Kuyamba 30

1Koma Rakelo paadawona kuti akubalila lini Jakobho wana, adachitila nchanje nkulu wake Liya. Rakelo adati kwa Jakobho, “Ndipase wana, ukaleka ninifa.”

2Koma Jakobho adakalipila Rakelo nkuti, “Ko ine ndatola mbuto ya Mulungu?” Pakuti ndiye adachitisa kuti uleke kubala. 3Pamwepo Rakelo adati kwa Jakobho, “Tola mulandakazi wangu Bhiliha ugone naye, kuti andibalile mwana.” 4Rakelo adapeleka Bhiliha kwa Jakobho kuti akhale nkazi wake. Nakutenepo Jakobho adadziwana naye. 5Bhiliha adaphata pathupi nkubalila Jakobho mwana wachimuna. 6Rakelo adapasa mwana umweyo dzina lakuti Dhani nkuti, “Mulungu wandiyenzanisa pomwe wabva fala langu, wandipasa mwana wachimuna.” 7Bhiliha mulanda wa Rakelo adaphata pathupi pomwe nkubala mwana wachimuna wachiwili. 8Pamwepo Rakelo adati, “Ndapolowana nanana wangu, ndichimukunda.” Nakutenepo mwanayo adampasa dzina lakuti Nafitali.

9Liya paadawona kuti wayima kubala, adapeleka mulanda wake Zilipa kwa Jakobho kuti akhale nkazi wake. 10Mulanda wa Liya Zilipa adabalila Jakobho mwana wachimuna. 11Liya adati, “Ndachita mwayi!” Mwanayo adampasa dzina lakuti Gadhi. 12Mulanda wa Liya Zilipa adabalila Jakobho mwana wachimuna wachiwili. 13Pamwepo Liya adati, “Ndikukondwa, akazi wentse an'zandichemela kuti kukondwa, adampasa dzina lakuti Asheri.”

14Munthawe yakukolola tiligu, Rubheni adayenda kumunda kwaadakawona yamichelo yamandirekisi,#30:14 Mandirekisi nikamuti, muzu wakene unseyenzesewa naakazi kuti awone mbeleko. adachela micheloyo achikapasa amayi wake Liya. Rakelo adati kwa Liya, “Ndaphata minyendo ndipasembo manango mamandirekisi yawabweleselewa namwana wako.” 15Liya adati, “Ko kunditolela kwawudachita mwamuna kwachepa? Lelo uno waakufuna kunditolela pomwe mamandirekisi yandabweleselewa namwana wangu.” Rakelo adati kwa Liya, “Ukandipasa mamandirekisi yawabweleselewa namwana wako, Jakobho an'gona nayiwe usiku walelo.”

16Chakumawulo Jakobho paadachoka kumunda, Liya adati kwayiye, “Usiku walelo unkagona kunyumba kwangu, ndapagali kale kwa Rakelo mamandirekisi yandabweleselewa namwana wangu.” Jakobho usiku umwewo adayenda kagona naye.

17Mulungu adabva pemphelo la Liya, iye adaphata pathupi, nkubala mwana wachimuna wachishanu. 18Liya adati, “Mulungu wandipasa mpagalo wangu, pakuti ndapeleka mulanda kwa mwamuna wangu.” Mwanayo adampasa dzina lakuti Isakari. 19Pamwepo Liya adaphata pomwe pathupi, achibala mwana wachitanthatu. 20Liya adati, “Pakuti Mulungu wandipasa mfupo yabwino; tsapano mwamuna wangu achandilemekeza, pakuti ndam'balila wana wachimuna atanthatu.” Mwanayo adampasa dzina lakuti Zebhuluni. 21Liya adazabala mwana wachikazi achimpasa dzina lakuti Dhina.

22Mulungu adazakumbukila Rakelo, nkubva pemphelo lake, achifungula mimba yake. 23Rakelo adaphata pathupi achibala mwana wachimuna, iye adati, “Mulungu wachosa kunyazisiwa kwangu.” 24Mwanayo adampasa dzina lakuti Jozefi kulewa kuti, “Chawuta ngaandipase pomwe munango mwana wachimuna.”

