Kuyamba 25

M'badwe unango wa Abhurahamu

(1 Mako 1:32,33)

1Abhurahamu adaloola munango nkazi, dzina lake akhachitiwa Ketura. 2Ketura adam'balila, Zimurani na Jokishani na Medhani na Midhiyani na Ishibhagi na Shuwa. 3Jokishani akhali apayi wa Shebha na Dhedhani. Wana wa Dhedhani akhali Ashurimu na Letushimu na Lewumimu. 4Wana wa Midhiyani akhali Efa na Eferi na Hanoki na Abhidha na Elidha. Awa wentse akhali wana wa Ketura.

5Abhurahamu adapasa mwana wake Isaki bzentse bzaakhanabzo. 6Koma kwawana wankazi wapambali, Abhurahamu adaapasa mpfupo. Iye paakhachana moyo adaachosa pakhana mwana wake Isaki achiwayendesa kudziko lakumabveladzuwa.

Kufa kwa Abhurahamu nakuyikhiwa kwake

7Abhurahamu adalalama padziko kwamagole dzana namakumi manomwe namashanu (175). 8Pamwepo Abhurahamu adazamalizika watokalambilatu, nkhalamba yamagole mazinji, adayikhiwa kudayikhiwa wam'badwe wake. 9Isaki na Ishimayeli, wana wake adamuyikha mumphako yapa Makipela, m'munda wa Efuroni mwana wa Zohari mu Hiti, chakumabveladzuwa kwa Mamure, 10#Kuya 23:3–16m'munda waadagula Abhurahamu kwa Efuroni mwana wa Zohari mu Hiti. Abhurahamu nankazi wake Sara adayikhiwa pamwepo. 11Pambuyo pakufa kwa Abhurahamu. Mulungu adadalisa mwana wake Isaki, Isaki adakhala pa Bheeri-lahayi-royi.

M'badwe wa Ishimayeli

(1 Mako 1:28–31)

12Uwu ndiwo m'badwe wa Ishimayeli, mwana wa Abhurahamu waadabaliliwa na Hagari mu Ijipiti, ule akhali mulanda wa Sara. 13Aya ndiyo madzina yawana wa Ishimayeli. M'badwe umwewu udapasiwa madzina kuteyeza kubadwa kwawo; mwana wakuyamba wa Ishimayeli akhali Nebhayoti, kuchizabwela Kedhari na Adhibheyeli na Mibhusamu, 14na Mishima na Dhuma na Masa, 15na Hadhadhi na Tema na Jeturi na Nafishi na Kedhima. 16Awa ndiwo wana wa Ishimayeli, aya ndiyo madzina yawo, kuteyeza miyi yawo, namatenti yawo, anemwanamambo khumi namawili kuteyeza madzinza yawo. 17Ishimayeli adakhala kwamagole dzana namakumi matatu nanomwe (137), adamalizika achikayikhiwa kudayikhiwa wakwake. 18Iwo adakhala kuchoka Havila kufika ku Shuri, ikhadanyanganana na Ijipiti, kumbali ya Asiriya; adakhala adanyanganana naabale wake wentse.

Kubaliwa kwa Esau na Jakobho

19Uwu ndiwo m'badwe wa Isaki mwana wa Abhurahamu: Abhurahamu akhali apayi wa Isaki. 20Isaki akhana magole makumi manayi (40), paadaloola nkazi wake Rabheka mwana wa Bhetuyeli mu Aramu waku Padhaniaramu, nana wa Labhani mu Aramu. 21Isaki adapemphela kwa Chawuta achikumbilila nkazi wake Rabheka, pakuti akhalibe mbeleko. Chawuta adabva pemphelo la Isaki, Rabheka nkuphata pathupi. 22Wana adashupana m'mimba mwake, iye adati, “Tsono peno ntenepa chanin'khalila wamoyo n'chinyi?” Nakutenepo adazayenda kabvunza Chawuta. 23#Alo 9:12Chawuta adati kwayiye,

“M'mimba mwako muna mishowo miwili,

wanthu awili, wawun'zabala an'zakhala wakugawika.

Munango an'zakhala wamphamvu kuposa munango,

nkulu an'zatumikila mung'ono.”

24Nthawe yakubala kwake payidafika, adabala mapasa. 25Wakuyamba adabula ali wakuphsukuluka, thupi lake lentse likhadachita ninga n'khanjo wawukuse, achimpasa dzina lakuti Esau.#25:25 Esau muchi Hebheru bzinilewa kuti ukuse. 26Pambuyo pache padabula m'bale wake adaphata chithatha cha Esau, achimpasa dzina lakuti Jakobho.#25:26 Jakobho muchi Hebheru bzinilewa kuti chithatha. Isaki nthawe yaadabala wana amwewo akhana magole makumi matanthatu (60).

Esau an'gulisa ukulu wake wawumwana wakuyamba

27Wana amwewo adakula, Esau adakhala nkhumbalume nyabezi, munthu wan'thengo, Jakobho akhali munthu wakunyamala, akhafuna bzakukhala pamatenti. 28Isaki adafuna Esau, pakuti akhafuna kudya nyama yan'thengo yakham'bwelesela, koma Rabheka adafuna Jakobho. 29Ntsiku inango Jakobho paakhaphika phala, Esau adafika achichoka n'thengo wafa nanjala. 30Esau adati kwa Jakobho, “Leka ndidyeko phala lifuyila, pakuti ndikubva njala.” Ndibzo bzidazachitisa kuti achemelewe nadzina lakuti Edhomu.#25:30 Edhomu lidachoka pafala lachi Hebheru linilewa kuti fuyila.

31Jakobho adati, “Yamba wandigulisila ukulu wako.” 32Esau adati, “Pakuti ine ndaakufa nanjala, ukulu un'thandizanyi?” 33#Ahe 12:16Jakobho adati, “Tsapano yamba walumbila kwayine.” Nakutenepo iye adalumbila kwayiye, adagulisila ukulu wake kwa Jakobho. 34Pamwepo Jakobho adapasa Esau zingwa naphala lanyemba, adadya nakumwa, adayenda ulendo wake. Ndiko kudzonga kudachita Esau ukulu wake.

Currently Selected:

Kuyamba 25: KUNDA

Highlight

Copy