍.”

18Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍ pu̍u̍ŋ, mi̍ Che̍kɔ̍pū cha̍ŋ mbo̍ chūā pōū ndu̍ o̍o̍ ha̍ndu̍ ko̍ŋ bo᷅lle̍ŋ ndo̍, mbo̍ sīmī ndu̍ o̍ fo̍ndāŋ kōŋ le̍ lōōnɔ᷄ŋndo̍ māā fo̍nda᷄ŋ cho̍ le̍ Mɛ̄lɛ̄ka̍ wo̍ fo̍ndāŋ kōŋ chō ni̍. Mbo̍ tālā chūɛ̄īya̍ŋ o̍ pōū kōŋ chōo̍. 19Mbo̍ kē fo̍ndāŋ kālāa̍ dīōla̍ŋ āā, Bɛ̍tɛ̄ɛ̄l. Kɛ̍, tāŋgūl tāse̍ wāŋnda̍ tāŋgu̍l chi̍o̍o̍ lo̍ŋ ndo̍, ma̍ kē ndu̍ dīōla̍ŋ āā, Lu̍u̍sī. 20O̍ ko̍ŋ kɔ̍ɔ̍lī, mi̍ Che̍kɔ̍pū chu̍ēl Mɛ̄lɛ̄ka̍ Ya̍a̍wɛ̄ɛ̄ būŋgɛ̄i̍ āā, “Mɛ̄lɛ̄ka̍, tē a̍ lo̍ ya̍ kɔ̄ɔ̄lī pɛ̍, ndu̍yɛ̍ mā lo̍ ya̍ māndā ha̍a̍a̍ mī I̍ fu̍u̍lu̍u̍ kɛ̍ndi̍a̍a̍ nāa̍ ya̍ cho̍ la̍ŋ nda̍ pɛ̍, mī sɔ̍la̍ nyɛ̄ ya̍ I̍ di̍ā wo̍ a̍ nyɛ̄ ya̍ wo̍u̍nūŋ ndo̍ pɛ̍, 21o̍ ko̍ŋ kɔ̍ɔ̍lī, mī I̍ mi̍i̍ŋgu̍ o̍ fi̍nyā nūu̍ lo̍ chi̍ɛ̍ī ni̍ŋ yɛ̍lɛ̍kɛ̍lɛ̍ɛ̍ pɛ̍, mɛ̄ɛ̍ nūm Mɛ̄lɛ̄ka̍ Ya̍a̍wɛ̄ɛ̄ ā sīmnu᷄ŋ Mɛ̍lɛ̄ka̍ ni̍ ya̍ I̍ so̍o̍lūū wo̍. 22Ndu̍yɛ̍, pōū ya̍ I̍ ba̍ŋ ho̍ō māā tāāmāsi̍ le̍ lōōnɔ᷄ŋndo̍ a̍ nūm o̍kɔ̄ɔ̄ wo̍, mbō sīmnu᷄ŋ fo̍ndāŋ sōōlāā nu̍m. Ndu̍yɛ̍ ō fūla̍ o̍ ko̍ŋ kɔ̍ɔ̍lī, nyɛ̄ o̍ nyɛ̄ ŋ̄ ke̍ ya̍ pɛ̍, te̍ la̍ wa̍ pɛ̍ la̍ ŋɔ̄ma̍hīɔ̍ɔ̍lu̍ tɔ̍ɔ̍ lēchōo̍ I̍ ke̍ nu̍m māā kē lēbōl.”

Currently Selected:

Chɛ̄nɛ̍se̍ē 28: YM

Highlight

Copy