Matayo 8

Yesu naosya omugenge

(Mk. 1:40-45; Lk. 5:12-14)

1Ejire aso:ka ku ci:ma, ebise byafu nibimuru:ba. 2Mbe na:ja omugenge namuramya na:ika ati, Ratabugenyi, ukenda outura okunyesya. 3Nagorora okuboko kwae naika ati, Enenda, uore. Aonao ebigenge nibyera. 4Yesu namubwira ati, Rora utaja kubwira mu:nu, nawe ugende wiyeresye ku mugabisi, umusirire eciyanwa cinu Musa aragiriye, cibe rusingiro ku bene.

Omurerwa wo musirikare naosibwa

(Lk. 7:1-10)

5Yesu ejire engira mu Kaperinaumu, Omukuru wa basirikare namu:jako namwiremberesya, 6Na:ika ati, Ratabugenyi, akamura kani kama:mire mu nyumba kakomborikire, aka:sibwa muno. 7Yesu namubwira ati, Eni:jo:kuja nimuosye. 8Omukuru wa basirikare naindura ati, Ratabugenyi, anye nite:ire awe okwingira emwaro yo ruswi rwani, nawe yaika ecigambo era, akamura kani akajoora. 9Kwo kuba anye one nitungirwe, ndi na basirikare banu nitungire. Enimubwira oundi ati, Genda, kagenda. No undi ati, Ija, ka:ja. No mugaya wani enimubwira ati, Kora kutya, kakora. 10Yesu ejire ongwa ebyo narugu:ra nababwira banu bamuru:baga ati, Ni cimari enibabwira ati, Nicariga kubona kwikirisya kunene kwejabo kunu nakabee mu Baisraeli. 11Nawe enibabwira ati, Bari:ja ba:fu kuso:ka ebuturuka ne bugwa, bariyanja aamwi na Iburaimu na Isaka na Yakabo mu bukama bwa mu rwire. 12Nawe aba:na bo bukama baryeswa mu cisu:te ca anja, niyo kuriba okurira no kuguguna ame:no. 13Yesu namubwira Omukuru wa basirikare ati, Mbe nugende, gabe rwa kutyo wekirisya. Mu mwanya ogwo akamura kae nikaora.

Yesu naosya ba:fu mu Kaperinaumu

(Mk. 1:21-39; Lk. 4:31-41)

14Yesu ejire engira mu nyumba ya Petero, narora nyabuko ama:mire arwae ribiri nabira rugurugu. 15Namugwata ku kuboko, ribiri ndimuso:kako, ne:muka namufurubendera. 16Kwejire kwaba ke:goro, nibamure:tera ba:fu banu bariga baungirwe emisambwa, nairisya emisambwa ne cigambo cae, naosya abarwae bo:ne. 17Korereki cikumire eco caikirwe no muragi Isaya ati, Omwene a:gegere amarwaririsi geswe, ne:twika jindwara jeswe.

Okumuru:ba Yesu

(Lk. 9:57-62)

18Mbe Yesu ejire arora ebise byafu bimusingiye, naragirira ati, Ciunguke cije ku ngego yenderya. 19Omwandiki umwi na:ja namubwira ati, Mwiigisya, nje nkuru:bega eyo wo:ne uragendaga. 20Yesu namubwira ati, Banyamubwe barina mo:bo na jinyonyi ja mu rutumba jiri na moswi, nawe Omwana wo mu:nu atana wa kuta mutwe gwae. 21Omwiigisibwa wae oundi namubwira ati, Ratabugenyi, Siga mbere nije okusi:ka rata. 22Nawe Yesu namubwira ati, Ndu:ba, siga abafu:ye basi:ke abafu:ye bebwe.

Yesu narembe:sya amatu:ma no muyaga

(Mk. 4:36-41; Lk. 8:22-25)

23Nasyabara mu bwato abe:igisibwa nibagenda nage. 24Mbe ngwimuka omuyaga gwe ciure ku nyanja, amatu:ma nigaorekera mu bwato, nawe Omwene ariga ama:mire. 25Abe:igisibwa bae nibamu:jako nibamurafya niba:ika ati, Ratabugenyi, nucikisye, cafwa! 26Nababu:sya ati, ?Niki cinu omukora nimu:baya? Emwe abo kwikirisya okuto:to. Mbe, ne:muka, nagonya omuyaga na inyanja, ni:rembe:ra ndiba etore. 27Aba:nu nibarugu:ra mba:ika ati, ?Ni mu:nu ki unu, omuyaga na inyanja ebimungwa?

Abe misambwa abe Gadara

(Mk. 5:1-20; Lk. 8:26-39)

28Ejire agoba ku ngego yenderya mu:si ya Bagadara nabonana na ba:nu babiri baungirwe emisambwa, nibaso:ka mu bitu:ro, barurire muno, atariwo mu:nu unu aturaga okuitiŋana ku njira eyo. 29Mbe nibaragirisya niba:ika ati, ?Ecifuno niki eswe na:we, Omwana wa Nyamuanga? ?Wejire okucinya:sya omwanya gweswe gucari kwiya? 30Ryariga ririwo kurao eijo rya jingurube nyafu njire:ba. 31Emisambwa nijimwiremberesya nja:ika ati, Ukaciirisya, ucisige cigende cingire mwiijo rya jingurube. 32Najibwira ati, Mugende. Nijibaso:kako njingira mu ngurube. Mbe rora, riijo ryone ndiurutukira ku bugema ndigwirira mu nyanja njifwira mu manji. 33Abare:fi nibabirima nibengira mu musi, nibabasimurira byone ne bya be misambwa one. 34Omusi gwone nigwimuka okubonana na Yesu. Wejire bamurora nibamwiremberesya aso:ke mu mbibi jebwe.

Currently Selected:

Matayo 8: KIJ1960

Highlight

Copy