Kuyamba 19

Kutaza kwa Sodhomu na Gomora

1Ngilozi ziwili zidabwela ku Sodhomu chakumawulo, pamwepo Loti akhadakhala pansuwo wa Sodhomu. Loti paadawona, adayenda kagumana nawo, adakotama pantsi, 2iye adati, “Azimbuye wangu, ndaphata minyendo, bwelani kunyumba kwamulanda wanu, mukagone kumweko usiku walelo, mukasambe nzayo zanu, muchizalamuka machibese-bese muchiyenda ulendo wanu.” Koma iwo adati, “Nee, tinkagona pansika.”

3Koma iye adaatsungiliza bzakulimba, mpaka iwo adazabwelela nkuyenda kapita munyumba mwake. Adaakonzela feshita, adakonza zingwa ilibe chakufutisa, iwo nkudya. 4Koma iwo anati agona, amuna wamuguta, amuna wamu Sodhomu, akulu naang'ono nawanthu wentse, adazungunuka nyumbayo; 5#Ato 19:22–24adachemelela kwa Loti adati, “Ali kuponi amuna abwela kwayiwe usiku? Abulise pano panja kuti tigone nawo!” Pamwepo amuna wamu Sodhomu akhafuna kugona nawo.

6Nakutenepo Loti adabula panja pakhana amunawo, nkufunga nsuwo. 7Adati kwayiwo, “Ndaphata minyendo, abale wangu, lekani kuchita chinthu chakuyipa tenepa. 8Wonani, ndina wana wangu awili wachikazi anati adziwa amuna; lekani ndiwabwelese kwayimwe, muchite nawo bzamunfuna. Lekani kuchita chinango chinthu kwaamuna awa, pakuti mbaalendo wangu.”

9Koma iwo adati, “Choka apa!” Adati, “Uyu nimulendo muno, koma waakufuna kutonga! Tsapano taakukuphata mwadima kuposa iwo.” Pamwepo iwo adagwinya Loti achiyesa kuphwanya nsuwo kuti apite nkati. 10Koma amuna awili wale adakwekwetela Loti nkati nkufunga nsuwo. 11#2 Maz 6:18Iwo adaachita kuti wanthu wentse akhali pansuwo wanyumba achite azimola, wentse akulu naang'ono, bzakuti adashupika, akhachita bzakupsapsadzila nsuwo.

Loti an'choka mu Sodhomu

12Tsapano amuna awiliwo adati kwa Loti, “Ko iwe una anango wakwako muguta lino? Akuwasa, wana wachimuna, wana wachikazi panango munango wawunaye muguta, uwachose mumbuto ino; 13pakutiife taakuphwanya mbuto ino, pakuti kulila kwawanthu kwakula patsogolo pa Chawuta, iye watituma kuti tizaliphwanye.”

14Loti adayenda kwaakuwasa wake awo akhali kuzaloola wana wake wachikazi, iye adati kwayiwo, “Chokani mumbuto ino, pakuti Chawuta waakuphwanya guta lino.” Koma akuwasa wake adawona ninga akundoseka nawo.

15Nachakumadandakucha machibese-bese, ngilozizo zidati kwa Loti, “Sumuka utole nkazi wako nawana wako uyende, kuti uleke kufa pan'zalangiwa guta.” 16#2 Pit 2:7Koma Loti, pakuti akhachedwa, adatochita bzakum'phata janja achim'bulisa muguta pabodzi nankazi wake, nawana wake wachikazi awili. Chawuta adamubvela chifundo, amunawo adamuchosa achim'bulisa kunja kwaguta. 17Paadaabulisa kunja kwaguta inango gilozi idati, “Thawani muyende, lekani kuchewuka panango kuyima, muthawile kuphili kuti muleke kuchenekeka!”

18Koma Loti adati kwayiwo, “Nee, azimbuye wangu. 19Wonani, pakuti mwakomela ntima mulanda wanu, mwawonesa chifundo chikulu pakuchiza umoyo wangu; koma ningathawile lini kumapili, pakuti ngozi imweyi intiphata tinati tafika kumweko, tichifa. 20Wonani, pana guta lili pafupi kuti tingathawileko, nikaguta kang'ono, lekani ndithawile kumweko, ko sikaguta kang'ono kale? Umoyo wangu un'chiziwa.”

21Ngilozi idati, “Ninkuthandiza pomwe nayibzi, nimphwanya lini guta lawalewa. 22Kamangu thawila kumweko; pakuti ninkwanisa lini kuchita chinango chinthu unati wafika kumweko.” Nakutenepo Guta limwelo adalipasa dzina lakuti Zoari.

Kuphwanyiwa kwa Sodhomu na Gomora

23Loti paadafika ku Zoari dzuwa likhatobula. 24#Mat 10:15; 11:23,24; Luk 10:12; 17:29; 2 Pit 2:6; Jud 1:7Pamwepo Chawuta adabvumbisa moto wasalufa muguta la Sodhomu na Gomora kuchoka kwa Chawuta kudzulu. 25Adaphwanya maguta yentse, nachigowa chentse nawanthu wentse wamugutalo, nambewu zentse zaakhadabzala padziko. 26#Luk 17:32Koma nkazi wa Loti akhateyela mbuyo, adachewuka nkusanduka chulu chamunyu.

27Abhurahamu adalamuka machibese-bese nkuyenda pambuto paakhadayima na Chawuta. 28Adanyangana ku Sodhomu na Gomora namuchigowa chamudziko lentse, adawona utsi uchichoka m'maguta yentse, ninga moto ukuchoka mubhayela. 29Koma Mulungu paadaphwanya maguta yamuchigowa mukhakhala Loti, iye adazakumbuka Abhurahamu, nakutenepo adazabulisa Loti kuti aleke kufa.

Kudachoka mishowo yaa Moabhi naa Amori

30Loti adazachoka mu Zoari, achikakhala m'mapili, pabodzi nawana wake awili wachikazi, pakuti akhagopa kukhala mu Zoari, nakutenepo adakakhala m'phako nawana wake awili. 31Mwana wake wakuyamba adati kwamung'ono wake, “Apayi wathu akalamba, palibe amuna angatiloole padziko lino. 32Ngatiwaledzelese navinyu kuti tikwanise kugona nawo, tikatenepo tin'zabala wana naapayi wathu.” 33Nakutenepo usiku umwewo adaledzelesa apayi wawo, mwana wakuyamba adapita munyumba nkukagona naapayi wake; Loti alibe kudziwa chidachitika mwana wake paadabwela kuzagona naye napaadayenda.

34Mangwana yache mwana wakuyamba wa Loti adati kwamung'ono wake, “Ine usiku wapitawu ndidagona naapayi, bwela tiwaledzelese pomwe kuti iwe ugonembo nawo usiku walelo, kuchitila kuti tichite wana.” 35Nakutenepo usiku umwewo adaaledzelesa pomwe apayi wawo, mung'ono wache nkugona nawo. Loti alibe kudziwa chidachitika mwana wake paadabwela kuzagona naye napaadayenda. 36Wana wa Loti wentse ali awili adaphata pathupi paapayi wawo. 37Mwana wa Loti nkulu adabala mwana wachimuna achimpasa dzina lakuti Moabhi. Ndiko kudachoka m'badwe waa Moabhi. 38Mwana wake mung'ono adabala mwana wachimuna achimpasa dzina lakuti Bheniami. Ndiko kudachoka m'badwe waa Amoni kufika nalelo.

Currently Selected:

Kuyamba 19: KUNDA

Highlight

Copy