Kuyamba 26

Isaki an'khala mu Gerari

1Tsapano mudziko mudagwa njala kuposa njala idambachitikako munthawe ya Abhurahamu. Isaki adayenda ku Gerari, kwa Abhimeleki mambo waa Filisitiya. 2Chawuta adabziwonesa kwayiye, iye adati, “Leka kuyenda ku Ijipiti, khala mudziko landichakuwuza. 3#Kuya 22:16–18Khala mudziko ili, ine nin'zakutsogolela, nin'zakudalisa, pakuti kwayiwe nakum'badwe wako nin'zapeleka madziko yentse aya. Nin'zadzadzikiza kulumbila kwandidachita kwaapayi wako Abhurahamu. 4Nin'zawandisa m'badwe wako kulingana nanyenyezi zakudzulu, nin'zapeleka kum'badwe wako madziko yentse. M'badwe wako un'zachitisa kuti madzinza yentse yapadziko yadalisiwe, 5pakuti Abhurahamu akhatetekela fala langu, pomwe akhateyeza bzandikhamuwuza kuti achite, nakuchengeta mitemo yangu.”

6Nakutenepo Isaki adazakhala mu Gerari. 7#Kuya 12:13; 20:2Wanthu wamudziko limwelo paadam'bvunza nabzankazi wake iye adati, “Ninana wangu.” Iye alibe kufuna kuti bzidziwike, kuti akhali nkazi wake, pakuti akhagopa kuti angamuphe achitola Rabheka, pakuti akhadakoma nkhope kwene-kwene. 8Isaki paakhali kumweko kwanthawe itali, Abhimeleki mambo waa Filisitiya adanyangana napazhanela, nkuwona Isaki achiphata-phata nkazi wake Rabheka. 9Pamwepo Abhimeleki adachemelesa Isaki nkuti kwayiye, “Mangwesa uyu ninkazi wako! Thangwe lanyi ukhalewa kuti ninana wako?”

Isaki adati, “Ndikhagopa kuphewa ndipo pandidazati ninana wangu.”

10Abhimeleki adati, “Thangwe lanyi kuchita bzatenepo kwayise? Ko ninga mwamuna munango akhadagona nankazi wako, ukhachitisa kuti ise tikhale namulandu ukulu.” 11Nakutenepo Abhimeleki adachenjeza wanthu wentse, iye adati, “Munthu amphata-phata mwamuna uyu panango nkazi wake am'phewa.”

12Isaki adabzala mbewu zake mudziko limwelo, mugole limwelo adakolola kadapetewa kadzana pakuti Chawuta adamudalisa. 13Mwamunayo adakhupuka kwene-kwene, adapitiliza kusumukila mpaka adazakhala wachuma. 14Akhana bzifuwo bzake bzizinji, akhana ng'ombe namabila naalanda azinji bzidazachitisa kuti a Filisitiya ayambe kumuchitila nchanje. 15Tsapano a Filisitiya adafuchila nadongo michela yentse idafukuliwa naalanda waapayi wake, muntsiku za Abhurahamu apayi wake.

16Abhimeleki adati kwa Isaki, “Chokani muno, pakuti mwawa namphamvu kuposa ise.” 17Nakutenepo Isaki adachoka kumweko, achikamanga matenti yake muchigowa cha Gerari, kwaadakakhala. 18Isaki adafukula pomwe michela ikhadafukuliwa muntsiku zaapayi wake Abhurahamu, pakuti Abhurahamu paadafa, a Filisitiya adafuchila michela imweyo. Michelayo adazayipasa madzina yakhadambapelekewa naapayi wake.

19Koma alanda wa Isaki paadachela n'chela muchigowa, n'chela umwewo ukhamala lini madzi. 20Anyakabusa wamu Gerari adayamba kushupana naanyakabusa wa Isaki, iwo akhati, “Madzi aya niyathu.” Isaki adazapasa n'chelawo dzina lakuti, “Kushupana.”

21Tsapano alanda wa Isaki adazachela pomwe unango n'chela, koma adayamba pomwe kushupana naanyakabusa wamu Gerari pan'chela umwewo. N'chelawo Isaki adazawupasa dzina lakuti, Chizondo. 22Isaki adazachoka pamwepo achikachela unango n'chela, pan'chela umwewo alibe kuzashupana. Adazawupasa dzina lakuti, Rehobhoti, bzichilewa kuti, “Ntetete,” adati, “Chawuta watipasa mbuto ikulu kuti tiwande.” 23Tsapano Isaki adazachoka pamwepo nkuyenda ku Bheeri-shebha. 24Chawuta adabziwonesa kwayiye usiku umwewo, iye adati, “Ndine Mulungu waapayi wako Abhurahamu, leka kugopa pakuti ine ndikukutsogolela. Nin'zakudalisa, ndichizachita kuti m'badwe wako uwande nathangwe lamulanda wangu Abhurahamu.” 25Nakutenepo iye adamanga mbuto yakupelekela ntsembe pamwepo, nkupemphela Chawuta. Adazika tenti yake pamwepo, alanda wake nkuchela n'chela.

Chibvano pakati pa Isaki na Abhimeleki

26 # Kuya 21:22 Pamwepo Abhimeleki namanduna yake Ahuzati na Pikoli nkulu wankhondo yake, adachoka ku Gerari, nkuyenda kwa Isaki. 27Isaki adati kwayiwo, “Mwabwelelanyi kwayine? Imwe muchidziwa kuti munin'zonda, pomwe mudandithamangisa kwanu?”

28Iwo adati, “Ise tawonelatu kuti Chawuta ana iwe, tsapano ngapakhale lumbilo pakati payiwe nayise, ngatichiteni chibvano nayimwe, 29kuti iwe un'zachita lini chakuyipa kwayise, ninga bzatidachita kuleka kukuphata-phata, kunja kwabzabwino bzokha-bzoka, tidakuyendesa mun'delekho. Tsapano ndiwe wakudalisiwa na Chawuta.” 30Nakutenepo Isaki adaachitila feshita, adadya nakumwa. 31Machibese-bese adachita chibvano chawo ali awili, Isaki adaapelekeza iwo nkuyenda mwan'delekho. 32Ntsiku ibodzi-bodziyo alanda wa Isaki adafika kwayiye achimuwuza nabzan'chela waadachela adati, “Taphata madzi.” 33Isaki adapasa dzina n'chela umwewo lakuti, “Shibha.” Nakutenepo dzina laguta limwelo lin'chemelewa kuti Bheeri-shebha nalelo.

Akazi wachilendo wa Esau

34Esau paakhana magole makumi manayi (40), adaloola, Judhisi mwana wa Bheeri mu Hiti na Bhasemati mwana wa Eloni mu Hiti, 35akaziwo adawumisila Isaki na Rabheka.

Currently Selected:

Kuyamba 26: KUNDA

Highlight

Copy