Chibvano cha Jakobho na Labhani

25Rakelo paadabala Jozefi, Jakobho adati kwaatebzala wake Labhani, “Lekani ndiyende, ndibwelele kwathu kudziko langu. 26Ndipaseni akazi wangu nawana wangu wandidaphatila basa kwayimwe ndiyende, pakuti imwe mun'dziwa kuti ndidakuphatilani basa.” 27Koma Labhani adati, “Leka ndikuwuze, ndidabzidziwa nakulotela kuti Chawuta adandidalisa nathangwe layiwe. 28Ulewe mpagalo wawukufuna ndikupase.” 29Jakobho adati kwayiye, “Imwe mun'dziwa kukuphatilani basa kwandidachita, nabzifuwo bzanu kukhala kwabzidachita nayine. 30Pandidafika pano, mukhana bzifuwo bzing'ono-ng'ono, koma bzidazawanda. Chawuta adakudalisani nathangwe layine. Tsono ine nin'zaseyenzelambo lini nyumba yangu?” 31Labhani adati, “Ko ndikupase chinyi?”

Jakobho adati, “Palibe chamungandipase, koma mukandichitila ibzi, nimpitiliza kukubusilani mabila yanu; 32Koma ine lelo lekani ndipitemo mumabila yanu, ndichosemo mabila yentse yamawala-mawala nayamadodo-madodo namapsipa nambuzi zamadodo-madodo nazamawala-mawala, bzimwebzi ndibzo bzikhale mpagalo wangu. 33Kukhulupilika kwangu kun'zawoneka patsogolo, pamun'zabwela kuzanyangana mpagalo wangu. Mbuzi zentse zin'zawoneka zilibe mawala, namabila mapsipa, bzikazawoneka nayine, mun'zadziwa kuti ndidakubelani.” 34Labhani adati, “Bzili bwino! Ngabzichitike ninga bzawalewa.” 35Koma ntsiku imweyo Labhani adachosa mbuzi zikono zikhana mitsetse-mitsetse nazamadodo-madodo, nambuzi zikazi zikhana mawala-mawala nazamadodo-madodo, nazentse zikhana mawala machena, namabila yentse mapsipa, achibzipasa wana wake, 36achiwayendesa kuwulendo wa ntsiku zitatu. Pamwepo Jakobho adasala achibusa mabila ya Labhani yakhadasala.

37Jakobho adatola tumiti tuwisi twamupopula natwamualimondi natwamupuleni, akhati apa wakwatula apa wasiya apa wakwatula apa wasiya, kuwonesa magamba machena patumitito. 38Adayikha tumitito twaadakwatula mukhamwela mabila, pakuti kumweko ndiko kukhakwililana mabila, payakhabwela kuzamwa madzi, 39mabilayo payakhakwililana patsogolo patumitito, mabilayo yadayamba kubala wana wamitsetse-mitsetse nawamawala-mawala nawamadodo-madodo. 40Jakobho adapatula mabila makazi nambuzi zikazi pazikhakwililiwa, akhabzinyanganisa kumabila ya Labhani yamitsetse-mitsetse, nayentse mapsipa, kuchitila kuti yazabale wana wamitsetse nawamadodo-madodo. Nakutenepa Jakobho adachitambo mabila yake, achiyayikha payokha.

41Mabila yakulimba payakhafika pafupi nakubala, Jakobho akayikha tumiti patsogolo pamabilayo kuti yakwililane nkati mwatumitito, kuti yabale, 42koma yale zakuvuwa akhayapitisa lini mule mukhana tumitito, nakutenepo yentse mabila yakuvuwa yakhali ya Labhani, yakulimba yakhali ya Jakobho. 43Nakutenepo Jakobho adakhupuka kwene-kwene, adawa namabila mazinji naalanda wachimuna nawachikazi nangamela namadhonki.

Currently Selected:

Kuyamba 30: KUNDA

Highlight

Copy