Yoana 14

Yesu naraga kutyo aribe:jira abae

(Rora 1 Bates. 4:14-17)

1Mutaja kuwa mwoyo mu mitima jemwe. Omwikirisya Nyamuanga, Anye one munyikirisye. 2Mu nyumba ya Rata burimo bwikaro bwafu. Kumba atari kutyo, nakababwiriye. Okuba enigenda okubacumacumira obwikaro. 3Mbe nikagenda okubacumacumira obwikaro, ndisuba oku:ja rindi nibasire anu niri, korereki anu anye niri, nemwe one mubeo. 4Ne:nu enigenda, injira muimenyere. 5Tomaso namubwira ati, Ratabugenyi, citakumenya enu ouja. ?Injira eciimenya atiki? 6Yesu namubwira ati, Nanye injira, nanye okumasya, nanye obuanga. Atario unu ka:ja ku Rata, atari mwanye.

Yesu na Esemwene ni umwi

7Kumba mu:menyere anye, na Rata one mwakamumenyere. Okuso:ka ori mumumenyere na ka mwamurorere. 8Filipo namubwira ati, Ratabugenyi, ce:resye Rata, ebicimara. 9Yesu namubu:sya ati, ?Anu nikabeere:ga nemwe siku nyafu kutya, ucariga ku:menya anye, Filipo? Unu arorere anye, arorere Rata. ?Niki cinu ecikwaikya ati, ce:resye Rata? 10?Utakwikirisya ati, anye ndi mu Rata, na Rata ari mwanye? Emisango jinu enibabwira anye, nitakuja:ika kubwani era, nawe Rata unu e:kae mwanye niwe kakora emirimu jae. 11Munyikirisye ati, anye ndi mu Rata, na Rata ari mwanye, amwi munyikirisye kurwe mirimu eje:ne.

12Ni cimari cimari enibabwira ati, Unu kanyikirisya anye, emirimu jinu anye enikora, one arijikora. Naka arijikora jinu jikirire ejo obunene, okuba anye enigenda ku Rata. 13Eco co:ne murasabwaga mwisi:na ryani, eco ndacikoraga, korereki Rata akusisibwega mu Mwana. 14Murasabwaga omusango gwone mwisi:na ryani, anye ndagukoraga. 15Mukaba nimunyenda, muragwataga ebiragiro byani.

Omurago gwo Mwoyo Mweru

16Nanye ndisabwa Rata abayane Omusi:ri:sya oundi, e:kare nemwe kajanende na kajanende, 17Niwe Omwoyo we cimari, unu i:si inu itakutura kumwikirisya okuba itakumurora, amwi itakumumenya. Emwe mumumenyere okuba e:kae nemwe, na ka:rabaga mwimwe.

18Nitaribasiga rwa basigwa. Enisubo:ku:ja kwimwe. 19Gwasigaeo mwanya muto:to, i:si itakundora rindi. Nawe emwe omundora. Okuba anye ndi muanga, nemwe one muriba baanga. 20Ku rusiku urwo murimenya ati, anye ndi mu Rata, nemwe muri mwanye, nanye mwimwe. 21Unu ari ne biragiro byani nabigwata, oyo niwe kanyenda. Unu kanyenda arendwaga Rata, nanye one ndamwendaga, ndamubonekeraga.

22Yuda, atari Iskariote, namubu:sya ati, ?Ratabugenyi, okuba kutiki awe okuja okucibonekera eswe, kamwi atari ku:si? 23Yesu naindura namubwira ati, Omu:nu akanyenda, arigwata omusango gwani, na Rata one aramwendaga, na ka cirimu:jako nicimwikarako. 24Unu atakunyenda atakugwata misango jani. No musango gunu omungwa gutari gwani, nawe ni gwa Rata unu antumire. 25Emisango jinu nababwira, nicari nemwe. 26Nawe Omusi:ri:sya, niwe Omwoyo Mweru, unu Rata arimutuma mwisi:na ryani, oyo aribe:igisya byone, aribe:cukya byone binu nababwiriye.

Yesu nabasigira omurembe

27Omurembe nabasigira. Omurembe gwani nabayana. Nitakubayana rwa i:si kutyo eiyana. Emitima jemwe jisigega kurumwarumwa, amwi jisigega ku:baya. 28Mwongu:ywe kutyo nababwira ati, Enigenda, ka enisuba oku:ja kwimwe. Mwakabae munyendere, mwakakondeywe, okuba enigenda ku Rata. Okuba Rata ni mukuru kukira anye. 29Wori nababwira cicari kubao, ariba cabao korereki mwikirisye. 30Nitaca:ika muno nemwe, okuba Omukuru wa i:si inu ka:ja, nawe atari na eci:nu kwanye. 31Nawe i:si imenye ati, enenda Rata, na rwa kutyo Rata andagiriye, nikwo kutyo enikora. Mwimuke ciso:ke anu.

Currently Selected:

Yoana 14: KIJ1960

Highlight

Copy