Kuyamba 31

Jakobho an'thawa Labhani

1Tsapano Jakobho adabva wana wa Labhani adati, “Jakobho adatola bzentse bzikhali bzaapayi wathu; kukhupuka kwake kwachoka kwaapayi wathu.” 2Jakobho adawona kuti Labhani akhawonesa lini kumufuna ninga pakuyamba. 3Pamwepo Chawuta adati kwa Jakobho, “Bwelela kudziko laapayi wako kwaabale wako, ine ndininga ndina iwe.”

4Jakobho adatuma munthu kachemela Rakelo na Liya n'thengo kukhana mabila yake. 5Iye adati kwayiwo, “Ndawona kuti apayi wanu akuwonesa lini kundifuna ninga pakuyamba. Koma Mulungu waapayi akhana yine. 6Imwe mun'dziwa kuti ndidaphatila basa apayi wanu namphamvu zangu zentse; 7koma apayi wanu adandinamiza, nkusandula mpagalo wangu kankwana khumi, koma Mulungu alibe kuwalekelela achindipweteka. 8Iwo paakhati, ‘Mabila yentse yana madodo-madodo yan'zakhala mpagalo wako,’ pamwepo mabila yentse yakhabala wana wamadodo-madodo; paakhati ‘Mabila yana mitsetse-mitsetse yan'zakhala mpagalo wako,’ mabila yentse yakhabala wana wamitsetse-mitsetse. 9Nakutenepo Mulungu adatola mabila yaapayi wanu, achiyapeleka kwayine. 10Munyengo in'chita mimba mabila, kutulo ndidawona atonde wambuzi akhakwilila bzifuwo akhana mitsetse-mitsetse namadodo-madodo. 11Pamwepo ngilozi ya Mulungu idalewa-lewa nayine kutulo, iyo idati, ‘Jakobho!’ Ine ndidati, ‘Ndili pano.’ 12Iyo idati, ‘Nyangana uwone, atonde wentse akukwilila bzifuwo ana mitsetse-mitsetse namadodo-madodo; pakuti ndidawona bzentse bzaakuchita Labhani kwayiwe. 13#Kuya 28:18–22Ndine Mulungu waku Bheteli, kwawudadzodza mwala wachilemela namafuta uchilumbila kwayine. Tsapano sumuka, choka mudziko lino, bwelela kudziko lawudabadwa.’ ” 14Pamwepo Rakelo na Liya adati kwayiye, “Ko pachana chathu ise panthaka idasala munyumba yaapayi wathu? 15Ise sitakhala ninga alendo kwayiwo? Pakuti adatigulisa, achiphatisa basa masheleni yathu. 16Chuma chentse chidatakuliwa na Mulungu kwaapayi wathu nichathu nawana wathu; tsapano imwe chitani bzentse bzamwawuziwa na Mulungu.” 17Nakutenepo Jakobho adasumuka, nkukwiza wana wake naazikazi wake pangamela; 18adabusa ng'ombe zake zentse nabzifuwo bzake bzentse bzaadawona, ng'ombe zake zaadawona mu Padhani-aramu, nkuyenda kudziko la Kenani kwaapayi wake Isaki. 19Labhani akhadayenda kagela mabila yake, Rakelo adaba amilungu wamunyumba yaapayi wake. 20Jakobho adanamiza Labhani mu Aramu, pakuti alibe kumuwuza kuti akufuna kuthawa. 21Adathawa nabzentse bzaakhanabzo, adayambuka kamadzi ka Ufuletesi, kudziko lamapili la Giliyadhi.

Labhani anteyela Jakobho

22Pantsiku yachitatu Labhani adawuziwa kuti Jakobho wathawa. 23Labhani adatola abale wake nkumuteyela kwantsiku zinomwe, paakhali pafupi kum'phatila mudziko lamapili la Giliyadhi, 24Mulungu adabwela kwa Labhani mu Aramu kutulo usiku umwewo, adati kwayiwe, “Chenjelela, kuti uleke kulewa fala kwa Jakobho lingawe labwino panango lakuyipa.” 25Labhani adafika pakhana Jakobho. Tsapano Jakobho akhadazika matenti yake mudziko lamapili, Labhani naabale wake adazikambo matenti yawo mudziko lamapili la Giliyadhi.

26Labhani adati kwa Jakobho, “N'chiyi chawachita ichi, kuchita bzakundithawa, kundinamiza ine, kutakula wana wangu ninga anyakupambiwa pankhondo? 27Thangwe lanyi kuchita bzakundithawa, kundinamiza ine, kuleka kundiwuza? Ukhadandiwuza ninga ndidakudayendesa uchikondwa uchiyimba nyimbo, uchiliza bzikhwechele nachipendani? 28Thangwe lanyi ulibe kuchita kuti ndipsopsode azukulu wangu nawana wangu ndichigonekana nawo? Tsapano bzawachita m'bzawulombe. 29Ine ndina mphamvu yakukupweteka; koma Mulungu waapayi wako adalewa-lewa nayine kutulo usiku walelo adati, ‘Chenjelela kulewa kwa Jakobho bzabwino panango bzakuyipa.’ 30Iwe udathawa pakuti ukufuna kubwelela kunyumba kwaapayi wako, ko thangwe lanyi udaba amilungu wangu.” 31Jakobho adati kwa Labhani, “Pakuti ndikhagopa, ndidakumbuka kuti munganditakulile wana wanu. 32Munthu wamuniwona ana amilungu wanu ngaaphewe. Patsogolo paabale wanu mungalate pabzinthu bzandinabzo bzamunti m'bzanu, mubzitakule.” Koma Jakobho alibe kudziwa kuti Rakelo ndiye akhadaba amilunguwo.

