Matayo 9

Yesu naosya omukomborike

(Mk. 2:2-12; Lk. 5:18-26)

1Narinya mu bwato, naunguka nakinga mu musi gwabo. 2Nibamure:tera omurwae akomborikire ama:mire ku buriri. Yesu ejire arora okwikirisya kwebwe, namubwira omukomborike oyo ati, Mwana wani, si:ri:ka, we:swaririrwa ebibi:bi byao. 3Mbe abandiki abandi niba:ika munda jebwe ati, Omu:nu unu kafuma Nyamuanga. 4Yesu ariga amenyere okwiganirisya kwebwe, na:ika ati, ?Niki cinu ecikora nimwiganirisya kubi:bi mu mitima jemwe? 5?Kwo kuba ecangu ni ciya? ?Okwaika ati, We:swaririrwa ebibi:bi, tere amwi ati, Imuka uribate? 6Nawe muture okumenya ati, Omwana wo mu:nu ari no buinga ku ca:ro bwo kwiswaririra ebibi:bi. Mbe niwo nabwira omukomborike oyo ati, Imuka witwike oburiri bwao, ugende ika. 7Ne:muka nagenda ewae. 8Ebise byejire byarora nibyubaya nibikusya Nyamuanga unu ayana aba:nu obuinga bwejabo obwo.

Yesu nabirikira Matayo

(Mk. 2:13-17; Lk. 5:27-32)

9Yesu ejire aso:kayo, narora omu:nu unu natogwa Matayo enyanjire mwitobesyo rya rigoti. Namubwira ati, Ndu:ba. Ne:muka namuru:ba. 10Anu ariga acenyanjire mu nyumba acarya, rora mba:ja abatobesya ba:fu na be bibi:bi ba:fu, nibenyanja aamwi na Yesu na be:igisibwa bae. 11Abafarisayo bejire barora, nibababwira abe:igisibwa bae ati, ?Omwiigisya wemwe niki cinu kakora narya na batobesya na be bibi:bi? 12Nawe ejire ongwa, na:ika ati, Abaanga batakenere mufumu, tari abarwae. 13Nawe nimugende mwiigire obugajuro bwe cigambo cinu ati, Enenda ecigongo amwi nitakwenda co:go. Okuba nite:jire kubirikira abarengeresi tari abe bibi:bi.

Okusara:rira

(Mk. 2:18-20; Lk. 5:33-39)

14Nibamu:jako abe:igisibwa ba Yoana nibamubu:sya ati, ?Niki cinu ecikora nicisara:rira eswe na Bafarisayo kwiya ka:fu, nawe abe:igisibwa bao batakusara:rira? 15Yesu nababu:sya ati, ?Abejabo omutwasi abatura kutiki okusurumbara omutwasi acari nabo? Nawe jisiku jiri:ja omutwasi orwo aribaso:kako, mbe niwo nibasara:rira. 16Atariwo mu:nu unu kabari:ra akatamba:ra akaya:ya ku mwenda omukokoro, okuba ako akabari:rirwako akatemura omwenda, na riundu niryongesya okugariya. 17Amwi batakutu:ra amanji ge mijabibu amaya:ya mu nsagwa jiŋokoro, okuba bakakora kutiyo, jinsagwa jiŋokoro nijitemuka amanji ge mijabibu nigetika, jinsagwa nijifafanikana. Nawe abatu:ra amanji ge mijabibu amaya:ya mu nsagwa jinya:ya, bibiri byone mbi:yanya.

Omuyasya wa Yairo no mugasi wo bure:gu

(Mk. 5:21-43; Lk. 8:40-56)

18Anu ariga aca:ika emisango ejo, na:ja Omukuru umwi, namuramya na:ika ati, Omuyasya wani amara kufwa woryanu. Nawe ija umuteko okuboko asubo:rora. 19Yesu ne:muka namuru:ba na be:igisibwa bae one. 20Mbe omugasi unu ariga arwae obure:gu myaka ekumi ne:biri na:ja namuso:ka inyuma, naku:nia ku mufunjo gwe cifwaro cae. 21Kwo kuba a:ikire munda yae ati, Araba naku:niako era ku cifwaro cae eniora. 22Nawe Yesu ejire acu:ka namurora, na:ika ati, Muyasya wani, si:ri:ka, okwikirisya kwao kakuosya. Omugasi uyo naora kuso:ka mu mwanya ogwo. 23Yesu ejire engira mu nyumba yo mukuru oyo, narora ababumi ba jinkuri ne bise nibarira ji:mamu, 24Nababwira ati, Muso:keo, okuba Omwana atafu:ye, aongee era. Nibamuseka nibamugomberera. 25Ecise wejire camara kuurusibwamo, nengira namugwata okuboko, omuyara ne:muka. 26Orukuma orwo niruswira mu ca:ro eco co:ne.

Baofu babiri no mujibi nibaosibzua

27Yesu ejire aso:kayo, abaofu babiri nibamuru:ba nibaragirisya mba:ika ati, Awe Mwana wa Daudi, cifwire cigongo. 28Ejire engira mu nju abaofu nibamu:jako. Yesu nababu:sya ati, ?Omwikirisya ati, enitura okukora cinu? Nibamubwira ati, Yee, Ratabugenyi. 29Niwo naku:nia ku me:so gebwe, na:ika ati, Rwa kutyo mwekirisya gabe kutyo. 30Ame:so gebwe nige:guka. Yesu nabakomeresya muno na:ika ati, Mukabuke asige okubao mu:nu unu kamenya. 31Nawe bejire bauruka, nibaswisya orukuma rwae mu ca:ro eco co:ne.

32Anu bariga bacauruka, nibamure:tera omujibi, aungirwe omusambwa. 33Ejire airisya omusambwa, omujibi na:ika. Ebise nibirugu:ra, nibyaika ati, Anu cikabeere:ga bicariga kuboneka kutya mu Israeli. 34Nawe Abafarisayo niba:ika ati, Unu kairisya emisambwa kubwo mukuru we misambwa.

Orugeso na bagesi

35Yesu naturatura mu misi jo:ne na mu nguyo jo:ne, neigisya mu mekofyanyisyo gebwe, nasimura ebigambo byo bwana ebyo bukama, naosya jindwara jo:ne no burwaririsi bwone. 36Nawe ejire arora ebise, nabafwira ecigongo, okuba bariga baigirwe banyarambukire rwa ji:na:ma jinu jitana mure:fi. 37Niwo nabwira abe:igisibwa bae ati, Cimari orugeso ni rwafu, nawe abakosi bakeere. 38Mbe musabwe Omukuru wo rugeso, aku:re abakosi mu rugeso rwae.

Currently Selected:

Matayo 9: KIJ1960

Highlight

Copy