Kuyamba 20

Abhurahamu na Abhimeleki

1Abhurahamu adachoka ku Mamure nkuyenda kudziko la Negebhu, kwaadakakhala pakati pa Kadheshi na Shuri, adakhalambo mu Gerari. 2#Kuya 12:13; 26:7Kumweko Abhurahamu adalewa kuti Sara nkazi wake, “Ninana wangu.” Abhimeleki mambo waku Gerari adatuma wanthu katakula Sara. 3Koma Mulungu usiku umwewo adafikila Abhimeleki kutulo nkuti kwayiye, “Uchafa nathangwe lankazi wamwen'chilo wawatakula.”

4Koma Abhimeleki akhanati wagona naye, tsapano iye adati, “Mfumu, mungaphe wanthu alibe mulandu? 5Ko sindiye yekha adalewa kwayine kuti, ‘Ninana wangu?’ Nayiyembo nkazi wake adalewa yekha kuti, ‘Nimano wangu.’ Ine ndabzichita mwakusaya kudziwa, palibe chakuyipa chandikhakumbuka muntima mwangu.”

6Pamwepo Mulungu adalewa-lewa naye kutulo, iye nkuti, “Yinde, nindziwa kuti iwe udabzichita mwakusaya kudziwa, palibe chakuyipa chawukhakumbuka muntima mwako. Ndine ndidabzichita kuti iwe uleke kunditazila, nakutenepo ine ndidachita kuti iwe uleke kugona naye. 7Tsapano iwe bweza nkazi umweyo kwamwamuna wake, pakuti iye nimprofita, akupemphelele kuti uleke kufa. Koma ukaleka kum'bweza iwe nawanthu wako chadidi mwentse munifa.”

8Nakutenepo mangwana yache machibese-bese Abhimeleki adachemela manduna yake achiwawuza bzentse bzikhadachitika, manduna yake yadabva mantha. 9Pamwepo Abhimeleki adachemela Abhurahamu nkuti kwayiye, “N'chinyi ichi chawachita kwayise? Ko ndidakutazilanyi kubwelesa chakuyipa chikulu kwayine nawumambo wangu? Wachita kwayine bzinthu bzinfunika lini kuchitiwa.” 10Abhimeleki adati kwa Abhurahamu, “Ko ukhakumbukanyi pawukhachita chinthu chakutenepachi?”

11Abhurahamu adati, “Ine ndidakumbuka kuti wanthu wamudziko lino an'gopa lini Mulungu, nakutenepo ndidagopa kuti angandiphe thangwe lankazi wangu. 12Chadidi, n'chakuti uyu ninana wangu. Mwana waapayi wangu, koma alibe kubadwa naamayi wangu, nakutenepo ndidazamuloola. 13Mulungu paadandichosa mubanja laapayi wangu, ndichiyenda kumadziko yachilendo, ndidamuwuza kuti, ‘Iwe uwonese kukhulupilila kwako kwayine, kwentse kwatiniyenda iwe uniwuza wanthu kuti uyu nimano wangu.’ ”

14Pamwepo Abhimeleki adatola mabila nang'ombe naalanda wachikazi nawachimuna achibzipeleka kwa Abhurahamu, adabweza nkazi wake Sara kwayiye. 15Abhimeleki adati kwa Abhurahamu, “Wona, dziko lentse lawukuwonali nilangu, nakutenepo yenda ukakhale pawunfuna.” 16Adati kwa Sara, “Ndapasa mano wako bzigodo bzasiliva sawuzande, (1,000) kuwonesa kuti ulibe mulandu, ndakuchenesa wanthu wentse wawunawo achiwona.”

17Pamwepo Abhurahamu adapemphela kwa Mulungu, Mulungu nkupolesa Abhimeleki nankazi wake, naalandakazi wake kuti akwanise pomwe kubala wana. 18Nathangwe labzikhadachitika kwa Sara nkazi wa Abhurahamu, Chawuta akhadachita kuti akazi wentse wamunyumba ya Abhimeleki aleke kubala.

Currently Selected:

Kuyamba 20: KUNDA

Highlight

Copy