33Labhani adapita mutenti ya Jakobho, namutenti ya Liya namutenti yaalandakazi awili, koma alibe kubziwona. Adabula mutenti ya Liya nkuyenda mutenti ya Rakelo. 34Tsapano Rakelo ndiye akhadatakula amilungu wamunyumba mwake nkuwayikha pachakukhalila chapangamela yake, nkuwakhalila. Labhani adapsaga mutenti mwentse, koma palibe chaadawona. 35Rakelo adati kwaapayi wake, “Mbuye wangu lekani kukalipa, kuti ndilibe kukusumukilani, pakuti ndili kumwezi. Nakutenepo iye adapsaga, koma amilungu wamunyumba mwake alibe kuwawona.”

36Pamwepo Jakobho adakalipa, nkupopotela Labhani; Jakobho adati kwa Labhani, “Ko mulandu wangu uli paponi? Chitazo changu chili paponi chachitisa kuti munditeyele? 37Mwapsaga pabzinthu bzangu bzentse, koma palibe chamwawona? Ko amilungu wamunyumba mwanu mwaawona? Bziyikheni patsogolo paabale wangu, naabale wanu kuti atonge pakati payise awili. 38Ndidakhala nayimwe kwamagole makumi mawili (20); mabila yanu nambuzi zanu bzilibe kupsodza, ndilibe kudya mabila makono yamuthanga mwanu. 39Bzifuwo bzikhang'ambiwa nabzilombo, ndilibe kubwela nabzo kwayimwe; ndikhabzipagali pachangu, mukhabzibvunza, ne bzikhabewa masikati panango usiku mukhandipagalisa. 40Nakutenepo masikati ndikhaphsa nadzuwa, usiku ndikhajejelewa namphepo, ndikhaphuphudza ndidapenya ndichikuphatilani basa. 41Ndidakhala nayimwe kwamagole makumi mawili (20), ndidakuphatilani basa kwamagole khumi namanayi (14), kuti mundipase wana wanu awili. Ndidazaphata basa pomwe kwamagole matanthatu (6) ndichiphatila basa mabila. Koma mudasandula mpagalo wangu kankwana khumi (10). 42Ninga Mulungu waapayi wangu, Mulungu wa Abhurahamu an'gopewa na Isaki akhali lini kumbali kwangu, ninga mudandiyendesa manja-manja, koma Mulungu adawona kushupika kwangu nakukuphatilani basa kwandidachita, ndibzo bzachitisa kuti Mulungu akuchenjezeni usiku walelo.”

Chipangano cha Jakobho na Labhani

43Pamwepo Labhani adadayila adati kwa Jakobho, “Wana wachikazi awa niwana wangu, mabila aya nimabila yangu, nabzentse bzawunabzo nibzangu. Ko ningachitenyi kwawana wangu, panango kuwana wawo waadabala? 44Tsapano bwela, ngatichite chibvano iwe nayine; chizakhale mboni pakati payine nayiwe.”

45Nakutenepo Jakobho adatola mwala wachilemela achiwuyimisa. 46Jakobho adazati kwaabale wake, “Gwezekani minyala.” Adagwezeka minyala kuchita mudwi, adadya adakhala padzulu paminyalayo. 47Labhani adapasa mbuto imweyo dzina lakuti Jegarisahudhuta.#31:47 Muchi Aramiyeni bzinilewa kuti mudwi wachikumbuso. Koma Jakobho adayipasambo pomwe mbutoyo dzina lakuti Galeedhi.#31:47 Galeedhi muchi Hebheru bzinilewa kuti mudwi wawumboni. 48Labhani adati kwa Jakobho, “Mudwi waminyala iyi nimboni pakati payiwe nayine lelo.” Nakutenepo mbuto imweyo idapasiwa dzina lakuti Galeedhi. 49Mwalawo achizawuti Mizipa, pakuti iye adati, “Chawuta ngaawone payine nayiwe, patininga tili uyu kwake uyu kwake.#31:49 Mizipi bzinilewa kuti dala. 50Ukashupa wana wangu, panango kuloola anango akazi kunja kwawana wangu, ne pakakhala palibe munthu an'dziwa chibvano chathu, Mulungu ndiye mboni pakati payiwe nayine.”

51Pamwepo Labhani adati kwa Jakobho, “Wona mudwi uwu namwala wachilemela uwu wandayikha pakati payiwe nayine. 52Mudwi umwewu nimboni, namwala wachilemela umweyi nimboni, ine nin'zamoga lini mudwi uwu kuzamenyana nayiwe, nayiwembo pomwe un'zamoga lini mwala umwewu kuzamenyana nayine. 53Mulungu wa Abhurahamu na Mulungu wa Nahori na Mulungu waazipayi wawo, ngaawe atongi pakati payine nayiwe.” Nakutenepo Jakobho adalumbila nadzina la Mulungu waapayi wake Isaki. 54Jakobho adapeleka ntsembe paphili, adachemela abale wake kuzadya chakudya. Paadamala kudya adagona paphili pamwepo; 55Labhani adalamuka machibese-bese, nkupsoda azukulu wake nawana wake, adaadalisa iye nkubwelela kunyumba kwake.

Currently Selected:

Kuyamba 31: KUNDA

Highlight

Copy